རྩོམ་པ་པོ་འཛུམ་ཤུལ་འཇམ་དབྱངས་ཐབས་མཁས་ལགས་ཀྱིས་བརྩམས་པའི་བོད་བླ་བྲང་བཀྲིས་འཁྱིལ་དུ་རྒྱ་གཞུང་ལ་ཞི་བའི་ངོ་རྒོལ་བྱས་པའི་བརྒྱུད་རིམ་དང་རྒྱབ་ལྗོངས། རྒྱ་ནག་གཞུང་གིས་དགོན་པར་སྔོག་བཤེར། གྲྭ་དམངས་འཛིན་བཟུང་བྱས་པའི་གནས་ཚུལ་གསལ་བའི་དཔེ་དེབ་ཅིག་དབུ་འབྱེད་གནང་།
དེ་རིང་ཕྱི་ཚེས་ ༡༢ ཉིན་དྷ་ས་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྩོམ་པ་པོ་འཛུམ་ཤུལ་འཇམ་དབྱངས་ཐབས་མཁས་ལགས་ཀྱིས་བརྩམས་པའི་ཕྱི་ལོ་ ༢༠༠༨ ལོའི་ཞི་རྒོལ་ཆེན་མོའི་མྱོང་བྱང་། ཚེ་སྲོག་གཏའ་མར་བཞག་པའི་བདེན་པའི་ང་རོ་ཞེས་པའི་དཔེ་དེབ་ཅིག་དབུ་འབྱེད་གནང་སོང་། སྐབས་དེར་དྲ་ཐོག་ནས་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ནང་དངོས་སུ་མཉམ་ཞུགས་བྱེད་མཁན་རྩོམ་པ་པོ་འཛུམ་ཤུལ་འཇམ་དབྱངས་ཐབས་མཁས་ལགས་དང་། འཇམ་དབྱངས་སྦྱིན་པ་ལགས། འཇིགས་མེད་རྒྱ་མཚོ་ལགས་ཀྱིས་ཞི་བའི་ལས་འགུལ་སྐབས་དངོས་སུ་མཉམ་ཞུགས་གནང་བའི་སྐབས་ཀྱི་མྱོང་ཚོར་སྐོར་གཏམ་བཤད་གནང་སོང་།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཟླ་བ་ལགས་ཀྱིས། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་ནི་བོད་མིའི་རང་དབང་འཐབ་རྩོད་ཀྱི་ལོ་རྒྱུས་ཀྱི་ཀྱོག་མཚམས་ཤིག་ཡིན་པ་དང་། དེ་ནི་རྒྱ་ནག་གཞུང་གིས་བཤད་པ་ལྟར་དར་དམར་འོག་འཚར་ལོངས་བྱུང་བའི་བོད་ཀྱི་མི་རབས་གསར་པས་སྣེ་ཁྲིད་བྱས་པ་ཞིག་ཆགས་ཡོད་ཅིང་། ངོ་རྒོལ་གྱི་གྱེན་ལངས་དེ་ནི་ ༡༩༥༩ ཡི་གྱེན་ལངས་ཆེན་མོའི་རྗེས་ཀྱི་གཞི་ཁྱོན་ཆེ་ཤོས་དང་དུས་ཡུན་རིང་ཤོས་ཤིག་ཀྱང་ཆགས་ཡོད་ཅིང་། གྱེན་ལངས་དེ་དང་འབྲེལ་བའི་གནས་ཚུལ་མཁོ་སྒྲུབ་དང་ཕྱོགས་བསྒྲིགས་བྱ་རྒྱུ་དེ་ཧ་ཅང་གི་གལ་ཆེན་ཡིན་པར་བརྟེན། འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་ཀྱང་བོད་ནང་གི་ཞི་རྒོལ་གྱེན་ལངས་དང་འབྲེལ་བའི་གནས་ཚུལ་མཁོ་སྒྲུབ་དང་ཕྱོགས་བསྒྲིགས་བྱ་རྒྱུ་དེ་གལ་ཆེར་ངོས་འཛིན་བྱས་ཏེ་ད་ལམ་གྱི་དེབ་འདི་པར་སྐྲུན་བྱས་པ་ཡིན། ཞེས་བརྗོད་སོང་།
བསྟན་འཛིན་ཟླ་བ་ལགས་ཀྱིས་མུ་མཐུད་དུ། དེབ་འདིའི་རྩོམ་པ་པོ་འཛུམ་ཤུལ་འཇམ་དབྱངས་ཐབས་མཁས་ལགས་ཀྱིས། ཕྱི་ལོ་ ༢༠༠༨ ལོར་མདོ་སྨད་བླ་བྲང་བཀྲིས་འཁྱིལ་དུ་རྒྱ་གཞུང་ལ་ཞི་བའི་ངོ་རྒོལ་གྱི་སྣེ་ཁྲིད་བྱས་པའི་བརྒྱུད་རིམ་དང་རྒྱབ་ལྗོངས། རྒྱ་དམག་གིས་དགོན་པར་སྔོག་བཤེར་དང་། གྲྭ་དམངས་འཛིན་བཟུང་བྱས་པའི་གནས་ཚུལ་དེ་དག་སྐབས་དེའི་དངོས་ཡོད་ཀྱི་གནས་ཚུལ་གཞི་རྩར་བཟུང་ནས་ལོ་རྒྱུས་ཀྱི་དེབ་ཐེར་ནང་འགོད་ཡོད་པ་མ་ཟད། རང་ལུས་མེ་སྲེག་གཏོང་མཁན་གྱི་དཔའ་བོ་དཔའ་མོ་མང་པོ་ཞིག་གི་མཚན་གཞུང་དང་ས་གནས། དུས་ཚོད་སོགས་གསལ་པོར་འགོད་བསྔགས་བརྗོད་ཞུ་བཞིན་ཡོད། ཅེས་དང་། དེབ་འདི་ནི་བོད་མིའི་རང་དབང་འཐབ་རྩོད་ཀྱི་ལོ་རྒྱུས་སྤྱི་དང་། ལྷག་པར་དུ་ས་བྱི་ཞི་རྒོལ་ཆེན་མོའི་སྐབས་མདོ་སྨད་བླ་བྲང་བཀྲིས་འཁྱིལ་དུ་བྱུང་བའི་ཞི་རྒོལ་འཐབ་རྩོད་ལ་ཞིབ་འཇུག་བྱེད་པའི་ལོ་རྒྱུས་ཀྱི་དཔྱད་གཞི་གལ་ཆེན་ཞིག་ཆགས་ཀྱི་ཡོད་སྟབས། བོད་མི་ཚང་མས་འདི་དང་འདི་ལྟ་བུའི་དཔེ་དེབ་ཀྱི་རིགས་ལ་ངེས་པར་དུ་བལྟ་ཀློག་བྱ་དགོས་པའི་འབོད་སྐུལ་ཞུ་བཞིན་ཡོད། ཅེས་བརྗོད་བྱུང་།
རྩོམ་པ་པོ་འཛུམ་ཤུལ་འཇམ་དབྱངས་ཐབས་མཁས་ལགས་ཀྱིས། ཕྱི་ལོ་ ༡༩༤༩ ལོ་ནས་རྒྱ་ནག་དམར་པོའི་བཙན་འཛུལ་གྱི་འོག་ནས། བོད་ཀྱི་སྣོད་བཅུད་ཡོངས་སུ་རྫོགས་པར་ཆག་འཇིག་རབ་དང་རིམ་པ་བྱུང་བ་རེད། དེ་བཞིན་ཕྱི་ལོ་ ༡༩༥༨ དང་ ༡༩༥༩ ལྷག་པར་ཕྱི་ལོ་ ༡༩༦༦ བཅས་སུ་བོད་ཀྱི་ཆོས་དང་རིག་གཞུང་གི་ལྟེ་གནས་སུ་གྱུར་བའི་དགོན་པ་དྲུག་སྟོང་ལྷག་ཅིག་རྩ་མེད་དུ་བཏང་བ་དང་། བོད་ཁམས་འདི་དམྱལ་བ་མི་ཡུལ་དུ་བསླེབས་པ་ལྟ་བུའི་དཀའ་སྡུག་མང་པོ་ཞིག་བྱུང་བ་རེད་ལ། བོད་ཀྱི་མི་རབས་སྔ་མ་རྣམས་ཀྱིས་ལོ་རྒྱུས་སྟེང་བྱུང་མ་མྱོང་བའི་མུ་གེ་ཡི་དུས་སྐབས་ཤིག་བྱུང་སྟེ་མུན་ནག་གི་ལོ་ཟླ་རིང་པོ་ཞིག་བསྐྱལ་དགོས་བྱུང་བའི་ལོ་རྒྱུས་ཤིག་བྱུང་བ་རེད། ཕྱི་ལོ་ ༡༩༨༠ ཙམ་ནས་སྲིད་ཇུས་གུ་ཡངས་ཅུང་ཙམ་ཞིག་བྱུང་ནའང་། མི་རིགས་ས་གནས་རང་སྐྱོང་གི་བཅའ་ཁྲིམས་ཟེར་བ་སོགས་ཡོད་པ་དག་ཁ་ནས་བཤད་པ་ཙམ་ལས་ལག་ལེན་དངོས་ཀྱི་ཐོག་ནས། མི་རིགས་ས་གནས་རང་སྐྱོང་གི་བཅའ་ཁྲིམས་སྒང་ནས་བོད་ཀྱི་སྐད་ཡིག་དང་རིག་གཞུང་། ཁོར་ཡུག་སོགས་གང་དང་གང་གི་ཐད་ན་ཡིན་ནའང་དམ་དྲག་བྱས་ཡོད་ལ། བོད་ནང་འགྲོ་བ་མིའི་ཐོབ་ཐང་མེད་པའི་གནས་སྟངས་དེའི་ཐོག་ནས། ཕྱི་ལོ་ ༢༠༠༨ ལོར་བོད་ཁམས་ཡོངས་སུ་ས་བྱི་ཞི་རྒོལ་ཆེན་པོ་ཞིག་བྱུང་བ་རེད། ཕྱི་ལོ་ ༢༠༠༨ ཟླ་ ༣ ཚེས་ ༡༤ དང་ ༡༥ ཉིན་བོད་བླ་བྲང་ཁུལ་དུ་ངོ་རྒོལ་སྐད་འབོད་ཀྱི་གཞི་རྒྱ་ཆེ་བའི་ལས་འགུལ་ཞིག་བརྩམས་པར་བརྟེན། རྒྱ་ནག་གཞུང་གི་དྲག་དམག་དང་ཉེན་རྟོག་པ་མང་པོ་ཞིག་གིས་དྲག་པོའི་བཙན་གནོན་བྱས་ཏེ། མི་མང་དག་ཅིག་འཛིན་བཟུང་བྱས་པ་མ་ཟད། སྙིང་རྗེ་སྤུ་ཙམ་མེད་པའི་ཐོག་ནས་མནར་གཅོད་ཚད་མེད་ཅིག་བཏང་བས། མི་མང་པོ་ཞིག་ལ་རྨས་སྐྱོན་དང་གཅོང་ནད་ཅན་དུ་གྱུར་ནས་ཚེ་སྲོག་ཤོར་བའི་གནས་ཚུལ་བྱུང་ཡང་། བོད་ནང་གི་དངོས་ཡོད་ཀྱི་གནས་སྟངས་དེ་རྒྱལ་སྤྱིའི་ནང་ཁྱབ་རྒྱུ་ཧ་ཅང་ཁག་པོ་ཆགས་ཡོད་རེད། ཅེས་བརྗོད་སོང་།
ཡང་ཁོང་གིས། ཕྱི་ལོ་ ༢༠༠༨ ལོའི་ཞི་རྒོལ་ཆེན་མོའི་མྱོང་བྱང་། ཚེ་སྲོག་གི་གཏའ་མར་བཞག་པའི་རེ་འབོད་ཀྱི་ང་རོ་ཞེས་པའི་དཔེ་དེབ་དེ་ཕྱི་ལོ ༢༠༢༣ ལོར་ལོ་རྒྱུས་ཀྱི་གལ་གནད་ཅིག་ཏུ་མཐོང་ནས་འབྲི་མགོ་བཙུགས་ཡོད་ཀྱང་། བོད་ནང་གི་རྒྱལ་གཅེས་དཔའ་བོ་དཔའ་མོ་མང་དག་ཅིག་གི་དངོས་ཡོད་ཀྱི་གནས་བབ་མང་པོ་ཞིག་རྒྱ་ནག་གཞུང་གི་དམ་དྲག་དང་བཙན་གནོན་གྱི་དབང་གིས་ཁ་གསལ་བྲིས་ཐུབ་མེད་ཀྱང་། ང་རང་གི་ཕྱི་ལོ་ ༢༠༠༨ ལོར་བླ་བྲང་ཁུལ་དུ་ངོ་རྒོལ་འབྱུང་སྐབས་ཀྱི་མཐོང་ཐོས་མྱོང་གསུམ་བཅས་བྲིས་ཡོད། ཅེས་བརྗོད་སོང་།
དགེ་འདུན་པ་འཇམ་དབྱངས་སྦྱིན་པ་ལགས་ཀྱིས། བླ་བྲང་བཀྲ་ཤིས་འཁྱིལ་ལྟ་བུར་མཚོན་ན། ཕྱི་ལོ་ ༢༠༠༨ ཟླ་ ༣ ཚེས་ ༡༤ དང་ ༡༥ ཉིན་གཉིས་རིང་མི་མང་སྟོང་ཕྲག་མང་པོ་འཛོམས་ཏེ་ཞི་བའི་ལས་འགུལ་རྒྱ་ཆེན་པོ་སྤེལ་ཡོད་རེད། རྩ་བའི་ཆ་ནས་རྒྱ་ནག་གིས་བོད་ནང་གི་དངོས་ཡོད་གནས་སྟངས་རྣམས་གསང་བ་བྱས་ཏེ་ཡོངས་བསྒྲགས་བྱེད་ཀྱི་མེད་པ་རེད། ལོ་དེའི་ཕྱི་ཟླ་ ༤ ཚེས་ ༩ ཉིན་རྒྱལ་སྤྱིའི་གསར་འགོད་སྡེ་ཚན་ཡོང་གི་ཡོད་པར་བརྟེན་སྔ་ས་ནས་རྒྱལ་དར་ཆེན་པོ་བཟོས་ཏེ་གྲ་སྒྲིག་བྱས་ཡོད་པ་མ་ཟད། སྐབས་དེ་དུས་ཚོགས་པ་དེའི་བརྒྱུད་ཡོངས་བསྒྲགས་བྱ་རྒྱུའི་གོ་སྐབས་བྱུང་བ་རེད། ཞི་བའི་ལས་འགུལ་སྤེལ་རྒྱུའི་གོ་སྐབས་བྱུང་བ་དེ་སོ་སོའི་མི་ཚེ་ནང་གི་དོན་སྙིང་ལྡན་པའི་བྱ་བ་ཅིག་ལ་ངོས་འཛིན་བྱེད་ཀྱི་ཡོད། ལས་འགུལ་ནང་དངོས་སུ་མཉམ་ཞུགས་བྱེད་མཁན་མི་ཁག་ཅིག་གི་ཚེ་སྲོག་ཤོར་སོང་བ་དང་། བཙོན་ཁང་ནང་དུས་ཡུན་རིང་པོའི་རིང་སྡུག་སྦྱོང་མནར་གཅོད་གཏོང་བ་ལ་སོགས་པའི་གནས་ཚུལ་མང་པོ་ཡོད་པ་རེད། རྩ་བའི་ཆ་ནས་ལས་འགུལ་ནང་མཉམ་ཞུགས་ཀྱིས་བློས་གཏོང་ཆེན་པོ་བྱས་པར་བརྟེན། ང་ཚོ་ཚང་མ་ལ་དཀའ་ངལ་རབ་དང་རིམ་པ་ཡོད་བསྡད་པ་དེ་ཤོད་མི་དགོས་པ་ཞིག་རེད། ཅེས་དང་། བོད་ནང་ལས་འགུལ་གང་འདྲ་ཞིག་སྤེལ་རུང་ལག་ཏུ་གོ་མཚོན་གང་ཡང་མེད་པར་རྒྱ་མི་ལ་རེ་འདུན་ཞུས་པ་དང་འབོད་སྒྲ་སྒྲོག་པའི་སྐབས། རྒྱ་ནག་གིས་ཚུར་ལ་རྨས་སྐྱོན་གཏོང་བ་དང་དྲག་གནོན་བྱས་ཏེ་ཁ་གཏད་གཅོག་སྐབས། ང་ཚོས་མཐའ་གཅིག་ཏུ་འཚེ་མེད་ཞི་བའི་ཐོག་ནས་ཁ་གཏད་བཅག་པ་དེ་རྗེས་དྲན་བྱ་དགོས་པ་དང་། རྒྱལ་སྤྱིའི་སྟེང་ལ་སྤོབས་པ་བྱས་ནས་སྐད་ཆ་བཤད་དགོས་པ་ཞིག་རེད། ཅེས་བརྗོད་སོང་།
ཡང་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་གིས་ནམ་ཞག་རྒྱུན་དུ་ནས་ང་ཚོའི་ཆབ་སྲིད་དེ་ནང་པ་སངས་རྒྱས་པའི་ཆོས་དང་འབྲེལ་བ་ཡོད་པ་གསུངས་པ་བཞིན། འཛམ་གླིང་སྒང་ལ་རིག་གཞུང་རྩ་ཆེན་པོ་ཞིག་དང་འབྲེལ་ནས་འཛམ་གླིང་ལ་ཞབས་འདེགས་ཞུ་རྒྱུའི་ལག་ཆ་གལ་ཆེ་ཤོས་ཤིག་ཆགས་ཀྱི་ཡོད་སྟབས། ད་ལྟ་ང་ཚོས་བློས་གཏོང་བྱས་པ་དང་ལས་འགུལ་སྤེལ་མུས་ཡིན་པ་དེའང་ཆབ་སྲིད་ཀྱི་ལས་འགུལ་རྐྱང་པ་ཞིག་མིན་པར། ང་ཚོའི་མི་རིགས་ཀྱི་ངོ་བོ་སྲུང་སྐྱོབ་བྱ་རྒྱུ་དང་། རྒྱ་ཆེ་ས་ནས་འཛམ་གླིང་འདིའི་སྒང་ལ་ལེགས་སྐྱེས་ཕུལ་དུ་བྱུང་བ་དབུལ་རྒྱུའི་ནུས་པ་དེ་སྲུང་སྐྱོབ་དང་མཐུན་འགྱུར་བྱ་རྒྱུ་ཞིག་ཆགས་ཀྱི་ཡོད་རེད། ཅེས་བརྗོད་སོང་།
འཇིགས་མེད་རྒྱ་མཚོ་ལགས་ཀྱིས། ཕྱི་ལོ་ ༢༠༠༨ ལོར་བོད་ནང་ཞི་བའི་ལས་འགུལ་སྤེལ་བར་རིགས་གཉིས་ཡོད་པ་རེད། ཁག་ཅིག་གིས་སོ་སོའི་ངོས་ནས་དམ་བཅའ་བཞག་སྟེ་ངོ་རྒོལ་བྱེད་ཀྱི་ཡིན་ཞེས་བརྗོད་དེ་སྔ་ས་ནས་གྲ་སྒྲིག་ཡོད་པ་རེད། ཡང་ཁག་ཅིག་གིས་ང་ཚོས་སྐད་འབོད་བྱེད་སྐབས་སོ་སོ་ལ་སྐབས་དེ་དུས་ཚོར་བ་བསླེབས་ནས་སྐད་འབོད་ནང་མཉམ་ཞུགས་བྱེད་མཁན་ཡང་ཡོད་རེད། ང་ཚོས་སོ་སོའི་ངོས་ནས་སྔ་ས་ནས་གྲ་སྒྲིག་བྱས་ཏེ། བོད་མི་རིགས་དང་རྒྱལ་ཁབ་ཀྱི་དོན་དུ་ངོ་རྒོལ་བྱེད་དགོས་པའི་སེམས་ཤུགས་སྤར་ནས་ཞི་བའི་ལས་འགུལ་དེ་སྤེལ་བ་རེད། སོ་སོའི་ངོས་ནས་བོད་ནང་བྱུང་དང་འབྱུང་བཞིན་པའི་གནས་སྟངས་དང་། རྒྱ་ནག་གིས་བོད་མིར་དྲག་གནོན་ཤུགས་ཆེན་བྱེད་བཞིན་པའི་དཀའ་ངལ་དེ་དག་འཛམ་གླིང་སྟེང་གོ་རྟོགས་སྤེལ་རྒྱུ་དང་ཁྱབ་བསྒྲགས་ཀྱི་ནུས་པའི་ཐོག་ནས་འཛམ་གླིང་གི་མི་རྣམས་ཀྱིས་བོད་ནང་གི་དངོས་ཡོད་གནས་སྟངས་དེ་ཧ་གོ་ན་བསམ་པའི་ཀུན་སློང་དེ་འཁུར་བའི་ཐོག་ནས་ལས་འགུལ་སྤེལ་བ་རེད། ང་རང་གི་མཐོང་ཚུལ་ལ་ང་ཚོས་བོད་ཕྱི་ནང་གཉིས་སུ་ལས་འགུལ་གང་འདྲ་ཞིག་སྤེལ་རུང་། སྐབས་ཐོག་སྐབས་ཐོག་གི་བོད་ནང་གི་གནས་སྟངས་དེ་འཛམ་གླིང་ལ་གོ་རྟོགས་སྤེལ་རྒྱུ་དང་། བོད་དོན་དྲིལ་བསྒྲགས། ཁྱབ་སྤེལ་བྱ་རྒྱུ་གལ་ཆེན་པོ་རེད་འདུག ཅེས་སོགས་བརྗོད་སོང་།
ཕྱི་ལོ་ ༢༠༠༨ ལོའི་ཞི་རྒོལ་ཆེན་མོའི་མྱོང་བྱང་། ཚེ་སྲོག་གི་གཏའ་མར་བཞག་པའི་རེ་འབོད་ཀྱི་ང་རོ་ཞེས་པའི་དཔེ་དེབ་དེའི་ནང་ཕྱི་ལོ་ ༢༠༠༨ ལོའི་ཞི་རྒོལ་ཆེན་མོའི་མྱོང་བྱང་དང་། རྒྱལ་གཅེས་དཔའ་བོའི་རྗེས་དྲན་གསེར་གྱི་རྡོ་རིང་། དུས་རབས་ཀྱི་ཅོང་བརྡ། མི་རབས་སྔ་མའི་ལོ་རྒྱུས། མི་སྒེར་གྱི་མྱོང་བྱང་ཞེས་ལེའུ་ལྔ་ཡོད་པའི་ཁྲོད། བོད་ནང་གི་ས་བྱི་ཞི་རྒོལ་ལང་དོན་དང་། རྒྱ་ནག་གཞུང་གིས་བླ་བྲང་ཁུལ་དུ་དམ་དྲག་དང་འཛིན་བཟུང་བྱས་པའི་གོ་རིམ། བོད་ནང་གི་ས་གནས་མང་དག་ཅིག་ཏུ་ངོ་རྒོལ་བྱས་པའི་བརྒྱུད་རིམ། མི་རབས་སྔ་མ་རྣམས་ཀྱིས་རྒྱ་ནག་གཞུང་གི་དྲག་གནོན་གྱི་འོག་ནས་དཀའ་སྡུག་མྱངས་པའི་བརྒྱུད་རིམ་སོགས་གསལ་སྟོན་གནང་ཡོད་པ་རེད།
གསར་འགོད་པ། བསྟན་འཛིན་ཕུར་བུ། དཔལ་ལྡན།
