རྩོམ་པ་པོ། བསྟན་འཛིན་པདྨ། ཤེས་ལྷན་འགན་འཛིན་དྲུང་འཕར།
རྩོམ་ཁུངས། བོད་ཀྱི་དུས་བབ།
༄༅། །དེ་རིང་ནི་བོད་ཀྱི་ཡིག་གཟུགས་དུས་ཆེན་ཡིན་པས། དབྱངས་གསལ་སོ་བཞི་ལ་བཀའ་དྲིན་རྗེས་དྲན་ཞུ་རྒྱུའི་ཉིན་མོ་ཞིག་ཡིན། དེ་ཡང་ཕྱི་ལོ་ ༢༠༡༧ ཟླ་ ༤ ཚེས་ ༡༥ དང་ ༡༦ ཉིན་གཉིས་རིང་ཨ་མདོ་མཚོ་སྔོན་མི་རིགས་སློབ་ཆེན་དུ་རྒྱལ་ཡོངས་བོད་ཀྱི་ཡིག་གཟུགས་བགྲོ་གླེང་ཚོགས་འདུ་སྐབས་དང་པོ་འཚོགས་ཡོད་པ་དང་། དེའི་སྐབས་སུ་དགེ་སློབ་ ༡༣༠ ལྷག་ཙམ་ལྷན་འཛོམས་ཐོག་དེ་རིང་གི་ཉིན་མོར་བོད་ཀྱི་ཡིག་གཟུགས་དུས་ཆེན་དུ་གཏན་འབེབས་གནང་ནས་དེ་རིང་བོད་ཀྱི་ཡིག་གཟུགས་དུས་ཆེན་ཐེངས་དགུ་པ་དེ་ཆགས་ཀྱི་ཡོད་པས། དུས་ཆེན་འདི་ཉིད་སྲུང་བརྩི་ཞུ་བའི་ཚུལ་དུ་ཨ་མས་གཅེས་ཕྲུག་གསུམ་ལ་ཡང་བསྐྱར་སྙིང་གཏམ་ཚིག་འགའ་ཤས་ཤིག་བཤད་འདོད་བྱུང་།
བསྟན་འཛིན་ལྷ་སྒྲོན་ཁྱེད་ཕྱི་ལོ་ ༢༠༡༧ ཟླ་ ༤ ཚེས་ ༢༤ ཉིན་སྐྱེས་པར་ཁྱེད་དང་བོད་ཀྱི་ཡིག་གཟུགས་དུས་ཆེན་སྲུང་བརྩི་ཞུ་སྲོལ་གཉིས་ལོ་ཟླ་གཅིག་པ་འཁེལ་འདུག་ལ། ཨ་མས་དུས་ཚོད་དེ་འདྲའི་སྐབས་ཤིག་ལ་མན་ཇུའི་སྐད་ཡིག་གི་ཛ་དྲག་གནས་སྟངས་འདི་བོད་ཀྱི་སྐད་ཡིག་ལ་བྱུང་སྲིད་དམ་ཞེས་པའི་བརྗོད་གཞིའི་ཐོག་དཔྱད་རྩོམ་ཞིག་ (https://tibetpolicy.net/tibet-policy-journal-iv-ii/) བྲིས་པ་དེ་བོད་ཀྱི་སྲིད་བྱུས་ཉམས་ཞིབ་ཁང་གི་དུས་དེབ་ནང་སྤེལ་ཡོད་པས། ཁྱེད་གསུམ་ནས་རིམ་པས་ཀློག་ངེས་རེད། དཔྱད་རྩོམ་དེའི་ནང་གསལ་བ་བཞིན་ལོ་བརྒྱ་ལྷག་ཙམ་སྔོན་རྒྱ་ནག་རྒྱལ་ཁབ་དབང་འོག་ཏུ་འཛིན་མཁན་ཆིང་རྒྱལ་བརྒྱུད་ཀྱི་མི་རིགས་སྟོབས་ཆེན་འདི་ད་ལྟའི་ཆར་རྒྱ་ནག་གི་གྲངས་ཉུང་མི་རིགས་ཤིག་ཏུ་གྱུར་ཡོད་པ་མ་ཟད། ད་ལྟའི་ཆར་མི་འབོར་ས་ཡ་བཅུ་ལྷག་ཙམ་ཡོད་ཀྱང་མན་ཇུའི་སྐད་ཡིག་ཤེས་མཁན་མན་ཇུ་མི་རིགས་ལྔ་བཅུ་ལས་ཉུང་བ་ཡོད་པའི་ཛ་དྲག་གནས་སྟངས་འདི་འདྲ་ཞིག་ཆགས་ཡོད་པ་ཀུན་གྱི་མཐོང་ཆོས་སུ་གྱུར་ཡོད། རྒྱ་གཞུང་དང་ཚོགས་སྒེར་མི་ཉུང་བས་མན་ཇུའི་སྐད་ཡིག་སླར་གསོ་ཡོང་བར་ལས་འགུལ་འདྲ་མིན་སྤེལ་གྱི་ཡོད་ཀྱང་། ཚང་མས་འབད་བརྩོན་རྒྱུན་བསྲིངས་ནས་བྱས་ན་དུས་ཡུན་ངེས་ཅན་ཞིག་གི་ནང་སྐད་ཡིག་དེ་ཉིད་རྩ་བརླག་ཏུ་མ་འགྲོ་སྔོན་ལ་སྐྱོབ་ཐུབ་ངེས་ཡིན་ཡང་། དེ་སྔ་ལྟ་བུ་སྤྱི་ཚོགས་ནང་བཀོལ་སྤྱོད་ལྷུག་པོ་ཡོང་རྒྱུ་ཏོག་ཙམ་ཁག་པོ་རེད་སྙམ། དེ་འདྲ་སོང་ཙང་མན་ཇུའི་སྐད་ཡིག་གི་གནས་སྟངས་ཇི་ཆགས་ནས་ང་ཚོས་སྔོན་ཚུད་ནས་སློབ་གསོ་བླངས་ཏེ་བོད་ཀྱི་སྐད་ཡིག་མི་ཉམས་རྒྱུན་འཛིན་བྱེད་རྒྱུའི་ཐོག་བོད་མི་ཡོངས་ནས་སྦྱང་བརྩོན་བྱེད་རྒྱུ་དང་། སྤྱི་སྒེར་གྱི་ལས་དོན་ཐོག་བཀོལ་སྤྱོད་རྒྱ་གང་ཆེ་བྱེད་རྒྱུ། བོད་པའི་སྤྱི་ཚོགས་ཁྱོན་ཡོངས་ལ་བོད་ཀྱི་སྐད་ཡིག་གང་སར་མཐོང་ཐོས་ཡོད་པ། (https://tibetpolicy.net/travelogue-journey-ladakh/) མི་རབས་གཅིག་ནས་གཅིག་ལ་རྩིས་སྤྲོད་བྱེད་སྐབས་སྐད་ཡིག་གི་ནང་དོན་རྒྱ་ཆེ་རུ་དང་ཕྱུག་ཏུ་བཏང་ནས་རྩིས་སྤྲོད་ཐུབ་པ་བྱེད་རྒྱུ་བཅས་ཀྱིས་མགྱོགས་མྱུར་ཐབས་ལམ་སྣ་ཚོགས་སྤེལ་དགོས་པ་ནི། བོད་གངས་ཅན་གྱི་ཐུན་མོང་མ་ཡིན་པའི་ཡི་གེའམ་ཡིག་གཟུགས་ལ་བཀའ་དྲིན་རྗེས་དྲན་བྱེད་རྒྱུའི་ཐབས་ལམ་ཡག་ཤོས་དེ་ཡིན་པ་སྨོས་ཅི་དགོས།
དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོས་བཙུན་མོ་རྒྱ་ནག་ཀོང་ཇོ་དང་ལྷན་དུ་གཉེན་སྒྲིག་གནང་ཡོད་ཀྱང་། བོད་ཀྱི་ཡི་གེ་དེ་རྒྱ་ནག་གི་ཡི་གེ་ལ་དཔེ་མ་བླངས་པར་རྒྱ་གར་གྱི་དེཝ་ནག་རིའི་ཡི་གེ་ལ་དཔེ་བླངས་ནས་བོད་ཀྱི་ཡི་གེ་གསར་དུ་བཏོད་པ་དང་། དུས་རབས་བརྒྱད་པའི་ནང་མཁན་ཆེན་ཞི་བ་འཚོ་གང་ཉིད་རྒྱ་གར་བ་ཡིན་ཡང་བོད་མི་ཚོར་ལེགས་སྦྱར་ལྷའི་སྐད་དང་པཱ་ལཱི་ནས་ནང་ཆོས་སྦྱོང་མི་དགོས་པར་སོ་སོར་ཡི་གེ་ཡོད་པ་དེའི་ཐོག་བོད་སྒྱུར་བྱེད་དགོས་པའི་ལམ་སྟོན་བཟང་པོ་གནང་བར་བརྟེན། བོད་ཀྱི་ཡི་གེ་གསར་དུ་བཟོས་ནས་ལོ་མང་པོ་མ་ཕྱིན་གོང་སངས་རྒྱས་ཀྱི་བཀའ་བསྟན་འགྱུར་པོ་ཏི་ ༣༠༠ ལྷག་བོད་སྒྱུར་གནང་ཡོད་པ་དེ་དག་ནི་ཧ་ལས་པ་རེད་འདུག ད་ལྟ་ལོ་ངོ་ཆིག་སྟོང་ལྷག་གི་རྗེས་སུ་སངས་རྒྱས་ཀྱི་གསུང་རབ་འདི་དག་ང་ཚོ་བོད་པ་ཚོས་དགའ་སྤོབས་སྐྱེ་རྒྱུའི་གཞི་རྩ་གཙོ་བོ་དེ་ཆགས་ཡོད་པ་དང་། དེ་བཞིན་དེང་གི་དུས་སུ་དེའི་ཕན་ནུས་ཀྱི་ངོས་འཛིན་ཤུགས་ཆེ་རུ་དང་ཁྱབ་ཚད་ཆེ་རུ་འགྲོ་བཞིན་པ་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ཡིན། སྤྱིར་ནང་ཆོས་རྒྱ་ནག་གི་ནང་སྔོན་ལ་དར་ཡོད་ཀྱང་ད་ལྟ་ནང་ཆོས་རྒྱ་ཡིག་ལས་བོད་ཡིག་ནང་སྤུས་དག་པ་ཡོད་པ་བརྩི་ཡི་ཡོད་པ་མ་ཟད། མགོན་པོ་གང་ཉིད་ཀྱི་བཀའ་དྲིན་ལ་བརྟེན་ནས་འཛམ་གླིང་ཡོངས་དང་ལྷག་པར་དུ་རྒྱ་རིགས་ནང་པ་ཚོས་ཀྱང་བོད་ཀྱི་ནང་བསྟན་ལ་ཡིད་ཆེས་དང་དོ་སྣང་ཤུགས་ཆེ་རུ་འགྲོ་ཡི་ཡོད་སྟབས། བོད་པའི་རིག་གཞུང་འདིའི་རྐྱེན་པས་བོད་མི་རིགས་རྩ་བརླག་ཏུ་འགྲོ་མི་སྲིད་པ་ཤེས་པར་བརྟེན། ད་ལྟའི་ཆར་རྒྱ་ནག་གཞུང་གིས་བོད་ཀྱི་རིག་གཞུང་རྟེན་སའི་བོད་ཀྱི་སྐད་ཡིག་རྩ་མེད་གཏོང་རྒྱུའི་མངོན་གསལ་དོད་མེད་ཀྱི་ཐབས་ལམ་སྣ་ཚོགས་ལག་བསྟར་བྱེད་ཀྱི་ཡོད་པ་ང་ཚོ་ཚང་མས་ཤེས་ཀྱི་ཡོད།
རྒྱ་ནག་གཞུང་གིས་དྲག་གནོན་ཇི་ཙམ་བྱེད་པ་དེ་ཙམ་གྱིས་བོད་མིའི་སོར་ཆུད་ནུས་པ་ཇེ་ཆེར་ཕྱིན་པ་དང་། མི་རིགས་ཀྱི་ལ་རྒྱ་ཤུགས་ཆེ་རུ་ཕྱིན་ནས་གནས་སྟངས་ཇི་ཡིན་ལ་སེམས་ཤུགས་ཀྱིས་གདོང་ལེན་བྱས་དང་བྱེད་བཞིན་ཡོད་སྟབས། འདས་པའི་ལོ་ངོ་དྲུག་ཅུ་རེ་གྲངས་ནང་བོད་དང་བོད་མིའི་ངོ་བོ་བརླགས་མེད་པ་མ་ཟད། བོད་དང་བོད་མིའི་གནས་སྟངས་ཇི་ཡིན་འཛམ་གླིང་ཀུན་གྱིས་ཤེས་རྟོགས་བྱུང་ནས་ཚད་མཐོའི་རྒྱབ་སྐྱོར་གནང་གི་ཡོད། འོན་ཀྱང་ང་ཚོ་བོད་རིགས་སྤུན་ཟླ་མང་བ་དྲག་གནོན་འོག་མུ་མཐུད་གནས་ཡོད་པས་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱེད་རྒྱུའི་རང་དབང་དང་གོ་སྐབས་གཉིས་ཀ་མེད་པ་དང་། ང་ཚོ་རང་དབང་ལུང་པའི་ནང་ཉུང་ཤས་ཡོད་པ་དེའང་རྒྱལ་ཁབ་ཉི་ཤུ་རྩ་གྲངས་ནང་སྲན་མ་བཏོར་བ་ནང་བཞིན་ཐོར་ནས་ཡོད་པས། སོ་སོའི་སྐད་ཡིག་སྦྱོང་རྒྱུའི་རང་དབང་ཡོད་ཀྱང་གོ་སྐབས་ཞན་པོ་ཡིན་པ་དང། མཐུན་རྐྱེན་དང་ཁོར་ཡུག་བཟང་བ་ཡོད་སའི་རྒྱ་གར་ལུང་པའི་ནང་རྒྱུ་རྐྱེན་འདྲ་མིན་གྱིས་ལོ་རེ་བཞིན་བོད་ཕྲུག་ཉུང་དུ་འགྲོ་ཡི་ཡོད་སྟབས། འཛམ་གླིང་གི་གཅེས་ནོར་འདི་ད་ལྟ་བར་དུ་ང་ཚོ་བོད་པས་བདག་ཉར་བྱས་ཡོད་པ་འདི་ད་ལྟའི་ཆར་གནས་དང་མ་གནས་ཀྱི་ཛ་དྲག་གནས་སྟངས་ཐོག་སླེབས་ཡོད། དེ་འདྲ་སོང་ཙང་ང་ཚོ་བོད་པ་ཚོ་ལྷོད་གཡེང་དུ་མ་སོང་བར་སྒེར་དང་མི་རིགས་ཀྱི་ངོ་བོའམ། འཛམ་གླིང་སྤྱི་སྨན་འདི་ཉིད་སྲུང་སྐྱོབ་སླད་བོད་ཀྱི་སྐད་ཡིག་དང་སྐད་ཡིག་འདི་ལ་རྟེན་པའི་རིག་གཞུང་ཁྱད་དུ་འཕགས་པ་འདི་སྣང་མེད་མ་བཏང་བར། རང་ཉིད་ལ་ཛ་དྲག་ནད་གཞིའི་དཀའ་ངལ་འཕྲད་ན་ཛ་དྲག་གི་སྨན་བཅོས་སླད་ཐབས་ཤེས་ཇི་ལྟར་བྱེད་རྒྱུ་ཡིན་པ་དེ་ལྟ་བུ་མི་རིགས་ཀྱི་སྐད་ཡིག་དང་རིག་གཞུང་སྲུང་སྐྱོབ་སླད་འབད་བརྩོན་ཧུར་ཐག་བྱེད་དགོས། དེ་ང་ཚོས་བྱེད་ཐུབ་པ་དང་བྱེད་དགོས་པའི་ལས་འགན་ཡང་ཡིན། དེ་མིན་སོ་སོ་སྒེར་གྱི་མི་ཚེ་དང་ནང་མི་གཅིག་པུའི་འཕྲལ་སེལ་གྱི་ཁེ་ཕན་འགྲུབ་ཆེད་དེ་དག་སྣང་མེད་བཏང་ན་བོད་མི་གཅིག་ལ་སྐྱེས་ནས་སྐྱེས་གོ་ཆོད་མེད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྒྱུན་དུ། ང་ཚོ་བོད་པ་ལ་ལོ་ངོ་སྟོང་ཕྲག་སྔོན་ནས་ཡི་གེ་ཡོད་པར་སྤོབས་པ་ཞེ་དྲག་སྐྱེ་ཡི་འདུག་ཅེས་བཀའ་སློབ་ཡང་ཡང་ཕེབས་ཀྱི་ཡོད། མགོན་པོ་གང་ཉིད་ཀྱིས་ནང་པའི་ཆོས་དང་། ལྟ་གྲུབ། ཚན་རིག་བཅས་ཀྱི་སྐོར་མཐིལ་ཕྱིན་པ་བོད་ཀྱི་སྐད་ཡིག་ནང་དུ་མ་གཏོགས་འཛམ་གླིང་གི་སྐད་ཡིག་གཞན་གང་དུའང་མེད་སྟབས། འཛམ་གླིང་ནང་སངས་རྒྱས་ཀྱི་ཆོས་འགྲེལ་བཤད་ཡག་ཤོས་རྒྱག་ཐུབ་མཁན་བོད་པའི་སྐད་ཡིག་ཡིན་པ་དེ་ང་ཚོ་བོད་པ་ཚོ་ལ་སྤོབས་པ་སླེབས་ཡ་གཅིག་ཡིན་པ་གསུང་གི་ཡོད། དེ་འདྲ་སོང་ཙང་བོད་ཀྱི་སྐད་ཡིག་འདི་ང་ཚོ་མི་རིགས་ཀྱི་ཐུན་མོང་མ་ཡིན་པའི་ཁྱད་ཆོས་གཅིག་ཡིན་པ་དང་། མི་རིགས་ཀྱི་གཅེས་ནོར་ཡིན་པ་ངོ་ཤེས་དགོས་པ་དང་ངོས་འཛིན་བྱེད་དགོས། དེའི་ནང་དོན་ཕྱུག་པོ་དེ་དག་བོད་མི་དང་ནང་པ་ཙམ་མ་ཟད། འཛམ་གླིང་ཡོངས་ལ་ཕན་ཐོགས་རླབས་ཆེན་ཡོད་པའི་གཏེར་མཛོད་ཡིན་སྟབས། ང་ཚོས་འཐུས་ཤོར་མེད་པར་བདག་གཅེས་བྱེད་དགོས་པ་དེ་ཧ་ཅང་གལ་ཆེན་པོ་ཡིན་པ་ཙམ་དུ་མ་ཟད་དུས་ཀྱི་དགོས་མཁོ་ཡང་རེད་འདུག
ཨ་མས་བདག་གཅེས་བྱེད་དགོས་རེད་ལབ་དུས་སོ་སོ་དང་སོ་སོའི་བུ་ཕྲུག་ཡོངས་ནས་མི་ཚེ་ཧྲིལ་པོ་སྦྱང་བརྩོན་གྱིས་བཀོལ་སྤྱོད་གང་ཐུབ་བྱས་ནས་དེའི་ནང་དོན་རྟོགས་ཐུབ་པ་བྱེད་རྒྱུ་དེ་རེད། དེ་ལྟར་བྱུང་ཚེ་༸གོང་ས་མཆོག་གིས་ཐུགས་རེ་གནང་བ་བཞིན་སྲོལ་དེང་གཉིས་ཀའི་ཤེས་ཡོན་ཡོད་པའི་བོད་ཕྲུག་འདབ་ཤོག་གཉིས་ལྡན་ཞིག་ཆགས་ངེས་དང་། སོ་སོ་སྒེར་གྱི་མི་ཚེའང་བདེ་སྐྱིད་ལྡན་པ་སྐྱེལ་རྒྱུའི་ལྡེ་མིག་གཙོ་བོའང་དེ་རེད། དེ་དང་འབྲེལ་བའི་བོད་པའི་ཕ་མ་གཞོན་སྐྱེས་ཚོ་ལ་ཨ་མའི་སྙིང་གཏམ་ཞེས་པའི་རྩོམ་ཡིག་འདི་བྲིས་ཡིན་པས། ཁྱེད་གསུམ་གྱིས་རིམ་པས་ཀློག་ན་ད་ལྟ་དང་མ་འོངས་པར་བསམ་བློ་གཏོང་སྟངས་ཐད་ཕན་ཐོགས་ཕྲན་བུ་ཡོང་ངེས་རེད། (https://allabouttibet.com/pages/blog/post.html?id=10)
དེ་བཞིན་ཨ་མས་དུས་ཀྱི་དགོས་མཁོ་རེད་ལབ་དགོས་པའི་རྒྱུ་མཚན་ནི། དེང་སང་འཛམ་གླིང་ནང་དཀའ་ངལ་འདྲ་མིན་འཕྲད་ཀྱི་ཡོད་ཀྱང་གཙོ་བོ་སེམས་ཁམས་ཀྱི་དཀའ་ངལ་ཆགས་ཀྱི་ཡོད་པ་གསལ་པོ་རེད། འཛམ་གླིང་ནང་ཕྱི་དངོས་པོའི་ཐོག་ནས་འབྱོར་ལྡན་མི་མང་པོ་ཡོད་ཀྱང་སེམས་འཁྲུགས་ནས་མ་སྐྱིད་པ་ཧ་ཅང་མང་པོ་ཡོད་པ་དང་། དེའི་རྐྱེན་གྱིས་མི་གསོད་ཁྲག་སྤྱོད་དང་རང་ཤི་རྒྱག་མཁན་སོགས་མང་པོ་མཐོང་རྒྱུ་ཡོད་པ། དེ་ཚོ་ཚང་མ་བསམ་བློ་གཏོང་སྟངས་ཡག་པོ་མ་ཤེས་པའི་རྐྱེན་གྱིས་ཡོང་གི་ཡོད་པ་གསལ་པོ་རེད། ང་ཚོ་བོད་མིའི་ཁྲོད་དུ་མི་རྟག་པ་དང་། ལས་རྒྱུ་འབྲས། རྟེན་འབྲེལ། དགེ་སྡིག་སྤང་བླང་། སྐྱེ་བ་སྔ་ཕྱི། སེམས་ཅན་ཐམས་ཅད་རང་གི་ཨ་མ་བྱས་མྱོང་ཡོད་པ་སོགས་ཀྱི་ཆོས་ཕྱོགས་ཀྱི་བསམ་བློ་ཡོད་པའམ་བསམ་བློ་གཏོང་སྟངས་ཏོག་ཙམ་ཤེས་ཀྱི་ཡོད་སྟབས། སེམས་ཁམས་དཀའ་ངལ་ཡོད་པ་གཞན་དང་བསྡུར་ན་ཧ་ཅང་ཉུང་བ་ཡོད། འོན་ཀྱང་སོ་སོའི་རྩ་ཆེའི་རིག་གཞུང་ལ་དོ་སྣང་མ་བྱས་ན་འཛམ་གླིང་གི་མི་གཞན་ལྟ་བུ་སེམས་ཁམས་ཀྱི་དཀའ་ངལ་ཡོང་ངེས་རེད།
ཁྱེད་ཚོའི་པ་ལགས་ཀྱང་རང་ཉིད་ཀྱི་ཕ་དམ་པས་རེ་བ་དང་ལམ་སྟོན་གཞིར་བཟུང་རྒྱ་གར་དུ་ཕེབས་ནས་བོད་ཀྱི་སྐད་ཡིག་ཐོག་སྦྱང་བརྩོན་ཧུར་ཐག་གིས་ད་ལྟ་སོ་སོའི་སྤྱི་ཚོགས་ནང་ཞབས་སྤྱི་གང་ལེགས་སྒྲུབ་བཞིན་ཡོད་ལ། སོ་སོའི་བུ་ཕྲུག་ཚོ་ལའང་གནད་ལ་འཁེལ་བའི་ལམ་སྟོན་གནང་ནས་སོ་སོའི་མི་ཚེ་དོན་དང་ལྡན་པ་སྐྱེལ་ཐུབ་ཀྱི་ཡོད། དེ་འདྲ་སོང་ཙང་ཁྱེད་གསུམ་གྱིས་བོད་ཡིག་སྦྱངས་ན་མ་འོངས་པར་བེད་སྤྱོད་མེད་པའི་བསམ་བློ་དེ་འདྲ་འཁོར་མི་སྲིད་ལ། བོད་ཀྱི་སྐད་ཡིག་ལ་མཐོང་ཆུང་གིས་སྣང་མེད་དུའང་གཞག་མི་སྲིད། གལ་ཏེ་དེ་ལྟར་བྱས་ན་སོ་སོའི་མི་རིགས་སྤྱི་དང་ཡང་སྒོས་སོ་སོ་རང་ཉིད་ལ་གྱོང་གུན་ཆེན་པོ་ཞིག་ཡིན་པ་སེམས་ལ་ཞོག་ཨང་། བོད་པ་གཅིག་ཡིན་པའི་ཆ་ནས་བོད་ཡིག་ཤེས་རྒྱུ་དེ་ཞེ་དྲག་གལ་ཆེན་པོ་ཡིན་ལ། སོ་སོ་སྒེར་གྱི་མི་ཚེ་སྐྱེལ་རྒྱུའི་ཆེད་དུའང་བོད་ཡིག་ནང་དུ་ཡོད་པའི་ནང་ཆོས་དང་དེ་ལ་བརྟེན་པའི་རིག་གཞུང་འདིའི་གནས་ཚད་གང་འཚམས་ཡོད་ན་མི་ཚེ་སྐྱིད་པ་ཡོང་རྒྱུ་གསལ་པོ་ཞེ་དྲག་རེད་འདུག ཨ་མའི་འཛིན་རིམ་བཅུ་གཉིས་ཀྱི་བོད་ཡིག་གནས་ཚད་འདིས་ཀྱང་ནང་ཆོས་ལྟ་ཀློག་བྱེད་རྒྱུར་ཕན་ཐོགས་ཕྲན་བུ་འདུག་པ་མ་ཟད། ༸གོང་ས་མཆོག་དབུས་པའི་བླ་ཆེན་རྣམས་ཀྱི་བཀའ་ཆོས་རྣམས་རྟོགས་ཐུབ་པར་ཕན་ཐོགས་ཕྲན་བུ་ཡོང་གི་འདུག་པས། ཁྱེད་གསུམ་ནས་ལྷག་རབ་བྱུང་ན་མི་ཚེ་གང་པོ་དབྱངས་གསལ་སོ་བཞི་ནས་ཁ་མ་བྲལ་བར་ཉིན་མཚན་དུས་དྲུག་བོད་ཀྱི་སྐད་ཡིག་དང་འབྲེལ་བའི་སློབ་སྦྱོང་དང་མི་ཚེ་སྐྱེལ་རྒྱུ་དང་། དེ་ལྟར་མ་བྱུང་ནའང་འཛིན་རིམ་བཅུ་གཉིས་ཀྱི་རྗེས་སུའང་བོད་ཀྱི་སྐད་ཡིག་མུ་མཐུད་བཀོལ་སྤྱོད་བྱེད་རྒྱུར་འབད་བརྩོན་ཧུར་ཐག་བྱེད་དགོས། ངེད་ཕ་མ་གཉིས་ད་ལྟ་དགའ་སྤོབས་དང་བློ་བདེ་པོ་ཡོད་པ་གཅིག་ནི་བསྟན་འཛིན་འཆི་མེད་ཁྱེད་འཛིན་རིམ་དྲུག་པ་ཙམ་ནས་མ་འོངས་པར་བོད་ཡིག་དགེ་རྒན་ནམ་བོད་སྨན་ཨེམ་ཆི་བྱེད་རྒྱུའི་བསམ་བློ་བཅངས་པ་བཞིན། ད་ཆ་འཛིན་རིམ་བཅུ་གཉིས་ཐོན་པའི་སྐབས་སུ་བསམ་བློ་དེ་ཉིད་འགྱུར་བ་མེད་པར་རང་འཇགས་གནས་ཡོད་པའི་ཐོག་བོད་ཀྱི་གསོ་བ་རིག་པ་སྦྱོང་རྒྱུའི་ཐག་གཅོད་བྱས་པ་དེ་ཧ་ཅང་ཡག་པོ་འདུག་ལ། དེ་ནི་རང་མི་རིགས་ཀྱི་སྐད་ཡིག་དང་རིག་གཞུང་ལ་བཅངས་པའི་ཁྱེད་ཀྱི་འགྱུར་མེད་སྤྲོ་སྣང་དང་། དུང་བ། སེམས་ཤུགས། སྤོབས་པ། དོ་དབྱིངས། ནུས་པ་བཅས་ཡིན་པ་དང། དེ་ནི་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ཀྱི་ལམ་སྲོལ་བཟང་པོའི་བཀའ་དྲིན་དང་། སྲིད་བྱུས་བཟང་པོ་འདིའི་ལམ་སྟོན་འོག་སྐུ་ལས་ཚད་མེད་སྐྱོན་མཁན་གྱི་བཀའ་དྲིན་ཆེ་བའི་དགེ་རྒན་རྣམ་པ་དང་། སྲིད་བྱུས་ལ་ཡིད་ཆེས་བློ་གཏད་ཀྱིས་གསོ་སྐྱོང་བྱེད་མཁན་ངེད་ཕ་མ་གཉིས་བཅས་འབྲེལ་ཡོད་མང་པོས་གཞོགས་འདེགས་གང་ཐུབ་ཞུས་པའི་འབྲས་བུ་ཡིན་པར་སྙམ།
མཐའ་དོན། ཁྱེད་གསུམ་བོད་མི་རིགས་ལ་སྐྱེས་པ་དང་། སངས་རྒྱས་ཀྱི་བསྟན་པ་མཇལ་བ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཕགས་པ་སྤྱན་རས་གཟིགས་སྐུ་དངོས་ཡིན་པ་ཡང་ཡང་མཇལ་བ་མ་ཟད་གསུང་ཡང་ཡང་ཐོས་རྒྱུ་ཡོད་པ། མཐུན་རྐྱེན་དང་རང་དབང་གི་ཐོག་ནས་སོ་སོའི་སྐད་ཡིག་སྦྱོང་རྒྱུ་ཡོད་པ་འདི་ཚོ་ཆ་ཚང་ཞེ་དྲག་སྐལ་པ་བཟང་པོ་ཡིན་པ་ཤེས་དགོས་པ་དང་། མགོན་པོ་གང་ཉིད་ཀྱིས་བོད་ཀྱི་སྐད་ཡིག་དང་རིག་གཞུང་གི་ཐོག་བོད་ཕྲུག་ཚོ་ནས་ཐུགས་རེ་ག་རེ་གནང་གི་ཡོད་པ་ཤེས་པར་བྱས་ཏེ། སོ་སོའི་མི་ཚེ་དངོས་ཀྱི་ནང་ལག་ལེན་གང་ཐུབ་བསྟར་ཚེ། རྩ་བའི་བླ་མ་ཐུགས་འགྱེད་ཚོར་ཡོང་རྒྱུ་དང་། སྐུ་ཚེ་ཞབས་པད་བརྟན་རྒྱུ། སྒྲུབ་པའི་མཆོད་པ་མཆོག་ཡིན་པ་ཙམ་དུ་མ་ཟད། སོ་སོ་སྒེར་གྱི་མི་ཚེ་དོན་ལྡན་བདེ་སྐྱིད་ལྡན་པ་ཡོང་རྒྱུ་དང་། ཚེ་མཇུག་ཀྱང་འགྱོད་པ་མེད་པ་ཡོང་ངེས་ཡིན་པས། བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་གྱི་ཐོག་མུ་མཐུད་རིག་པ་སྒྲིམས་ཨང་།། །།
