བོད་ཀྱི་བུད་མེད་རྩོམ་པ་པོ་འོད་ཟེར་གྱིས་ལོ་ངོ་གསུམ་གྱི་རིང་ཁོང་མོ་ཕྱིར་སྐྱོད་བྱེད་ཆོག་པར་རྒྱ་གཞུང་ལ་རེ་ཞུ་ཡི་གེ་ཕུལ་ཡང༌། ད་བར་ཐོངས་མཆན་ལག་འཁྱེར་མ་རག་སྟབས་རྒྱ་ནག་གཞུང་ཁྲིམས་གཏུགས་བྱ་རྒྱུ་ཡིན་འདུག འདི་ནི་བོད་མི་ཞིག་གིས་རྒྱ་ནག་གཞུང་ཁྲིམས་གཏུགས་བྱས་པ་ཐོག་མ་དེ་ཆགས་ཡོད་པ་རེད།
འོད་ཟེར་ལགས་ནི་བོད་ཕྱི་ནང་གི་བོད་མི་གང་མང་གིས་དོ་སྣང་བྱེད་བཞིན་པའི་མི་སྣ་ཞིག་ཡིན་སྟབས། རྒྱ་གཞུང་གིས་ལོ་འདི་དག་ལ་ལྟ་རྟོག་དང༌། བཀག་ཉར་བྱས་པ་མ་ཟད། མོས་བརྩམས་པའི་དཔེ་དེབ་ཀྱང་རྒྱ་ནག་ནང་འགྲེམ་སྤེལ་གྱི་ཐོབ་ཐང་མེད་པར་བཟོས་ཡོད། ཁོ་མོས། ཐེངས་འདིར་རྒྱ་ནག་གཞུང་ལ་ཁྲིམས་གཏུགས་བྱེད་དོན་གཙོ་བོ་ནི། རྒྱ་ནག་གིས་མོ་ལ་ཐོངས་མཆན་ལག་འཁྱེར་མ་སྤྲད་པ་ཁོ་ན་མ་ཡིན་པར། གསུམ་པའི་དོན་རྐྱེན་ནས་བོད་ས་ཡོངས་སུ་སྔར་མེད་དམ་དྲག་བྱེད་པའི་དངོས་ཡོད་དང༌། མིག་སྔར་ཐེབས་པའི་གནོད་སྐྱོན། འདྲ་མཉམ་མིན་པའི་ཐོབ་ཐང་ལ་འཛམ་གླིང་མི་དམངས་ཀྱིས་དོ་ཁུར་བྱ་ཆེད་དུ་ཡིན་ཚུལ་བརྗོད་ཡོད། ཨ་རིའི་སྲིད་དོན་དཔྱད་བརྗོད་པ་ལེ་འར་ཧོན་ཁོན་གྱིས་མོ་ལ། བོད་ཀྱི་ཕུལ་བྱུང་རྩོམ་པ་པོའི་མཚན་སྙན་གནང་བ་དང༌། ཁོ་མོར་ཚད་མཐོ་བའི་རྩོམ་རྩལ་ཡོད་པ་ཁོ་ན་མིན་པར་སྐྱེས་སྟོབས་ཀྱི་ཤེས་ནུས་ཡོད་ཚུལ། བོད་མི་རིགས་ཀྱི་བདེ་སྡུག་ལ་སེམས་ཁུར་བྱས་པ་གཅིག་པུ་མ་ཡིན་པར། རྒྱ་ནག་ནང་ཁུལ་གྱི་མི་སེར་དཀྱུས་མའི་བདེ་སྡུག་གླེང་བའི་རྩོམ་མང་པོ་བྲིས་ཡོད་ཅེས་དང༌། ད་དུང༌། རྒྱ་ནག་གིས་ཁོ་མོར་གནོད་པ་བཟོ་བ་འདི་ནི། རྒྱ་ནག་ལ་སྔོན་མ་ནས་འདི་ལྟའི་སྣང་ཚུལ་ཡོད་པ་དང་འདི་ལྟར་ལས་གི་རེད་ཅེས་བརྗོད་ཡོད། ཡང་ཁོང་གིས། འོད་ཟེར་གྱིས་ལོ་ངོ་གསུམ་རིང་སྙན་ཞུ་ཕུལ་ཡང་ལམ་ཡིག་བཟོ་མ་ཐུབ་པ་འདིས། རྒྱ་ནག་ཁྲིམས་ཀྱི་དབང་སྒྱུར་འོད་ཡོད་པའི་རྒྱལ་ཁབ་ཅིག་མིན་པ་གསལ་སྟོན་བྱས་ཡོད་ལ། རྒྱ་ནག་གིས་ཁྲིམས་ཀྱི་དབང་སྒྱུར་གྱི་སྐད་ཆ་མི་བཤད་པར། དུས་ནམ་ཡང་ལྐོག་ལས་ཁོ་ན་ལས་ཀྱི་ཡོད་པ་རེད། འོད་ཟེར་ལྟ་བུའི་རྩོམ་པ་པོ་དང༌། ཤེས་ལྡན་མི་སྣ། གསར་འགོད་པ་སོགས་ལ་རྒྱ་ནག་གིས་དམིགས་བསལ་གྱིས་ཐོབ་ཐང་རྡོག་རོལ་གཏོང་བཞིན་པ་ནི་དོན་དངོས་ཀྱི་གནས་སྟངས་ཤིག་ཡིན་ཚུལ་བརྗོད་ཡོད།
ཐེངས་འདིའི་ཁྲིམས་གཏུགས་ཀྱི་སྐོར་ལ། ཨ་རི་རྒྱལ་ཡོངས་ཀྱི་འགྲོ་བ་མིའི་ཐོབ་ཐང་གོ་སྒྲིག་ཚོགས་པའི་ཡན་ལག རྒྱ་ནག་འགྲོ་བ་མིའི་ཐོབ་ཐང་ལག་བསྟར་པ་ཐེན་ཅིན་ཁྲེང་གིས། འོད་ཟེར་གྱིས་རྒྱ་ནག་གཞུང་ལ་ཁྲིམས་གཏུགས་བྱེད་མགོ་བརྩམ་བཞིན་ཡོད་པ་དང༌། ཁོང་དང་ཁོང་གི་ཁྲིམས་རྩོད་པས་རྒྱལ་ཁ་ཐོབ་པར་ཡིད་ཆེས་བྱེད་བཞིན་འདུག ཁོང་ཚོས། རྒྱ་ནག་གི་ཁྲིམས་ལུགས་ཀྱིས་དངོས་ཡོད་ཐོག་བདེན་པ་མེད་ཚེ་ཁོ་མོར་ཐོབ་མི་སྲིད་སྟབས། མོས་ཐེངས་འདིའི་ཁྲིམས་གཏུག་ལས། ཁྲིམས་ལུགས་སྲུང་སྐྱོབ་ཀྱིས་ཁོང་ལ་ཐོབ་ཐང་ཞིག་ཡོད་པར་བསམ་བཞིན་ཡོད་འདུག་ཅེས་དང༌། ད་དུང༌། ཨོ་ལིམ་པིག་ཡར་སྔོན་དུ། རྒྱ་ནག་གིས་ཕྱོགས་ཡོངས་ནས་དམ་དྲག་བྱེད་བཞིན་ཡོད་པས། འོད་ཟེར་གཅིག་པུ་ཕྱི་ཕྱོགས་སུ་བསྐྱོད་རྒྱུར་བཀག་འགོག་བྱས་པ་མིན་པར། ཕྱི་ནང་གི་མགྲོན་པོ་དག་ལའང་གཅིག་མཚུངས་ཀྱིས་བྱེད་ཐབས་འདི་བཀོལ་བཞིན་ཡོད་ལ། འདི་ནི་རྒྱ་ནག་གིས་ཨོ་ལིམ་པིག་སྐབས་སེམས་ཁྲལ་བྱེད་བཞིན་པའི་ནད་གཞི་ཞིག་ཆགས་ཡོད་པ་རེད་ཅེས་བརྗོད་ཡོད།
