སྐབས་བཅོ་བརྒྱད་པའི་བོད་མི་མང་སྤྱི་འཐུས་གསེར་རྟ་བཀྲ་ཤིས་དོན་གྲུབ་ལགས་ཀྱིས་བལ་ཡུལ་མི་མང་གི་དཀའ་ངལ་སེལ་སླད་འཛིན་སྐྱོང་བཀའ་ཤག་གི་སྲིད་ཇུས་ཤིག་གཏན་འབེབས་གནང་དགོས་སྐོར་སོགས་གསུངས་སོང་།
ཟླ་འདིའི་ཕྱི་ཚེས་ ༢ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་འཐུས་མི་དང་བོད་ཀྱི་དུས་བབ་གསར་ཁང་གི་སྤྱི་ཁྱབ་རྩོམ་སྒྲིག་པ་པདྨ་མཚོ་ལགས་མང་མོས་ཀྱི་ཐོག་ནས་བཀའ་བློན་དུ་འོས་འདེམས་བྱུང་བ་ལྟར། དེ་རིང་སྐབས་བཅོ་བརྒྱད་པའི་མདོ་སྨད་སྤྱི་འཐུས་ཀྱི་སྒུག་ཐོའི་ཁོངས་ནས་གསེར་རྟ་བཀྲ་ཤིས་དོན་གྲུབ་ལགས་ཀྱིས། སྐབས་བཅོ་བརྒྱད་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་ལགས་ཀྱི་དྲུང་ནས་ལས་འཁུར་དམ་འབུལ་ཞུས་སོང་། ཁོང་སྐབས་གསུམ་རིང་སྤྱི་འཐུས་སུ་འདེམས་ཐོན་བྱུང་ཡོད་ཅིང་། ད་ལན་བོད་མི་མང་སྤྱི་འཐུས་སུ་འདེམས་ཐེངས་བཞི་བར་གྱུར་འདུག
དེ་རིང་དམ་འབུལ་གྲུབ་རྗེས་འདི་གའི་གསར་འགོད་པས་བོད་མི་མང་སྤྱི་འཐུས་སྐབས་བཅོ་བརྒྱད་པར་འོས་འདེམས་བྱུང་བའི་མྱོང་ཚོར་དང་། མ་འོངས་པའི་འཆར་སྣང་སོགས་དང་འབྲེལ་ནས་བཀའ་འདྲི་ཞུ་སྐབས། ཁོང་གིས། སྤྱིར་བཏང་ང་རང་བོད་མི་མང་སྤྱི་འཐུས་ལྷན་ཚོགས་སྐབས་བཅོ་ལྔ་དང་། བཅུ་དྲུག བཅུ་བདུན་བཅས་སུ་སྤྱི་འཐུས་སུ་འོས་འདེམས་བྱུང་བ་རེད། དེ་རིང་སླར་ཡང་སྐབས་བཅོ་བརྒྱད་པའི་སྤྱི་འཐུས་ཀྱི་གོ་སྐབས་གནང་བར། ཐོག་མར་རྒྱབ་སྐྱོར་གནང་མཁན་གྱི་མདོ་སྨད་རྒྱ་ཆེ་མི་མང་ཚང་མར་ཐུགས་རྗེ་ཆེ་ཞུ་རྒྱུ་ཡིན་ལ། ༧གོང་ས་རྒྱལ་བ་རིན་པོ་ཆེ་མཆོག་གིས་བཙུགས་པའི་སྒྲིག་འཛུགས་དེ་ལ་ཞབས་ཕྱི་ཞུ་རྒྱུའི་གོ་སྐབས་བྱུང་བར་བསོད་ནམས་ཆེན་པོ་ཡིན་དྲན་གྱི་ཡོད། ཅེས་དང་། བལ་ཡུལ་ནང་གི་བོད་མིའི་གནས་སྟངས་དེ་ཛ་དྲག་རེད། འདས་ལོར་བལ་ཡུལ་ནང་གནད་དོན་ཞིག་བྱུང་ནས། བལ་ཡུལ་གྱི་སྐུ་ཚབ་དོན་གཅོད་ལས་ཁུངས་དང་སྤྱི་འཐུས་བཅས་སུ་མ་ཉེས་ཁ་གཡོགས་ཀྱི་གནས་ཚུལ་དེའི་རིགས་བྱུང་བ་རེད། རྒྱུ་མཚན་དེ་ལ་བརྟེན་ནས་བལ་ཡུལ་ནང་གི་གནས་སྟངས་ཛ་དྲག་རེད་ལ། བལ་ཡུལ་གྱི་བོད་མིའི་གནས་སྟངས་ལའང་བསམ་ཡུལ་ལས་འདས་པའི་ཛ་དྲག་ཡོད་རེད། བྱས་ཙང་གནད་དོན་དེའི་རིགས་གཙོ་བོ་འཛིན་སྐྱོང་བཀའ་ཤག་གིས་དཀའ་ངལ་དེ་དག་སེལ་ཐབས་སླད་སྲིད་ཇུས་ཤིག་གཏན་གཏན་དགོས་ཀྱི་རེད་བསམ་གྱི་འདུག ཅེས་གསུངས་སོང་།
ཡང་འདི་གའི་གསར་འགོད་པས་སྤྱི་འཐུས་བཀྲ་ཤིས་དོན་གྲུབ་ལགས་བལ་ཡུལ་དུ་བཞུགས་ཀྱི་ཡོད་སྟབས། ད་ལན་གྱི་སྤྱི་འཐུས་ཀྱི་ལས་ཡུན་ནང་བལ་ཡུལ་གྱི་བོད་མིའི་དཀའ་ངལ་དང་འབྲེལ་ལས་དོན་ག་རེ་གཉེར་འདུན་ཡོད་མེད་དྲིས་པར། ཁོང་གིས། ང་རང་ལ་ཆ་བཞག་ན་བལ་ཡུལ་ནང་ཛ་དྲག་གི་གནས་སྟངས་བྱུང་བ་དང་། བོད་མི་མང་སྤྱི་འཐུས་ཤིག་ཡིན་པའི་ཆ་ནས། འབྲེལ་ཡོད་ལྷན་ཁང་ལ་ཞུ་རྒྱུའི་རིགས་དང་། ལྷག་པར་བོད་མི་མང་སྤྱི་འཐུས་ཚོགས་གཙོ་གཙོས་པའི་རྒྱུན་ལས་རྣམ་པ་ཚོ་ལ་སྙན་གསེང་ཞུ་རྒྱུ་དེ་ལས་འགན་ཡིན་པ་བཞིན་བྱས་པ་ཡིན། གཙོ་བོ་བལ་ཡུལ་ནང་གི་བོད་མིའི་དཀའ་ངལ་དེ་གསར་པ་ཞིག་མ་རེད། ཕྱི་ལོ་ ༡༩༩༥ ལོ་ཙམ་ནས་བོད་མི་རྣམས་ལ་ལག་ཁྱེར་མཚོན་པའི་དཀའ་ངལ་རིགས་མང་དག་ཅིག་བྱུང་ཡོད་ལ། དཀའ་ངལ་རྣམས་ཞིབ་ཕྲར་བཤད་པ་ཡིན་ན་བསམ་ཡུལ་ལས་འདས་པ་ཞིག་ཡིན་སྟབས། དཀའ་ངལ་དེ་དག་སེལ་སླད་སྲིད་ཇུས་ཤིག་གཏན་འབེབས་བྱ་དགོས་པ་མ་གཏོགས། བལ་ཡུལ་ནང་གི་གནས་སྟངས་དེ་དངོས་གནས་ལྷིང་དུ་འགྲོ་རྒྱུ་དེ་དཀའ་ལས་ཁག་པོ་རེད། ཅེས་གསུངས་སོང་།
སྤྱི་འཐུས་གསེར་རྟ་བཀྲ་ཤིས་དོན་གྲུབ་ལགས་ནི། ཕ་ཚེ་འདས་མགོ་ལོག་གསེར་རྟ་བཀྲ་ཤིས་ཟླ་བ་དང་མ་ཚེ་རིང་པདྨ་གཉིས་ཀྱི་བུ་རུ་བལ་ཡུལ་གློ་སྨོན་ཐང་དུ་སྐྱེས། ཕྱི་ལོ་ ༡༩༨༩ ལོར་མཐོ་སློབ་ཐོན་རྗེས། ཕྱི་ལོ་ ༡༩༩༠ ནས་ ༢༠༠༠ བར་བལ་ཡུལ་སྤོག་ར་གློ་སྒྲིག་ཁྱབ་ཁོངས་ཚོང་ལས་སྡེ་ཚན་ཨར་ན་པུར་ན་མགྲོན་ཁང་ (Hotel Annapur-na) ནང་ལས་འགན་འདྲ་མིན་ཐོག་ལོ་ངོ་བཅུ་ལྷག་ཙམ་གྱི་ཉམས་མྱོང་ཐོབ། ཕྱི་ལོ་ ༡༩༩༨ ནས་ ༢༠༠༠ བར་སྤོག་ར་བྱམས་པ་གླིང་ས་གནས་གཞོན་ནུའི་རྒྱུན་ལས་བྱས། དེ་ནས་རང་གཞུང་དཔལ་འབྱོར་ལས་ཁུངས་ཀྱི་བཀའ་འབྲེལ་ཐོག་ཕྱི་ལོ་ ༢༠༠༠ ནས་ ༢༠༠༣ བར་བལ་ཡུལ་བོད་ཀྱི་གསོལ་མགྲོན་ཁང་ (Hotel Tibet) གི་འགན་འཛིན་ལས་རོགས་དང་དེའི་རྗེས་གནས་སྤར་གྱི་འགན་འཛིན་ཐོག་ཞབས་ཞུ་ཞུས། ཕྱི་ལོ་ ༢༠༠༣ ནས་ ༢༠༠༦ དང་ ༢༠༠༦ ནས་ ༢༠༠༨ བར་བལ་ཡུལ་ནང་སྐར་མ་གསུམ་ཅན་གྱི་མགྲོན་ཁང་གངས་ལྗོངས་ (Hotel Gangjong) དང་མ་ནང་ (Hotel Manang) གཉིས་ཀྱི་སྤྱི་ཁྱབ་འགན་འཛིན་བྱས།
ཕྱི་ལོ་ ༢༠༠༨ ནས་ ༢༠༡༡ དང་ཡང་ ༢༠༡༤ ནས་ ༢༠༡༩ བར་རང་གཞུང་ནང་སྲིད་ལས་ཁུངས་ཀྱི་ཁྱབ་ཁོངས་ཚེ་རིང་རྒན་གསོ་ཁང་གི་འགན་འཛིན་བྱས། ཕྱི་ལོ་ ༢༠༡༣ ནས་ ༢༠༡༨ བར་མདོ་སྨད་དབུས་སྤྱི་ཁྱབ་རྒྱུན་ལས་ཀྱི་སྐབས་ ༡༥ དང་ ༡༦ གི་ཕྱི་འབྲེལ་འགན་འཛིན་བྱས། བལ་ཡུལ་མདོ་སྨད་སྐབས་ ༥ ནས་སྐབས་ ༡༠ པའི་ས་གནས་རྒྱུན་ལས་ཀྱི་ཚོགས་གཞོན་ལས་འགན་ཐོག་སྔ་རྗེས་ཐེངས་དྲུག་བསྟུད་མར་གནང་། བོད་མི་མང་སྤྱི་འཐུས་སྐབས་ ༡༥ དང་། ༡༦། ༡༧ དང་། ད་ལྟ་སྐབས་ ༡༨ པའི་སྤྱི་འཐུས་ལས་འགན་ཞུ་མུས་ཡིན།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
