ཕྱི་ཚེས་བརྒྱད་ཉིན་ནས་བོད་མི་མང་སྤྱི་འཐུས་གྲོས་ཚོགས་ཀྱི་ཚོགས་འདུ་ཚོགས་ཏེ། བགྲོ་གླེང་སྣ་ཚོགས་བྱེད་བཞིན་ཡོད་ལ། འདི་གའི་གསར་འགོད་པས་གཞུང་འབྲེལ་མ་ཡིན་པའི་ཚོགས་པ་ཁག་གི་འབྲེལ་ཡོད་མི་སྣ་ཁག་ཅིག་ལ། ཐེངས་འདིའི་གྲོས་ཚོགས་སྟེང་གནད་དོན་གང་དག་གི་ཐད་ངེས་པར་བགྲོ་གླེང་བྱ་དགོས་མིན་ཐད་བཅར་འདྲི་བྱས་པ་ཡིན།
བོད་རང་དབང་སློབ་ཕྲུག་ཚོགས་པའི་ངྷ་ས་ས་གནས་ཀྱི་ཚོགས་གཙོ་བསྟན་འཛིན་ཆོས་དབྱངས་ལགས་ཀྱིས། ཐེངས་འདིའི་གྲོས་ཚོགས་སྐབས་ངེས་པར་དུ་གླེང་དགོས་པའི་ཕྱོགས་གཅིག་ནི་ང་ཚོས་ལས་འགུལ་སྤེལ་སྐབས་ནུས་པ་གང་ཐོན་ཡོད་མེད་དང་མ་འདང་ས་གང་ཡིན་མིན་དེ་གཉིས་ཐོག་བགྲོ་གླེང་བྱ་དགོས་ཀྱི་འདུག དཔེར་ན། ད་ལོར་བོད་ནང་ཞི་བའི་སྒེར་ལངས་ཆེན་པོ་འདི་ལྟ་བུ་ཞིག་ཡོང་གི་རེད་བསམ་བསམ་ཡོད་པ་མ་རེད། ང་ཚོས་ཚོད་དཔག་ཐིག་གི་མེད་ནའང༌། གཞུང་ངོས་ནས་ཚོད་དཔག་ཐུབ་དགོས་པ་རེད། སྔོན་ཚུད་ནས་གལ་སྲིད་བོད་ནང་ལས་འགུལ་འདི་ལྟ་བུ་ཞིག་སྤེལ་ན་ག་རེ་བྱེད་ཀྱི་ཡིན་བསམ་པའི་སྔོན་རྩིས་ཤིག་དགོས་པ་རེད། ད་ལོ་ལྟ་བུར་མཚོན་ན། འཆར་གཞི་གང་ཡང་མེད་པར་དུས་ཚོད་མང་བོ་འཕྲོ་བརླག་ཏུ་ཕྱིན་པ་རེད། དེ་ཁས་ལེན་བྱ་ཐུབ་ཀྱི་ཡོད་དམ་མེད། དེ་བཞིན་ཛ་དྲག་ཚོགས་ཆུང་བཙུགས་ནས་ཕན་ཐོགས་བྱུང་ཡོད་དམ་མེད། གལ་སྲིད་ཕན་ཐོགས་མེད་ན། སོ་སོས་ནོར་འཁྲུལ་ཁས་ལེན་བྱ་ཐུབ་ཀྱི་ཡོད་དམ། གལ་སྲིད་སོ་སོའི་ནོར་འཁྲུལ་ཁས་ལེན་ཐུབ་ཀྱི་ཡོད་ན། མ་འོངས་པར་ནོར་འཁྲུལ་མི་འབྱུང་བའི་ཆེད་དུ་གང་བྱ་དགོས་ཀྱི་ཡོད་མེད་སྐོར་ལ་བགྲོ་གླེང་བྱ་དགོས་ཀྱི་འདུག་ཅེས་བརྗོད་སོང༌།
བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་འཆི་མེད་གཡུང་དྲུང་ལགས་ཀྱིས་བརྗོད་དོན། གཅིག ད་ལོར་བོད་ནང་བྱུང་བའི་ཞི་བའི་སྒེང་ལངས་སྐབས་གཞིས་ལུས་བོད་མིའི་སེམས་གཏིང་གི་མངོན་འདོད་དང་མཐར་ཐུག་གི་དམིགས་ཡུལ་ག་རེ་ཡིན་མིན་ཕལ་ཆེར་གསལ་བོ་ཆགས་ཚར་བ་རེད། གང་ཡིན་ཟེར་ན། ཐེངས་འདིའི་གཞིས་ལུས་བོད་མི་ཚོའི་འབོད་ཚིག་གཙོ་བོ་བོད་རང་བཙན་དང་ྋགོང་ས་མཆོག་བོད་དུ་གདན་འདྲེན་དགོས་ལྟ་བུའི་འབོད་ཚིག་ཤ་སྟག་རེད། ང་ཚོའི་ལངས་ཕྱོགས་དེ་དབུ་མའི་ལམ་གྱི་སྟེང་དུ་འགྲོ་བསྡད་པ་རེད། ཡིན་ནའང༌། གྲོས་ཚོགས་ནང་དབུ་མའི་ལམ་གྱི་སྲིད་བྱུས་དེ་གང་འདྲ་ཞིག་ཆགས་ཀྱི་ཡོད་ན། ྋགོང་ས་མཆོག་གིས་བོད་གཞུང་འདིས་བོད་གཞིས་བྱེས་གཉིས་ཀྱི་གཞུང་མཚོན་གྱི་ཡོད་ཅེས་གསལ་བོར་གསུང་གི་ཡོད་ལ། བོད་ཕྱི་ལོགས་སུ་བརྒྱ་ཆ་ཉུང་ཉུང་ཞིག་མ་གཏོགས་མི་མང་ཕལ་ཆེ་བ་བོད་ནང་དུ་ཡོད་པ་རེད། དེར་བརྟེན། ང་ཚོའི་གྲོས་ཚོགས་དེ་བོད་གཞིས་བྱེས་གཉིས་ཀྱི་གཞུང་ཞིག་ཡིན་སྟབས་གྲོས་ཚོགས་ཀྱི་ཁ་ཕྱོགས་ཀྱང་བོད་ནང་གི་གཞིས་ལུས་བོད་མི་ཚོར་ཁ་ཕྱོགས་གཏད་དགོས་པ་རེད་ལ། ཐེངས་འདིའི་གྲོས་ཚོགས་ནང་བོད་མིའི་སེམས་གཏིང་གི་མངོན་འདོད་དེ་གང་ཡིན་བགྲོ་གླེང་བྱ་ཐུབ་དགོས་པ་རེད། གཉིས། བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་ལས་འགུལ་གང་འཚམ་ཡག་པོ་སྤེལ་བ་རེད། ཡིན་ནའང༌། བོད་ནང་གི་ཆབ་སྲིད་བཙོན་མ་གློད་གྲོལ་གཏོང་དགོས་ཞེས་པ་དང་རྨས་སྐྱོན་ཕོག་པ་རྣམས་ལ་སྨན་བཅོས་ཀྱི་མཐུན་རྐྱེན་སྤྲོད་དགོས་ཟེར་བ་སོགས་ནི་སྐབས་བབ་ཀྱི་སྐད་ཆ་ཞིག་རེད། དེ་ཚོ་གལ་ཆེན་པོ་ཡིན་ནའང་ཕུགས་བསམ་ཞིག་དགོས་པ་རེད་ལ། བོད་མིའི་སེམས་གཏིང་གི་མངོན་འདོད་དང་འཚམ་པའི་ལས་འགུལ་ཞིག་སྤེལ་རྒྱུ་དེ་བས་ཀྱང་གལ་ཆེན་པོ་རེད། དེའི་སྟེང་བགྲོ་གླེང་ཤུགས་ཆེན་པོ་ཞིག་ཡོང་དགོས་ཀྱི་ཡོད་པ་རེད་བསམ་ཡོད། གསུམ། ྋགོང་ས་མཆོག་ལམ་དབུ་མའི་ཐོག་ཏུ་ཕེབས་ཀྱིན་ཡོད་སྟབས། གོ་ཐོས་ལྟར་ན་གྲོས་ཚོགས་ནས་དེའི་སྟེང་འགྱུར་བ་ཞེ་དྲག་གཏོང་ཐུབ་ཀྱི་མེད་པ་ལྟ་བུ་ཡིན་ས་རེད། ངས་འདི་འདྲ་རེད་བསམ་གྱི་མི་འདུག ང་ཚོ་མང་གཙོའི་ལམ་ལུགས་ཤིག་གི་སྟེང་དུ་འགྲོ་བསྡད་ཀྱི་ཡོད་པ་རེད། མང་གཙོའི་ལམ་ལུགས་དེ་ང་ཚོར་ྋགོང་ས་མཆོག་གིས་གསོལ་རས་གནང་བ་རེད། ང་ཚོས་ྋགོང་ས་མཆོག་གི་བཀའ་སློབ་བརྩི་གིན་ཡོད་ཟེར་གྱི་ཡོད་པ་རེད་དེ། བཀའ་སློབ་ཟེར་དུས་མང་བོ་ཡོད་པ་རེད། བཀའ་སློབ་ག་ཚོད་ཅིག་སོ་སོས་ལག་བསྟར་ཐུབ་ཀྱི་ཡོད་པ་དེ་བསྒྲུབ་དགོས་པ་རེད། དཔེར་ན་ྋགོང་ས་མཆོག་གིས་ང་ཚོར་མང་གཙོའི་ལམ་སྲོལ་གསོལ་རས་གནང་ཡོད་དུས་དེ་ལོངས་སུ་མ་སྤྱད་ན་ྋགོང་ས་མཆོག་གིས་བཀའ་སློབ་མ་སྒྲུབ་པ་རེད། དེ་ལོངས་སུ་སྤྱོད་པ་ལ་གྲོས་ཚོགས་ནང་བགྲོ་གླེང་ག་རེ་ཡིན་ནའང་བྱ་ཆོག་གི་རེད། ཁོང་ཚོ་མི་མང་གི་སྐུ་ཚབ་ཡིན་སྟབས་མི་མང་གི་མངོན་འདོད་གླེང་དགོས་པ་རེད། བཞི། བོད་རྒྱ་ཞི་མོལ་འགྲོ་བསྡད་ཀྱི་ཡོད་པ་རེད། མི་རིང་བར་ཡང་བསྐྱར་ཐེངས་བརྒྱད་པ་དེ་འགྲོ་དགོས་པ་རེད། འབྲེལ་མོལ་འགྲོ་རྒྱུ་དེ་གལ་ཆེན་པོ་རེད། ཡིན་ནའང༌། ང་ཚོའི་ཕྱོགས་ནས་རྒྱ་ནག་ལ་བསྟུན་རྒྱུ་དང་མར་འབབ་རྒྱུ་གང་ཡོང་བྱས་པ་རེད། ད་ཕར་ཕྱོགས་ནས་ག་ཚོད་མར་འབབ་ཀྱིན་འདུག་མི་འདུག དེ་ཚོ་ལའང་བལྟས་ཏེ་གོམ་པ་སྤོ་རྒྱུ་དེ་གལ་ཆེན་པོ་རེད་ལ། གྲོས་ཚོགས་ནང་སྐད་ཆ་བཤད་དགོས་ཀྱི་ཡོད་པ་རེད། དཔེར་ན་ཕྱི་ཟླ་བཅུ་བའི་ནང་གི་འབྲེལ་མོལ་དེ་གལ་ཆེན་པོར་བརྩི་གི་འདུག དེ་ལྟར་ཡིན་རྒྱུ་རེད། ཡིན་ནའང༌། སྐབས་དེར་རྒྱ་ནག་ཕྱོགས་ནས་དངོས་གནས་འགྱུར་བ་ཞིག་འགྲོ་གི་འདུག་མི་འདུག་ལྟ་རྒྱུ་དེ་གལ་ཆེན་པོ་རེད་ཅེས་བརྗོད་ཡོད།
གཞོན་ནུའི་ཚོགས་གཞོན་དོན་འགྲུབ་རྡོ་རྗེ་ལགས་ཀྱིས་བརྗོད་དོན། ད་ལོ་བོད་ནང་ཞི་བའི་ངོ་རྒོལ་བྱས་སྐབས་གྲོས་ཚོགས་ཚོགས་དུས་འགྲོ་བསྡད་ཀྱི་ཡོད་ནའང་ཟུར་དུ་གྲོས་བསྡུར་བྱས་ཏེ། བོད་གཞུང་མང་ཛ་དྲག་ལས་འགུལ་ཚོགས་ཆུང་བཙུགས་ཤིང་ལས་འགུལ་སྤེལ་བ་དེ་ཚོ་གཞོན་ནུའི་ངོས་ནས་ཁ་ཚ་དགོས་གཏུགས་ཀྱི་ལས་འགུལ་ཞིག་ལ་ངོས་འཛིན་བྱེད་བཞིན་ཡོད་ལ། མུ་མཐུད་ཡར་རྒྱས་དང་ནུས་པ་གོང་མཐོར་གཏོང་དགོས་པ་རེད་བསམ་གྱི་ཡོད། ཡིན་ནའང༌། བཙན་བྱོལ་བོད་གཞུང་ནང་ད་ལོར་བོད་ནང་ལས་འགུལ་བྱུང་སྐབས་གཞི་ནས་གྲ་སྒྲིག་བྱ་རྒྱུ་དང་ལས་འགུལ་སྤེལ་རྒྱུ་བཅས་ཡོང་གི་འདུག དེ་ཚོ་སྔོན་ནས་གྲ་སྒྲིག་དགོས་པ་གལ་ཆེན་པོ་རེད་བསམ་གྱི་འདུག རྗེས་ཕྱོགས་དེ་ལྟ་བུ་ཞིག་མི་ཡོང་འབད་བརྩོན་གནང་རྒྱུ་གལ་ཆེན་པོར་མཐོང་གི་ཡོད་ཅེས་དང༌། ང་ཚོ་ལ་དངོས་སུ་གནས་ཚུལ་འབྱོར་བསྡད་པ་ཡིན་ནའང་རེད། ྋགོང་ས་མཆོག་གིས་ཡོངས་གྲགས་ཐོག་གསལ་བསྒྲགས་གནང་བ་ལྟར་ཨོ་ལིམ་པིག་རྩེད་འགྲན་མཇུག་སྒྲིལ་བ་དང་རྒྱ་ནག་གི་མི་སེར་མང་བོ་ཞིག་བོད་དུ་གནས་སྤོ་བྱ་རྒྱུ་དང༌། བོད་ཡུལ་སྔར་ལས་ཀྱང་རྒྱ་ཡུལ་དུ་བསྒྱུར་བའི་སྲིད་བྱུས་ཤིག་ལག་བསྟར་བྱེད་ཀྱིན་པ་རེད། དེའི་ཐོག་སྤྱི་འཐུས་ལྷན་ཚོགས་ཀྱི་གྲོས་ཚོགས་ཐོག་གླེང་སློང་ཤུགས་ཆེན་པོ་བྱ་དགོས་ཀྱི་འདུག
དེ་མིན་ཉེ་ཆར་བོད་གཞུང་མང་ཛ་དྲག་ལས་འགུལ་ཚོགས་ཆུང་བཙུགས་ནས་ཛ་དྲག་གི་ལས་འགུལ་མང་དག་ཅིག་སྤེལ་ནའང༌། ཚོགས་ཆུང་དེ་གནས་སྐབས་རིང་ཡིན་སྟབས་མུ་མཐུད་རྒྱུན་རིང་བོར་གནས་ཐུབ་མིན་ཤེས་རྟོགས་ཐུབ་ཀྱི་མེད་པ་དང༌། བོད་ནང་ལྟ་བུར་མཚོན་ན་འདས་པའི་མི་ལོ་དྲུག་ཅུ་ལྷག་གི་རིང་ཛ་དྲག་གནས་སྟངས་ཡིན་ཡིན་པ་རེད། དེ་ལ་གྲོས་བསྡུར་གྱིས་བོད་དོན་འཐབ་རྩོད་ཀྱི་ལས་འགུལ་སྤེལ་ཕྱོགས་ལ་བསམ་ཞིབ་བྱ་དགོས་ཀྱི་འདུག་ཅེས་བརྗོད་ཡོད་ལ། བོད་ཀྱི་དགུ་བཅུ་གསུམ་གྱི་ཉམས་ཞིབ་པ་ཟླ་བ་བཀྲ་ཤིས་ལགས་ཀྱིས་བརྗོད་དོན། བཙན་བྱོལ་དུ་ཡིག་བསྒྱུར་ཁང་ཞིག་འཛུགས་རྒྱུ་གལ་ཆེན་པོ་རེད། ཡིག་བསྒྱུར་ཁང་དེས་རྒྱ་ཡིག་དང་དབྱིན་ཡིག་ཐོག་བོད་དོན་དང་རྒྱ་ནག་སྐོར་གྱི་དཔེ་དེབ་དང་རྩོམ་ཡིག་གྲགས་ཅན་ཚུར་བོད་ཡིག་ནང་ཕབ་སྒྱུར་བྱ་དགོས་ཀྱི་འདུག དེ་སྔོན་ང་རང་ཐེངས་མང་བོར་ཟབ་སྦྱོང་དེ་འདྲའི་སྟེང་འགྲོ་མྱོང་ཡོད། ཟབ་སྦྱོང་སྤྲོད་ཐེངས་རེར་ཧིན་སྒོར་འབུམ་ཕྲག་མང་བོས་འགྲོ་སོང་གཏོང་གིན་འདུག འགྲོ་སོང་དེ་འདྲའི་ཕོན་ཆེན་པོ་ཞིག་བཏང་སྟེ་ཐེངས་གཅིག་གི་ཟབ་སྦྱོང་སྤྲོད་པ་ལས་རྩ་ཆའི་དཔེ་དེབ་ཅིག་ཚུར་བོད་ཡིག་ནང་ཕབ་སྒྱུར་བྱས་ཚེ། དེས་ང་ཚོར་རྒྱུན་དུ་ཕན་ཐོགས་ཡོང་གི་རེད། ངའི་ངོས་ནས་གནད་དོན་འདིའི་ཐོག་གྲོས་ཚོགས་ནང་བགྲོ་གླེང་ཡོང་རྒྱུར་རེ་བ་བརྒྱབ་ཡོད་ཅེས་བརྗོད་ཡོད།
