བོད་ཀྱི་དཔྱད་གཏམ་རིང་མོ་ལས་ཟུར་བཀོད་དང་པོ།
སྤྲ་རིགས་ཐོགས་མེད།
འདས་པའི་དུས་རབས་ཕྱེད་ཙམ་འདིའི་རིང་དུ་བོད་ཀྱི་མཐོ་རིམ་མི་སྣ་གཙོ་བྱས་པའི་ བོད་མི་མང་པོའི་སེམས་ངོགས་སུ་རང་ཉིད་ནི་རྒྱལ་སྤྱི་དང་ལྷག་པར་ཏུ་ནུབ་ཕྱོགས་ བ་ཚོའི་སེམས་གཏིང་གི་གཅེས་ཕྲུག་ཏུ་གྱུར་ཡོད་འདོད་ལ། བོད་མིའི་བདག་དབང་གི་འཐབ་རྩོད་ཀྱང་ནུབ་ཕྱོགས་པ་ཚོའི་རྒྱབ་སྐོར་དང་ལམ་སྟོན་ འོག་ད་གཟོད་ཐོབ་ཐུབ་པའི་ཡིད་ཆེས་བྱས་ཡོད། རབ་རིབ་དང་འཁྲུལ་སྣང་གི་བརྒྱུད་རིམ་འདིའི་ཁྲོད་དུ་བོད་མི་ཚོས་ཐེ་ཚོམ་མེད་ པར་རང་ཉིད་ཀྱི་མི་གཤིས་ལ་གཤགས་བཅོས་ཐེངས་མང་བཏང་ནས་ནུབ་ཕྱོགས་པའི་སེམས་ཁོང་ གི་རང་ཉིད་ཀྱི་གནས་བབ་རྒྱུད་འཛིན་ཡོང་བར་འབད་བརྩོན་བྱས་ཡོད།
དཔེར་ན། བོད་མི་ཚོས་རྒྱ་ནག་ནང་ཁུལ་གྱི་མི་འབོར་དཀའ་ངལ་ལ་བསམ་ཤེས་ཀྱིས་ལོ་རྒྱུས་ཁྲོད་ཀྱི་རང་བཙན་བློས་བཏང་ནས་ཚད་མཐོའི་རང་སྐྱོང་གི་བསམ་ཚུལ་བཏོན་ཞིང༌། བོད་ཀྱི་འཐབ་རྩོད་ལམ་ཁ་ཡང་འཚེ་བ་མེད་པ་དང་ཞི་བའི་ལམ་དུ་གཞུང་ཐོག་ནས་གཏན་འབེབས་མཛད། ད་དུང་རྒྱ་གར་དང་བལ་ཡུལ་སོགས་སུ་བོད་པའི་དུས་དྲན་ཁག་གི་ངོ་རྒོལ་སྐད་འབོད་ཀྱང་བྱང་ཆུབ་སེམས་མཆོག་མ་དང་མར་མེ་ཁྲོམ་སྐོར་གྱི་རྣམ་པ་ཅན་དུ་བསྒྱུར་བ་མ་ཟད། ཐ་ན་རང་ཉིད་ཀྱི་ཕུ་ནུ་སྤུན་ཟླ་བསད་པའི་ཁྲག་དྲི་མ་ཡལ་སྔོན་ནས་ལག་དམར་བའི་ཆེད་དུ་གཏོང་བའི་ཕྱག་ཟུང་རིང་དུ་བསྐྱངས་ནས་ས་ཡོམ་གྱི་དཀའ་ངལ་སེལ་རོགས་བྱས་ཡོད། འདི་ལྟར་བོད་མི་ཚོས་ཐབས་བརྒྱ་ཇུས་སྟོང་གི་སྒོ་ནས་རང་ཉིད་ནུབ་ཕྱོགས་མགོ་སེར་ཚོའི་མཚར་སྣང་ཁྲོད་ཀྱི་རང་ལས་གཞན་གཅེས་པར་འཛིན་མཁན་གྱི་ཐེག་ཆེན་པ་ཡིན་མདོག་གི་གདོང་འབག་ལ་ལྷན་པ་དགུ་བརྩེགས་བརྒྱབས་ནས་ཨུ་ཚུགས་ཀྱིས་གྱོན་ཡོད།
འོན་ཀྱང༌། ཚོང་རྭའི་དགོས་མཁོ་དང་བཟོ་གྲྭའི་དར་འཕེལ་གྱི་འགྲན་བསྡུར་ཁྲོད་ཤར་ནུབ་ཀྱི་རྒྱལ་ཁབ་གང་མང་ཞིག་རང་བཞིན་གྱིས་རྒྱ་གཞུང་གི་མདུན་དུ་རྣམ་འགྱུར་ཇེ་བཟང་དང་གཤིས་ཀ་ཇེ་འཇམ་དུ་འགྲོ་བཞིན་ཡོད་ལ། དེ་དང་མཉམ་དུ་བོད་དོན་ལ་རྒྱབ་སྐོར་གནང་མཁན་གྱི་ཚོགས་སྡེ་ཁག་བོད་དོན་ཐོག་སྐད་ཆ་བཤད་མཁན་གྱི་རྒྱལ་སྤྱིའི་མཐོ་རིམ་མི་སྣ་དག་ཀྱང་ཆར་རྗེས་ཀྱི་འཇའ་ཚོན་བཞིན་ཁུ་སིམ་མེར་ཡལ་ནས་འགྲོ་བཞིན་ཡོད། ཐ་ན་འགྲོ་བ་མིའི་ཐོབ་ཐང་དང་ཞི་བདེའི་ཁ་གཡང་རྒྱུན་ཆད་མ་མྱོང་བའི་ཨ་རིའི་སྲིད་འཛིན་བྷུ་ཤུ་དང་ཧྥ་རན་སིའི་སྲིད་འཛིན་སྭ་ཁོ་སོགས་ཀྱིས་ཀྱང་སོ་སོའི་རྒྱུ་མཚན་སྙིང་རྗེ་མོ་རེ་འགྲེལ་བཤད་བྱས་ནས། རྒྱ་ནག་གི་ཨོ་ལིམ་པིག་མཛད་སྒོར་ཤོར་འགོ་བཙུགས་ཡོད། ཐ་ན་ཨེ་ཤ་ཡའི་ནང་དུ་ཆེན་པོར་རློམ་པའི་རྒྱ་གར་སྲིད་བློན་སོགས་ལ་རྒྱ་ནག་གི་སྐུ་མགྲོན་བརྒྱད་ཅུའི་གྲས་སུ་མགྲོན་ཤོག་མ་རག་པར་ལྷག་ནས་ཡོད། འདི་ནི་ང་ཚོས་ངེས་པར་དུ་ཤེས་དགོས་ལ་ཁས་ཡང་ལེན་དགོས་པའི་རྒྱལ་སྤྱིའི་སྤྱི་ཚོགས་ཁྲོད་ཀྱི་རྒྱ་ནག་གཞུང་གི་དབང་ཤུགས་དང་གནས་བབ་ཡིན།
ཨོ་ལིམ་པིག་རྩེད་འགྲན་ལ་ཐག་ཉེ་རུ་ཕྱིན་པ་དང་མཉམ་དུ་རྒྱ་གཞུང་གི་བློ་སྟོབས་ཇེ་ཆེ་དང་མགོ་བོ་མཐོ་རུ་ཕྱིན་ཡོད། དེ་དང་མཉམ་དུ་ཁོ་ཚོས་བོད་དོན་ཐོག་བཟུང་བའི་རྣམ་འགྱུར་ཇེ་རྩུབ་དང་ངར་སྐད་ཇེ་མཐོར་འགྲོ་བཞིན་ཡོད། ཐ་ན་ང་ཚོའི་ཐེངས་བདུན་པའི་སྐུ་ཚབ་ཚོས་ཀྱང་བོད་གཞུང་མང་གཉིས་ཀྱི་རེ་བཞག་དང་སྨོན་འདུན་རྒྱབ་གང་ཁུར་ཏེ་མཁའ་ལམ་བརྒྱུད་པེ་ཅིན་དུ་འཕུར་ཞིང༌། ལས་ཕོག་མེད་པའི་གླ་བ་ཁྲི་ཕྲག་སྟོང་ཕྲག་གི་རྡུལ་ཆུས་བརྩིགས་པའི་རྩེད་འགྲན་རྭ་བར་སྐོར་ཐེངས་ཤིག་བྱས་རྗེས་རྒྱ་གཞུང་གི་སྐྱོན་འཛུགས་དང་ཆ་རྐྱེན་རུམ་གང་བརྫངས་ནས་ཕྱིར་རྡ་སར་སྐྱོ་ལྷང་ལྷང་ངང་ལོག་ཏུ་བཅུག་ཡོད། གང་ལྟར་སྐྱ་ཟད་འུ་ཐུག་གི་གནས་སྟངས་འདིའི་འོག་ནས་བོད་མི་ཚོས་དོན་ངོ་མར་རང་ཉིད་རྒྱལ་སྤྱིའི་གར་སྟེགས་སུ་བདག་མེད་དྭ་ཕྲུག་ཅིག་ཡིན་པའི་ངོས་འཛིན་ཐོག་མ་ཐོབ་ཡོད་ལ། རེ་བཞག་ནུབ་ཕྱོགས་སུ་བཅོལ་བའི་རབ་རིབ་ཀྱི་རྨི་ལམ་ལས་རྟོགས་སད་ཐེངས་ཤིག་ཀྱང་ཐེབས་ཡོད། སྐབས་འདིར་ངས་ང་ཚོའི་ངག་ཏུ་ཡང་ཡང་སྐྱོར་ཞིང་ལག་ལེན་དུ་ཐེངས་གཅིག་ཀྱང་འདེབས་མྱོང་མེད་པའི་སྟོན་པ་ཤཱཀྱ་ཐུབ་པའི་བསླབ་བྱ་ཚིག་རྐང་གཉིས་དྲན་གསོ་བྱེད་འདོད། རང་ཉིད་རང་གི་མགོན་ཡིན་ཏེ།། གཞན་ལྟ་སུ་ཞིག་མགོན་དུ་བགྱི།།
