ནམ་རྒྱུན་ཚགས་ཤོག་དང་དུས་དེབ་མང་བོར་ལྟ་ཀློག་བྱེད་རྒྱུ་ནི་ངའི་དགའ་ཕྱོགས་ཡིན་ལ། དེ་དག་ལས་རྩོམ་ཡིག་གང་ལེགས་དང་། དེའི་རྩོམ་པ་པོ་སུ་ཡིན་འཚོལ་རྒྱུ་ནི་ང་དང་ང་ལྟ་བུའི་ཀློག་པ་པོ་སྤྱིའི་དགའ་ཕྱོགས་ཡིན། ང་ཚོར་རྒྱུས་མངའ་ཡོད་པ་བཞིན་བཙན་བྱོལ་སྤྱི་ཚོགས་ཁྲོད་ཀྱི་བོད་ཡིག་ཚགས་ཤོག་མང་བོ་ཞིག་སྐྱེས་པ་ཚོས་བཙན་བཟུང་བྱས་པ་ལས་བུད་མེད་རྩོམ་པ་པོའི་མིང་འཁོད་པའི་རྩོམ་ཡིག་ཤིན་ཏུ་དཀོན་ཅིང་། རེ་ཟུང་ཡོད་མོད་དེ་དག་ཀྱང་སྐྱེས་པ་བུད་མེད་ཀྱི་མིང་བརྐུ་བར་དགའ་མཁན་རེ་ཟུང་གི་སྙུག་མིང་ཡིན། ང་ཚོའི་མི་རིགས་འདིའི་ཕྱེད་ཀ་ཟིན་པའི་བུད་མེད་ཚོས་བཙན་བྱོལ་སྤྱི་ཚོགས་ཁྲོད་ཀྱི་ཚགས་ཤོག་དག་གི་སྟེང་བྲིས་པའི་དཔྱད་བརྗོད་རྩོམ་ཡིག་ཅིག་འཚོལ་དགོས་ན་དེ་ནི་ཧ་ཅང་དཀོན་པོ ཡིན་ལ། ང་ཚོའི་སྤྱི་ཚོགས་ཁྲོད་བུད་མེད་ཚོས་ཐོབ་ཐང་ཁ་ནས་རྩོད་པ་ལས་ཡིག་ཐོག་ཏུ་མི་འབྲི་ལ། བུད་མེད་ཀྱི་ཐོབ་ཐང་ཁ་ལ་འཁྱེར་བ་ལས་ལག་ལེན་དུ་བསྟར་ཐུབ་ཀྱིན་མེད། དུས་དེབ་རེ་ཟུང་སྟེང་སྙན་རྩོམ་དང་ལྷུག་རྩོམ། སྒྲུང་རྩོམ་སོགས་བྲིས་ཡོད་པའི་བུད་མེད་སྐོར་ཞིག་དང་། སྒེར་དེབ་རེ་བཏོན་པའི་བུད་མེད་རྩོམ་པ་པོ་རེ་ཟུང་རྒྱུས་ཡོད་དུ་གྱུར་ཡོད་ནའང་། ཁོང་ཚོའི་འགྲོ་བ་མིའི་ཐོབ་ཐང་དང་། སྨྲ་བརྗོད་རང་དབང་། བྱ་བཞག་རང་དབང་། ཀུན་སྤྱོད་རང་དབང་སོགས་གཞི་རྩར་བཞག་སྟེ། བོད་རིགས་བུད་མེད་སྤྱིའི་བདེ་སྡུག་གླུ་རུ་ལེན་མཁན་ཧ་ཅང་ཉུང་།
བོད་མི་རིགས་ཀྱི་འདས་ཟིན་པའི་ལོ་རྒྱུས་ཁྲོད་བུད་མེད་ལ་གོད་ཆག་སྣ་དགུ་བྱུང་ཞིང་། ཕོ་མཆོག་མོ་དམན་གྱི་ལྟ་བས་སྤྱི་ཚོགས་ཧྲིལ་བོར་ཁྱབ་ཡོད། ཆོས་རྒྱལ་སྲུང་བཙན་སྒམ་པོའི་སྐབས་སུ་ཕྱིའི་དཔལ་འབྱོར་དང་རིག་གནས་མང་བོ་ནང་འདྲེན་བྱས་པ་དང་དུས་མཚུངས། བུད་མེད་ཚོར་འགྲོ་བ་མིའི་ཐོབ་ཐང་དང་གོ་ས་གཏན་ནས་མི་སྤྲོད་པར་སྐྱེས་པ་ཕོས་གང་བཤད་པར་ཉན་འཇོག་དང་། སྐྱེས་གཡོག་བྱེད་དགོས་པའི་གོ་གནས་དམན་པའི་རྒྱ་ནག་མི་རིགས་ཀྱི་བུད་མེད་ལ་འཛིན་པའི་འདུ་ཤེས་དེ་ཡང་ནང་འདྲེན་བྱས་ཡོད་ལ། དེ་ནས་བཟུང་བུད་མེད་དང་། སྐྱེས་དམན། ནག་མོ་སོགས་མིང་གི་འདོགས་སྟངས་ཐད་ནས་ཀྱང་འགྱུར་བ་ཕྱིན་ཏེ། བོད་རིགས་བུད་མེད་ཀྱི་གོ་གནས་ཤིག་མཚོན་པར་བྱས་ཡོད།
དུས་རབས་ཉེར་གཅིག་པའི་སྤྱི་ཚོགས་ཁྲོད་ན་བུད་མེད་ལ་ཐོབ་ཐང་དང་། སྨྲ་བརྗོད་རང་དབང་། འདམ་བྱ་འདེམས་བྱེད་ཀྱི་ཐོབ་ཐང་ཡོད་ནའང་། བོད་ཁུལ་གྱི་ས་ཆ་མང་ཆེ་བར་སྲོལ་རྒྱུན་བསམ་བློའི་དབང་ཤུགས་རྐྱེན་པས་དེང་སྐབས་ད་དུང་ཡང་། བུད་མེད་ཚོ་འཚོ་བའི་དགོས་མཁོ་ཙམ་གྱི་དོན་དུ་ཚོང་བསྒྱུར་བྱེད་པའི་གོད་ཆག་བཟོད་དུ་མེད་པ་རེ་ཡོད་པ་ནི། འདས་པའི་ལོ་འགའི་ནང་བོད་ནང་གི་གླུ་བ་ཁག་ཅིག་གིས་གྱེར་བའི་གླུ་ཚིག་གིས་བསྟན་འདུག དཔེར་ན། བདུད་བྷེས། བྱམས་དང་སྙིང་རྗེ་ཅན་གྱི་ཕ་མ་ལོ་ལོ། །བུ་མོ་སྒྲོལ་མ་འབྲི་དང་འཛོ་མོར་མ་བརྗེ། །འབྲི་དང་འཛོ་མོའི་མར་ཆུར་ལོ་གཅིག་རེད། །བུ་མོ་སྒྲོལ་མའི་སྐྱིད་སྡུག་ཚེ་གཅིག་རེད། ། བྱམས་དང་སྙིང་རྗེ་ཅན་གྱི་ཕ་མ་ལོ་ལོ། །བུ་མོ་སྒྲོལ་མ་རྒྱུ་ཆེན་དཔོན་ལ་མ་སྟེར། །རྒྱུ་ཆེན་དཔོན་པོའི་རྫོང་བ་ཐེངས་ཤིག་རེད། །བུ་མོ་སྒྲོལ་མའི་སྐྱིད་སྡུག་ཚེ་གཅིག་རེད། །ཅེས་ངག་གི་འགྱུར་ཁུག་ལ་བརྟེན་ཏེ་བོད་རིགས་བུད་མེད་ཚོར་རང་ཉིད་ཀྱི་ཚེ་གཅིག་གི་ཁྱོ་ག་ཡང་རང་ཉིད་ལ་འདེམས་དབང་མེད་པར། བུ་མོ་ཚོ་འབྲི་དང་མཛོ་མོར་བརྗེ་བའི་ཕ་མ་ཀླད་རྙིང་ཚོའི་འདུ་ཤེས་གསལ་འདེབས་བྱས་འདུག ཕུལ་བྱུང་སྒྲོལ་མས། སྐྲ་རིང་བུ་མོ་མ་ཟེར། །བློ་གཏད་མེད་རབས་མ་ཟེར། །ང་ཚོ་བོད་རིགས་བུ་མོའི། །ཡིད་སེམས་དྲང་མོ་མདའ་ཡིན། །བློ་ཐུང་བུ་མོ་མ་ཟེར། །རིག་གནས་མེད་རབས་མ་ཟེར། །ང་ཚོ་བོད་རིགས་བུ་མོའི། །གཤིས་རྒྱུད་འཇམ་པོ་བལ་ཡིན། །སོགས་ང་ཚོས་སྲོལ་རྒྱུན་གྱི་བསམ་བློའི་འདུ་ཤེས་འཛིན་སྟངས་ཤིག་གིས་བོད་རིགས་བུད་མེད་ཚོར་སྐྲ་རིང་ཞིང་བློ་སྣ་ཐུང་སྟེ། ཡིད་ཆེས་བློ་གཏད་མེད་པ་དང་། རིག་གནས་མེད་པར་འཇིག་རྟེན་གྱི་སྡུག་དང་གྱོད་སྣ་ཁ་མཆུའི་སྣ་འདྲེན་ཡིན་པ་སོགས་འབོད་བཞིན་ཡོད་སྟབས། དེ་ལྟར་མི་ཟེར་བར་ང་ཚོ་བོད་རིགས་བུད་མེད་ཚོ་ནི་ཡིད་སེམས་དྲང་མོ་མདའ་ཡིན་པ་དང་། གཤིས་རྒྱུད་འཇམ་པོ་བལ་ཡིན་པ་སོགས་རྒྱས་འགྲེལ་བཤད་བྱེད་མི་དགོས་པར་རྣམ་དཔྱོད་ཅན་ཚོས་གོང་གི་གཞས་ཚིག་དེ་གཉིས་ཀློག་ཐེངས་ཤིག་གིས་རྟོགས་ཐུབ། འདི་ལྟ་བུའི་གླུ་ཚིག་མང་བོ་ཞིག་ཡང་ནས་ཡང་དུ་རྣ་ལམ་དུ་བརྒྱུད་ཡོང་བར་བསམ་ན་ང་ཚོའི་སྤྱི་ཚོགས་ཀྱི་གནས་བབ་དང་། བུད་མེད་ཚོའི་རང་དབང་གསལ་སྟོན་བྱས་འདུག་ལ། བོད་ཁུལ་ཧྲིལ་བོར་བུད་མེད་ལ་དུས་རབས་ཉེར་གཅིག་པའི་བུད་མེད་ཅིག་གི་ལོངས་སྤྱོད་དུ་གྱུར་བའི་འགྲོ་བ་མིའི་འདུ་ཤེས་ཙམ་ཡང་མེད་པ་གསལ་བོར་མཐོང་ཐུབ་པས། བུད་མེད་སྙུག་ཐོག་པ་ཚོས་ཅིས་ཀྱང་རྩོད་ལེན་བགྱི་དགོས་པ་ཞིག་ཏུ་མཐོང་ནའང་། བཙན་བྱོལ་སྤྱི་ཚོགས་ཁྲོད་བུད་མེད་རྩོམ་པ་པོ་ཚོས་བྲིས་པའི་དཔྱད་བརྗོད་རྩོམ་ཡིག་མཇལ་རྒྱུ་དཀོན་པ་ནི་ང་ཚོའི་བུད་མེད་རྩོམ་པ་པོ་ཚོས་རྙོག་འཛིང་གི་སྤྱི་ཚོགས་ལ་ཁ་གཏད་ནས་རྩོམ་ཡིག་འབྲི་རྒྱུར་བློ་ཁོག་འདང་གི་མེད་པ་དང་། དངོས་ཡོད་སྤྱི་ཚོགས་འཚོ་བའི་དཀའ་སྡུག་ལ་དཔྱད་གོམས་མེད་པ། བུད་མེད་སྤྱིའི་བདེ་སྡུག་ལ་བསམ་གཞིག་མི་བྱེད་པ། འདས་མ་འོངས་པའི་བོད་ཀྱི་འཕོ་འགྱུར་ལ་མི་སེམས་པ་སོགས་ཀྱིས་ཡིན་པར་འདོད། དེར་བརྟེན་བཙན་བྱོལ་སྤྱི་ཚོགས་འདི་ཕོ་མོ་འདྲ་མཉམ་དང་། དམངས་གཙོའི་རང་དབང་། སྐད་ཆ་བཤད་པ་དང་རྩོམ་ཡིག་འབྲི་བ་ལ་རང་དབང་ཆ་ཚང་ཡོད་པས་བུད་མེད་རྩོམ་པ་པོ་ཚོ་ལོ་རྒྱུས་ཁྲོད་ཀྱི་བོད་རིགས་བུད་མེད་སྤྱི་བྱིངས་ཀྱི་སྣེ་ཁྲིད་མཁན་དང་། བསམ་ཕོད་པ་དང་བཤད་ཕོད་པ། སྒྲུབ་ཕོད་པའི་སྙིང་སྟོབས་ཅན་ཡིན་དགོས་པར་འདོད།
མོའུ་ཙེ་ཏུང་གིས་བུད་མེད་གནམ་གྱི་ཕྱེད་ཀ་ཡིན་ཞེས་པ་ནི་རྒྱ་ནག་གོ་མིན་ཏང་དང་གུང་ཁྲན་ཏང་གཉིས་ཀྱི་དམག་འཁྲུག་སྐབས་བུད་མེད་ཚོས་རང་ཉིད་བློས་གཏོང་གིས་གུང་ཁྲན་ཏང་རྒྱལ་བར་རླབས་ཆེ་བའི་བྱས་རྗེས་བླ་ན་མེད་པ་བཞག་ཡོད་པས་རེད་ལ། ང་ཚོ་བོད་མི་རིགས་ཀྱི་དཀའ་སྡུག་གི་ལོ་ཟླ་འདིའི་ཁྲོད་དུའང་བུད་མེད་ཚོས་རྣམ་དཔྱོད་དང་། རིག་རྩལ་བཀོལ་ཏེ་འབྱུང་འགྱུར་བོད་ཀྱི་དཀའ་རྙོག་སེལ་རྒྱུར་རླབས་ཆེ་བའི་བྱས་རྗེས་འཇོག་རྒྱུ་ནི་གལ་ཆེར་མཐོང་ངོ་། །
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
བོད་མི་རིགས་ཀྱི་འདས་ཟིན་པའི་ལོ་རྒྱུས་ཁྲོད་གོད་ཆག་སྣ་དགུ་བྱུང་བ་ནི་བོད་ཀྱི་བུད་མེད་ཚོ་གཅིག་པུ་མིན་པར་བོད་པ་ཐུན་མོང་ལ་གོད་ཆག་སྣ་དགུ་བྱུང་ཡོད། དེ་ལས་ཀྱང་བོད་ཀྱི་བུད་མེད་ཚོ་དུས་རབས་༢༡པའི་ནང་དུ་ཡང་གྲགས་འགུལ་མེད་པ་འདི་བུད་མེད་ཁོ་ནར་ལེ་གདའ་བྱེད་མི་རུང་བ་མ་ཟད། དེ་ལས་ཀྱང་འགན་ཆེ་བ་དེ་སྐྱེས་པ་ཚོར་ཡོད།