བོད་ནང་གི་ཛ་དྲག་གི་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དོན་ཚན་དྲུག་ལས། དོན་ཚན་ལྔ་པ་མར་ཟགས་ཀྱང་དོན་ཚན་གཞན་ལྔ་སྤྱི་མོས་ཐོག་གཏན་འབེབས་བྱུང་སོང་།
དེ་རིང་ཕྱི་ཚེས་ ༢༡ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་ལྔ་པར། བོད་ནང་གི་ཛ་དྲག་གི་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་སྒྲོག་སྦྱང་དང་། གྲོས་ཆོད་གྲོས་འཆར་དེ་དག་དང་འབྲེལ་ནས་བགྲོ་གླེང་བྱས་ཡོད་ཅིང་། སྐབས་དེར་སྤྱི་འཐུས་རྒྱུན་ལས་ཀྱིས་བོད་ནང་གི་ཛ་དྲག་གི་གནས་སྟངས་དང་འབྲེལ་བའི་གྲོས་ཆོད་དོན་ཚན་དྲུག་བསྣམས་ཕེབས་པའི་ཁྲོད། དོན་ཚན་ལྔ་པ་མར་ཟགས་ཀྱང་། གཞན་དོན་ཚན་ལྔ་པོ་སྤྱི་མོས་ཐོག་གཏན་འབེབས་བྱུང་སོང་།
དེ་རིང་བོད་ནང་གི་ཛ་དྲག་གནས་སྟངས་ལ་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དོན་དོན་ཚན་ལྔ་པ་དང་འབྲེལ་ནས། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བཀའ་ཤག་ལ་ད་ལྟའི་གྲོས་ཚོགས་ཀྱི་ལས་རིམ་འགྲོ་སྟངས་དེ་བཅའ་ཁྲིམས་ཀྱི་འགྲོ་ལུགས་བཞིན་ཏག་ཏག་ཅིག་བསྡད་ཡོད་མེད་ཀྱི་བསམ་ཚུལ་ཤུགས་ཆེན་ཞིག་ཡོང་གི་འདུག གནད་དོན་དེ་འདྲ་ཞིག་གི་རྒྱུ་མཚན་ལ་བརྟེན་ནས་གྲོས་ཚོགས་སུ་ཐག་གཅོད་ཅིག་བྱུང་། ཡང་ཁྲིམས་ཞིབ་ཁང་ལ་འགྲོ་དགོས་པའི་གནད་དོན་དེ་འདྲ་ཆགས་མི་སྲིད་པ་མ་རེད་བསམ་པའི་ཐོག་ནས། དེའི་སྔོན་གྱི་ལས་རིམ་ལའང་ཞུས་པ་ཡིན། གྲོས་འཆར་ཚུད་དང་མ་ཚུད་མ་གཟིགས་པའི་སྔོན་ལ་སྤྱི་འཐུས་སྒེར་གྱི་གྲོས་ཆོད་གྲོས་འཆར་ཞིག་དང་འབྲེལ་བའི་ཐོག་ནས། ནང་དོན་གྱི་ཆ ནས་བལྟས་ན་སྲིད་ཇུས་ཀྱི་འགྱུར་བ་ཆགས་འདུག་ཅེས་ཞུས་པ་ཡིན། བཅའ་ཁྲིམས་དོན་ཚན་ ༥༦ དང་རང་བཞིན་གྱིས་འབྲེལ་བ་ཆགས་ཡོད་རེད། དེ་རིང་གི་གཞུང་འབྲེལ་གྱི་མགོ་བརྗོད་ལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་རེད། གྲོས་ཆོད་ཀྱི་ནང་དོན་ལ་བལྟས་ཡོང་དུས། ལྷག་པར་དུ་དོན་ཚན་ལྔ་པ་ལྟ་བུ་ནི་སྲིད་ཇུས་ཀྱི་འགྱུར་བ་དང་འབྲེལ་བ་ཆགས་འདུག ཡང་མིན་ན་གསལ་བོ་བཟོ་དགོས་འདུག ད་ལྟའི་གྲོས་ཆོད་གྲོས་འཆར་གྱི་ངོ་བོ་གང་ཡོད་པ་དེ་ཕྱིན་པ་ཡིན་ན། བོད་མིའི་སྒྲིག་འཛུགས་ཀྱི་སྲིད་ཇུས་ལངས་ཕྱོགས་ལ་འགྱུར་བ་འགྲོ་ཡི་ཡོད་མིན་དང་། སྲིད་ཇུས་ལངས་ཕྱོགས་ལ་འགྱུར་བ་འགྲོ་ཡི་ཡོད་པ་ཡིན་ན། ངེས་པར་དུ་བཅའ་ཁྲིམས་དོན་ཚན་ ༥༦ འོག་ནས་འགྲོ་དགོས་ཀྱི་ཡོད་རེད། བཅའ་ཁྲིམས་དོན་ཚན་ ༥༦ ཆེད་མངགས་དེའི་ཆེད་དུ་བཟོས་པ་རེད། བསྐྱར་དུ་དྲན་གསོ་ཞུ་རྒྱུ་ཞིག་ལ། བཅའ་ཁྲིམས་དོན་ཚན་ ༥༦ པ་མང་ཚོགས་ལ་མང་མོས་ཐག་གཅོད་བྱུང་བ། བོད་དང་བོད་མིའི་རྩ་དོན་དང་འབྲེལ་བའི་གལ་ཆེའི་སྲིད་ཇུས་གཏན་འབེབས་ཆེད། སྤྱི་འཐུས་ལྷན་ཚོགས་སུ་རྩ་འབོར་གསུམ་ཆ་གཉིས་ཡན་གྱི་མོས་མཐུན་བྱུང་བའམ། དེ་མིན་བཀའ་ཤག་དང་སྤྱི་འཐུས་རྒྱུན་ལས་ལྷན་འཛོམས་ཀྱི་རྩ་འབོར་བཞི་ཆ་གསུམ་ཡན་གྱི་མོས་མཐུན་བྱུང་ན། དབུས་འོས་བསྡུ་ལས་ཁང་བརྒྱུད་མང་མོས་ཐག་གཅོད་འོས་བསྡུའི་ལས་རིམ་རྩོམ་ཆོག་ཅིང་། མང་མོས་ཇི་བྱུང་ལ་ལས་ཉིན་བཅུ་བཞིའི་ནང་ཚུན་སྲིད་སྐྱོང་གིས་མང་མོས་བྱུང་བའི་ཚད་འཛིན་དང་མིང་རྟགས་བཀོད་དེ་གསལ་བསྒྲགས་ཟེར་བ་དེ་བཅའ་ཁྲིམས་ཀྱི་ཆ་རྐྱེན་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས། བོད་མི་དམངས་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་ལེའུ་གཉིས་པའི་གྲོས་ཆོད་ཁག་ནང་དུ། དོན་ཚན་ ༤༦ དེ་གྲོས་ཆོད་གྲོས་འཆར་འདོན་པའི་ཐོབ་ཐང་ཟེར་བ་དེ་རེད། དེའི་ནང་དུ་སྒྲིག་གཞི་དེའི་ཆ་རྐྱེན་འོག་སྤྱི་འཐུས་སམ་སྲིད་སྐྱོང་། བཀའ་བློན་སུ་རུང་གིས་མང་ཚོགས་ཀྱི་དོན་གནད་དང་འབྲེལ་བའི་གྲོས་ཆོད་གྲོས་འཆར་བཏོན་ཆོག་པ་ཡིན་ཞེས། མང་ཚོགས་ཀྱི་དོན་གནད་དང་འབྲེལ་བ་ལས་སྲིད་ཇུས་དང་འབྲེལ་བ་ཡོད་མ་རེད། སྲིད་ཇུས་དང་འབྲེལ་བ་དེ་བཅའ་ཁྲིམས་དོན་ཚན་ ༥༦ ལ་འགྲོ་དགོས་རེད་མ་གཏོགས། ད་ལྟ་གྲོས་ཆོད་གྲོས་འཆར་འདིའི་ངོ་བོའི་ཐོག་ནས། གལ་སྲིད་སྲིད་ཇུས་བསྐྱར་བཅོས་འགྱུར་བ་འགྲོ་ཡི་མེད་པ་ཡིན་ན་གནད་དོན་གཅིག་རེད། ཡིན་ནའང་། ཚིག་དེ་ཀློག་ཡོང་སྐབས་སྲིད་ཇུས་ལ་རང་བཞིན་གྱིས་འགྱུར་བ་འགྲོ་བ་ཞིག་ཆགས་ཡོང་གི་འདུག གྲོས་ཆོད་གྲོས་འཆར་གྱི་ཆ་རྐྱེན་གྱི་འོག་ནས། དེ་ལ་གྲོས་འཆར་བསྒྱུར་བཅོས་ཀྱི་ཆ་རྐྱེན་ནང་ནས་དོན་གནད་དམིགས་བཀར་གཅིག་གི་སྐོར་ཡིན་པ་ཞེས་གསུངས་ཡོད་རེད། མགོ་བརྗོད་དེ་བོད་ནང་གི་བོད་མི་ཚོ་ལ་གདུང་སེམས་མཉམ་བསྐྱེད་ཀྱི་གྲོས་འཆར་རེད། དེ་དང་མཉམ་དུ་སྲིད་ཇུས་འགྱུར་བ་གཏང་རྒྱུའི་གྲོས་ཆོད་སླེབས་ཡོང་དུས། གདུང་སེམས་མཉམ་བསྐྱེད་ཀྱི་གྲོས་ཆོད་ཡིན་དུས་སྤྱི་ཡོངས་སུ་དགག་པ་བརྒྱབ་པ་ཡིན་ན་རྒྱག་སྟངས་མི་ཤེས་པ་དང་། ཡང་ཚུད་པ་བྱས་ན་མ་འོངས་པ་ལ་ག་དུས་ཡིན་ན་གྲོས་ཆོད་གྲོས་འཆར་བསྒྱུར་བཅོས་ཀྱི་སྲིད་ཇུས་འཁུར་ཆོག་པའི་རྣམ་པ་ཐོན་པ་ཡིན་ན། ང་སྤེན་པ་ཚེ་རིང་ཟེར་མཁན་གང་ཟག་སྒེར་ལ་གང་ཡང་ཁྱད་པར་མེད། བཅའ་ཁྲིམས་ལ་བརྩི་སྲུང་ཞུ་དགོས་ཞེས་ཚང་མས་བཤད་ཀྱི་འདུག བཅའ་ཁྲིམས་ལ་བརྩི་སྲུང་ཞུ་དགོས་ཀྱི་ཡོད་ན། བཅའ་ཁྲིམས་སྤྱི་ཡོངས་ཀྱི་སྒྲོམ་གཞི་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དང་སྒྲིག་གཞི་གཞན་དག་ཚང་མ་ལ་བསྡུར་ནས་བལྟ་དགོས་རེད་མ་གཏོགས། བྱེ་བྲག་གཅིག་ཁོ་ན་བལྟས་ནས་བྱེད་ཆོག་གི་ཡོད་མེད་ཀྱི་གནས་སྟངས་འོག་ནས་བཏང་པ་ཡིན་ན། ཏག་ཏག་ཅིག་འགྲིག་གི་ཡོད་མེད་དང་། དགག་པ་རྒྱག་པའི་དབང་ཆ་བཀའ་ཤག་ལ་ཡོད་མ་རེད། ཡིན་ནའང་། བཅའ་ཁྲིམས་ཀྱི་འགྲོ་ལུགས་དང་བཅའ་ཁྲིམས་སྒྲོམ་གཞིའི་འོག་ནས་བཟོས་པའི་ཁྲིམས་དག་ལ་དགོས་པ་རྒྱུ་མཚན་མང་པོ་ཞིག་ཡོད་རེད། ཅེས་གསུངས་སོང་།
ཡང་ཁོང་གིས། སྒྲིག་གཞི་ཞིག་བསྐྱར་བཅོས་བྱ་དགོས་ཡོད་ན། མང་མོས་ལ་སྒྲིག་གཞི་གཅིག་མ་གཏོགས་ཡོད་མ་རེད། གཞན་ངོ་ཡོད་གསུམ་ཆ་གཉིས་དང་རྩ་འབོར་གྱི་བཞི་ཆ་གསུམ་ཚང་དགོས་པའི་ཆ་རྐྱེན་བཟོས་འདུག་པས། བོད་མིའི་སྒྲིག་འཛུགས་ཀྱི་སྲིད་ཇུས་འགྱུར་བ་གཏང་དགོས་ཡོད་ན། བཅའ་ཁྲིམས་དོན་ཚན་ ༥༦ འོག་ནས་འགྲོ་དགོས་རེད་མ་གཏོགས་གྲོས་ཆོད་གྲོས་འཆར་གྱི་ངོ་བོའི་ཐོག་ནས་སྲིད་ཇུས་འགྱུར་བ་གཏང་བ་ཡིན་ན། གྲོས་ཚོགས་ཀྱི་ཐག་གཅོད་བྱེད་སྟངས་དང་བཅའ་ཁྲིམས་ཀྱི་སྒྲོམ་གཞི་དག་ལ་ཡང་དག་ཅིག་ཡོང་གི་མེད་པ་ངས་ཐག་བཅད་ནས་ཞུ་ཡི་མེད། བཀའ་ཤག་ངོས་ནས་དེ་འདྲ་མཐོང་གི་འདུག དེར་བཀུར་འོས་སྤྱི་འཐུས་རྣམས་ནས་བལྟས་མ་བལྟས་དང་། ཚོགས་གཙོ་རྣམས་གཉིས་ནས་བལྟས་མ་བལྟས་དེ་རྣམ་པ་ཚོས་ངོས་ནས་ཐག་གཅད་དགོས་རེད། ལས་རིམ་དེ་ལྟར་འགྲོ་ཡི་ཡོད་དུས་བཀའ་ཤག་གི་ངོས་ནས་ཚུད་ན་ཏག་ཏག་ཅིག་བསྡད་མེད་པ་དང་།བཀའ་ཤག་གྲོས་ཚོགས་ཀྱི་ཚོགས་མི་ཞིག་ཡིན་པའི་ཆ་ནས་འགན་མ་འཁུར་བའི་རྣམ་པ་ཞིག་ཏུ་ཆགས་ཡོད་པས་ཡར་ལངས་ནས་ཞུས་ཡིན། ཐག་གཅོད་གང་གནང་བ་ཡིན་ནའང་། དེའི་རྗེས་ལ་གང་ཡང་ཞུ་འདོད་མེད། སྐུ་དབང་ཡོད་པ་ནང་བཞིན་གྱིས་ཐག་གཅོད་གནང་རོགས་གནང་། བཅའ་ཁྲིམས་དང་སྒྲིག་གཞིའི་སྒྲོམ་གཞི་ལ་ཐུགས་སྣང་མ་གནང་བ་ཡིན་ན། མ་འོངས་པ་ཉེན་ཁ་ཆེན་པོ་ཞིག་ཏུ་ལྷུང་སྲིད་ཀྱི་རེད། ཅེས་གསུངས་སོང་།
གསར་འགོད་པ། རྟ་མགྲིན་མཚོ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
