རྒྱ་ནག་གཞུང་གིས་རང་བཙན་བློ་དགའ་ལགས་ཀྱི་ཕ་ཡུལ་དུ་དམ་དྲག་ཆེན་པོ་བྱེད་བཞིན་འདུག

ཕྱི་ཟླ་ ༧ ཚེས་ ༢ ཉིན་ནས་བཟུང་རྒྱ་ནག་གཞུང་གིས་རང་བཙན་བློ་དགའ་ལགས་ཀྱི་ཕ་ཡུལ་དཀར་མཛེས་ཁུལ་ཏྲེ་ཧོར་རྫ་ཁོག་སྨད་མར་དམ་དྲག་ཆེན་པོ་བྱས་དང་བྱེད་མུས་ཡིན་འདུག

དེ་འབྲེལ་རྒྱ་རིགས་གཞོན་སྐྱེས་བོད་དོན་རྒྱབ་སྐྱོར་ཚོགས་པ་སྟེ། བོད་རྒྱ་གྲོས་མོལ་གྱི་སྟེགས་བུ་ལྷ་སའི་དཔྱིད་ཀ་ (Lhasaspring) ཞེས་པས་གནས་ཚུལ་སྤེལ་བ་ལྟར་ན། ཕྱི་ཟླ་ ༧ ཚེས་ ༢ ནས་བཟུང་རྒྱ་ནག་གཞུང་གིས་རང་བཙན་བློ་དགའ་ལགས་ཀྱི་ཕ་ཡུལ་རྫ་ཁོག་གྲོང་ཚོ་དང་དེའི་ཉེ་འཁྲིས་སུ་དྲག་ཆས་སྤྲས་པའི་རྒྱལ་ཁབ་བདེ་འཇགས་དང་སྤྱི་བདེ་མི་སྣ་མང་པོ་འགྲེམས་འཇོག་བྱས་ཏེ། ས་གནས་མི་མང་གི་འགྲོ་འོང་དང་འབྲེལ་མཐུད་སོགས་ལ་དམ་དྲག་དང་བཀག་སྡོམ་བྱས་ཡོད་ཅིང་། ད་ལྟའི་ཆར་ས་གནས་མི་མང་ལྟ་ཞིབ་དྲག་པོ་འོག་བཅུག་ཡོད་སྟབས། མི་མང་རྣམས་ཞེད་སྣང་དང་དངངས་འཚབ་འོག་གནས་མུས་ཡིན་འདུག

དེ་ཡང་ཟླ་འདིའི་ཕྱི་ཚེས་ ༢ ཉིན་ཨ་རིའི་ནེའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་རང་བཙན་བློ་དགའ་ལགས་ཀྱིས། བོད་ནང་གི་བོད་མི་ཚོར་འགྲོ་བ་མིའི་གཞི་རྩའི་ཐོབ་ཐང་དང་རང་དབང་གང་ཡང་མེད་པ་ནི་བོད་རང་བཙན་ཤོར་བའི་རྒྱུ་མཚན་ལ་ཐུག་བསྡད་ཡོད་པར་བརྟེན་བོད་རང་བཙན་རྩོད་དགོས་པ། བཙན་བྱོལ་གཞུང་མང་གི་བོད་མི་ཡོངས་ནས་ཆོལ་གསུམ་མཐུན་སྒྲིལ་བགྱིས་ཏེ་བོད་མི་རིགས་ཀྱི་འཐབ་རྩོད་རྒྱུན་སྐྱོང་བྱེད་དགོས་པ། བོད་རྒྱལ་ཁབ་སླར་གསོ་དགོས་པ་སོགས་ཀྱི་ཁ་ཆེམས་བཞག་སྟེ། རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་ཡོད།

ཡང་ཕ་ཡུལ་གསར་ཁང་ལ་མིང་བརྗོད་འདོད་མེད་པའི་མི་ཞིག་གིས། ད་ལྟ་ས་གནས་དེར་དམ་དྲག་དང་བཀག་སྡོམ་ནན་པོ་བྱས་ཡོད། ང་ཚོས་ཁོང་ཚོ་དང་འབྲེལ་བ་བྱེད་ཐབས་འཚོལ་བཞིན་ཡོད། ཡུལ་མི་ཚོ་ཞེད་སྣང་དང་འཇིགས་སྣང་འོག་གནས་ཡོད་སྟབས། རང་བཙན་བློ་དགའ་ལགས་ཀྱི་ནང་མི་དང་གཉེན་ཉེ་ཚོའི་གནས་ཚུལ་རག་ཐབས་ཧ་ཅང་དཀའ་ངལ་ཆེ་བར་གྱུར་ཡོད་ཅེས་བརྗོད་འདུག ད་ལྟ་ས་གནས་དེར་ལྟ་སྲུང་ནན་མོ་བྱེད་བཞིན་ཡོད་སྟབས། ས་གནས་ཀྱི་ཡུལ་མི་རྣམས་རང་བཙན་བློ་དགའ་ལགས་ཀྱི་ནང་མིར་ཐུག་འཕྲད་བྱ་རྒྱུ་དང་ཐ་ན་ཁ་པར་ཙམ་ཡང་གཏོང་ཕོད་ཀྱི་མེད་པ་རེད།

རང་བཙན་བློ་དགའ་ལགས་ནི་བོད་མདོ་ཁམས་ཏྲེ་ཧོར་རྫ་ཁོག་ཀྱི་གད་ཁ་ཚང་གི་ཁྱིམ་རྒྱུད་ཀྱི་པ་བདོས་དགའ་དང་མ་རྡོ་རྗེ་ལྷ་མོ་གཉིས་ཀྱི་བུར་སྐྱེས། གད་ཁའི་བཀྲ་ལོས་གཙོས་པའི་ཁོང་གི་ཁྱིམ་རྒྱུད་ཀྱི་མིང་སྲིང་གསུམ་ཡང་རྒྱ་ནག་དམར་པོའི་བཙོན་ཁང་དུ་སྐུ་སྲོག་ཤོར། ཕྱི་ལོ་ ༡༩༩༢ ལོར་འཕགས་ཡུལ་རྒྱ་གར་དུ་འབྱོར་རྗེས། དགའ་ལྡན་བྱང་རྩེ་གྲྭ་ཚང་དུ་མི་ལོ་བཅུ་གསུམ་ཙམ་གྱི་རིང་ལ་གཞུང་ཆེན་སློབ་གཉེར་གནང་བ་དང་། དེའི་རིང་གྲྭ་ཚང་གི་ལས་སྣེ་འདྲ་མིན་ཡང་ཁུར་རྗེས་ཨ་རིར་ཕེབས་ཏེ། ས་གནས་གཞོན་ནུ་ལྷན་ཚོགས་ཀྱི་རྒྱུན་ལས་དང་། ས་གནས་མདོ་ཁམས་ཆུ་བཞི་སྒང་དྲུག་གི་རྒྱུན་ལས་བཅས་ཀྱི་ཐུགས་འགན་བཞེས། ད་ཆར་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་གཙོའི་ཐུགས་འགན་བཞེས་མུས་ཡིན་འདུག་ལ། ཁོང་ནི་རྒྱུན་དུ་བོད་དོན་ལ་སེམས་ཤུགས་དང་སྤྱི་སེམས་ཆེན་པོ་ཡོད་མཁན་ཞིག་ཡིན་འདུག 

གསར་འགོད་པ། སྐལ་བཟང་སྦྱིན་པ།