བོད་ཡུལ་སྟོད་སྨད་བར་གསུམ་དུ་པེ་ཅིན་ཨོ་ལིམ་པིག་གི་བདེ་འཇགས་ཀྱི་ཆེད་དུ། སྔར་ལས་ཀྱང་དམག་དཔུང་ཇེ་མང་དང༌། སྒྲིག་ཁྲིམས་ཇེ་བཙན་དུ་གཏོང་གི་ཡོད། དེའི་དཔེར་མཚོན་གཅིག་ནི། དཀར་མཛེས་བོད་རིགས་རང་སྐྱོང་ཁུལ་མི་དམངས་སྲིད་གཞུང་གི་བཀའ། ཅེས་པའི་ཁྲིམས་ལུགས་དོན་ཚན་ ༡༢ ཅན་ཞིག་ཟླ་ ༦ པའི་ཚེས་ ༢༨ ཉིན་ཁྱབ་བསྒྲགས་བྱས་ཡོད། ཁྱབ་བསྒྲགས་དོན་ཚན་ ༡༢ དེ་དོན་ཚན་གཙོ་བོ་གསུམ་གྱི་ནང་བསྡུས་ཡོད་པ་སྟེ། དང་པོ། ཟིང་ཆ་སློང་མཁན་གྱི་གྲྭ་བཙུན་ལ་ཐག་གཅོད་ནན་མོ་བྱ་རྒྱུ་དང༌། གཉིས་པ། ཟིང་ཆ་བསླངས་པའི་དགོན་པར་ཐག་གཅོད་ནན་མོ་བྱ་རྒྱུ། གསུམ་པ། དགོན་པའི་དོ་དམ་ཨུ་ཡོན་ལྷན་ཁང་གི་འགན་འཁྲི་ལ་རྩད་གཅོད་བྱ་རྒྱུའི་སྐོར་བཅས་རེད།
དང་པོ། ཟིང་ཆ་སློང་མཁན་གྱི་གྲྭ་བཙུན་ལ་ཐག་གཅོད་ནན་མོ་བྱ་རྒྱུའི་ནང་དུ་དོན་ཚན་བཞི་འདུག་པ་དང༌། ངོ་རྒོལ་དང་རྔམ་སྟོན་ཁྲོམ་སྐོར། དར་ཆ་སྒྲེང་བ་སོགས་བྱས་ཀྱང༌། རྣམ་འགྱུར་ཡག་པོ་དང་འགྱོད་བཤགས་ཡི་གེ་བྲིས་ཏེ་ནོར་འཁྲུལ་ཁས་ལེན་བྱེད་པ། རང་འགུལ་གྱིས་གནད་དོན་ངོས་ལེན་བྱེད་མཁན་སོགས་ལ་ཁྱིམ་བདག་གིས་འགན་ལེན་བྱས་རྗེས། འགྲོ་འདུག་ལ་སྟངས་འཛིན་དང་སློབ་གསོ་སྤྲོད་རྒྱུ་ཡིན་པ་དང༌། ཡང་གོང་གི་ལས་འགུལ་དེ་དག་གི་ནང་དུ་ཞུགས་རྗེས་རྣམ་འགྱུར་ངན་པ་དང༌། ཉེས་པ་ཚབས་ཆེན་ཏེ། ཁ་བྲལ་དང་ཟིང་ཆ་སློང་མཁན་ཚོར་རྒྱབ་སྐྱོར་དང་ངན་འབྲེལ་བྱེད་པ། སྒྲིག་འཛུགས་ཀྱི་སྣེ་ཁྲིད་དེ་ཟིང་ཆ་སློང་མཁན་ཚོར་བཅའ་ཁྲིམས་ལྟར་ཉེས་ཆད་དྲག་པོ་བཅད་རྗེས། དགོན་པ་ནས་ཕྱིར་ཕུད་ནས་ཕྱིན་ཆད་ཆོས་ལུགས་ཀྱི་ལས་དོན་སྒྲུབ་པའི་ཐོབ་ཐང་མེད་པར་གཏོང་རྒྱུ་དང༌། འདིའི་རིགས་ཀྱི་གྲྭ་བཙུན་ཚོ་དགོན་པ་གང་གི་ནང་དུ་བསྡུས་ཚེ་དགོན་པ་དེའི་དོ་དམ་ཨུ་ཡོན་ལྷན་ཁང་གི་འགན་ཁུར་པར་ངོ་ལོག་དང༌། ཁ་བྲལ་རིང་ལུགས་ལ་རྒྱབ་སྐྱོར་བྱེད་མཁན་གྱི་ཉེས་མིང་འོག་ཐག་གཅོད་ནན་མོ་བྱེད་རྒྱུ་ཡིན་འདུག
གཉིས་པ། ཟིང་ཆ་བསླངས་པའི་དགོན་པར་ཐག་གཅོད་ནན་མོ་བྱ་རྒྱུའི་ནང་དུ་དོན་ཚད་ལྔ་ཡོད་པ་དང༌། གལ་ཏེ་དགོན་པ་ཞིག་གི་ནང་དུ་གྲྭ་བ་བརྒྱ་ཆ་ ༡༠ དང་ ༣༠ བར་ཟིང་ཆ་བསླངས་པའི་སྤྱོད་ངན་གྱི་ནང་དུ་ཞུགས་ཚེ། གྲྭ་བའི་འགྲོ་སྡོད་ལ་བཀག་འགོག་དང༌། དགོན་པའི་ཆོས་ཕྱོགས་ཀྱི་བྱེད་སྒོ་མཚམས་འཇོག་བྱ་རྒྱུ། དོགས་ཡོད་མི་སྣ་འཛིན་བཟུང་དང་སྔོག་བཤེར་བྱེད་པ། དངོས་རྫས་རྩིས་ལེན་བྱ་རྒྱུ། གལ་ཏེ་དགོན་པའི་ཨུ་ཡོན་མི་སྣ་ལས་འགུལ་ལ་ཞུགས་ཚེ་ཐད་གར་ལེགས་སྒྲིག་བྱ་རྒྱུ་དང༌། གནས་སྐབས་འོས་མི་མེད་པའི་དགོན་པར་ཡུལ་དེའི་སྲིད་གཞུང་གིས་དོ་དམ་བྱེད་པའི་རིང་བདག་གཉེར་བྱེད་སྒོ་ཚང་མ་མཚམས་འཇོག་བྱ་རྒྱུ། གལ་ཏེ་ལས་ཀར་གཞོགས་འདེགས་མི་བྱེད་མཁན་དང་ཡོ་བསྲང་མི་བྱེད་མཁན། དགོན་པའི་ཕྱི་ལ་འགྲོ་མཁན་གྱི་གྲྭ་བཙུན་ཚོ་དགོན་པ་ནས་གཙང་ཕུད་བྱས་ཏེ་ཕ་ཡུལ་དུ་མངགས་རྒྱུ་དང་གྲྭ་ཤག་བཤིག་རྒྱུ། གྲྭ་ཤག་དག་ལ་གཅིག་གྱུར་གྱི་སྒོ་གྲངས་འབྲི་བ་དང་དགོན་པའི་གྲྭ་བཙུན་གྱི་སྤུས་ཀ་ཇེ་ལེགས་དང་གྲངས་ཀ་ཉུང་འཕྲི་བྱ་རྒྱུ འདི་ལྟར་ལེགས་སྒྲིག་བྱས་རྗེས་ད་དུང་ཡང་གནས་ཚུལ་བྱུང་ན་དགོན་པའི་སྒོ་རྒྱག་རྒྱུ་བཅས་རེད་འདུག
གསུམ་པ། དགོན་པའི་དོ་དམ་ཨུ་ཡོན་ལྷན་ཁང་གི་འགན་འཁྲི་ལ་རྩད་གཅོད་བྱ་རྒྱུའི་ནང་དུ་དོན་ཚན་གསུམ་འདུག་པ་དང༌། གོང་གི་ལས་འགུལ་དེ་དག་གི་ཁྲོད་དུ་ཞུགས་མཁན་གྱི་གྲྭ་བཙུན་ཚོར་དོ་དམ་དང་རྩད་གཅོད་མི་བྱེད་མཁན་ནམ་ཡང་ན་གནས་ཚུལ་ལྐོག་ཞུ་དང༌། ཁ་བྲལ་གཏོང་མཁན་ལ་ངན་འབྲེལ་བྱེད་མཁན། ཟིང་ཆ་སློང་མཁན་ལ་རོགས་རམ་བྱེད་མཁན་གྱི་དགོན་པའི་དོ་དམ་ཨུ་ཡོན་གྱི་གྲྭ་བ་དང༌། སྤྲུལ་སྐུ། མཁན་པོ། དགེ་བཤེས་སོགས་ལ་སློབ་གསོ་དང་སྐྱོན་བརྗོད་ནན་མོ་བྱ་རྒྱུ། གལ་ཏེ་རྣམ་འགྱུར་ཡག་པོ་མེད་ན་གྲྭ་བཙུན་གྱི་ཚོགས་ཆེན་ཐོག་ནོར་འཁྲུལ་ཁས་ལེན་དང་ཡིག་ཐོག་ནས་ཁས་ལེན་བྱེད་དུ་འཇུག་རྒྱུ་མ་ཟད། ཆོས་ལུགས་ཀྱི་ཐོབ་ཐང་དང་སྤྲུལ་སྐུའི་རྒྱུད་འཛིན་ཐོབ་ཐང་མེད་པར་བཟོ་རྒྱུ། སྤྲུལ་སྐུ་དེར་བདག་པའི་དངུལ་དངོས་བསྡམས་བཅད་བྱ་རྒྱུ་སོགས་ཀྱི་གནས་ཚུལ་དེ་དག་གསར་འགྱུར་དང་བརྙན་འཕྲིན་སོགས་ཀྱི་ནང་དུ་ཡང་ཡང་བཏང་སྟེ་སྤྱི་བསྒྲགས་བྱ་རྒྱུ་ཡིན་འདུག
