བདེ་སྙན་ལ་བསྐྱར་ཞིབ་དགོས་པའི་ཞུ་སྙན་ཕུལ། 

ཆེས་མཐོའི་ཁྲིམས་ཞིབ་ཁང་གིས་བདེ་སྙན་གྱི་ངོ་བོ་དང་། རྐྱེན་རྩ། དགོས་འདུན་བཅས། ཁ་མཆུ་ཨང་ ༢༢ པ་དང་གཅིག་མཚུངས་ཆགས་སྟབས་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་བརྩི་མེད་དུ་བཏང་བར་བསྐྱར་ཞིབ་དགོས་པའི་ཞུ་སྙན་ཕུལ།

ཕྱི་ཚེས་ ༡༢ ཉིན་ཆེས་མཐོའི་ཁྲིམས་ཞིབ་ཁང་གིས་བདེ་སྙན་གྱི་ངོ་བོ་དང་། རྐྱེན་རྩ། དགོས་འདུན་བཅས། ཁ་མཆུ་ཨང་ ༢༢ པ་དང་གཅིག་མཚུངས་ཆགས་སྟབས། ཁ་མཆུ་ཨང་ ༢༢ ནང་གྱོད་ཡ་སྣོན་མའི་ངོ་བོའི་ཐོག་ནས་ཞུ་གཏུག་བྱ་ཆོག་པ་ལས། རྐྱེན་རྩ་གཅིག་ལ་ཞུ་རྩོད་གཅིག་ལས་མང་བ་ཆགས་པ་ཡིན་ན། ཁྲིམས་ཡིག་གི་བྱ་རིམ་ཚུལ་མིན་དུ་གྱུར་ཉེན་སོང་།  སྤྱི་མང་ཁྲིམས་ཡིག་དོན་ཚན་ ༨༨ དགོངས་དོན་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་བརྩི་མེད་དུ་བཏང་བའི་ཐག་གཅོད་གནང་ཡོད་སྟབས། དེ་རིང་སྤྱི་དམངས་གཏུགས་གཤེར་གྱི་དོན་ཚན་རེ་བཞིའི་ནང་གསེས་ཀ་བའི་ནང་གསེས་གཉིས་པའི་དགོངས་དོན་བཞིན། བདེ་སྙན་བསྐྱར་ཞིབ་དགོས་པའི་ཞུ་སྙན་ཕུལ་སོང་། 

དེའི་ཐད་བོད་ཀྱི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་བྱམས་པ་དབང་ཕྱུག་ལགས་ཀྱིས། ཕྱི་ཚེས་ ༩ ཉིན་སྤྱི་དམངས་གཏུགས་གཤེར་གྱི་དོན་ཚན་རེ་དགུ་པའི་ (ཁ) བའི་ནང་གསེས་བཞིན། བདེ་སྙན་པ་གཙོ་བོ་སེངྒེ་ཤེས་རབ་དང་། དགོན་སྡེ་ཁག་གཉིས་ཀྱི་ཐོག་མའི་ཉན་ཞིབ་དེ་འགྲོ་ཡོད་པ་རེད་ལ། ཐོག་མའི་ཉན་ཞིབ་ལ་ཆ་མཚོན་པ་ཡིན་ན་གཙོ་བོ་གཞི་རྩའི་ཐོབ་ཐང་རྡོག་རོལ་འགྲོ་ཡོད་མེད་ཀྱི་ཐོག་ལ་ཁུངས་སྐྱེལ་བྱ་དགོས་ཀྱི་ཡོད་རེད། ཁྲིམས་ཞིབ་པ་རྣམས་ཀྱི་ཐག་གཅོད་ཁྲོད་སྤྱི་དམངས་གཏུག་གཤེར་གྱི་དོན་ཚན་ཁ་པ་ནང་བཞིན་གཞི་རྩའི་ཐོབ་ཐང་རྡོག་རོལ་འགྲོ་ཡོད་མེད་ཐད་ཁུངས་སྐྱེལ་བྱས་པ་ཡིན་ན། བདེ་སྙན་དེ་ངོས་ལེན་བྱ་རྒྱུ་དང་། གལ་ཏེ་ཁུངས་སྐྱེལ་བྱ་མ་ཐུབ་ན་ངོས་ལེན་མེད་ཅེས་ཐག་གཅོད་ཞུ་དགོས་ཀྱང་། ཕྱི་ཚེས་ ༡༢ ཉིན་ཁྲིམས་ཞིབ་ཁང་གིས་དོན་ཚན་བཞི་ཅན་ཞིག་ཐག་གཅོད་ཞུས་ཡོད། ཅེས་བརྗོད་བྱུང་། 

ཡང་ཁོང་གིས། སྤྱིར་བཏང་ཁ་མཆུ་ཨང་ ༢༢ དང་བདེ་སྙན་གཉིས་ཀྱི་ངོ་བོ་དང་བྱ་རིམ་རྦད་དེ་ཐ་དད་ཆགས་ཡོད་པ་རེད། དེ་བཞིན་སྤྱིར་རྐྱེན་རྩ་གཅིག་པ་ཆགས་ཀྱི་ཡོད་ཀྱང་ངོ་བོ་དང་། བྱ་རིམ། དེ་བཞིན་ཁྲིམས་སྒྲིག་ནང་གཟིགས་ན་དོན་ཚན་བཅུ་དགུ་ཡི་ནང་གསེས་དང་པོ་དང་གཉིས་པའི་ནང་། སྤྱིར་བདེ་སྙན་དང་ཁ་མཆུ་གཉིས་མཐུད་ཆོག་གི་མེད་པ་གསལ་པོ་ཡིན་དུས། དེ་རིང་ང་ཚོ་འདིར་བཅར་ནས་སྤྱི་དམངས་གཏུགས་གཤེར་གྱི་དོན་ཚན་རེ་བཞིའི་ (ཀ་) པའི་ནང་གསེས་གཉིས་པའི་ནང་གསེས་བཞིན། བསྐྱར་ཞིབ་ཞུ་ཆོག་པ་བཞིན་བསྐྱར་ཞིབ་ཀྱི་ཞུ་སྙན་ཞིག་ཕུལ་ཡོད། ཅེས་བརྗོད་བྱུང་། 

ཟླ་འདིའི་ཕྱི་ཚེས་ ༡༢ ཉིན་ཆེས་མཐོའི་ཁྲིམས་ཞིབ་ཁང་གི་ཆེས་མཐོའི་ཁྲིམས་ཞིབ་ཁང་གིས་བདེ་སྙན་གྱི་སྔོན་འགྲོའི་ཉན་ཞིབ་དང་ཐག་གཅོད་ཅིག་བྱས་པའི་ཁྲོད། བདེ་སྙན་པས་འདོན་འབུལ་བྱས་པའི་ཡིག་དངོས་ཐོ་གཞུང་ནང་གསལ་གྱི་ཟུཪ་སྦྱཪ་ ༡ ནས་ ༣ བཪ་གྱི་ཡིག་ཆ་ཁག་ཁ་མཆུ་ཞུ་སྦྱོར་དེབ་འགོད་ཨང་ ༢༢ ཀྱི་གྱོད་ཡས་འདོན་འབུལ་ཡིག་དངོས་ཐོ་གཞུང་ནང་གསལ་དང་གཅིག་མཚུངས་རེད་འདུག་པ་བཅས་ལ་བརྟེན། ཁྱེད་ཅག་གི་བདེ་སྙན་ཕྱི་ལོ་ ༢༠༢༦ །༥།༢༦ འཁོད་པ་དང་ཁ་མཆུ་ཞུ་སྦྱོར་དེབ་འགོད་ཨང་ ༢༢ ཀྱི་ངོ་བོ་དང་། རྐྱེན་རྩ། དགོས་འདུན་བཅས་པ་གཅིག་པ་ཆགས་ཀྱི་འདུག་པས། ཁྱེད་ཅག་བདེ་སྙན་པ་ཐུན་མོང་གི་ཞུ་གཏུག་ཐོབ་ཐང་སྲུང་སྐྱོབ་ཆེད་སྤྱི་མང་ཁྲིམས་ཡིག་དོན་ཚན་ ༡༩ [ཀ] པའི་དགོངས་དོན་ཁ་མཆུ་ཞུ་སྦྱོར་དེབ་འགོད་ཨང་ ༢༢ ནང་གྱོད་ཡ་སྣོན་མའི་ངོ་བོ་ཐོག་ནས་ཞུ་གཏུག་བྱེད་ན་འཐུས་རྒྱུ་དང་། རྐྱེན་རྩ་གཅིག་ལ་ཞུ་རྩོད་གཅིག་ལས་མང་བ་ཆགས་པ་ཡིན་ན། ཁྲིམས་ཡིག་གི་བྱ་རིམ་ཚུལ་མིན་དུ་ཆགས་ཉེན་ལ་སོང་། སྤྱི་མང་ཁྲིམས་ཡིག་དོན་ཚན་ ༨༨ དགོངས་དོན་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་བརྩི་མེད་སོང་བའི་ཐག་གཅོད། ཅེས་གསལ་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།