ནག་ཉེས་ཡོད་མེད་གང་ལྟར་ཡང་རྒྱ་ནག་གིས་འཛིན་བཟུང་བྱས་པའི་གྲྭ་པ་རྣམས་གློད་སྐབས་རྒྱ་སྒོར་སྟོང་ཕྲག་མང་བོའི་ཉེས་ཆད་གཅོད་པ་མ་ཟད། འཛིན་བཟུང་བྱས་རིང་བཙོན་ཁང་གི་ཁང་གླ་དང་ཟ་མའི་རིན་འབབ་ཡང་སྤྲོད་དགོས་ཀྱི་ཡོད་འདུག་ལ། འདི་ནི་མི་གཏའ་མར་ཉར་ཏེ་གཞན་རྒྱུ་ཧམ་འཕྲོག་བྱེད་པའི་ཇག་ཚོགས་ཀྱི་བྱེད་སྟངས་དང་གཅིག་མཚུངས་རེད་ཟེར།
ཟླ་ ༧ ཚེས་ ༢༥ ཉིན་ངྷ་ས་བཞུགས་སྒར་ཀིརྟིའི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་གིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་ ༣ ཚེས་ ༡༢ ཉིན་ལྷ་ས་འབྲས་སྤུངས་དགོན་པའི་དགེ་འདུན་པ་ཚོས་རྒྱ་གཞུང་ལ་ཞི་བའི་ངོ་རྒོལ་བྱེད་སྐབས་ཉེན་རྟོག་པ་དང་དྲག་ཆས་དམག་མིས་དྲག་གནོན་བྱས་པས། དེར་ཡོད་རྔ་པ་ཀིརྟི་དགོན་པའི་གྲྭ་སྐལ་བཟང་དང་དམ་ཆོས་གཉིས་ཀྱིས་རང་གི་ལུས་ལ་གྲི་རྩེས་ཡི་གེ་དང་རི་མོ་སྣ་ཚོགས་བྲིས་ཏེ་ཁྲག་འཛར་བཞིན་པར་ངོ་རྒོལ་བའི་ཁྲོད་ནས་ཧར་ཐོན་གྱིས་སྐད་འབོད་ཤུགས་ཆེན་བྱས་པས་དགེ་འདུན་པ་རྣམས་ཀྱིས་ཉེན་སྐྱོབ་སླད་དགོན་པའི་སྨན་ཁང་དུ་བསྐྱལ་ཡོད་མོད། ད་ལྟ་ཁོང་གཉིས་སྐོར་གྱི་གནས་ཚུལ་གང་ཡང་ཤེས་རྟོགས་མེད་པར་གྱུར་ཡོད་ཅིང༌། དེ་བཞིན་དུས་ཚེས་གསལ་ཁ་བྱུང་མེད་ནའང་ལྷ་སར་ཡོད་པའི་རྔ་པ་ཀིརྟི་དགོན་གྱི་གྲྭ་པ་གཉིས་ངོ་རྒོལ་བའི་ཁྲོད་ནས་ཐོན་ཏེ་རྒྱ་དམག་དང་འཛིང་རེས་ཤོར་བའི་གནས་ཚུལ་རྒྱ་ནག་གི་གློག་བརྙན་ནང་བླངས་འདུག་ལ། ཟླ་གསུམ་པའི་ཚེས་བཅུའི་དོན་རྐྱེན་རྗེས་ནས་མདོ་སྟོད་སྨད་ཀྱི་དགེ་འདུན་པ་རྣམས་འཛིན་བཟུང་བྱས་ནས་ས་གནས་གཞན་དག་ཏུ་ཁྲིད་འདུག་པ་ལྟར། སྟག་ཚང་ལྷ་མོ་ཀིརྟི་དགོན་གྱི་དགེ་འདུན་པ་ ༡༥ ཙམ་དང༌། རྔ་པ་ཀིརྟི་དགོན་པའི་དགེ་འདུན་པ་ ༢༠ ལྷག་ལྷ་ས་སེ་ར་དང་འབྲས་སྤུངས་སུ་སློབ་གཉེར་བྱེད་བཞིན་ཡོད་པ་རྣམས་ཀྱང་བཟུང་ནས་ས་གནས་གཞན་དུ་ཁྲིད་དེ། ད་བར་ཟླ་བཞི་ལྷག་གི་རིང་གནས་ཚུལ་གང་ཡང་ཤེས་རྟོགས་བྱུང་མེད་ནའང༌། ཟླ་ ༧ ཚེས་ ༢༠ ཉིན་རྒྱ་གཞུང་གི་དཔོན་རིགས་ཚོས་དེ་སྔོན་ལྷ་ས་ནས་འཛིན་བཟུང་བྱས་པའི་རྔ་པ་ཀིརྟི་དགོན་པའི་དགེ་འདུན་པ་ ༢༢ ཀྱི་མཚན་བྱང་བཀོད་པའི་ཡི་གེ་ཞིག་རྔ་པ་ཀིརྟི་དགོན་པར་བཏང་སྟེ། འཛིན་བཟུང་བྱས་པའི་གྲྭ་པ་རྣམས་མི་རིང་བར་ས་གནས་སུ་འབྱོར་རྒྱུ་ཡིན་ཚུལ་བཤད་འདུག འོན་ཀྱང་ཟླ་ ༧ ཚེས་ ༢༣ ཉིན་གནས་ཚུལ་ཤེས་རྟོགས་བྱུང་བར་གོང་གསལ་གྱི་དགེ་འདུན་པ་རྣམས་དེང་སྐབས་ནག་ཆུ་རྫོང་དུ་ཡོད་པས་དོ་བདག་སོ་སོའི་ནང་མི་རྣམས་ནག་ཆུར་ལེན་དུ་ཤོག་ཅེས་པ་ལས་རྔ་པ་ས་གནས་སུ་འབྱོར་མེད་ཅིང༌། ནག་ཆུར་དོ་བདག་གི་ནང་མི་ལེན་དུ་འགྲོ་དགོས་དོན་ཉེས་ཆད་ཀྱི་སྒོར་དང་འཛིན་བཟུང་བྱས་ནས་ད་བར་གྱི་བཙོན་ཁང་གི་ཁང་གླ་དང་ཟ་མའི་རིན་འབབ་སྤྲོད་དགོས་པས་ཡིན་ཞིང༌། བཙོན་ཁང་གི་ཁང་གླ་ནི་མགྲོན་ཁང་ལས་ཀྱང་མཐོ་བོ་ཡིན་འདུག་ལ། འདི་ནི་མི་གཏའ་མར་ཉར་ཏེ་གཞན་རྒྱུ་ཧམ་འཕྲོག་བྱེད་པའི་ཇག་ཚོགས་ཀྱི་བྱེད་སྟངས་དང་གཅིག་མཚུངས་རེད་ཅེས་ཀིརྟི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་པའི་ཚོགས་མི་གྲྭ་ཚེ་རིང་ལགས་ཀྱིས་བརྗོད་ཡོད།
དེ་སྔོན་ཟླ་ ༣ ཚེས་ ༢༨ དང་ ༢༩ ཉིན་གཉིས་ནང་རྔ་པ་ཀིརྟི་དགོན་པ་ནས་འཛིན་བཟུང་བྱས་པའི་གྲས་སུ། རྨེའུ་རུ་མ་ནས་ཡིན་པའི་གྲྭ་ངག་ཁོ། རང་ལོ་ ༦༠ ལྡོང་ཁུ་བློ་བཟང་འཇམ་དབྱངས། རང་ལོ་ ༣༥ ། རྔ་སྲིབ་སེ་སྐོར་བློ་བཟང་བསམ་གཏན། རང་ལོ་ ༣༩ ། རྨེའུ་རུ་མ་བློ་བཟང་ཐབས་མཁས། རང་ལོ་ ༣༣ ། འཇམ་དབྱངས། ཕྱུགས་ལས་ནས་ཡིན་པའི་འདའ་རྡོར། རང་ལོ་ ༤༧ ཙམ་ཡིན། ཁྲིན་ཀན་བློ་བཟང་དཔལ་ལྡན། རང་ལོ་ ༣༦ ། ཡིན་པ་བཅས་ད་ལྟ་གློད་ཡོད་འདུག
