ཀུན་བདེ་གླིང་རྟ་ཚག་རྗེ་སྤྲུལ་རིན་པོ་ཆེ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནི་བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་གཏོང་པར་བླ་ན་མེད་པའི་རྨང་གཞི་དང་གོ་སྐབས་སྐྲུན་མཁན་ཡིན་ཞེས་གསུངས་སོང་།
ཟླ་འདིའི་ཕྱི་ཚེས་ ༢༠ དང་ ༢༡ ཉིན་གྲངས་གཉིས་རིང་༧གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་དུ། ཏཱ་ལའི་བླ་མའི་དགེ་རྩ་དང་བོད་མིའི་སྒྲིག་འཛུགས་ཆོས་རིག་ལས་ཁུངས་གཉིས་ཀྱི་གོ་སྒྲིག་འོག བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་ཚོགས་ཆེན་འཚོགས་ཏེ། དེ་རིང་མཇུག་བསྡོམས་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕེབས་ཏེ། གྲངས་འཛིན་དཔེ་མཛོད་ཐོག་ནས་བོད་ཀྱི་མཁས་པས་བརྩམས་པའི་དཔེ་ཆ་ཡོངས་རྫོགས་བདག་ཉར་བྱ་དགོས་པའི་གལ་གནད་སྐོར་གསུངས་སོང་ལ། ཐེངས་འདིའི་ཚོགས་ཆེན་ཐོག་དྷ་ས་ཁུལ་གྱི་ཤེས་ཡོན་ལྟེ་གནས་ཁང་ཁག་ཉི་ཤུའི་སྐུ་ཚབ་དང་། ཐེངས་འདིའི་ཚོགས་ཆེན་གྱི་གཙོ་སྐྱོང་གནང་མཁན་དང་གཏམ་བཤད་པ་ ༢༤ ། དེ་བཞིན་བཙུན་དགོན་ཁག་ནས་བཙུན་མ་གྲངས་ ༨༦ མཉམ་ཞུགས་གནང་ཡོད་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། མདོ་སྔགས་ཟུང་འབྲེལ་དང་ལུང་རྟོགས་ཀྱི་བསྟན་པ་ཡོངས་རྫོགས་བོད་ཀྱི་སྐད་ཡིག་ནང་དུ་མ་གཏོགས་མེད་ཀྱང་། སྐད་ཡིག་བཀོལ་སྤྱོད་བྱེད་མཁན་གྱི་མི་གྲངས་ཉུང་ཉུང་ཞིག་ལས་མེད་ཚེ་སྐད་ཡིག་ལ་ཉེན་ཁ་ཡོང་གི་ཡོད། ཧི་མ་ལ་ཡའི་རི་རྒྱུད་ཀྱི་མི་རྣམས་བོད་ཀྱི་དགོན་སྡེ་ནང་དུ་ཞུགས་ཏེ་བོད་ཡིག་ཐོག་སློབ་གཉེར་བྱེད་བཞིན་ཡོད་དུས། བོད་ཀྱི་སྐད་ཡིག་བཀོལ་སྤྱོད་བྱེད་མཁན་མང་དུ་འགྲོ་བཞིན་ཡོད། ཐར་བ་འདོད་མཁན་མི་ཚང་མར་ནང་ཆོས་ཀྱིས་ཕན་ཐོགས་དགོས་པ་མ་གཏོགས། བོད་དང་ཧི་མ་ལ་ཡ་གཉིས་བདག་གི་ཡོད་པ་དེ་འདྲ་མ་རེད། དེའི་དངོས་ཡོད་གནས་སྟངས་ཐོག་ནས་དགོན་པའི་ནང་འགྱུར་བ་ཆེན་པོ་འགྲོ་བཞིན་ཡོད། དགོན་སྡེ་ཆེན་པོ་ཁག་ཏུ་ནང་ཧི་མ་ལ་ཡའི་མི་རྣམས་ཀྱིས་འགན་འཁུར་བའི་དུས་ཤིག་ཤར་ཡོང་གི་འདུག ཅེས་དང་། ཆོས་རིག་ལས་ཁུངས་ཀྱི་ལས་གཞིའི་རྒྱ་ཆེ་ཤོས་དེ་གྲངས་འཛིན་དཔེ་མཛོད་རེད། མ་འོངས་བར་ལས་གཞི་འདི་ཚུགས་ཚད་བྱུང་ཚེ་དཔེ་ཆ་འཚོལ་བ་དཀའ་ངལ་འབྱུང་གི་མ་རེད། ད་དུང་དེའི་ཐོག་ཏུ་མིས་བཟོས་རིག་ནུས་བེད་སྤྱོད་གཏོང་ཐུབ་ཚེ། བསྐལ་བ་མ་སྟོང་བར་དུ་བོད་ཀྱི་མཁས་པ་རྣམས་ཀྱིས་བརྩམས་པའིི་དཔེ་ཆ་ཡོངས་རྫོགས་བདག་ཉར་བྱ་ཐུབ་པའི་གནས་བབ་ཞིག་ཡོང་གི་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས། བོད་ཀྱི་དགོན་སྡེ་ཁག་ཏུ་ལོ་རྟག་པར་དགེ་བཤེས་དང་མཁན་པོ་མང་པོ་བསླབ་པ་མཐར་སོན་གྱི་ཡོད་ཅིང་། དགོན་པར་བཞུགས་ནས་བསྡད་ཚེ་སྤྱི་ཚོགས་ནང་ཕན་ཐོགས་ཀྱི་ཡོད་མེད་ཤེས་ཀྱི་མི་འདུག ཧི་མ་ལ་ཡའི་རི་རྒྱུད་ཀྱི་མི་རྣམས་ཀྱིས་བསླབ་པ་མཐར་ཕྱིན་རྗེས། སོ་སོའི་ཁོངས་ཀྱི་མི་རྣམས་ལ་ཕན་ཐོགས་རྒྱུ་གལ་ཆེན་པོ་རེད་བསམ་གྱི་འདུག ནང་ཆོས་ཀྱི་ཁྱད་ཆོས་ནི་འགྲོ་བའི་དོན་བསྒྲུབ་པར་མི་མང་གི་བསམ་བློའི་དཀའ་ངལ་སེལ་རྒྱུ་དེ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་དང་མི་སྣ་མང་པོ་ཞིག་གི་དཀའ་ལས་བརྒྱབ་པར་བརྟེན་ནས་བཙུན་མོའི་སྡེ་ཡར་རྒྱས་ཡོང་བཞིན་ཡོད། བོད་ཀྱི་བུད་མེད་སུ་ཡིན་ཡང་གཞུང་ཆེན་པོ་ལྟ་བའི་གོ་སྐབས་ཡོད་པ་ཡག་པོ་རེད། དེ་བཞིན་ཚོགས་འདུའི་ཁྲོད་ཕན་ཚུན་ལ་ཕན་ཐོགས་བྱུང་ཡོད་པའི་མི་གཞན་ལའང་བཤད་རྒྱུ་གལ་ཆེན་པོ་ཡིན་སྐོར་གསུངས་སོང་།
ཐེངས་འདིའི་ཚོགས་ཆེན་སྐོར་ལ་ཏཱ་ལའི་བླ་མའི་དགེ་རྩ་ཁང་གི་དྲུང་ཆེ་འཇམ་དཔལ་ལྷུན་གྲུབ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་སྟེང་བུད་མེད་རྣམས་ཀྱི་བྱམས་བརྩེ་ཤུགས་ཆེ་བ་དང་། བྱམས་བརྩེ་ནུས་སྟོབས་ཀྱིས་ཞི་བདེ་ཡོང་ཐུབ་པའི་སྐོར་ཡང་ཡང་བཀའ་སློབ་བསྩལ་ཡོད་ལ། བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་པ་གོང་སྤེལ་གཏོང་རྒྱུའི་ཐད་སྔོན་མ་ནས་༧གོང་ས་རྒྱལ་བ་རིན་པོ་ཆེ་མཆོག་ནས་བཙུན་མ་དང་བུད་མེད་ཀྱི་ཐོབ་ཐང་འདྲ་མཉམ་ཡོད་དགོས་སྐོར་བཀའ་སློབ་གང་མང་ཕེབས་ཡོད། གཞི་ཐམས་ཅད་ཡོད་པར་སྨྲ་བའི་དགེ་སློང་མའི་སྡོམ་རྒྱུན་སླར་གསོ་ཆེད་ཐུགས་འཁུར་ཆེར་བཞེས་ཡོད། ཕྱི་ལོ་ ༢༠༡༦ ལོར་༧གོང་ས་མཆོག་ནས་ཆེས་ཐོག་མར་དགེ་བཤེས་མའི་ལག་འཁྱེར་གནང་བ་དང་། ད་ལྟའི་ཆར་དགེ་བཤེས་མའི་བསླབ་པ་མཐར་སོན་པའི་གྲངས་ ༡༢༠ ལྷག་ཡོད་ལ། བོད་ཀྱི་བཙུན་མ་རྣམས་ལ་ཆེ་མཐོང་དང་བརྩི་བཀུར་གནང་བཞིན་པ་ཡང་༧གོང་ས་མཆོག་གི་བླ་མེད་ཀྱི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན། ཞེས་འགྲེལ་བརྗོད་གནང་སོང་།
ཁ་སང་དབུ་འབྱེད་མཛད་སྒོའི་ཐོག་༧སྐྱབས་རྗེ་ཀུན་བདེ་གླིང་རྟ་ཚག་རྗེ་སྤྲུལ་རིན་པོ་ཆེ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་ཐོག་བུད་མེད་རྣམས་ཀྱི་ནུས་པ་གོང་སྤེལ་གཏོང་ཐུབ་པ་ལ་བརྟེན་ནས། འཛམ་གླིང་ནང་འཆམ་མཐུན་དང་འཚེ་བ་ཉུང་དུ་འགྲོ་ཐུབ་པའི་བཀའ་སློབ་མང་པོ་གནང་ཡོད་ལ། དེ་བཞིན་འཛམ་གླིང་ནང་བུད་མེད་ཀྱི་དབུ་ཁྲིད་མང་པོ་བྱུང་ཚེ་དམག་འཁྲུག་ཉུང་དུ་འགྲོ་སྲིད་པའི་སྐོར་གསུངས་ཡོད། འཛམ་གླིང་ནང་བུད་མེད་ཀྱི་ནུས་སྟོབས་གོང་དུ་སྤེལ་ཐུབ་པར་རང་ངོ་རང་ཤེས་ཀྱི་ཐོག་ནས་སོ་སོའི་རྐང་པའི་ཐོག་ལངས་ཐུབ་ཡོད་པ་མ་ཟད། འཛམ་གླིང་སྤྱིའི་ཆེད་དུ་ནུས་པ་དང་ཞབས་འདེགས་སྒྲུབ་མཁན་མང་པོ་བྱུང་དང་འབྱུང་མུས་ཡིན།ཅེས་དང་།བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་གཏོང་པར་བླ་མ་མེད་པའི་རྨང་གཞི་དང་གོ་སྐབས་སྐྲུན་མཁན་༧གོང་ས་རྒྱལ་བ་རིན་པོ་ཆེ་མཆོག་ཆགས་ཡོད།༧མགོན་པོ་གང་ཉིད་མཆོག་ནས་མ་འོངས་སྔོན་གཟིགས་དང་དགོངས་གཞི་རྒྱ་ཆེན་པོའི་ཐོག་ནས་རྒྱ་བལ་འབྲུག་གསུམ་གྱི་བཙུན་དགོན་ཁག་ཏུ་འདོན་ཆོས་སྤྱོད་ཙམ་མིན་པར་གཞུང་ཆེན་མོར་སློབ་གཉེར་གནང་མགོ་བཙུགས་ཡོད་པ་མ་ཟད། རིས་སུ་མ་མཆིས་པའི་བཙུན་མའི་ཁྲོད་གཞུང་ཆེན་མོར་སློབ་གཉེར་གནང་སྟེ་དགེ་བཤེས་མའི་བསླབ་པ་མཐར་སོན་པའི་དུས་ཚོད་བཟང་པོ་ཞིག་བྱུང་ཡོད། དེ་ཡང་དགེ་བཤེས་མའི་ལག་འཁྱེར་རག་པ་ཙམ་མིན་པར་གཙོ་བོར་བསྟན་པ་དང་འགྲོ་བར་ཕན་པའི་ཆེད་དུ་བེད་སྤྱོད་གཏོང་དགོས། བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་གཏོང་པར་སྐབས་སུ་བབས་པའི་དམིགས་བསལ་གྱི་ནུས་པ་ཡོད་མཁན་བཙུན་མ་རྣམས་ཆགས་ཡོད། དགེ་བཤེས་མ་དང་བཙུན་མ་རྣམས་ཀྱིས་དཔེ་ཆ་ལ་བལྟས་པ་དེ་ཐར་བ་དང་ཐམས་ཅད་མཁྱེན་པར་སྦྱར་ཐུབ་རྒྱུ་དང་། དེ་བཞིན་སྤྱི་ཚོགས་ལ་ཕན་པ་བསྒྲུབ་པ་དང་སངས་རྒྱས་ཀྱི་བསྟན་པར་ཞབས་འདེགས་བསྒྲུབ་ཐུབ་རྒྱུ་དེ་གལ་ཆེན་པོ་ཡིན་སྐོར་གསུངས་སོང་།
དེ་རིང་ཚོགས་ཆེན་གྱི་ཉིན་གཉིས་པའི་ཐོག་སྐུའི་གསུང་སྒྱུར་བ་ཐུབ་བསྟན་སྦྱིན་པ་ལགས་ཀྱིས དེང་རབས་ཀྱི་ཁྱད་ཆོས་གཙོ་བོ་དེ་སྤྱི་ཚོགས་ཤིག་ནང་དུ་ཆོས་ལུགས་ཐ་དད་དང་རིག་གཞུང་ཐ་དད་མང་པོ་མཉམ་རུབ་ཐོག་ནས་བསྡད་ཡོད། དེའི་ཁྲོད་དུ་གཅིག་གིས་སོ་སོའི་ཆོས་བརྒྱུད་དང་ཐོབ་ཐང་ངོས་འཛིན་པ་དང་། གཅིག་གིས་འགྲོ་བ་མི་གཅིག་གྱུར་འདུ་ཤེས་ཁོངས་ཀྱི་ཕོ་མོ་དབྱེ་འབྱེད་སྐོར་བཤད་ཀྱི་ཡོད། ཆོས་ལུགས་ཁག་མང་པོ་དེང་རབས་ཀྱི་སྤྱི་ཚོགས་དང་གཤིབ་ཡོང་དུས། བོད་བརྒྱུད་ནང་བསྟན་དེ་ཆོས་ལུགས་གཞན་དང་བསྡུར་ཚེ་ལོ་རྒྱུས་རང་བཞིན་གྱི་འགོག་རྐྱེན་ཅུང་ཙམ་ཉུང་བའི་གྲས་རེད། འགོག་རྐྱེན་གཅིག་ནི་གསུང་རབས་ནང་ཆོས་ཀྱི་དད་པ་དང་ལྟ་གྲུབ་ཐོག་ནས་ཡོང་བཞིན་ཡོད། དེ་ནི་རྙོག་དྲ་ཚ་བོ་ཡོད་པའི་དབྱེ་འབྱེད་རིགས་ཤིག་རེད། གཞན་ཞིག་ནི་སྤྱི་ཚོགས་ཀྱི་ཡུལ་སྲོལ་དང་གོམས་གཤིས་ཐོག་ནས་ཡོང་གི་ཡོད། ཅེས་དང་། ༧གོང་ས་མཆོག་ནས་འཕགས་བོད་ཀྱི་གྲུབ་ཆེན་སྐྱེས་མ་ཉེར་གཅིག་གི་བསྟོད་པ་ཞིག་མཛད་ཡོད་ཅིང་། དེའི་བོད་བརྒྱུད་ནང་བསྟན་གྱི་ཁོར་ཡུག་ནང་བུད་མེད་སྐྱེས་ཆེན་ལ་དད་པ་བྱེད་པའི་གོམས་གཤིས་བསླེབས་པའི་དགོས་དགོངས་པ་བཞེས་ཡོད། དགེ་བཤེས་མ་ཞེས་པའང་མཁས་པའི་ལམ་ཁར་འགྲོ་བ་གཅིག་པུ་མིན་པར་ཕྱོགས་མང་པོ་ཐོག་འཛིན་དགོས། དཔེ་ཆ་ཡག་པོ་ཡོད་པ་ཙམ་གྱི་དཔེ་ཆ་འཁྲིད་ཐུབ་ཀྱི་མ་རེད། ཁ་ཤས་རྟགས་གསལ་ཡག་པོ་ཡོད་ཀྱང་དཔེ་ཆ་ཡག་པོ་འཁྲིད་ཐུབ་ཀྱི་མེད། དེའང་གཙོ་བོ་བློ་ཁོག་གི་ཐོག་ནས་ཡོང་གི་ཡོད། ད་ལྟའི་ཆར་ནུབ་ཕྱོགས་ཁུལ་དུ་བུད་མེད་ཀྱི་ཐོབ་ཐང་དང་རྒྱབ་སྐྱོར་བྱེད་མཁན་མང་པོ་རེད། ང་ཚོའི་ཉམས་མྱོང་ཐོག་ནས་གཏམ་བཤད་གནང་བའི་གོ་སྐབས་བྱུང་སྐབས། སོ་སོའི་སེམས་ཀྱི་འགོག་རྐྱེན་མ་འགྲོ་བ་བྱས་ཏེ་བློ་ཁོག་ཆེན་པོའི་ཐོག་ལས་ཀ་བྱ་རྒྱུ་གལ་ཆེན་པོ་རེད། ད་ལན་བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་གྱི་ཚོགས་འདུ་ཞིག་འཚོགས་པ་འདི་བསྒྲུབ་པའི་མཆོད་པ་རེད། ༧གོང་ས་རྒྱལ་བ་རིན་པོ་ཆེ་མཆོག་ཐུགས་མཉེས་པོ་བྱུང་གི་རེད། ང་རང་སྒེར་ལ་མཚོན་ནའང་བུ་མོ་གཉིས་ཀྱི་ཨ་ཕ་ཡིན་པའི་ཆ་བཞག་ནས་ཧ་ཅང་དགའ་བོ་བྱུང་། ཞེས་གསུངས་སོང་།
དེ་བཞིན་རྣམ་གྲྭ་ཕན་བདེ་ལེགས་བཤད་གླིང་གི་སློབ་སྤྱི་ཐུབ་བསྟན་ཡར་འཕེལ་ལགས་ཀྱིས། ཕྱི་ལོ་ ༢༠༢༤ ལོར་༧གོང་ས་མཆོག་ནས་འཕགས་བོད་གྲུབ་ཆེན་སྐྱེས་མའི་གསོལ་འདེབས་དད་པའི་མཆོད་སྤྲིན་ཞེས་པ་ལྗགས་རྩོམ་གནང་ཡོད་ཅིང་། འཕགས་བོད་ཀྱི་གྲུབ་ཆེན་སྐྱེས་མ་ཉེར་གཅིག་གི་རྣམ་ཐར་བཀོད་ཡོད་པའི་ཁྲོད། བོད་ཀྱི་གྲུབ་ཆེན་བཅུ་གཅིག་བྱུང་ཡོད་པའི་ནང་ཙན་མོ་བྱང་ཆུབ་རྗེ། མཁའ་འགྲོ་ཡེ་ཤེས་མཚོ་རྒྱལ། མ་ཅིག་སྒྲོལ་མ། མ་གཅིག་ཞ་མར། རྗེ་བཙུན་རས་ཆུང་མ། སྣང་ས་འོད་འབུམ། རྗེ་བཙུན་ཆོས་ཀྱི་སྒྲོན་མེ། གུང་རུ་ཡེ་ཤེས་མཁའ་འགྲོ། མི་འགྱུར་དཔལ་གྱི་སྒྲོན་མེ། རྗེ་བཙུན་རྟ་མགྲིན་དབང་མོ། རྗེ་བཙུན་ཆོས་ཉིད་བཟང་མོ་བཅས་ཀྱི་མཛད་འཕྲིན་གསུངས་ཡོད། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་ནས་དེ་དག་གི་མཛད་པ་འཕྲིན་ལས་ཀྱི་རྗེས་སུ་བཟུང་ནས་ཕོ་མོ་འདྲ་མཉམ་གྱི་ཐོབ་ཐང་དེ་ཆོས་སྲིད་གཉིས་ཀྱི་ཐོག་ནས་གནང་ཡོད། ༧མགོན་པོ་གང་ཉིད་མཆོག་ནས་ཆབ་སྲིད་དང་ཤེས་ཡོན་སོགས་ཀྱི་ཐོག་ཕོ་མོ་འདྲ་མཉམ་ཀྱི་གཟིགས་པ་ག་རེ་བསྐྱངས་ཡོད་མེད་ཤེས་དགོས་པ་ཞིག་རེད། ཅེས་གསུང་བཤད་གནང་སོང་།
ཕྱི་ལོ་ ༡༩༩༥ ལོ་ནས་༧གོང་ས་མཆོག་གིས་དགེ་བཤེས་མའི་ཡིག་རྒྱུགས་གཏོང་གལ་ཆེ་བའི་བཀའ་སློབ་ཕེབས་པ་བཞིན། ཕྱི་ལོ་ ༢༠༡༢ ཟླ་ ༥ ཚེས་ ༡༨ ནས་ ༡༩ བར་དྷ་ས་བོད་ཀྱི་དཔེ་མཛོད་ཁང་དུ་བཙུན་དགོན་དྲུག་དང་། དྷ་ས་རིགས་ལམ་སློབ་གཉེར་ཁང་། བོད་ཀྱི་བཙུན་མའི་ལས་འཆར་བཅས་ཀྱི་སྐུ་ཚབ་ལྷན་འཛོམས་ཐོག་༼ བོད་ཀྱི་བཙུན་དགོན་དང་སློབ་གཉེར་ཁང་གི་གཞུང་ཆེན་བསླབ་པ་མཐར་སོན་བཙུན་མ་རྣམས་ལ་དགེ་བཤེས་མའི་རྒྱུགས་སྤྲོད་དང་ལག་འཁྱེར་འབུལ་ཕྱོགས་ཀྱི་སྒྲིག་གཞི་༽ གཏན་འབེབས་གནང་བ་གཞིར་བཟུང་། ཕྱི་ལོ་ ༢༠༡༣ ཟླ་ ༡ ཚེས་ ༧ ནས་ ༨ བར་དགེ་བཤེས་མའི་རྒྱུགས་སྤྲོད་དོ་དམ་ཚོགས་ཆུང་བསྡུ་བསྐོང་གིས་རྒྱུགས་སྤྲོད་གོ་སྒྲིག་ཚོགས་ཆུང་ཆེད་འཛུགས་གནང་། དེ་ནས་བཟུང་ལོ་འཆར་ཅན་དུ་སེར་འབྲས་དགའ་གསུམ་གྱི་དགེ་བཤེས་ལྷ་རམས་པ་ཁག་ཅིག་གིས་རྒྱུགས་སྤྲོད་ཀྱི་མཐུན་འགྱུར་དང་འབྲེལ། ཕྱི་ལོ་ ༢༠༡༣ ཟླ་ ༥ ཚེས་ ༢༠ ནས་ཟླ་ ༦ ཚེས་ ༣ བར་དྷ་ས་བཙུན་དགོན་འཇམ་དབྱངས་ཆོས་གླིང་དུ་སྐབས་དང་པོའི་རྒྱུགས་སྤྲོད་དབུ་ཚུགས་པ་ནས་ཕྱི་ལོ་ ༢༠༢༤ བར་དགེ་བཤེས་མ་ཁྱོན་ ༦༠ ཐོན་ཡོད་ཅིང་། ཕྱི་ལོ་ ༢༠༡༩ ལོར་༧དཔལ་ལྡན་རྒྱུད་སྟོད་གྲྭ་ཚང་དུ་ཆེས་ཐོག་མར་སྔགས་རམས་དགེ་བཤེས་མའི་བསླབ་པ་མཐར་སོན་གྱི་མཛད་སྒོ་འཚོགས་ཏེ་སྔགས་རམས་དགེ་བཤེས་མ་ཁྱོན་ ༤༨ བྱུང་བཅས་ད་ལྟ་བར་དུ་དགེ་བཤེས་མ་ཁྱོན་ ༡༢༠ ལྷག་ཐོན་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
