ཨོ་གླིང་གི་གྲོས་ཚོགས་འཐུས་མི་ལྔ་ཡིས་རྒྱ་ནག་གཞུང་གིས་བོད་ནང་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བ་ཞིག་ལག་བསྟར་གྱིས་བོད་མིའི་ངོ་བ་རྩ་མེད་གཏོང་ཐབས་བྱེད་ཀྱིན་ཡོད་པར་སྐྱོན་བརྗོད་གནང་།
ཨོ་གླིང་གྲོས་ཚོགས་འཐུས་རྣམས་ཀྱིས་རྒྱ་ནག་གི་ཁྲིམས་གསར་པར་སྐྱོན་བརྗོད་གནང་།
རྒྱ་ནག་གཞུང་གིས་བོད་ནང་དུ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བ་ཞིག་ལག་བསྟར་བྱེད་མགོ་བཙུགས་ཡོད་པ་ལྟར། ཉེ་ལམ་ཨོ་གླིང་གི་གྲོས་ཚོགས་ཐེངས་ ༤༨ པ་འཚོག་མུས་ཡིན་པ་དང་བསྟུན། ཨོ་གླིང་གྲོས་ཚོགས་འཐུས་མི་ཨན་ཌི་རེའོ་ཝིལ་ཀི་( Andrew Wilkie) ལགས་དང་། གྲོས་ཚོགས་འཐུས་མི་ཨན་ཌི་རེའོ་ཝ་ལེ་སི་ ( Andrew Wallace )ལགས། ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སུ་སན་ཊེམ་པལ་མན ( Susan Templeman ) ལགས། གྲོས་ཚོགས་འཐུས་མི་ཌེ་ཝིཌ་སི་མིཊ་( David Smith ) གྲོས་ཚོགས་གོང་མའི་འཐུས་མི་བྷར་བྷ་ར་པོ་ཀོག་ ( Barbara Pocock ) ལགས་བཅས་ཀྱིས། རྒྱ་ནག་གཞུང་གིས་བཅའ་ཁྲིམས་གསར་པ་དེ་དང་། ལྷག་པར་རྒྱ་ནག་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཐད་ཐེ་ཇུས་བྱས་པར་སྐྱོན་བརྗོད་གནང་འདུག
ཨོ་གླིང་གྲོས་ཚོགས་འཐུས་མི་ཨན་ཌི་རེའོ་ཝིལ་ཀི་ལགས་ཀྱིས། རྒྱ་ནག་གཞུང་གིས་ལག་བསྟར་བྱས་པའི་ཁྲིམས་ཡིག་འདིས་བོད་དང་མི་རིགས་གཞན་རྣམས་ཀྱི་ངོ་བོ་རྩ་མེད་ཇེ་ཆེར་གཏང་རྒྱུ་དེ་ཡིན་ཞིང་། དེས་རིག་གཞུང་རྩ་གཏོར་དང་། རྒྱ་ནག་གི་མཐའ་མཚམས་ལས་བརྒལ་ནས་རྒྱལ་ཁབ་གཞན་དུ་དབང་ཤུགས་སྐྱེད་དེ། རྒྱལ་མཚམས་ལས་བརྒལ་བའི་དྲག་གནོན་སོགས་བྱེད་ཀྱི་ཡོད་སྟབས། ཨོ་གླིང་གཞུང་གིས་རྒྱ་ནག་དང་ཨོ་གླིང་གི་འབྲེལ་ལམ་ནི། བོད་མི་རྣམས་ཀྱི་གཞི་རྩའི་ཐོབ་ཐང་དང་རིག་གཞུང་སྲུང་སྐྱོབ་བྱ་རྒྱུ་ལས་གཙིག་ཆེན་མི་འཛིན་པའི་རེ་སྐུལ་ཞུས་འདུག
གྲོས་ཚོགས་འཐུས་མི་ཨན་ཌི་རེའོ་ཝ་ལེ་སི་ལགས་ཀྱིས། ད་ལྟ་བོད་ནང་མཐོང་མུས་ཡིན་པའི་དངོས་ཡོད་ཀྱི་གནས་སྟངས་ནི་ཛ་དྲག་ཅན་ཞིག་ཡིན་པའི་ཁར། ཨོ་གླིང་གཞུང་གིས་ཀྱང་རྒྱ་ནག་གཞུང་གིས་བོད་ཕྲུག་རྣམས་ཁྱིམ་ཚང་དང་ཁ་བྲལ་དུ་བཏང་ནས་བོད་ཀྱི་རིག་གཞུང་གི་ངོ་བོ་བརླག་བཞིན་ཡོད། སྤྱིར་རྒྱ་ནག་གཞུང་གིས་བོད་ཕྲུག་རྣམས་ལ་སློབ་སྦྱོང་ཞིག་སྤྲོད་ཀྱིན་ཡོད་ཀྱང་དོན་དངོས་ཐོག་བོད་ཕྲུག་རྣམས་རང་རང་གི་ཕ་མ་དང་བྲལ་དུ་བཅུག་ནས། བོད་ཀྱི་ཐུན་མོང་མ་ཡིན་པའི་སྐད་ཡིག་དང་། རིག་གཞུང་རྩ་མེད་བཟོ་ཐབས་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ལངས་ཕྱོགས་དང་མཐུན་པའི་སློབ་གསོ་ཞིག་སྤྲོད་མུས་ཡིན། ཞེས་གསུངས་འདུག
ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སུ་སན་ཊེམ་པལ་མན་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནས་དགའ་ལྡན་ཕོ་བྲང་རྒྱུན་མཐུད་གནས་ངེས་ཡིན་པ་དང་། མགོན་པོ་གང་ཉིད་མཆོག་གི་ཡང་སྲིད་ངོས་འཛིན་གྱི་བྱེད་སྒོའི་འགན་ཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་ལས། གཞན་སུས་ཀྱང་ཐེ་བྱུས་མི་ཆོག་པའི་སྐོར་གསལ་བསྒྲགས་བསྐྱངས་ཡོད་སྟབས། ཨོ་གླིང་གཞུང་གིས་ཀྱང་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་ཐད། རྒྱ་ནག་གཞུང་ལ་ཐེ་ཇུས་བྱེད་དབང་མེད་པའི་ལངས་ཕྱོགས་གཟུང་དགོས་པ་ནན་བརྗོད་དང་། གྲོས་ཚོགས་འཐུས་མི་ཌེ་ཝིཌ་སི་མིཊ་ལགས་ཀྱིས། འདི་ལོར་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༡ བཞེས་པ་དང་། མགོན་པོ་གང་གི་ཡང་སྲིད་ཀྱི་བདག་དབང་ཡོངས་རྫོགས་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་ལ་ཡོད་སྐོར་སོགས་གསུངས་འདུག
དེ་བཞིན་གྲོས་ཚོགས་གོང་མའི་འཐུས་མི་བྷར་བྷ་ར་པོ་ཀོག་ལགས་ཀྱིས། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་དང་ཡུ་རོབ་གྲོས་ཚོགས་ཀྱིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་ཕྱིར་འཐེན་དགོས་པའི་འབོད་སྐུལ་ཞུས་ཡོད་པ་དང་། ཨོ་གླིང་གཞུང་ནས་ཀྱང་རྒྱ་ནག་གཞུང་ལ་གནད་དོན་དེའི་ཐོག་སེམས་འཚབ་བསྟན་དགོས་པའི་མུར། རྒྱ་ནག་གཞུང་གི་ཁྲིམས་དང་སྲིད་ཇུས་དག་རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་འཁྲི་དང་མཐུན་པར་བཟོ་དགོས་པ་དང་། གྲངས་ཉུང་མི་རིགས་ཀྱི་ཆོས་དང་རིག་གཞུང་། སྐད་ཡིག་བཅས་ཀྱི་ཐོབ་ཐང་སྲུང་སྐྱོབ་བྱ་དགོས་པའི་འབོད་སྐུལ་ཞུས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
