ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ནས་བོད་ནང་གི་གནད་དོན་དང་འཛམ་གླིང་གི་འགྱུར་འགྲོས། རྒྱ་ནག་གི་གནས་བབ་སོགས་ཀྱི་ཐད་ལ་གླེང་སློང་གནང་འདུག
ཁ་སང་ཕྱི་ཚེས་ ༢༩ ཉིན་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་བྷི་རི་ཨན་མཱ་སི་ཊི་ (Brian Mast) མཆོག་གི་སྣེ་ཁྲིད་འོག ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བཞུགས་སྒར་ངྷ་སར་འབྱོར་ཡོད་པ་ལྟར། དེ་རིང་ཁོང་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་འདུག སྐུ་ཚབ་ཚོགས་ཆུང་འདིའི་ཁྲོད། ཨ་རིའི་སྤྱི་མཐུན་ཚོགས་པའི་འཐུས་མི་བྷི་རི་ཨན་མཱ་སི་ཊི་ (Brian Mast) དང་། ཇེམས་གྷལ་ལཱ་གྷར་ (James Gallagher)། ཇི་མི་པཱ་ཊོ་ནི་སི་ (Jimmy Patronis) བཅས། དམངས་གཙོ་ཚོགས་པའི་འཐུས་མི་ཤྲ་ཐཱ་ནེ་ཌར་ (Shri Thanedar) དང་། ཧེ་ལི་སི་ཊིབ་སི་ (Haley Stevens) བཅས་ཡོད་འདུག
མཇལ་ཕྲད་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། བོད་རྒྱ་ཆེའི་མི་མང་དང་རྒྱ་གར་དུ་ཡོད་པའི་བོད་པ་ཚང་མས་ངོས་ལ་རེ་བ་བྱེད་པ་ནི། ངོས་ནས་བོད་མི་རིགས་ཀྱི་ལམ་གྱི་བཟོ་འདྲ་བོ་དེ་བཟུང་ནས་བསྡད་ཡོད་རེད། དེ་ལ་དོ་སྣང་ཞེ་དྲགས་བྱེད་ཀྱིན་འདུག ཅེས་དང་། ངོས་རང་ཞོགས་པ་ལངས་པ་དང་བོད་མི་རྣམས་ནི་ཞི་བདེ་དོན་གཉེར་མཁན་རེད་བསམས་ནས་དྲན་ཡོང་གི་འདུག ད་བར་དུ་ངོས་རང་གི་གཟུགས་པོ་ནི་བདེ་ཐག་ཆོད་འདུག ཅེས་གསུངས་འདུག
ཡང་མགོན་པོ་གང་ཉིད་ཀྱིས། ཏཱ་ལའི་བླ་མ་ཟེར་དུས་མི་མང་གིས་དགའ་པོ་དང་ཡིད་ཆེས་ཞེ་དྲགས་བྱེད་ཀྱི་རེད། ངོས་ནས་བོད་མིའི་ཚབ་བྱས་ནས་སྐད་ཆ་བཤད་རྒྱུར་སྤོབས་པ་ཡོད། ཅེས་གསུངས་འདུག
གནད་དོན་དེ་དང་འབྲེལ་ནས་དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། ད་ལན་གྱི་མཇལ་འཕྲད་དེ་ནི་གནད་འགག་ཆེན་པོ་ཞིག་ཆགས་ཡོད། གང་ཡིན་ཟེར་ན། ཉེ་ལམ་ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིན་གཉིས་མཇལ་འཕྲད་བྱས་པའི་ཉིན་ཁ་ཤས་རྗེས། ཆབ་སྲིད་ཚོགས་པ་གཉིས་ལས་གྲུབ་པའི་གྲོས་ཚོགས་འཐུས་མི་རྣམས་བཞུགས་སྒར་དྷ་སར་ཕེབས་ཡོད་སྟབས། དེ་ནི་ཨ་རིའི་བོད་དོན་རྒྱབ་སྐྱོར་གྱི་མཚོན་རྟགས་དང་། ཨ་རིའི་གྲོས་ཚོགས་གོང་འོག་གཉིས་ཀས་ཀྱང་ཨ་རི་དང་རྒྱ་ནག་གི་མགོ་ཁྲིད་ཐུག་འཕྲད་བྱས་མིན་ལ་མ་ལྟོས་པར། མུ་མཐུད་དུ་བོད་དོན་ལ་རྒྱབ་སྐྱོར་ཡོད་པའི་གནས་སྟངས་ཤིག་དང་། ང་ཚོས་ཀྱང་ཨ་རིའི་སྔར་ལས་ལྷག་པའི་བོད་དོན་རྒྱབ་སྐྱོར་ཡོང་རྒྱུར་རེ་བ་བྱེད་ཀྱི་ཡོད། ཅེས་བརྗོད་བྱུང་།
མཇལ་ཁ་གྲུབ་རྗེས་སྐུ་ཚབ་ཚོགས་ཆུང་གི་ཚོགས་གཙོ་བྷི་རི་ཨན་མཱ་སི་ཊི་ལགས་ཀྱིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་མཇལ་བ་ནི་ངས་རྟག་ཏུ་བརྗེད་པར་དཀའ་བའི་གནད་དོན་ཞིག་ཡིན། ང་ཚོས་དོན་གནད་ཧ་ཅང་མང་པོའི་སྐོར་ལ་དུས་ཡུན་རིང་པོར་གྲོས་མོལ་བྱས་པའི་ཁྲོད། གཙོ་བོ་རྒྱ་ནག་གི་སྐོར་ལ་གླེང་སློང་བྱུང་ལ། བོད་མིའི་རང་དབང་། དེ་བཞིན་འཛམ་གླིང་ཡོངས་ཀྱི་རང་དབང་གི་མཚོན་རྟགས་ལྟ་བུར་གྱུར་བའི་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་དེའང་གཙོ་བོ་ཞིག་ཡིན། ང་ཚོས་ཨ་རི་ནི་འཛམ་གླིང་ཡོངས་ཀྱི་རང་དབང་གི་མཚོན་རྟགས་ཤིག་ཡིན་པར་ཡིད་ཆེས་བྱེད་ཀྱི་ཡོད་ལ། གནད་དོན་ཧ་ཅང་མང་པོའི་ཐད་གྲོས་མོལ་བྱས་ཡོད། རྒྱ་ནག་གཞུང་གིས་རྒྱལ་མཚམས་ལས་བརྒལ་བའི་དྲག་གནོན་བྱེད་ཤུགས་ཇེ་ཆེར་འགྲོ་མུས་ཡིན་ལ། རྒྱ་ནག་གིས་ཁྱེད་རང་གང་དུ་ཡོད་ཀྱང་རྗེས་འདེད་བྱེད་ཀྱི་ཡོད། ཁོང་ཚོས་མི་མང་གི་འགྲོ་འདུག་ཚོད་འཛིན་དང་རྒྱལ་ཁབ་གཞན་དུའང་གསང་མྱུལ་བ་སོགས་མངག་གཏོང་བྱེད་ཀྱིན་ཡོད། ཅེས་གསུངས་སོང་།
ཡང་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་ནས། སྲིད་འཛིན་ཊོམ་ཕུ་མཆོག་གིས་འཛམ་གླིང་གི་རྒྱལ་ཁབ་ཆེ་ཤོས་དང་སྟོབས་ཆེ་ཤོས་ཀྱི་མགོ་ཁྲིད་ཚོ་མཇལ་རྒྱུ་དེ་གལ་ཆེན་པོ་ཡིན་པར་ཡིད་ཆེས་གནང་གི་འདུག་ལ། མགོ་ཁྲིད་ཕན་ཚུན་བར་མཇལ་འཕྲད་བྱ་དགོས་པ་ཞིག་རེད། འོན་ཀྱང་། མཇལ་འཕྲད་དེས། ང་ཚོས་རྒྱ་ནག་གི་མི་མང་ཚུད་པའི་བོད་མི་དང་། ཡུ་གུར་མི་མང་བཅས་ལ་དྲག་གནོན་བྱེད་མི་རུང་བའི་ལངས་ཕྱོགས་ལ་འགྱུར་བ་གང་ཡང་མེད། དེ་ལས་ལྡོག་སྟེ་ང་ཚོས་རྒྱ་ནག་གིས་འཛམ་གླིང་ཡོངས་སུ་རང་དབང་ལ་བརྩི་མཐོང་དང་རྒྱབ་སྐྱོར་བྱ་དགོས་པའི་རེ་སྐུལ་ཞུ་ཡི་ཡོད། རྒྱ་ནག་གིས་རང་དབང་མཚོན་མི་ཐུབ་ཀྱང་། ཨ་རིས་རང་དབང་མཚོན་གྱི་ཡོད། ང་ཚོར་རང་དབང་དང་། མང་གཙོ། སྒེར་གྱི་ཁེ་ཕན་སྲུང་སྐྱོབ་བྱ་དགོས་པའི་རྩ་དོན་ཡོད། ཅེས་དང་། རྒྱ་ནག་གཞུང་གིས་ཁྲིམས་མཐུན་མིན་པའི་ཐོག་ནས་མིའི་ནང་ཁྲོལ་ཉར་ཚགས་དང་ཉོ་ཚོང་། དེ་བཞིན་འགྲོ་བ་མིའི་གཞི་རྩའི་ཐོབ་ཐང་སོགས་ལ་རྡོག་རོལ་གཏོང་གིན་ཡོད་སྐོར་སོགས་གསུངས་སོང་།
གྲོས་ཚོགས་འཐུས་མི་ཧེ་ལི་སི་ཊིབ་སི་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནི། མང་གཙོ་དང་རང་དབང་གི་མཚོན་རྟགས་གལ་ཆེན་ཞིག་ཡིན། ད་ལྟ་འཛམ་གླིང་ཡོངས་སུ་མང་གཙོ་དང་རང་དབང་ལ་འཇིགས་སྣང་དང་ཉེན་ཁ་འཕྲད་བཞིན་པའི་སྐབས་འདིར། ཁོང་ལྟ་བུའི་རང་དབང་དང་ཞི་བདེའི་མཚོན་རྟགས་ལ་གལ་གནད་དམིགས་བསལ་བ་ཞིག་ཡོད། ང་ཚོས་རྒྱ་ནག་གི་བཙན་གནོན་དང་། གནས་ཚུལ། ཤེས་བྱ་ཁག་ལ་ཚོད་འཛིན། བསླུ་བྲིད་བྱེད་པའི་སྐོར་ཡང་མཐོང་གི་ཡོད། དེ་བཞིན་གནས་ཚུལ་ལ་རང་དབང་གིས་ལྟ་ཀློག་བྱེད་ཐུབ་པའི་གོ་སྐབས་ཉུང་བ་དང་། གནས་ཚུལ་མ་ཚང་བའམ་ཡང་ན་བཀག་འགོག་བྱས་པའི་གནས་ཚུལ་མང་བ་ཡང་མཐོང་གི་ཡོད། འདི་ནི་མི་སྒེར་གཅིག་གི་གནད་དོན་ཙམ་མ་རེད། འཛམ་གླིང་ཡོངས་ཀྱི་མི་མང་ལ་གནས་ཚུལ་ངོ་མ་ཤེས་པའི་ཐོབ་ཐང་ཡོད། དེར་བརྟེན། གནས་ཚུལ་ཁ་སྒྱུར་དང་། བསླུ་བྲིད། མང་གཙོའི་ལྟ་བར་གནོད་པའི་གནས་ཚུལ་རྫུན་མ་སྤེལ་བ་སོགས་ལ་ང་ཚོས་དོ་སྣང་ཆེན་པོ་བྱ་དགོས། ཞེས་གསུངས་སོང་།
ཡང་ཁོང་མོས། ད་ལྟའི་དུས་སྐབས་འདིར་རང་དབང་གི་གསར་འགྱུར་དང་གསར་འགོད་པའི་ལས་འགན་ནི་ཧ་ཅང་གལ་ཆེན་པོ་ཆགས་ཡོད། དེར་བརྟེན་ཁྱེད་གསར་འགོད་པ་དང་རང་དབང་གི་གསར་ཁང་ལ་ཐུགས་རྗེ་ཆེ་ཞུ་དགོས། འདི་ནི་གལ་གནད་ཆེ་བའི་གནད་དོན་ཞིག་ཡིན། ང་རང་ཨ་རི་བ་ཞིག་དང་། མང་གཙོའི་སྐུ་ཚབ་སྟེ་མི་དམངས་ཀྱི་འཐུས་མི་ཞིག་ཡིན་པའི་ཆ་ནས། ངས་འདི་གལ་ཆེན་པོར་བརྩི་བཞིན་ཡོད། ཅེས་གསུངས་སོང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
