ངྷ་སའི་ཐང་ཁྲོམ་སྟོན་མཁན་ཚོའི་དཀའ་ངལ།

གུ་དོག་ཅིང་འགྲུལ་ལམ་སྟབས་བདེ་མེད་པའི་མེག་གྷན་སྲང་ལམ་གྱི་ལམ་ཟུར་དུ་ཐང་ཁྲོམ་སྟོན་མཁན་བོད་མི་ ༡༨༠ ལྷག་ཡོད་མོད། ཁོང་ཚོས་ཐང་ཁྲོམ་སྟོན་རྒྱུར་རྒྱ་གར་གཞུང་གི་ཆོག་མཆན་ཐོབ་ཀྱི་མེད་ཅིང༌། ངྷ་ས་ས་གནས་སུ་དཔོན་པོ་རེ་བརྗེ་བསྒྱུར་བྱས་སྐབས་ང་ཚོར་ཐང་ཁྲོམ་སྟོན་མི་ཆོག་པའི་བཙན་བཀའ་གཏོང་གི་འདུག་ལ། ལོ་རེའི་མེ་ལཱ་ཚོགས་སྐབས་སུའང་ང་ཚོར་ཁྲོམ་སྟོན་འཇུག་གི་མི་འདུག་ཟེར།

ཕྱི་ཚེས་ ༢༩ ཉིན་ང་ངྷ་ས་མེག་གྷན་དུ་ཕྱིན། མེག་གྷན་བྷག་སུ་ལམ་ཁ་ནས་གཙུག་ལག་ཁང་བར་དུ་ཐང་ཁྲོམ་སྟོན་མཁན་ཚང་མ་ཚ་ཚ་འུར་འུར་གྱུར་འདུག ཁྲོམ་བསྡུ་གི་འདུག ཐེག་ཆེན་ཆོས་གླིང་གཙུག་ལག་ཁང་དང་བར་ཐག་མི་རིང་སར་ངྷ་ས་ས་གནས་གཞུང་གི་རྒྱ་གར་དཔོན་པོ་ཞིག་དང་ཉེན་རྟོག་པ་བདུན་བརྒྱད་ཅིག་གིས་ལས་ཀ་བ་ཁ་ཤས་དང༌། སྐྱེལ་འདྲེན་རླངས་འཁོར་ཞིག་བཅས་ཁྲིད་དེ་ལམ་ཁའི་གཡས་གཡོན་གྱི་ཐང་ཁྲོམ་སྟོན་མཁན་ཚོས་ཐང་ཁྲོམ་བསྡུས་རྗེས་ཀྱི་ཅ་ལག་རེ་ཟུང་ཁྱེར་འགྲོ་གི་འདུག ཡིན་ནའང༌། ཁམས་ཕྱོགས་ཀྱི་ཨ་མ་རྒན་མོ་ཞིག་གི་ཁྲོམ་བསྡུ་མ་ཐུབ་པར་ལྷག་ཡོད་པ་དེར་སང་ཉིན་ནས་ཁྲོམ་སྟོན་མི་ཆོག་པའི་བཙན་བཀའ་བཏང་བ་ལས། ཅ་དངོས་གཅིག་ཀྱང་འཕྲོག་མ་སོང་ལ། ཨ་མ་རྒན་མོ་དེས་ཀྱང་ལག་གཉིས་ཐལ་མོ་སྦྱར་ཏེ་ཐུགས་རྗེ་ཆེ་ཟེར་བའི་ལག་བརྡ་སྟོན་བཞིན་འདུག

དུས་ཚོད་ཐུང་ཐུང་ཞིག་ནང་མི་ཚོགས་མང་བོ་འདུ་འཛོམས་བྱེད་ཀྱིན་འདུག འོན་ཀྱང་སུ་གཅིག་ལའང་སྐད་ཆ་གསལ་བོ་ཞིག་བཤད་རྒྱུ་མི་འདུག ངས་ཐང་ཁྲོམ་སྟོན་མཁན་ཚོའི་སྐྱིད་སྡུག་ཚོགས་པའི་འགན་འཛིན་སུ་ཡིན་རྩད་གཅོད་བྱས་པ་ཡིན། ཡིན་ནའང༌། འགན་འཛིན་དེང་སྐབས་ངྷ་སར་མི་འདུག་ཟེར་བ་ཐོས་སོང༌། དེར་བརྟེན་ངས་ཐང་ཁྲོམ་སྟོན་མཁན་བློ་དགའ་ལགས་སུ་གནས་ཚུལ་དྲིས་པར་ཁོང་གིས་བརྗོད་དོན། ཉིན་གཉིས་གསུམ་རྗེས་རྒྱ་གར་གྱི་མེ་ལཱ་འཚོགས་དགོས་པ་དང༌། ངྷ་ས་ས་གནས་སུ་སིམ་ལ་ནས་རྒྱ་གར་དཔོན་པོ་སྐར་མ་གཉིས་ཅན་ཞིག་བརྗེ་བསྒྱུར་བྱས་འདུག ཁོང་ཚོ་དཔོན་པོ་གསར་པ་རེ་བརྗེ་བསྒྱུར་བྱས་སྐབས་ལོ་གཅིག་ནང་ཐེངས་གཉིས་གསུམ་རེ་གཙང་བཟོ་བྱེད་དགོས་ཀྱི་ཡོད་པ་རེད་ལ། དེ་དུས་ང་ཚོ་བཙན་ཤེད་ཀྱིས་ཕྱིར་འབུད་གཏོང་གི་འདུག ཡིན་ནའང༌། ང་ཚོ་འགྲོ་ས་མི་འདུག ང་ཚོ་སྐྱབས་བཅོལ་བ་ཡིན་སྟབས་བཟའ་མི་བུ་ཕྲུག་གི་འགྲོ་སོང་གཏོང་ས་ཁྲོམ་ས་གཅིག་པུ་ལས་མེད་ཅེས་ཞུ་སྐུལ་བྱེད་སྐབས་ཁོང་ཚོས་རང་སོར་འཇོག་གི་ཡོད་པ་རེད། སྤྱིར་རྒྱ་གར་གཞུང་གིས་ང་ཚོར་ཁྲོམ་ས་ཞིག་ལོགས་སུ་སྟེར་ཐུབ་ཀྱི་མེད་པར་བརྟེན། མེ་ལཱ་ཚར་རྗེས་རིམ་པས་ང་ཚོར་ཁྲོམ་སྟོན་འཇུག་གི་རེད་ཅེས་བརྗོད་སོང༌།

ཁོང་ལ་སྔོན་མར་ཁྱེད་ཚོ་ཐང་ཁྲོམ་སྐྱིད་སྡུག་ཚོགས་པར་བཙན་བྱོལ་བོད་གཞུང་གིས་རྒྱབ་སྐྱོར་བྱས་ཏེ། རྒྱ་གར་གཞུང་ལ་ཐང་ཁྲོམ་སྟོན་མཁན་ཚོར་ཁྲོམ་སྟོན་སའི་ས་ཆ་ཞིག་ལོགས་སུ་སྟེར་རྒྱུར་འབད་བརྩོན་བྱས་ཡོད་པ་རེད། དེ་གང་འདྲ་བྱུང་ཡོད་མེད་སྐོར་དྲིས་པར། ཐང་ཁྲོམ་སྐྱིད་སྡུག་ཚོགས་པས་རྒྱ་གར་གཞུང་ལ་ང་ཚོ་ཁྲོམ་སྟོན་སའི་ས་ཆ་ཞིག་ལོགས་སུ་སྟེར་རོགས་ཞུས་ཡོད་པ་རེད་ལ། བོད་མི་མང་སྤྱི་འཐུས་ཀྱིས་ནང་སྲིད་བརྒྱུད་ནས་རྒྱབ་སྐྱོར་གནང་ཡོད་པ་རེད། ཡིན་ནའང༌། ངྷ་སའི་ཁོར་ཡུག་འདི་ས་ཆ་ཆུང་དྲགས་པ་དང༌། ཁྲོམ་སྟོན་སའི་ས་ཆ་ལོགས་སུ་སྟེར་ཐུབ་རྒྱུ་དེ་འདྲ་བྱུང་ཡོད་པ་མ་རེད། ཐབས་ཤེས་རབ་དང་རིམ་པ་བྱས་པ་རེད། མེག་གྷན་གྱི་གཡས་གཡོན་ཞིག་ནས་ས་ཆ་རེག་གི་མེད་དུས། ས་ཆ་ཐག་རིང་ས་ཞིག་ཏུ་ས་སྤྲད་ན་མི་ཡོང་གི་མ་རེད། དེར་བརྟེན་ལམ་ཁའི་གཡས་གཡོན་དུ་ཁྲོམ་མི་སྟོན་རང་སྟོན་འཁེལ་གྱི་ཡོད་པ་རེད། ཡིན་ནའང༌། རྙོག་དྲ་འདི་རྒྱ་གར་ས་གནས་རང་གིས་ང་ཚོར་སྡུག་པོ་བཏང་བ་དེ་འདྲ་གང་ཡང་མ་རེད། ང་ཚོ་སྐྱབས་བཅོལ་བ་ཡིན་པ་དང་ཐང་ཁྲོམ་ཆུང་ཆུང་རེ་བསྟན་ཏེ་ཁ་གསོ་དགོས་ཀྱི་ཡོད་དུས་རྒྱ་གར་གཞུང་གིས་ང་ཚོར་ཁྲོམ་ས་ཆུང་དུ་གཏོང་དགོས་པ་དང༌། རླངས་འཁོར་དང་མིའི་འགྲོ་ལམ་ལ་གནོད་སྐྱོན་མི་ཡོང་བའི་ཐབས་ཤེས་བྱ་དགོས་སྐོར་བརྗོད་སྐབས་ང་ཚོས་ཀྱང་གང་ཡོང་ཡོང་གིས་དེ་ལྟར་བྱེད་ཀྱི་ཡོད། ཁྲོམ་སྟོན་མཁན་ ༡༨༠ ཙམ་ཡོད་པའི་བརྒྱ་ཆ་བདུན་ཅུ་བོད་ནས་གསར་དུ་འབྱོར་མཁན་ཡིན་པ་དང༌། འགྲོ་ས་འདུག་ས་མེད་དུས་མུ་མཐུད་ཨུ་ཚུགས་བརྒྱབ་ན་ཁྲོམ་སྟོན་འཇུག་གི་རེད་ཅེས་བརྗོད་སོང༌།

བྷག་སུ་ལམ་ཁར་འོད་སྡེར་འཁོར་ལོ་བཙོང་མཁན་སྐལ་ལོ་ལགས་ཀྱིས་ལོ་སྔོན་མར་ཐང་ཁྲོམ་སྐྱིད་སྡུག་ཚོགས་པའི་ངོས་ནས་ཐང་ཁྲོམ་སྟོན་མཁན་རེར་ཧིན་སྒོར་ ༥༠༠ རེ་བསྡུས་ཏེ། ས་གནས་གཞུང་ངོས་ནས་ཁྲོམ་སྟོན་སའི་ས་ཆ་ཞིག་ལོགས་སུ་སྤྲོད་རྒྱུར་ཐབས་ཤེས་བྱས་ཡོད་ནའང༌། ས་ཆ་རག་ཡོད་པ་མ་རེད། རྒྱ་གར་དཔོན་པོ་ཚོ་སླེབས་སྐབས་ང་ཚོར་ཁྱེད་ཚོར་ཐང་ཁྲོམ་སྟོན་སའི་ས་ཆ་མི་འདུག ཁྲོམ་སྟོན་ཆོག་གི་མི་འདུག་ཟེར་གྱིན་འདུག སྤྱིར་ང་ཚོ་རང་ས་མེད་པར་སྐྱབས་བཅོལ་དུ་ཡོང་མཁན་ཞིག་ལ་ས་ཆ་མེད་པ་གསལ་བོ་རེད་ཅེས་བརྗོད་སོང༌།

འདི་ལོའི་དབྱར་དུས་ཀྱི་ཆར་བ་ཅུང་འབབ་མཚམས་ཆད་པ་དང༌། ཨོ་ལིམ་པིག་རྩེད་འགྲན་ཡང་མཇུག་བསྡུས་ཏེ། ཉིན་འདི་ཚོར་ཐང་ཁྲོམ་སྟོན་མཁན་ཚོ་ཅུང་ལྷོད་ལ་བབས་ཡོད་ནའང༌། མི་རིང་བར་རྒྱ་གར་གྱི་མེ་ལཱ་འཚོགས་དགོས་པ་དང༌། ངྷ་ས་ས་གནས་སུ་དཔོན་རིགས་གསར་པ་ཞིག་སླེབས་པ་དེས་ཐང་ཁྲོམ་སྟོན་མཁན་ཚོས་ཐང་ཁྲོམ་སྟོན་རྒྱུར་སྔར་བས་དཀའ་ཁག་ཆེ་རུ་གྱུར་ཡོད། 

ལོ་སྔོན་མར་རྒྱ་གར་མངའ་སྡེ་གཞུང་གིས་བཀའ་ཁྱབ་བཏང་སྟེ། ཐང་ཁྲོམ་སྟོན་མཁན་ཚོར་ཐང་ཁྲོམ་སྟོན་མི་ཆོག་པར་བཟོ་དོན་ནི། ྋགོང་ས་མཆོག་གི་སྐུ་བྱ་སྲུང་བར་སྟབས་བདེ་མེད་པ་དང༌། འགྲིམ་འགྲུལ་སྐྱེལ་འདྲེན་གྱི་ལམ་ཁ་དོག་དྲགས་པའི་དཀའ་ངལ་ཆེ་བ། ངྷ་ས་འདིར་ཡུལ་སྐོར་སྤྲོ་འཆམ་པའི་ལྟེ་བ་ལྟ་བུར་གྱུར་ཡང་ཐང་ཁྲོམ་སྟོན་མཁན་མང་དྲགས་སྟབས་ཁོར་ཡུག་བཙོག་འགྱུར་བཟོས་པ་སོགས་ཡིན་སྐོར་བརྗོད་ཡོད་ལ། སྐབས་དེར་རྒྱ་གར་སྔོ་ཚལ་བཙོང་མཁན་ཚོར་མེག་གྷན་བྷག་སུའི་ལམ་འགྲམ་དུ་ས་ཆ་ཆུང་ངུ་ཞིག་རག་ཡོད་ཀྱང༌། ཐང་ཁྲོམ་སྟོན་མཁན་ཚོར་ངེས་གཏན་གྱི་ས་ཆ་གང་ཡང་མེད་པར་ལྷག་ཡོད་པ་རེད།
གསར་འགོད་པ འགྱུར་མེད།