བཙན་བྱོལ་བོད་མིའི་སྤྱི་ཚོགས་ཀྱི་ལས་ཤུགས་གོང་འཕེལ་ཐབས་བྱུས་ལྷན་ཚོགས་ཐོག་གཞུང་ཁོངས་མིན་པའི་ཚོགས་སྡེ་དང་སྤྱི་ཚོགས་ཞབས་ཞུ་ཁང་ཁག་གི་འཐུབ་ཚབ་ ༣༢ མཉམ་ཞུགས་གནང་།
ཟླ་འདིའི་ཕྱི་ཚེས་ ༢༡ དང་ ༢༢ ཉིན་གྲངས་གཉིས་རིང་དྷ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ན་གཞོན་རོགས་སྐྱོར་ཚན་པའི་གོ་སྒྲིག་འོག བཙན་བྱོལ་བོད་མིའི་སྤྱི་ཚོགས་ཀྱི་ལས་ཤུགས་གོང་འཕེལ་ཐབས་བྱུས་ལྷན་ཚོགས་ཤིག་འཚོགས་ཡོད་ཅིང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། དཔལ་འབྱོར་དྲུང་ཆེ་གྱང་གསར་ཚེ་རིང་དོན་གྲུབ་ལགས། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས། དེ་བཞིན་བཙན་བྱོལ་ནང་གི་གཞུང་ཁོངས་མ་ཡིན་པའི་ཚོགས་སྡེ་དང་སྤྱི་ཚོགས་ཞབས་ཞུ་ཁང་ཁག་གི་འཐུབ་ཚབ་ ༣༢ བཅས་མཉམ་ཞུགས་གནང་ཡོད་འདུག
ཐེངས་འདིའི་ལྷན་ཚོགས་ཀྱི་གལ་གནད་སྐོར་ལ་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས། ལོ་ཁ་ཤས་ཀྱི་སྔོན་ནས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པས་སྤྱི་ཚོགས་ཡར་རྒྱས་ཆེད་དུ་གཞུང་ཁོངས་མིན་པའི་ཚོགས་སྡེ་ཁག་དང་ལྷན་དུ་ལས་ཀ་བྱེད་བཞིན་ཡོད་ཅིང་།རྒྱལ་ཁབ་དང་སྒྲིག་འཛུགས་ཀྱི་སྒལ་ཚིགས་ལྟ་བུ་ཡིན་པའི་གཞོན་སྐྱེས་རྣམས་ལ་ལས་ཀ་རག་དགོས་ཀྱི་ཡོད་པ་མ་ཟད།དེ་བཞིན་ན་གཞོན་རྣམས་ཀྱི་མཉམ་རུབ་ཐོག་ནས་སྤྱི་པའི་ལས་དོན་བསྒྲུབ་དགོས་ཀྱི་ཡོད་པ་རེད། ད་ལན་གྱི་ལྷན་ཚོགས་ཐོག་ཤེས་ཡོན་དང་། འཕྲོད་བསྟེན། སྤྱི་ཚོགས་ཞབས་ཕྱི་སོགས་ལ་གྲོས་བསྡུར་བྱེད་བཞིན་ཡོད་ལ། ཐེངས་འདིའི་གྲོས་བསྡུར་ཁྲོད་ཀྱི་གྲངས་ཐོ་ལ་བལྟས་ཏེ་མ་འོངས་བར་གཞོན་སྐྱེས་རྣམས་ལ་ལས་ཀའི་གོ་སྐབས་བསྐྲུན་དགོས་པའི་ལས་འཆར་ཤེས་རྟོགས་བྱུང་ཆེད་དུ་ཡིན། དེ་བཞིན་བཙན་བྱོལ་བོད་མིའི་ཁྲོད་གཞོན་སྐྱེས་རྣམས་ཀྱི་ནུས་པ་ཡར་རྒྱས་གཏོང་རྒྱུར་དམིགས་བཞིན་ཡོད། ཅེས་གསུངས་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། སྤྱི་ཚོགས་གང་འདྲ་ཞིག་གི་ནང་དུ་ནུས་པ་ཐོན་དགོས་ན་ལས་ཀ་བྱེད་མཁན་རྣམས་ལ་ནུས་པ་ལྡན་པ་ཞིག་དགོས་ཀྱི་ཡོད། འདས་བའི་ལོ་འདི་དག་གི་རིང་བོད་མིའི་སྒྲིག་འཛུགས་ཀྱིས་ནུས་སྟོབས་གོང་སྤེལ་གཏོང་ཕྱོགས་ཐོག་གྲོས་བསྡུར་བྱས་ཡོད། དེ་ཡང་གཞོན་སྐྱེས་རྣམས་ཀྱི་འདོད་མོས་དང་སྤྱི་ཚོགས་ཀྱི་གནས་སྟངས་གཞི་ལ་བཞག་པའི་ཐོག་ནས་ཐབས་ལམ་འཚོལ་དགོས་དུས། བོད་མིིའི་སྒྲིག་འཛུགས་དང་གཞུང་ཁོངས་མིན་པའི་ཚོགས་སྡེ་ཐུན་མོང་གི་ནུས་པ་མཉམ་དུ་སྤུངས་དགོས་པ་གནད་འགག་ཏུ་མཐོང་སྟེ། ད་ལན་ན་གཞོན་རོགས་སྐྱོར་ཚན་པས་གཞུང་ཁོངས་མིན་པའི་ཚོགས་པ་ཁག་དང་མཉམ་དུ་ལས་ཤུགས་གོང་འཕེལ་ཐབས་བྱུས་ལྷན་ཚོགས་ཤིག་མགོ་བཙུགས་པ་རེད། ཐེངས་འདིའི་ཚོགས་འདུའི་ཐོག་མ་འོངས་བའི་ལས་དོན་བྱེད་ཕྱོགས་ཐོག་བསམ་ཚུལ་སྤུངས་ཏེ། མིའི་ནུས་པ་དང་དཔལ་འབྱོར་བྱུང་ཚེ་བོད་དོན་འཐབ་རྩོད་དང་། སྤྱི་ཚོགས་བདེ་དོན། འཛིན་སྐྱོང་གི་འགྲོ་སྟངས་བཅས་ཚགས་ཚུད་ཡོང་ཐུབ་པ་ཞིག་རེད། ཟབ་སྦྱོང་འདི་འདྲ་བརྒྱུད་ནས་བོད་མིའི་སྒྲིག་འཛུགས་ཀྱི་འགན་འཁུར་པའི་ཐོག་ནས་བོད་པ་ཚང་མ་ནུས་པ་ལྡན་པའི་ཁ་ཕྱོགས་ཤིག་ལ་ཁྲིད་ཐབས་བྱེད་ཀྱི་ཡོད། བཙན་བྱོལ་ནང་དུ་བོད་མིའི་གྲངས་ཀ་ཉུང་ཉུང་ཡིན་ཡང་། བོད་པ་རྣམས་ནུས་པ་ལྡན་པ་ཞིག་བྱུང་ཚེ་འཛམ་གླིང་སྟེང་དུ་གཟི་བརྗིད་ལྡན་པའི་ལས་ཀ་བསྒྲུབ་ཐུབ་རྒྱུ་རེད། དེ་བཞིན་བོད་ཀྱི་གཞོན་སྐྱེས་རྣམས་ཀྱིས་གོ་སྐབས་དམ་འཛིན་བྱས་ཏེ་སྤྱི་ཚོགས་ནང་དུ་འབུར་དུ་ཐོན་པའི་ལས་ཀ་བྱས་ཚེ་ཚང་མར་ཕན་ཐོགས་འབྱུང་གི་རེད། ཅེས་གསུངས་སོང་།
ན་གཞོན་རོགས་སྐྱོར་ཚན་པ་ནི་ཕྱི་ལོ་ ༢༠༠༣ ལོར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁོངས་སུ་མགོ་བཙུགས་ཏེ། བོད་ཀྱི་གཞོན་སྐྱེས་ཆེད་ལག་ཤེས་དང་བཟོ་རིགས་སོགས་ཀྱི་སྦྱོང་བརྡར་སྤྲོད་བཞིན་ཡོད་པ་དང་། ཕྱི་ལོ་ ༢༠༢༢ ལོར་གཞོན་སྐྱེས་ནུས་སྟོབས་གོང་འཕེལ་རྒྱབ་སྐྱོར་ཚོགས་པས་(Youth Empowerment Support (YES+)གཞོན་སྐྱེས་ཀྱི་ནུས་སྟོབས་གོང་སྤེལ་ཆེད་དུ་དམིགས་ནས་ལས་ཀ་བྱེད་བཞིན་ཡོད་པ་དང་། ཐེངས་འདི་ནི་གཞུང་ཁོངས་མིན་པའི་ཚོགས་པ་དང་ཁེ་ལས་པ་སོགས་བསྡུས་པའི་ཚོགས་འདུ་ཐེངས་དང་པོ་དེ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
