བདུན་ཕྲག་སྔོན་མའི་ཛུམ་བྷ་ཝེ་ཡི་སྲིད་འཛིན་འོས་བསྡུའི་སྐབས་སྲིད་འཛིན་ལས་ཐོག་པ་མུ་གྷ་བྷེ་གཅིག་པུ་ལས་འོས་ཞུགས་བྱས་མེད་སྟབས། མི་རྣམས་ཀྱིས་རྐུས་ལ་ཤོར་བའི་འོས་ཤོག་ཅེས་འབོད་ཀྱིན་དུ། གླིང་ལྔ་མཚོ་བཞི་ན་གནས་པའི་རྒྱལ་སྤྱིའི་དབུ་ཁྲིད་དག་གིས་སྲིད་འཛིན་མུ་གྷ་བྷེ་ལ་ངོ་ཚ་མེད་རབས་དང་། འོས་ཤོག་འདི་དྲང་པོ་དང་ལུགས་མཐུན་མ་རེད་ཅེས་སྐྱོན་བརྗོད་མཆིལ་མ་འཕེན་འཕེན་བྱས། འདིས་ཀྱང་མ་ཁོག་པར་ཁོང་གིས་སྲིད་འཛིན་གྱི་རྒྱལ་ཁ་ཐེངས་དྲུག་པར་བླངས་ཚུལ་ཡོངས་ཁྱབ་དུ་བསྒྲགས་པ་རེད།
སྲིད་འཛིན་མུ་གྷ་བྷེ་བསྐྱར་དུ་སྲིད་འཛིན་ལ་བསྡད་རྗེས་ཨ་རིའི་གཞུང་གིས་མུ་གྷ་བྷེ་ལ་དཔལ་འབྱོར་གྱི་ཉེས་ཆད་བཀལ་བར་བརྟེན། ཕྱི་ཚེས་ ༣༠ ཉིན་ནས་ཨབ་རི་ཀའི་དབུ་ཁྲིད་རྣམས་ཨེ་ཇེབ་དུ་འཛོམས་ནས་ཛུམ་བྷ་ཝེ་ཡི་ཆབ་སྲིད་ཀྱི་དཀའ་རྙོག་འཕར་མ་མི་ཡོང་བ་དང་ད་ལྟའི་དཀའ་རྙོག་འདི་སེལ་ཐབས་ཀྱི་གྲོས་བསྡུར་བྱས་པ་རེད། ཨབ་རི་ཀའི་དབུ་ཁྲིད་ཁག་ཅིག་གིས་ཁེན་ཡའི་ནང་འོས་ཤོག་གི་འགྲན་རྩོད་བྱུང་རྗེས་ཐག་གཅོད་བྱེད་ཕྱོགས་ལྟར། ཛུམ་བྷ་ཝེ་འདི་ཡང་གནས་སྐབས་རིང་རྒྱལ་ཁབ་འགའི་སྲིད་གཞུང་མཉམ་འབྲེལ་གྱིས་བཟུང་ན་ལེགས་ཚུལ་བཤད། ཡིན་ནའང་སྲིད་འཛིན་མུ་གྷ་བྷེ་ཡི་མགྲིན་ཚབ་པ་རྗོར་རྗུ་ཆ་རམ་པ་ཡིས་བརྗོད་དོན། ཁེན་ཡ་ནི་ཁེན་ཡ་རེད། ཛུམ་བྷ་ཝ་ནི་ཛུམ་བྷ་རེད། ང་ཚོར་ཛུམ་བྷ་ཝེ་རང་གི་ལུགས་སྲོལ་ལྟར་གྲོས་ལ་ཞུགས་ཏེ་ཆབ་སྲིད་ཀྱི་དཀའ་རྙོག་སེལ་ཕྱོགས་ཀྱི་ལོ་རྒྱུས་ཡོད། ཛུམ་བྷ་ཝི་ཡི་ལུགས་སྲོལ་མ་གཏོགས་ཁེན་ཡའི་ལུགས་སྲོལ་མི་དགོས། རྩ་བ་ཉིད་ནས་མི་དགོས། ཕྱིར་འཕུད་པ་ནི་ཛུམ་བྷ་ཝེ་མི་དམངས་ཀྱིས་བཤད་ཀྱིན་པའི་ལམ་ཁ་རེད། ཕྱིའི་ཇུས་གཏོགས་ལས་ཐར་དགོས་པ་རེད། དཀའ་རྙོག་འདི་སེལ་ཕྱོགས་ཀྱི་ལམ་ཁ་ཉག་གཅིག་ཡོད་པ་ནི་དེ་རེད། ཅེས་བརྗོད་ཡོད་པ་རེད།
ཨབ་རི་ཀའི་རྒྱལ་ཁབ་ ༥༣ གྱི་དབུ་ཁྲིད་རྣམས་མཚོ་དམར་ཁ་ཞེས་པར་འཛོམས་ནས་གྲོས་བསྡུར་ཡུན་རིང་བྱས་ཡོད་ལ། སྐབས་དེར་སྲིད་འཛིན་མུ་གྷ་བྷེ་ཡང་ཚོགས་ཁང་ཞིག་ལས་ཕྱིར་ཐོན་པ་ན། གསར་འགོད་པ་དག་གིས་སྒྲ་ལེན་དང་པར་ཆས་དག་གཏད་ནས་ཁོར་ཚ་འདྲི་གཏོང་མགོ་བཙུགས་ཡོད་པ་རེད།
བྷི་བྷི་སི་ཡི་གསར་འགོད་པ་ཞིག་གིས། “ཁྱོད་ཚོའི་ལུང་པའི་ནང་གི་འོས་ཤོག་བརྐུས་ལ་ཤོར་སོང་བ་རེད་”ཅེས་ཛུམ་བྷ་ཝེ་ཡི་སྲིད་འཛིན་མུ་གྷ་བྷེ་ལ་སྐྱོན་བརྗོད་བྱས་པ་ཛུམ་བྷ་ཝི་ཡི་གསར་འགོད་པ་ཞིག་གིས་མཐོང་ཡོད་པ་དང་། སྲིད་འཛིན་མུ་གྷ་བྷེ་ཡིས་ཕྱིར། “དབྱིན་ཇུས་ང་ཚོར་མི་སེར་སྤེལ་གྱིན་པ་ག་དུས་མཚམས་འཇོག་གི་ཡིན། ཁྱོད་དགའ་རུང་མ་དགའ་རུང་ང་རྒྱལ་ཁབ་འདིའི་སྲིད་འཛིན་ཡིན་”ཅེས་ལན་བཏབས་པ་རེད།
ཛུམ་བྷ་ཝེ་ཡི་གཞུང་འབྲེལ་གསལ་བསྒྲགས་ལྟར་ན། སྲིད་འཛིན་མུ་གྷ་བྷེ་ལ་འོས་ཤོག་སྤྱིའི་བརྒྱ་ཆ་ ༨༥ ཐོབ་ཡོད་འདུག ཡིན་ནའང་། ཁོང་གི་ཁ་གཏད་འོས་གཞི་མོར་གྷན་ཚེ་ཝན་གྷི་རི་ནི་འོས་ཁོངས་ནས་མ་བསྡད་པར། ཧ་ར་རི་ན་ཡོད་པའི་ཌེ་ནི་ཞིའི་དོན་གཅོད་ཁང་དུ་བཙན་བྱོལ་ལ་ཕྱིན་ཡོད་པ་དང་། ཁོང་གི་ལས་རོགས་དང་རྒྱབ་སྐྱོར་བ་མང་པོ་ཞིག་འོས་བསྡུའི་ཉིན་དེ་དག་རིང་སྲིད་འཛིན་མུ་གྷ་བྷེ་ཡི་ཕྱོགས་གཏོགས་ཚོས་བསད་ཡོད་ཚུལ་འདུག
ཕྱི་ཚེས་ ༡ ཉིན་མོར་གྷན་ཚེ་ཝན་གྷི་རི་ཕྱིར་རང་གི་ཁྱིམ་ལ་ལོགས་ནས་འཆར་ཅན་གྱི་ཕྱག་ལས་གནང་མགོ་བཙུགས་ཡོད་ཅེས་ཌར་ཅིའི་ཕྱི་སྲིད་བློན་ཆེན་ལྷན་ཁང་གིས་བརྗོད་ཡོད་འདུག
ཕྱིའི་དཔལ་འབྱོར་ཉེས་ཆད་དང་གནོན་ཤུགས་ཇེ་ཆེར་གྱུར་ན་གླིང་ཆེན་དེས་རང་གི་དཀའ་རྙོག་སེལ་བར་འགོག་རྐྱེན་དུ་འགྱུར་རྒྱུ་ཡིན་པར་བརྟེན། ཨབ་རི་ཀའི་དབུ་ཁྲིད་དག་གིས་སྲིད་འཛིན་མུ་གྷ་བྷེ་དང་ཁ་གཏད་འོས་གཞི་མོར་གྷན་ཚེ་ཝན་གྷི་རི་གཉིས་ཀྱིས་ཞི་འགྲིག་བྱས་ཏེ། གཞུང་དེ་མཉམ་འབྲེལ་གྱིས་སྐྱོང་རྒྱུའི་ཐབས་ཤེས་འཐེན་གྱིན་ཡོད་པ་རེད།
སྐབས་འདིའི་གནད་ཐུག་ས་གཙོ་བོ་ནི་ཨབ་རི་ཀའི་དབུ་ཁྲིད་དག་གིས་སྔོན་མའི་གཟའ་པ་སངས་ཉིན་གྱི་འོས་ཤོག་དེ་ངོས་ལེན་བྱེད་མི་བྱེད་ལ་ཐུག་ཡོད་པ་རེད། ཁོང་ཚོས་ཕྱོགས་གཅིག་ནས་འོས་ཤོག་དེར་ངོས་ལེན་བྱས་ཏེ་སྲིད་འཛིན་མུ་གྷ་བྷེ་ནི་ཁྲིམས་མཐུན་གྱི་སྲིད་འཛིན་ཡིན་པར་ཁས་ལེན་བྱེད་དགོས་ལ། དེ་མིན་ཚེ་འགྲན་ཡ་འོས་གཞི་མོར་གྷན་ཚེ་ཝན་གྷི་རི་ཡི་ཆ་རྐྱེན་ལ་དཔུང་རོགས་བྱེད་དགོས་ལ། ཁོང་ལྟར་ན། གསུམ་པའི་ཉེར་དགུའི་ཉིན་གྱི་སྔོན་འགྲོའི་འོས་བསྡུའི་སྐབས་འོས་ཤོག་མང་ཤོས་ཁོང་ལ་ཐོབ་ཡོད་སྟབས། འདི་གཞི་ལ་བཟུང་སྟེ་ཞི་འགྲིག་བྱེད་དགོས་ཟེར་གྱིན་ཡོད་པ་རེད།
ཨབ་རི་ཀའི་ལྟ་རྟོག་ཚོགས་པ་ཆེ་ཤོས་གསུམ་གྱིས་གཟའ་པ་སངས་ཉིན་གྱི་འོས་ཤོག་དེར་ངོ་རྒོལ་སྐྱོན་བརྗོད་བྱེད་ཀྱིན་ཡོད་ནའང་། གྷ་བྷོན་རྒྱལ་ཁབ་ཀྱི་སྲིད་འཛིན་ཨོ་མར་བྷོན་གྷོ་ཡིས་ཨབ་རི་ཀའི་ཚོགས་ཆེན་དེའི་ཐོག་ནས་གསར་འགོད་པ་ཚོར། སྐུ་ཞབས་མུ་གྷ་བྷེ་ནི་འོས་འདེམས་བྱས་པ་རེད། ཁོང་གིས་སྲིད་འཛིན་གྱི་དམ་འབུལ་དབུ་མནའ་བཞེས་ཚར་པ་རེད། ཁོང་ང་ཚོ་དང་མཉམ་དུ་ཡོད་ལ། ཁོང་ད་ལྟ་སྲིད་འཛིན་རེད། ང་ཚོས་ཁོང་ལ་འདི་ལས་ལྷག་པ་ཞིག་བཤད་ཐུབ་པ་ཡོད་པ་་མ་རེད་ཅེས་བརྗོད་ཡོད་པ་རེད།
ཨབ་རི་ཀའི་དབུ་ཁྲིད་དག་ཀྱང་ཕྱོགས་གཉིས་སུ་གྱེས་ཀྱིན་ཡོད་ལ། སེར་ར་ལོ་ཎིའི་སྲིད་འཛིན་ཨེར་ཎི་སུ་བྷེ་ཁོ་རོ་མ་ཡིས་བྷི་བྷི་སི་ལ་བརྗོད་དོན། ཛུམ་བྷ་ཝེ་མི་དམངས་ལ་དམངས་གཙོའི་རང་དབང་མ་སྤྲད་པ་རེད། ཚིག་བརྗོད་ཅི་ཡིན་ལ་མ་ལྟོས་པར། ང་ཚོས་དོན་དག་ཅི་བྱུང་བ་དེར་སྐྱོན་བརྗོད་བྱེད་འོས་པ་རེད་ཅེས་བརྗོད་ཡོད་པ་རེད།
མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་གཞོན་པ་ཨ་ཤ་རོ་སུ་མེ་གྷི་རོ་ཨབ་རི་ཀའི་དབུ་ཁྲིད་དག་ལ་བརྗོད་དོན། ཨབ་རི་ཀའི་མཐུན་ཚོགས་ཀྱིས་རྒྱབ་སྐྱོར་ཡོད་པའི་ཛུམ་བྷ་ཝེ་ཡི་ཚོགས་པ་ཁག་དང་། མངའ་ཁུལ་འདིའི་ལས་ཀྱི་སྣེ་མོ་བ་གཞན་པ་དག་གིས་ཞི་མོལ་ཁོ་ན་བརྒྱུད་དེ་དཀའ་རྙོག་འདི་སེལ་ཐུབ་གི་རེད་ཅེས་བརྗོད་ཡོད་པ་རེད།
འབོད་སྐུལ་འདིའི་བྲག་ཅ་དེ་ལྷོ་ཨབ་རི་ཀར་ཁྱབ་ཅིང་། མངའ་ཁུལ་འདིའི་སྟོབས་ཤུགས་ཆེ་ཤོས་དེའི་ཕྱི་སྲིད་ལྷན་ཁང་གིས་ཀྱང་། སྲིད་འཛིན་མུ་གྷ་བྷེ་དང་མོར་གྷན་ཚེ་ཝན་གྷི་རི་གཉིས་ཀྱིས་ཞི་མོལ་བྱས་ཏེ། བར་བརྒལ་གྱི་གཞུང་ཞིག་བཙུགས་ནས་ད་ལྟའི་དཀའ་རྙོག་འདི་སེལ་ཐབས་བྱེད་དགོས་ཞེས་བརྗོད་ཡོད་པ་རེད།
མོར་གྷན་ཚེ་ཝན་གྷི་རི་ཡི་དམངས་གཙོ་ཚོགས་པའི་སྲིད་འཛིན་གཞོན་པ་ཐོ་ཁོ་ཛ་ཎི་ཁུ་བྷེ་ཡིས་བཅར་འདྲི་ཞིག་གི་སྐབས་བརྗོད་དོན། ཁོང་ཚོར་བར་བརྒལ་གྱི་དབུ་ཁྲིད་ཅིག་དགོས་ལ། དེའང་གསུམ་པའི་ཉེར་དགུའི་ཉིན་གྱི་འོས་ཤོག་ལ་གཞི་འཛིན་དགོས་ལ། དེ་ལྟར་བྱས་ཚེ་མོར་གྷན་ཚེ་ཝན་གྷི་རི་ལགས་ནས་དབང་ཚད་ངེས་ཅན་ལེན་ཐུབ་པར་བརྗོད། ཁོང་མོས་བཤད་དོན། ཛུམ་བྷ་ཝེ་འབར་གྱིན་འདུག དེ་མེ་ཐོག་ན་ཡོད་པ་རེད། འདི་འབར་ནས་ཚིག་སྟེ་ངོས་མི་ཟིན་པའི་ཚད་དུ་མ་བསླེབ་གོང་ཨབ་རི་ཀའི་དབུ་ཁྲིད་ཚོས་འདི་སྐྱོད་རྒྱུ་ནི་གལ་ཆེན་པོ་ཆགས་ཡོད་ཅེས་བརྗོད་ཡོད་པ་རེད།
ཨ་རིའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ཀྱིས་ཕྱི་ཚེས་ ༡ ཉིན་བརྗོད་དོན། ཨ་རིའི་གཞུང་གིས་བདུན་ཕྲག་འདིའི་ནང་དུ་མཉམ་འབྲེལ་རྒྱང་ཚོགས་ཀྱི་བདེ་འཇགས་ལྷན་ཚོགས་ནང་དུ་གཞུང་འབྲེལ་གྲོས་ཆོད་ཅིག་བཞག་སྟེ། མུ་གྷ་བྷེ་ཡི་གཞུང་ལ་ཉེས་ཆད་འགེལ་བར་འབད་བརྩོན་བྱེད་ཀྱི་ཡིན། གནད་དོན་འདིའི་ཐོག་ལ་ལྷན་ཚོགས་ཀྱི་ནང་ཁུ་སིམ་མེར་མི་འདུག་པའི་ཡིད་ཆེས་ཡོད། ང་ཚོས་གཞུང་དེའི་ཐོག་ཁ་སྐོར་ནས་ཉེས་ཆད་འགེལ་རྒྱུ་ཡིན། ལས་དོན་འདི་ལ་སུ་ཞིག་གིས་ངོ་རྒོལ་བྱས་པ་ཡིན་ན་དེར་འགྲེལ་བཤད་འདང་ངེས་པ་ཞིག་དགོས་ཟེར།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།