ཚོགས་གཙོ་སྒྲོལ་མ་ཚེ་རིང་མཆོག་གིས་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་ལས་བྱེད་དང་མཇལ་འཕྲད་གནང་།

སྐབས་བཅོ་བརྒྱད་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་ལས་བྱེད་དང་མཇལ་འཕྲད་གནང་ནས་ཨ་རི་གཞུང་གིས་བོད་དོན་རྒྱབ་སྐྱོར་གནང་བར་ཨ་རིའི་གཞུང་དམངས་གཉིས་ལ་ཡི་རངས་ཞུས་འདུག

ཟླ་འདིའི་ཕྱི་ཚེས་ ༢༢ ཉིན་སྐབས་བཅོ་བརྒྱད་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས། རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་འབྲེལ་ཡོད་ལས་བྱེད་སྐུ་ཞབས་མེག་ཁེ་རེ་མར་ (Mike Cramer) ལགས་དང་། ལྕམ་སྐུ་རཱ་དྷ་ར་ནི་ཐ་ཀུ་རེཡ་ (Radharani Thakuria) ལགས་རྣམ་གཉིས་དང་ལྷན་མཇལ་འཕྲད་གནང་སྟེ། ཨ་རིས་བཙན་བྱོལ་བོད་མིའི་སྤྱི་ཚོགས་སྲ་བརྟན་སླད་རོགས་དངུལ་མཐུན་བསྒྱུར་དང་རོགས་འདེགས་གནང་བར་བཀའ་དྲིན་ཆེན་པོ་ཡིན་སྐོར་དང་ཨ་རིས་མུ་མཐདུ་དུ་བོད་དོན་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་འདུག

མཇལ་འཕྲད་སྐབས་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས། ཨ་རིའི་གྲོས་ཚོགས་སུ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་པ་མ་ཟད། ཨ་རིའི་སྲིད་འཛིན་ཊོམ་ཕུ་མཆོག་གིས་ཁྲིམས་འཆར་དེར་ས་ཡིག་བསྐྱོན་ནས་ཨ་རིའི་ཁྲིམས་སུ་བསྒྱུར་བ་དང་། ལྷག་པར་ཨ་རིའི་རོགས་ཚོགས་ཀྱིས་བཙན་བྱོལ་བོད་མིའི་སྤྱི་ཚོགས་སྲ་བརྟན་དང་རྒྱུན་གནས་ཡོང་སླད། དབུས་བོད་མིའི་སྒྲིག་འཛུགས་ལ་རོགས་འདེགས་དང་བོད་དོན་ལ་རྒྱབ་སྐྱོར་གནང་བར་ཨ་རིའི་གཞུང་དམངས་གཉིས་ལ་ཐུགས་རྗེ་ཆེ་ཞུ་རྒྱུ་དང་། ཨ་རིའི་གཞུང་གིས་ཀྱང་རྒྱ་ནག་གཞུང་གིས་དྲང་བདེན་མིན་པའི་ཐོག་ནས་རྒྱལ་སྤྱིའི་ནང་བོད་དོན་འགྲེལ་ལོག་བྱེད་མུས་ཡིན་པར་གདོང་ལེན་གནང་རྒྱུའི་གལ་གནད་སོགས་ཀྱི་སྐོར་ལ་གསུངས་འདུག

ཡང་ཁོང་མོས། བོད་མི་མང་སྤྱི་འཐུས་ལྷན་ཚོགས་ཀྱིས་ལོ་ལྟར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་བསྡུ་སྐོང་བྱེད་ཀྱི་ཡོད་ཅིང་། ལྷག་པར་འདས་ལོར་ཉི་ཧོང་གི་རྒྱལ་ས་ཊོག་ཡོར་འཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་པའི་འཆར་གཞི་དང་། གྲོས་ཆོད་སོགས་ཀྱི་སྐོར་ལ་གླེང་སློང་གནང་འདུག་ལ། བོད་མཐོ་སྒང་ནི་ཨེ་ཤ་ཡའི་གཙང་པོ་ཁག་གི་འབྱུང་ཁུངས་དང་ལྷག་པར་བོད་ཀྱི་ས་ཁམས་ཆགས་ཚུལ་གྱི་ཐད་ནས། གོ་ལ་སྤྱིའི་རང་བྱུང་ཁོར་ཡུག་གི་འགྱུར་ལྡོག་ལ་འབྲེལ་བ་ཆེན་པོ་ཡོད་པའི་མུར། རྒྱ་གར་ཞི་བདེ་རྒྱ་མཚོའི་ཆག་འཇིག་ལའང་འབྲེལ་བ་ཆེན་པོ་ཡོད་སྐོར་སོགས་གསུངས་འདུག འདས་ལོའི་ཕྱི་ཟླ་ ༦ ཚེས་ ༣ དང་ ༤ བཅས་ཉིན་གྲངས་གཉིས་རིང་ཉི་ཧོང་གི་རྒྱལ་ས་ཊོག་ཡོ་རུ། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༩ པ་འཚོགས་ཡོད་ཅིང་། ཚོགས་ཆེན་ཐོག་བསྒྲགས་གཏམ་དོན་ཚན་ ༢༤ དང་གྲོད་ཆོད་དོན་ཚན་ ༦ གཏན་འབེབས་བྱུང་ལ། ཚོགས་ཆེན་དེའི་ཐོག་འཛམ་གླིང་རྒྱལ་ཁབ་ ༢༩ ཡི་སྐུ་ཚབ་དང་གྲོས་ཚོགས་འཐུས་མི་ ༡༤༢ ཀྱིས་མཉམ་ཞུགས་གནང་།

ལོ་ལྟར་རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཀྱི་ལས་བྱེད་དང་། ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་སོགས་བཞུགས་སྒར་དྷ་སར་ཕེབས་ནས། བཙན་བྱོལ་བོད་མིའི་ཤེས་ཡོན་ལྟེ་གནས་དང་སློབ་གྲྭ་ཁག་སོགས་ལ་གཟིགས་ཞིབ་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་བ་དང་། བཙན་བྱོལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཇལ་འཕྲད་བྱེད་ཀྱི་ཡོད་ལ། ཕྱི་ལོ་ ༢༠༢༣ ལོར་ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་ཞིག་དྷ་སར་ཕེབས་ཏེ་༧གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཇལ་འཕྲད་ཞུས་ཡོད་ལ། ཕྱི་ལོ་ ༢༠༢༢ ལོར་སྐབས་དེའི་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་(Uzra Zeya) མཆོག་གིས་སྣེ་ཁྲིད་པའི་ཨ་རིའི་གཞུང་འབྲེལ་མི་སྣའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་འཚམས་གཟིགས་སུ་ཕེབས་ནས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་པའི་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བཀའ་བློན་རྣམ་པ། དེ་བཞིན་བོད་མིའི་སྒྲིག་འཛུགས་ཀྱི་ལྷན་ཁང་གི་དྲུང་ཆེ་རྣམ་པ་དང་སྲི་ཞུའི་ལས་བྱེད་སོགས་དང་ཐུག་འཕྲད་གནང་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།