ག་ཟི་དགེ་བཤེས་ལ་སྤྲིངས་པ།

ས་སྐྱའི་སྤྱི་འཐུས་ག་ཟི་དགེ་བཤེས་མཆོག་ལ་ཕུལ་བ།

མགོ་ལོག་འཇིགས་མེད་བློ་གྲོས་རིན་པོ་ཆེ།
༄༅༅།། འདས་པའི་ལོ་མང་པོ་ཞིག་གི་ཡར་སྔོན་གཞིས་བྱེས་ཇོ་ནང་པ་ཡོངས་ཀྱིས་ཇོ་ནང་ལ་ཆོས་བརྒྱུད་ཆེན་པོའི་མཚན་གནས་ཀྱི་ཐོབ་ཐང་གནང་སྐྱོང་ཡོང་བ་ཞེས། གྲུབ་དབང་པད་ནོར་རིན་པོ་ཆེ་དང༌། རྒྱལ་བ་ཀརྨ་པ། དགའ་ལྡན་ཁྲི་རིན་པོ་ཆེ་སོགས་བོད་ཀྱི་བླ་ཆེན་ཁག་གི་མཐུན་འགྱུར་གྱི་ཕྱག་ཡིག་དང་བཅས་རང་གཞུང་ལ་ཞུ་བ་ནན་ཆེར་ཞུས་སོང་ན་ཡང༌། ཡུན་རིང་པོར་གྲུབ་འབྲས་གང་ཡང་མ་ཐོན་པར་མི་འགའ་ཞིག་གིས། ཇོ་ནང་ས་སྐྱའི་ཁོངས་མིན་པ་སུས་ཀྱང་ཤེས་ལ་ཐ་ན་ས་སྐྱའི་སྤྱི་འཐུས་ཁོ་རང་གིས་ཀྱང་ཤེས་ཀྱི་ཡོད་མོད། འོན་ཀྱང་གལ་སྲིད་ཇོ་ནང་ལ་སྤྱི་འཐུས་ཞིག་ཡོང་དགོས་ན་ཧ་ལམ་མདོ་སྨད་ནས་ཡོང་རྒྱུ་ཡིན་པ་གཏན་ཁེལ་ཡིན་པས། གྲོས་ཚོགས་ཀྱི་ནང་དུ་ཁ་གཏད་ཀྱི་ལག་མགོ་གཅིག་ཡིན་རུང་ཇེ་མང་དུ་མི་འགྲོ་རྒྱུའི་ཆེད། ཆོལ་ཁ་གཞན་པའི་འཐུས་མི་ཚོ་ས་སྐྱའི་སྤྱི་འཐུས་ཀྱི་ཁོག་ཏུ་འཛུལ་ནས་འགོག་རྐྱེན་བཟོ་གི་ཡོད་པས། ཆབ་སྲིད་ཀྱི་གཡོ་རྒྱུའི་ཁྲོད་ནས་ཇོ་ནང་པ་ཚོའི་རེ་བར་གྲུབ་འབྲས་མ་བྱུང་བ་རེད་ཟེར།

ཡང་ལ་ལས་ས་སྐྱ་པའི་མངའ་ཐང་རྒྱ་བསྐྱེད་བྱེད་ཆེད་ཇོ་ནང་ཚུར་བསྡུ་མ་ཐུབ་རུང་ཕར་གློད་ཐུབ་ཀྱི་མེད་པས་ས་སྐྱའི་བླ་མ་ཁ་ཅིག་ས་སྐྱའི་སྤྱི་འཐུས་ཀྱིས་ཁོག་ཏུ་འཛུལ་བ་རེད་ཟེར། ང་ལ་མཚོན་ན་སྐད་ཆ་ཕྱི་མ་འདིར་ཡིད་ཆེས་མེད་རུང་སྐད་ཆ་དང་པོ་ལ་ཡིད་ཆེས་ཆེ་ཙམ་བྱས་པ་ཡིན། དེ་རྗེས་ཡུན་རིང་པོར་ཞིབ་འཇུག་ཚོགས་ཆུང་བཙུགས་ཁུལ་བྱས་པ་དང༌། ཆོས་ལུགས་ཚོགས་ཆེན་སོགས་ཀྱི་སྟེང་དུ་ཁ་འཕངས་ནས། བོད་རྒྱ་ཞི་མོལ་ལ་རྒྱ་ནག་གིས་ནར་འགྱང་བྱེད་པ་བཞིན་ནར་འགྱང་གང་ཐུབ་བྱས་ཏེ་འཛིན་ས་ཅི་ཡང་མེད་པ་ཞིག་ཆགས་སོང༌། ༢༠༠༧ ལོའི་ལོ་མགོར་ཁོ་བོ་ཨ་རིར་ཕྱིན་རྗེས། ཨན་ཨར་བྷོར་(Ann Arbor)ཀྱི་གྱི་གྲོང་གསེབ་ཁུག་ཀྱོག་ཤིག་ཏུ་ཡིག་ཆ་རྣམས་བསྒུགས་ནས་ཡུན་རིང་འགོར་བའི་བར་དེའི་སྐོར་གྱི་གསར་འགྱུར་གང་ཡང་མ་གོ་མོད། དེ་རིང་སྟབས་ལྟས་དབང་ཞིག་གིས་མ་རས་ལན་ཌིར་(Maryland)གྲོགས་པོ་ཞིག་གི་ཁྱིམ་ནས་ཁྱེད་ཀྱིས་བྲིས་པའི་ཇོ་ནང་མུན་སེལ་ཉི་མ་ཟེར་བ་དེ་མཐོང་བྱུང༌། ཨོ་ཧོ་ཧོ། འདི་ནི་ཅི་འདྲའི་སྟབས་ལེགས་པ་ཞིག་རེད། ངས་སྔ་མོ་ནས་ཇོ་ནང་ས་སྐྱའི་ཁོངས་མིན་པ་རང་གཞན་ཐམས་ཅད་ཀྱིས་གསལ་བོར་ཤེས་ཀྱི་ཡོད་ན་ཡང༌། ས་སྐྱའི་སྤྱི་འཐུས་ཀྱིས་རྒྱུ་མཚན་ཅི་ཞིག་བགྲང་ནས་ཇོ་ནང་ས་སྐྱའི་ཁོངས་རེད་གསུང་གི་ཡོད་ན་བསམ་མྱོང༌། དེས་ན་ཁྱེད་ཀྱི་ཆེད་རྩོམ་འདི་ཁྱེད་ཀྱི་རྒྱུ་མཚན་མཐར་ཐུག་ཡིན་པས། ད་ངས་ཁྱེད་ཀྱིས་ཅི་ཞིག་གསུངས་གིན་ཡོད་གཞི་ནས་གསལ་བོར་ཤེས་སོང་བར་མ་ཟད། བློ་གཟུ་བོའི་སྒོ་ནས་བསམ་བློ་བཏང་རུང་ཁྱེད་ཀྱི་རྒྱུ་མཚན་རྣམས་ནི་སྣ་འཐེན་ནས་ཁ་ནང་དུ་ཡོང་ཨེ་ཐུབ་ལྟ་བ་ཙམ་མ་གཏོགས་རྒྱུ་མཚན་ཡང་དག་ཅིག་ཏུ་མ་མཐོང་བའི་ཁར། ངའི་བློ་སྐྱོན་མིན་ན་ཁྱེད་ཀྱི་བཞེངས་ཕྱོགས་ལ་མཇུག་འབྲས་ངན་པ་ཞིག་ཡོང་བ་འདྲ་བས། ཁོ་བོ་ཕྱེད་རྙིང་མ་དང་ཕྱེད་ཇོ་ནང་པ་ཡིན་པའི་འབངས་མི་སེར་དཀྱུས་མ་ཞིག་གིས། དེ་རིང་ཁྱེད་ལ་ལུགས་མཐུན་གྱི་གུས་ཚུལ་སྔོན་དུ་བཏང་ནས་གཏམ་ལན་མདོར་བསྡུས་ཤིག་མི་ཞུ་ཐབས་མེད་བྱུང་ལགས། དེས་ན་ཁྱེད་ཀྱིས། འོ། ཡང་མི་ཞིག་གིས་རྙོག་དྲ་ལབ་བཞག་ཅེས་ཐོག་མ་ཉིད་ནས་སྤྱན་ཤེས་ནག་པོ་མི་མནབས་པར་ངའི་ཡིག་ཆུང་འདི་ལ་ཐུགས་དཔྱད་ཞིབ་ཏུ་གནང་རོགས་ཞུ་རྒྱུ་དང༌། ཞར་ལ་ཁྱེད་ཀྱིས་ལྗགས་རྩོམ་འདི་བྲིས་ནས་ལོ་གཅིག་འགོར་བའི་རྗེས་སུ་དེ་རིང་ཁོ་བོ་གཞི་ནས་གཉིད་སད་པ་ལྟ་བུ་ཞིག་བྱུང་སོང་མོད། དེ་ནི་ཡུལ་དུས་ཀྱི་དབང་གིས་ཡིན་པས་དགོངས་པ་མ་ཚོམས་རོགས་ཞེས་ཞུ་རྒྱུ་ཡིན།

ད་ནི་ཚིག་འཁྲི་དང་ཡིག་སྐྱོན་འདོན་པ་སོགས་བྱིས་པའི་ལད་མོ་རྣམས་བསྐྱུར་ཏེ་དོན་གྱི་སྙིང་པོ་མདོ་ཙམ་བརྗོད་ན། ཁྱེད་ཀྱིས་ཐོག་མར་ཆོས་ལུགས་ཀྱི་འཐེན་ཁྱེར་དང༌། རང་འདོད་ཀྱི་སྨྱོ་ཧམ་སོགས་ནི་འཕེལ་རྒྱས་ཀྱི་འཆིང་ཐག་དང༌། རང་གཞུང་ལ་དཀའ་ངལ་སྣོན་མ་རུ་འགྱུར་ཚུལ་ཀྱི་བཀའ་སློབ་རིང་པོ་ཞིག་གནང་འདུག་པ་དེར། ཐོག་མར་བཀའ་སློབ་གནང་མཁན་རང་ཉིད་ནས་དབུ་བཙུགས་ཏེ་དེ་ལྟར་ཉམས་བཞེས་གནང་རོགས་ཞུ་རྒྱུ་ལས་གཞན་མེད་རུང༌།
བཀའ་སློབ་དེའི་འོག་ཏུ་ཇོ་ནང་ས་སྐྱ་ཡིན་མིན་དེ་རྒྱལ་རབས་དང་ཆོས་འབྱུང༌། ཁྱད་པར་རྒྱལ་བ་ཇོ་ནང་པའི་སྔོན་བྱོན་དམ་པ་རྣམས་ཀྱི་རྣམ་ཐར་ལས་ཤེས་དགོས་པ་ཞིག་དང༌། ཤེས་རྒྱུ་ཡོད་པ་ཞིག་ལས་སོགས་ཟེར་བ་ནི།  ཁྱེད་ཀྱིས་འདི་ལྟར་སྦོམ་བཤད་འདྲ་བོ་ཞིག་བྱས་ན་ཇོ་ནང་པ་ཚོའི་ལག་ཏུ་ཆོས་འབྱུང་ལོ་རྒྱུས་གཅིག་ཀྱང་ཡོད་རྒྱུ་མ་རེད་དགོངས་པ་ཡིན་ནམ། ཡང་ན་ཇོ་ནང་པ་ཚོའི་ནང་དུ་ཆོས་འབྱུང་ལོ་རྒྱུས་ལ་བལྟ་ཤེས་མཁན་གཅིག་ཀྱང་ཡོད་རྒྱུ་མ་རེད་དགོངས་པ་ཡིན། རྒྱལ་རབས་ཀྱི་ནང་དུ་ཇོ་ནང་ས་སྐྱ་ཡིན་མིན་གྱི་གདར་ཤ་བཅད་ཡོད་པ་ཞིག་ཁྱེད་འདྲ་མ་གཏོགས་མི་མང་པོས་མཐོང་ཡོད་མེད་མི་ཤེས་ཏེ། བོད་གངས་ཅན་གྱི་ཆོས་འབྱུང་ཕལ་མོ་ཆེའི་ནང་དུ་ཇོ་ནང་ས་སྐྱ་ལས་ལོགས་སུ་ཕྱེས་ཡོད་པ་འདི་གསལ་བོར་མཐོང་ནས། ཇོ་ནང་པ་ཚོས་བདེན་པའི་གནས་ལུགས་བགྲངས་པ་ཡིན་པས། ཁྱེད་ཀྱིས་ཁྱི་ཕར་ཟུག་མེད་ས་ནས། གླ་བ་ཚུར་ངེར་མི་དགོས་ངེས་ཅན་ཡིན།

མཁས་པའི་དབང་པོ་ཀུན་མཁྱེན་གོ་རམས་པའི་གསུང་གི་ནང་དུ་ཇོ་ནང་ས་སྐྱ་ལས་ལོགས་སུ་བཀར་ཏེ་གསུང་ཡོད་ན་ལུང་ཚིག་མ་བཅོས་པར་ཁུར་ཤོག་ཅེས་ཟེར་བར། ཨ་ཡ་མཚན། གོ་རམས་པའི་ལྟ་བའི་ཤན་འབྱེད་ཐེག་མཆོག་གནད་ཀྱི་ཟླ་ཟེར་དུ། རྟག་མཐའ་ལ་དབུ་མར་སྨྲ་བ་དང༌། ཆད་མཐའ་ལ་དབུ་མར་སྨྲ་བ། མཐའ་བྲལ་ལ་དབུ་མར་སྨྲ་བ་ཞེས་ཇོ་ནང་དང་དགེ་ལུགས་ས་སྐྱའི་རིང་ལུགས་ལས་ལོགས་སུ་བཀར་ཏེ་དངོས་སུ་སྔ་རྒོལ་མཛད་ཡོད་པ་འདི་ཁྱེད་ས་སྐྱའི་དགེ་བཤེས་བགྲེས་ཤོག་ཅིག་གིས་ད་བར་མ་གཟིགས་པ་ག་ལ་སྲིད།

མཁས་པས་བཞེད་ཚུལ་མི་འདྲ་བ་ཙམ་གྱིས་ཆོས་ལུགས་ལོགས་སུ་བཀར་དུ་ཡོད་ན་ད་དུང་བོད་གངས་ཅན་གྱི་ལྗོངས་སུ་ཆོས་ལུགས་མང་པོ་ཞིག་ཕྱེ་རྒྱུ་ལྷག་འདུག་པས་སོགས་ཟེར་བར། མཁས་པས་བཞེད་ཚུལ་མི་འདྲ་བས་ཆོས་ལུགས་ལོགས་སུ་བཀར་བ་མིན་ན། འོ་ན་ཤ་མདོག་དང་རིགས་རྒྱུད་སོགས་ཀྱི་སྟེང་ནས་ཆོས་ལུགས་ལོགས་སུ་བཀར་དགོས་པ་ཡིན་ནམ། རྗེ་བཙུན་ཙོང་ཁ་པ་ཆེན་པོ་ཐོག་མར་ས་སྐྱའི་སློབ་བརྒྱུད་ཡིན་ཡང༌། རྗེས་སུ་དགེ་ལུགས་པའི་གྲུབ་མཐའ་ཟུར་དུ་གྱེས་པ་དེ་བཞེད་ཚུལ་མི་མཐུན་པའི་དབང་གིས་གྱེས་པ་མིན་ན་རྒྱག་རེས་བརྒྱབ་ནས་གྱེས་པ་ཨེ་རེད། ད་དུང་སྔར་བོད་ལ་བསྒྲུབ་བརྒྱུད་ཤིང་རྟ་ཆེན་པོ་བརྒྱད་དུ་གྲགས་པ་བྱུང་བ་ལས། འགའ་ཞིག་ལ་ད་ལྟའི་ཆར་གདམས་ངག་གི་རྒྱུན་མ་ཆད་ཙམ་རེ་ལས་ཆེར་མེད་མོད། ཇོ་ནང་པ་ལ་མཚོན་ལ་མགོ་ལོག་དང་རྔ་བ་ཚ་ཁོ་གསུམ་གྱི་ས་ཆ་ཁོ་ན་ལ་ཡང་ཇོ་ནང་གི་རིང་ལུགས་གཙང་མར་འཛིན་པའི་དགོན་སྡེ་བདུན་ཅུ་དོན་གཉིས་ཙམ་བཞུགས་ཤིང༌། བོད་གངས་ཅན་གྱི་ལྗོངས་ན་ས་དགེ་བཀའ་རྙིང་བཞིའི་འཕྲོར་ཇོ་ནང་ལྟ་བུའི་ཆོས་བརྒྱུད་ཆེན་པོ་གཅིག་ཀྱང་མེད་པས་ཆོས་བརྒྱུད་ཆེན་པོའི་ཐོབ་ཐང་བརྩད་བཞིན་པ་ལས། ཇོ་ནང་པ་ལ་ཡང་རི་ཁྲོད་རེ་ཟུང་དང་བཙུན་དགོན་རེ་ཟུང་ལས་མེད་པ་ཞིག་ཡིན་ན་ཆོས་བརྒྱུད་ཆེན་པོའི་ཐོབ་ཐང་ག་ལ་རྩོད། གལ་ཏེ་ད་དུང་ཇོ་ནང་དང་མཉམ་པའི་ཆོས་བརྒྱུད་ཆེན་པོ་གཞན་ཞིག་ཡོད་ན་དེ་དག་ལ་ཡང་ཆོས་བརྒྱུད་ཆེན་པོའི་ཐོབ་ཐང་སྤྲད་རུང་མི་ཆོག་རྒྱུ་ཅི་ཡང་མེད། བོད་ལ་ཆོས་བརྒྱུད་ཆེན་པོ་བཞི་ལས་མང་མི་ཆོག་པའི་ཁྲིམས་སུ་ཞིག་གིས་ཀྱང་བཞག་མེད་ལ། མ་འོངས་པར་ཡང་འཇོག་མི་སྲིད་སྙམ།

དེས་ན་ད་ལྟའི་ཆར་གྲུབ་མཐའ་ཉི་ཚེ་བ་རྣམས་དང་མི་འདྲ་བར་རྒྱལ་བ་ཇོ་ནང་པ་འདི་ལ་ཆོས་བརྒྱུད་ཆེན་པོའི་ཐོབ་ཐང་སྤྲོད་རྒྱུའི་རྒྱུ་ཚོགས་ཚང་བ་གོང་སྨྲོས་ལྟར་གྱི་ཐོག གཞེས་བྱེས་ཇོ་ནང་པ་ཡོངས་ཀྱིས་རང་གཞུང་ལ་གུས་བརྩི་ཚད་མེད་ཀྱིས་ཆོས་བརྒྱུད་ཆེན་པོའི་ཐོབ་ཐང་ཞུ་བཞིན་པ་དང༌། ྋགོང་ས་སྐྱབས་མགོན་ཆེན་པོ་མཆོག་གིས་ཀྱང་ས་དགེ་བཀའ་རྙིང་ཇོ་ནང་དང་བཅས་པ་ཞེས་ཡང་ཡང་གསུངས་བཞིན་པའི་སྐབས་འདིར། ཇོ་ནང་པ་ལ་ཆོས་བརྒྱུད་ཆེན་པོའི་ཐོབ་ཐང་སྤྲད་ན་དགེ་མཚན་ཆེ་ཞིང་རྙོག་གླེང་མེད་པ་ཡིན་མོད། རྙོག་དྲ་ཐམས་ཅད་གླེང་གིན་གླེང་གིན་ཆེ་རུ་འགྲོ་བ་སྐུ་ཉིད་ཀྱིས་མཁྱེན་གསལ་ལྟར་ཡིན་པས། ད་རང་གཞུང་དང་རང་རིགས་མི་མང་ཁྲི་ཕྲག་དུ་མའི་བར་དུ་རྙོག་དྲ་གསར་བ་ཞིག་གི་སྒོ་མི་ཕྱེ་ཆེད་སྐུ་ངོ་མཆོག་གིས་ཐུགས་བསམ་ཅུང་བཞེས་ན་མི་དགའ་འམ།  ཇོ་ནང་ས་སྐྱའི་ཁོངས་ཡིན་མིན་ལ་ཁྱེད་ལས་ཇོ་ནང་པ་རྣམས་ལ་རྒྱུ་མཚན་མང་ཞིང༌། གཞེས་བྱེས་ཇོ་ནང་པ་ཡོངས་ཀྱི་སེམས་གཏིང་ནས་རང་ཉིད་ས་སྐྱ་པ་ཞིག་ཡིན་པར་ཁས་ལེན་གྱི་མེད་པས། ཁྱེད་ཀྱིས་ཨུ་ཚུགས་ཅི་ལྟར་གནང་ཡང་དེ་ལྟར་རང་གཞུང་དང་མི་མང་གི་བར་ལ་རྙོག་དྲ་ཆེ་རུ་འགྲོ་བ་མ་གཏོགས་ཇོ་ནང་པ་ཚོས་ཁས་མི་ལེན་པ་སྨྲོས་མེད་རེད།

མཆོག་ཉིད་ས་སྐྱའི་བསྟན་པ་ལ་ཞེན་ཁོག་ཡོད་པ་ནི་ཕ་རྗེས་བུ་འཇུག་ཡ་རབས་ཀྱི་ལུགས་སྲོལ་ཡིན་པས་བསྔགས་པར་འོས་པ་ཡིན་མོད། དཔལ་ལྡན་ས་སྐྱའི་བསྟན་པ་ནི་དེང་སང་འཛམ་བུ་གླིང་ན་ཉི་མ་ཤར་བ་བཞིན་དར་གྱི་ཡོད་པར་མ་ཟད།  ཚད་མ་ས་དང༌། འདུལ་བ་མཚོ། མངོན་པ་མཆིམས། དབུ་མ་རེད། ཕར་ཕྱིན་གཡག་ལ་ཐུག་པའི་བཤད་སྲོལ་ལྟར། བོད་ཁ་བ་ཅན་གྱི་རྒྱལ་བསྟན་ཡོངས་རྫོགས་ལ་དཔལ་ལྡན་ས་སྐྱའི་ཕྲིན་ལས་ཀྱིས་ཁྱབ་ཀྱི་ཡོད་པ་དེས་ཆོག་གི། ད་དུང་ཇོ་ནང་པ་རྣམས་ཀྱི་སྐེ་མདོ་ནས་བཙིར་དགོས་པའི་རྒྱུ་མཚན་ཨེ་འདུག་ལེགས་པར་སོམས་ཤིག

ཀུན་མཁྱེན་དོལ་པོ་བས་རྒྱ་ཡུལ་བ་དཀོན་མཆོག་རྒྱལ་མཚན་ལ་གནང་བའི་ཞལ་གདམས་ནང་གི་ཚིག་ཅིག་དུམ་བུར་བཅད་དེ། ཁྱད་པར་དུ་ཟབ་ལམ་གྱི་བསྟན་པ་དར་ཞིང་རྒྱས་པར་མཛད་པ་དེ་ལྷག་པར་ཡང་ཐུགས་ལ་བཏགས་ཤིང༌། དགོན་པ་མ་བུ་ན་བཞུགས་པ་རྣམས་ཀྱི་གཙོ་བྱས་པ་རང་རེའི་ཆོས་བརྒྱུད་གཅིག་པ་ཐམས་ཅད་ལ་དགའ་ཚོར་ཆེན་པོ་དཔག་ཏུ་མེད་པ་མཆིས་ལགས། ཞེས་པ་འདིས་ཇོ་ནང་ས་སྐྱའི་ཁོངས་ཡིན་པར་བསྒྲུབ་འདུག་མོད། དེ་ནས་མར་ད་དུང་ཡིག་ཕྲེང་གཅིག་ཀློག་དང༌། དེའི་ཐད་ནས་བླ་མ་དམ་པ་རྣམས་ཀྱི་ཆོས་ཀྱི་དམ་ཚིག་ཟབ་མོ་ལ་དགོངས་ནས་གདན་ས་ཆེན་པོ་དཔལ་ལྡན་སྐྱའི་གཙོ་མཛད། འབྲེལ་ཡོད་ཀྱི་དགོན་སྡེ་རྣམས་སུ་དབུལ་སྐྱེལ་གྱི་གནང་སྦྱིན་ཕུན་སུམ་ཚོགས་པ་དང༌། ཁྱད་པར་རང་རེའི་དགོན་པ་མ་བུར་ཤིན་ཏུ་ཁྱད་པར་འཕགས་པའི་གནང་སྦྱིན་ཕུན་སུམ་ཚོགས་པས་བསམ་གཏན་པ་རྣམས་ཀྱི་སེམས་ཚིམ་པར་མཛད་དེ། ཞེས་སོགས་གདན་ས་ཆེན་པོ་དཔལ་ལྡན་ས་སྐྱ་སོགས་ནི་བླ་མ་རྣམས་ཀྱི་དམ་ཚིག་ལ་དགོངས་པའི་འབྲེལ་ཡོད་ཀྱི་དགོན་སྡེ་དང༌། ཇོ་ནང་རང་གི་གདན་ས་རྣམས་ལ་ཁྱད་པར་རང་རེའི་དགོན་པ་མ་བུ་ཞེས་ལོགས་སུ་གསལ་བོར་ཕྱེས་འདུག་པ་འདི་ཡིན་པས། གོང་གི་རང་རེའི་ཆོས་བརྒྱུད་གཅིག་པ་ཟེར་བ་འདི་ས་སྐྱ་ལ་ཟེར་བ་མིན་པ་སུས་ཀྱང་ལོས་ཤེས། སྔོན་ཞྭ་རྒབ་པས་སྲིད་དོན་རྒྱལ་རབས་འབྲི་སྐབས། ལུང་ཕྱེད་ཀ་ཕྱེད་ཀ་རྐྱང་རྐྱང་དྲངས་ཤིང༌། སྐབས་རེར་གནད་འགག་གི་ཐོག་ནས་བཟོ་བཅོས་ཕྲན་བུ་རེ་བྱས་འདུག་པ་བོད་ལ་ལྷག་བསམ་གྱིས་ཡིན་སྲིད་མོད། རྗེས་སུ་ཆབ་སྤེལ་ཚེ་བརྟན་ཕུན་ཚོགས་སོགས་ཀྱིས་ལུང་དེ་དག་ཡོངས་རྫོགས་དྲངས་པ་དང༌། བཟོ་བཅོས་བྱས་པ་རྣམས་མ་ཕྱི་དངོས་ཀྱི་ཐོག་ནས་ཐེར་འདོན་ཇི་ལྟར་བྱས་ཡོད་པ་ཁྱེད་ཀྱིས་གཟིགས་ཨེ་མྱོང༌།

ད་དུང་འཕྲིན་ཡིག་དེ་ཆ་ཚང་བར་ཀློག་དང༌། དོལ་པོ་ཡབ་སྲས་ཀྱི་ཆོས་སྐད་དུ་ཟབ་ལམ་གྱི་བསྟན་པ་ཟེར་དུས་སྦྱོར་དྲུག་ལ་གོ་ཞིང༌། ཆོས་རྗེ་ཡབ་སྲས་ཟེར་དུས་ཀུན་སྤངས་ཐུགས་རྗེ་བརྩོན་འགྲུས་ཡབ་སྲས་ལ་གོ་བ་དང༌། དོན་དམ་ངེས་དོན་དཀོན་མཆོག་གསུམ་བསྒྲུབས་ནས།། ཞེས་དང༌། བདེ་གཤེགས་སྙིང་པོ་འགྲོ་ལ་གསལ་བར་མཛད།། ཅེས་པ་ནི་འཁོར་ལོ་ཐ་མ་སྙིང་པོ་བསྟན་པའི་མདོའི་དགོངས་དོན་རྣམས་དོན་དམ་གཞན་སྟོང་ལྟར་དུ་སྟོན་པ་ཞིག་ལ་གོ་དགོས་པ་ཡོངས་གྲགས་ཡིན་པ་ལྟར་ན། དཀོན་མཆོག་རྒྱལ་མཚན་ཞུ་བ་དེ་སྦྱོར་དྲུག་པ་ཞིག་དང༌། ཀུན་སྤངས་ཐུགས་རྗེ་བརྩོན་འགྲུས་ཡབ་སྲས་ཀྱི་སློབ་བརྒྱུད། འཁོར་ལོ་ཐ་མ་གཞན་སྟོང་ལྟར་དུ་བཞེད་པ་ཞིག་ཡིན་འདུག་པ་འདྲ་བར་མ་ཟད། འཕྲིན་ཡིག་རང་གི་དབུར་རྒྱ་ཡུལ་བ་དཀོན་མཆོག་རྒྱལ་མཚན་ལ་གདམས་པ་ཞེས་བྲིས་འདུག་པས། དཀོན་མཆོག་རྒྱལ་མཚན་དེ་ས་སྐྱའི་ཏི་ཤྲཱི་དཀོན་མཆོག་རྒྱལ་མཚན་ཡིན་པའི་སྒྲུབ་བྱེད་ཅི་ཞིག་ཡོད། གལ་ཏེ་ཡོད་ན་ཡང་གོང་གི་ལུང་དེས་གྲོད་པུ་དང་གྲོད་ཤུན་ལོགས་སུ་གསལ་བོར་ཕྱེས་འདུག་པས་ད་ཁྱེད་ཀྱིས་འཕྲིན་ཡིག་དེ་ལ་བཟོ་བཅོས་རྒྱག་ཧ་ཅང་དཀའ།

ཏཱ་ར་ན་ཐཱས་ཁོང་ལ་ས་སྐྱ་་པའི་ཕོ་རུས་ཡོད་པ་དང༌། ས་ལུགས་ཀྱི་བསྟན་པ་ལ་གང་ཕན་བྱས་ཚུལ་སོགས་གསུངས་ཡོད་པ་བདེན་མོད། དེ་ནི་སྐྱེས་བུ་དམ་པའི་མི་ཐབས་རང་ཡིན་པ་ལས། དོན་ལ་ང་ཏཱ་ར་ན་ཐཱས་སྐྲ་སྦར་གང་ནི་སྟག་ལུང་ཐང་པ་ལ་བཅད། ཆོས་ནི་ཕྱོགས་མེད་དུ་ཞུས། སེམས་ངོ་ནི་རྟོགས་ལྡན་ལྷ་དབང་གྲགས་པས་སྤྲད། ཞེས་སོགས་ནས། ལྟ་བ་ནི་དོལ་པོ་པའི་ལུགས་སྐྱོང༌། ཆོས་སྐད་ནི་རྒྱ་གར་གྲུབ་ཐོབ་ཀྱི་རྗེས་སུ་འབྲང༌། ཆོས་ལུགས་སུ་ཡིན་དང༌། སུའི་གྲྭ་བ་ཡིན་ད་ཤེས་པར་འདའ་འམ་ཞེས་དགོངས་པའི་བབས་སོ་མཐར་ཐུག་དོལ་པོ་པའི་ལུགས་ཡིན་པ་གསར་པོར་གསུངས་པའི་ཕྱིར་རོ།། ད་དུང་དེ་བས་ཀྱང་གལ་ཆེ་བ་ཞིག་ལ། ཏཱ་ར་ན་ཐཱའི་དབུ་མའི་སྙིང་པོ་སོགས་ཐུགས་ཀྱི་བཅུད་ཕྱུང་བའི་མན་ངག་གི་བསྟན་བཅོས་རྣམས་ལ་གཟིགས་དང༌། དཔེ་ཆ་ཅུང་ཤེས་མཁན་ཞིག་ཡིན་ཕྱིན་ཆད་ཕྲུ་གུ་ཆུང་ཆུང་ཞིག་ཡིན་རུང༌། འོ། འདི་ས་སྐྱ་པའི་གྲུབ་མཐའ་འཛིན་མཁན་ཞིག་མ་རེད་ཅེས་ལས་སླ་བོར་ཐག་གཅོད་ཐུབ་ངེས་ཡིན།

གལ་སྲིད་ཇོ་ནང་ས་སྐྱ་ལས་ཆོས་བརྒྱུད་ལོགས་སུ་ཡོད་ན་ཁུངས་སྐྱེལ་གྱི་ཡིག་ཆ་ཚད་ལྡན་ཞིག་གཞུང་སྒེར་གཉིས་ལ་སྤྱན་འདྲེན་ཞུས་ན། གནས་ལུགས་ལ་བསྙོན་མེད་ཀྱི་ཐག་གཅོད་ཅིག་དགོས་རྒྱུ་རེད་བསམ་པ་ལས་སོགས་ཟེར་བར། ཨ་ཙི་དཀོན་མཆོག་མཁྱེན། མཚམས་འདི་ནས་ངའི་མིག་འཁྲུལ་བ་ཡིན་ནམ་ཡང་ན་ཁྱེད་ཀྱིས་ཕྱག་ནོར་བ་ཡིན། འདི་ཅི་བས་ཀྱང་ཡ་མཚན་ཆེ་བ་ཞིག་སྟེ། ལོ་ཤས་ཀྱི་སྔོན་རྙིང་མ་དང༌། བཀའ་བརྒྱུད། དགེ་ལུགས། བོན་པོ་རྣམས་ཀྱི་ཆོས་འབྱུང་མཁན་པོ་ཆེ་དགུ་ཀུན་གྱིས་མཛད་པའི་ཆོས་འབྱུང་ཆེ་ཁག་ཀུན་ཏུ། ཇོ་ནང་ས་སྐྱ་ལས་ལོགས་སུ་ཕྱེས་ཡོད་པ་རྣམས་ཕྱོགས་བསྡུས་ཞུས་ནས་རང་གཞུང་ལ་ཕུལ་འདུག་པར་མ་ཟད། འཇམ་དབྱངས་མཁྱེན་བརྩེ་དབང་པོ་སོགས་ས་སྐྱའི་ཕྱོགས་ཀྱི་མཁས་གྲུབ་ཆེ་གྲས་དུ་མས། རྙིང་མ་ས་སྐྱ་སོགས་གྱི་གྲུབ་མཐའ་ཡན་ལག་དང་བཅས་པའི་བྱུང་བ་བརྗོད་པའི་རྗེས་སུ། ད་ནི་དེ་དག་ཏུ་མ་འདུས་པའི་གྲུབ་མཐའ་གཞན་པ་ཇོ་ནང་དང་ཞེས་སོགས་ཧ་ཅང་ཁ་གསལ་གྱིས་གསུངས་ཡོད་པ་རྣམས་ཀྱང་ཕུལ་ཡོད་འདུག་ཀྱང༌། ཁྱེད་ལ་མི་སུ་གཅིག་གིས་ཀྱང་ཡིག་ཆ་དེ་ཚོ་བསྟན་མ་སོང་ངམ། ཁྱེད་ཀྱིས་ད་བར་བོད་ཀྱི་ཆོས་འབྱུང་ཆེ་ཁག་གི་རིགས་ལ་གཏན་ནས་གཟིགས་མ་མྱོང་ངམ། ཚད་ལྡན་གྱི་ཡིག་ཆ་མང་པོ་དེ་འདྲ་ཞིག་གི་ནང་དུ་རྩོད་པ་མི་དགོས་པའི་ཁ་གསལ་པོ་དེ་ཙམ་ཡོད་རུང༌། ཡང་ན་ཁྱེད་ཀྱིས་བཛྲ་ས་ཏྭ་ཧཱུྃ། ད་དེའི་ཐད་ནས་ངས་བོད་ཀྱི་མཁས་གྲུབ་སུ་གཅིག་ཀྱང་ཁས་ལེན་ན་དཀོན་མཆོག་གསུམ་ཞེས་གསུང་རྒྱུ་ཨེ་ཡིན།
ད་དུང་ས་སྐྱ་རང་ཉིད་ཀྱང་འཁོན་དཀོན་མཆོག་རྒྱལ་པོ་ཡན་ཆད་དུ་སྔགས་རྙིང་མ་ཡིན་པ་དང༌། འཁོན་དཀོན་མཆོག་རྒྱལ་པོའི་སྐུ་རིང་ལ་གྲུབ་མཐའ་ཟུར་དུ་གྱེས་ཚུལ་གངས་རིའི་ལྗོངས་ཀྱི་ཆོས་འབྱུང་མཁན་པོ་རྣམས་ཞལ་གཅིག་གྲག་ཡིན་པས། ས་སྐྱ་རྙིང་མ་ལས་ལོགས་སུ་གྱེས་ཆོག་ན་ཇོ་ནང་ས་སྐྱ་ལས་ལོགས་སུ་གྱེས་མི་ཆོག་པའི་རྒྱུ་མཚན་ཅི་ཞིག་ཡོད། ཇོ་ནང་པ་ལ་ཡང་གྲུབ་མཐའི་སྲོལ་འབྱེད་དང༌། ལྟ་གྲུབ་ཐུན་མོངས་མ་ཡིན་པའི་ཡིག་ཆ། ཆོས་བརྒྱུད་ཐུན་མོང་མ་ཡིན་པ་འཛིན་སྐྱོང་གནང་བའི་གདན་ས་སོགས་ས་སྐྱ་པ་ལ་གང་ཡོད་ཇོ་ནང་ལ་ཡང་ཡོད་པ་ཡིན།

གཞན་ཁྱེད་ཀྱིས་ཨ་རི་འབྱོར་ལྡན་གྱི་ཞིང་ནས་རྒྱ་ནག་རྒྱལ་ཁབ་རྒྱབ་ལ་ཁུར་ནས་འཇིགས་སྐུལ་ཀྱི་སྐད་ཆ་བཤད་པ་ཞེས། མཁན་པོ་ངག་དབང་རྡོ་རྗེར་གང་ཟག་ལ་སྐུར་འདེབས་ཞུས་པ་ནི་ཆེས་མི་འོས་པ་ཞིག་སྟེ། ཁོང་ནི་རང་རེའི་ན་གཞོན་ཚོའི་ཁྲོད་དུ་བོད་ཀྱི་ཆོས་དང་རིག་གཞུང་གི་གཏིང་ཟབ་སར་མཁྱེན་ཡོན་ཆེན་པོ་ཡོད་མཁན་ཞིག་དང༌། བོད་ལ་ཤ་ཞེན་ཚད་མེད་ཡོད་མཁན་ཞིག་ཡིན་ཞིང༌། བོད་མི་མང་པོ་ཞིག་ནུབ་ཕྱོགས་སུ་སླེབས་རྗེས་སྒྲོ་ལར་ལ་མགོ་འཁོར་ནས་བོད་དོན་འཐབ་རྩོད་ཀྱི་གོ་སྐབས་ཆེན་པོ་ལེན་ཐུབ་ཀྱི་མེད་རུང༌། ཁོང་ནི་ཨ་རིར་སླེབས་རྗེས་ཀྱང་བོད་དོན་ཀྱི་ཞི་བའི་གོམས་བགྲོད་རྒྱང་རིང་གནང་བ་དང༌། སྲིད་དོན་ཀྱི་ལས་འགུལ་གལ་གང་ཆེ་ལ་ག་དུས་ཡིན་ཀྱང་ཐོག་མར་སླེབས་མཁན་ཞིག་ཡིན་ཞིང༌། ད་ལྟའི་ཁོང་གི་བཞུགས་ཡུལ་བིར་ཇི་ནི་ཡ་(Virginia)ནས་ཝ་ཤིན་ཏྲོན་(Washington)བར་དུ་མོ་ཊས་ཆུ་ཚོད་གསུམ་ལྷག་དགོས་ན་ཡང༌།  འདི་ལོར་བོད་ནང་དུ་དམར་གསོད་བྱུང་བའི་རྗེས་ནས་ཨོ་ལིམ་ཕིཀ་མཇུག་མ་རྫོགས་བར་དུུ། ཝ་ཤིན་ཏྲོན་གྱི་རྒྱ་མིའི་གཞུང་ཚབ་ཁང་གི་མདུན་དུ་ངོ་རྒོལ་ལ་ཕེབས་རྒྱུར་ཧ་ལམ་ཉིན་གཅིག་ཙམ་ཡང་ཆད་མྱོང་མེད། ཉིན་རེའི་ཆུ་ཚོད་བདུན་བརྒྱད་ཀྱི་འགྲིམ་འགྲུལ་དེ་ལས་སླ་བོ་ཞིག་མིན་པར་མ་ཟད། འགྲོ་གྲོན་ཆ་ཚང་སྐུ་སྒེར་གྱིས་གཏོང་བཞིན་བོད་དོན་འཐབ་རྩོད་མུ་མཐུད་གནང་བཞིན་པ་དེས་ས་གནས་བོད་པ་ཚོས་ཁོང་ལ་མིག་དཔེ་བལྟ་གི་ཡོད་པ་དང༌། ལེ་ལོ་ཅན་ཚོ་ལ་ཡང་སྐུལ་ལྕག་ཐེབས་ཀྱི་ཡོད་པ་རེད།  ང་ཚོ་བོད་ཀྱི་བླ་སྤྲུལ་མཁན་གསུམ་ཚོའི་ནང་དུ་སྐུ་ཕྲེང་མང་པོར་བོད་མིའི་ཤི་གསོན་གྱི་དཀོར་ལ་ལོངས་སྤྱོད་པ་ཙམ་ལས། སྐྱབས་མགོན་རིན་པོ་ཆེའི་རྒྱབ་ཏུ་ལངས་ནས་བོད་དོན་འཐབ་རྩོད་གནང་མཁན་ཅི་ཡོད་ཁྱེད་ཀྱིས་ལོས་མཁྱེན། དེས་ན་བོད་ཞེན་ཅན་གྱི་མཁན་པོ་རྒྱལ་གཅེས་པ་ཞིག་ལ་རྒྱ་ནག་རྒྱབ་ཁུར་ཞེས་འབོད་པ་འདི་ནི་རང་མགོ་ཆུ་འདྲེན་གྱི་སྐད་ཆ་ཞིག་ཡིན་པར་མ་ཟད། དགའ་ལྡན་ཕོ་བྲང་གི་སྲིད་ཀྱི་སྣེ་མོ་ལ་གཏོགས་པའི་མི་ཆེན་ཞིག་གིས་དེ་བས་ཀྱང་ཁ་སྒོ་ནས་ཐོན་མི་རུང་བའི་ཚིག་གཅིག་ཡིན་པས། འགན་མི་ཁུར་བའི་སྐད་ཆ་ཟེར་བ་དེ་ལ་འདི་ལས་ལྷག་ཅིག་གང་དུ་ཡོད།

ྋསྐྱབས་མགོན་རིན་པོ་ཆེས་བོད་མི་མང་གི་ཐོབ་ཐང་བརྩད་པ་ལ་རྒྱ་མིའི་ཕྱོགས་ནས་ཁ་བྲལ་དང༌། གཅིག་གྱུར་ལ་གཏོར་བཤིག་གི་མཚན་སྨོད་བྱེད་བཞིན་པ་འདིའི་བསླབ་བྱ་ང་ཚོས་ལེན་མི་རུང་ལ། མིང་ཚིག་དེ་ཇོ་ནང་པའི་སྟེང་དུ་གཏན་ནས་བཀོལ་མི་རུང༌། གལ་ཏེ་ཇོ་ནང་གི་བླ་མ་དང་མི་དཔོན་རེ་ཟུང་སྡོད་མ་ཐུབ་པར་ཆོས་བརྒྱུད་ཀྱི་ཐོབ་ཐང་བརྩད་པ་ཞིག་ཡིན་ན། གཅིག་བྱས་ན་སྤྱི་འཐུས་ལགས་ཀྱིས་ཁ་བྲལ་དང་གཏོར་བཤིག་གི་མིང་ཚིག་འདི་དག་བེད་སྤྱོད་གནང་ན་ཡང་འགྲིག་སྲིད་མོད། ཇོ་ནང་པའི་ཆོས་བརྒྱུད་ཀྱི་ཐོབ་ཐང་རྩོད་ལེན་གནང་བཞིན་པ་འདི་ནི་གཞིས་བྱེས་ཇོ་ནང་གི་ཆོས་བརྒྱུད་འཛིན་པ་ཡོངས་ཀྱིས་རེ་བ་ཞིག་ཆགས་ཡོད་སྟབས། ཁྱེད་གཞུང་ཞབས་སྤྱི་འཐུས་ཤིག་གི་གསུང་ཚིག་ལ་གཟབ་གཟབ་མཛད་དགོས་པར་འདུག་སྙམ། སྲིད་དོན་སོགས་ཀྱི་དབང་གིས་འདིར་དགོན་པའི་མཚན་ནས་དངོས་སུ་སྨྲོས་པ་སྟབས་བདེ་མིན་མི་ཤེས་ཀྱང༌། ང་རྒྱ་གར་དུ་སྡོད་སྐབས་གངས་ལྗོངས་བོད་གཞིས་ཀྱི་ཇོ་ནང་གི་དགོན་ཆེན་མང་པོས་བཙན་བྱོལ་བོད་གཞུང་ལ་རེ་ཞུའི་ཡི་གེ་ཐེངས་མང་ཕུལ་བའི་ཡི་གེ་དངོས་དང་ངོ་བཤུས་མང་པོ་དངོས་སུ་མཐོང་མྱོང་ལ། ལོ་རེའི་དཔྱིད་ཆོས་སོགས་ཀྱི་སྐབས་སུ་བོད་ནས་ཆོས་ཞུར་སླེབས་པའི་ཇོ་ནང་གི་ཆོས་བརྒྱུད་ཀྱི་རྒན་རྒོན་མང་པོས། ད་ང་ཚོས་རེ་བ་ཞིག་ནི་ཡུན་རིང་པོ་ནས་ཞུས་ཡོད་པ་རེད། མི་ཁ་ཤས་ཀྱི་འགོག་རྐྱེན་བཟོ་བཞིན་ཡོད་ཀྱང་ཡིད་བཞིན་ནོར་བུའི་ཐུགས་རྗེ་ལ་བརྟེན་ནས་ཅིག་འགྲིག་ཡོང་གི་རེད་བསམ་གྱི་འདུག་ཅེས་ཡང་ཡང་ཟེར་བ་དངོས་སུ་ཐོས་མྱོང༌། དེས་ན་སྤྱི་འཐུས་མཆོག་ནི་མིང་ལ་ས་སྐྱའི་སྤྱི་འཐུས་ཞེས་གསོལ་ཡོད་རུང༌། དོན་ལ་ཇོ་ནང་པ་ཐེ་བའི་བོད་མི་མང་སྤྱིའི་བདེ་སྡུག་ལ་གཟིགས་མཁན་ཞིག་ཆགས་ཡོད་སྟབས་བློ་གཟུ་བོའི་སྒོ་ནས་གཞིས་བྱེས་ཇོ་ནང་པ་ཡོངས་ཀྱི་རེ་འདོད་ལ་རྒྱུས་ལོན་ཕྲན་བུ་ཞིག་གནང་རོགས་ཞུ་བ་ཡིན། གངས་ལྗོངས་བོད་གཞིས་སུ་ང་ཚོས་ལག་པ་བརྐྱངས་སྟབས་མི་བདེ་བ་མ་གཏོགས། གལ་ཏེ་སྟབས་བདེ་བོའི་ཉི་མ་ཞིག་བྱུང་ན་ཁྱེད་ཀྱི་སྤྱན་སྔར་ས་རྟགས་ཆིག་འབུམ་འབུལ་དགོས་རུང་ཉིན་ཤས་ཤིག་གི་ནང་དུ་འབུལ་ཐུབ་པ་སྨྲོས་མ་དགོས།

དེས་ན་གཞིས་བྱེས་ཇོ་ནང་པའི་ཆོས་བརྒྱུད་འཛིན་པའི་གྲྭ་བཙུན་སྔགས་གསུམ་དང་མི་སྐྱ་ཕོ་མོ་ཁྲི་ཕྲག་མང་པོའི་རེ་བའི་སེམས་ཁོངས་སུ་ཆུ་འཁྱག་བླུགས་རྒྱུ་དེ་ལས་སླ་བོ་ཞིག་གཏན་ནས་མིན་པར་མ་ཟད། ད་ལྟའི་ཆར་གཞིས་བྱེས་ཇོ་ནང་གི་ཆོས་བརྒྱུད་འཛིན་པ་ཡོངས་ཀྱིས་རང་ཉིད་ས་སྐྱ་པ་ཞིག་ཡིན་པར་བསམ་གྱི་མེད་ལ། ས་སྐྱ་པ་ཞིག་ཡིན་པར་ཁས་ཀྱང་ལེན་གྱི་མེད་པས། སྐུ་ཉིད་ཀྱིས་སྲབ་དཀྱོག་གློད་རུང་མ་གློད་རུང་ཇོ་ནང་པ་འདི་ས་སྐྱ་ལ་གཏན་ནས་དབང་གི་མེད། དེས་ན་སྤྱི་འཐུས་ལགས་ཀྱིས་འདི་ལྟར་ཨུ་ཚུགས་གནང་བཞིན་པ་དེས་ཇོ་ནང་ས་སྐྱ་ལ་དབང་བར་ཕན་ཐོག་ཡོང་རྒྱུ་ཕར་ཞོག དེ་ལས་ལྡོག་སྟེ་ཆོས་བརྒྱུད་ནང་ཁུལ་དང༌། གྲོགས་མཆེད་ནང་ཁུལ་གྱི་དམ་ཚིགས་ལ་སེལ་ཞུགས་རྒྱུ་མ་གཏོགས་མེད་ཅིང༌།  གཅིག་བྱས་ན་མ་འོངས་པར་ྋགོང་ས་མཆོག་གི་ཐུགས་དགོངས་དཀྲུགས་རྒྱུའི་རྒྱུ་རུ་ཡང་འགྲོ་མི་སྲིད་པའི་ངེས་པ་གཏན་ནས་མེད།
ཨེ་ཨེ། སྐུ་ངོ་ལགས། ཁྱེད་ལེགས་ཉེས་ཤེས་པ་དང་གཞུང་མང་ལ་ཤ་ཚ་མཁན་གྱི་སྐུ་ངོ་རྣམ་དཔྱོད་ཅན་ཞིག་ཡིན་ན། ད་ཧ་ཅང་སྨྱོ་མཆོངས་མ་མཛད་ན་མི་དགའ་འམ། ྋགོང་ས་མཆོག་ལ་མཚོན་ན། ལོ་སྔོན་མའི་སྤྱི་ཟླ་བཅུ་བར་ཨ་རིའི་མངའ་སྡེ་ཨིན་ཌི་ཡ་ནར་(Indianapolis)བྱང་ཆུབ་ལམ་སྒྲོན་གྱི་གསུང་ཆོས་གནང་སྐབས་ས་དགེ་བཀའ་རྙིང་ཇོ་ནང་དང་བཅས་པ་ཞེས་གསུངས་པ་དངོས་སུ་ཐོས་ཤིང༌། འདི་ལོའི་སྤྱི་ཟླ་བདུན་པར་ཕེན་སུ་ཝི་ནའི་ཡ་(Pennsylvania)རུ་ལམ་རིམ་ཆེན་མོའི་གསུངས་ཆོས་གནང་སྐབས་ཀྱང་ས་དགེ་བཀའ་རྙིང་ཇོ་ནང་དང་བཅས་པ་ཞེས་གསུངས་པ་དང༌། དེ་རྗེས་མཻ་སྒྲི་སོན་ཝིས་སི་ཁོན་སིན་(Madison, Wisconsin)དུ་ཡང་གོང་བཞིན་ས་དགེ་བཀའ་རྙིང་ཇོ་ནང་དང་བཅས་ཞེས་གསུངས་པ་དངོས་སུ་ཐོས་པར་མ་ཟད། མ་འོངས་པར་ཡང་འདི་ལྟར་གསུང་ངེས་ཡིན་པ་ང་ཚོས་རྣ་བ་ཀྲོག་ཀྲོག་བྱས་ནས་ཉན་ཆོག དེས་ན་༧གོང་ས་མཆོག་ལ་སངས་རྒྱས་དངོས་མཐོང་གི་དད་པ་ཡོད་ཕྱིན། ྋགོང་ས་མཆོག་གི་གསུང་གི་ཟུར་ཙམ་ལ་ཡང་དགོས་པ་བསམ་གྱིས་མི་ཁྱབ་པ་ཡོད་པ་སྨྲོས་མེད་ཡིན་ན།  དངོས་སུ་འདི་ལྟར་ས་དགེ་བཀའ་རྙིང་ཇོ་ནང་དང་བཅས་པ་ཞེས་ཡང་ནས་ཡང་དུ་ནན་ཏན་མཛད་ནས་གསུངས་པ་ལ་དགོས་པ་རྒྱུ་མཚན་ཅི་ཡོད་ས་སྐྱའི་སྤྱི་འཐུས་ལགས་ཀྱིས་ངེས་པར་དུ་མཁྱེན་འོས་པ་ཞིག་རེད། ྋགོང་ས་མཆོག་གིས་ཐེངས་གཅིག་ཙམ་མིན་པར་ནམ་རྒྱུན་བཀའ་འདི་ལྟར་གནང་བཞིན་པ་དེ་ཞལ་ནོར་ཤོར་བ་མིན་ལ། ཐུགས་མཉམ་མ་བཞག་པའི་གསུང་ཡང་མིན། ཁྱེད་ནི་དེང་སང་རྒྱ་མིན་བོད་མིན་གྱི་གསར་བུ་ཁ་ཅིག་རང་མོས་སྙན་ངག་རེ་འབྲི་ཤེས་དུས་ཆོས་དང་བླ་མ་ལ་ལོག་ལྟ་བྱེད་བཞིན་པ་དེ་ཚོ་དང་མི་འདྲ་བར། ནང་བའི་ཆོས་ལ་སློབ་གཉེར་རྒྱུན་རིང་པོར་གནང་ནས་དགེ་བཤེས་ཀྱི་མཚན་གནས་སུ་ཕེབས་པ་ཞིག་ཡིན་པས། བཤེས་གཉེན་བསྟེན་ཚུལ་གྱི་ཐོག་ལ་ཐུགས་རྒྱུས་ཅི་བས་ཀྱང་ཆེ་བ་སྨྲོས་མེད་ལོས་ཡིན།

ངས་འདི་ལྟར་བྲིས་པར་བཀུར་འོས་སྤྱི་འཐུས་གང་ཟག་སྐུ་སྒེར་ལ་ཕོག་ཐུག་འགྲོ་གཞི་འདྲ་མཆིས་ན་དགོངས་འགལ་མེད་པ་ཞུ་རྒྱུ་དང༌། གཞན་ཆོས་དང་མཐུན་པའི་བགྲོ་གླེང་དང༌། དགོངས་ཚུལ་དང་བསམ་ཚུལ་བརྗེ་རེས་ཀྱི་ཐུགས་བཞེད་འདྲ་ཡོད་ན་ཡིག་ཐོག་ནས་སམ། ཡང་ན་གསེར་ཞལ་དངོས་མཇལ་གྱིས་བགྲོ་གླེང་གནང་བཞེད་གང་ཡོད་ལ། འདི་ནས་དེ་དེ་བཞིན་དུ་ཞུ་བའི་འདུན་པ་ཡོད་ཅེས་གསོལ་བ་ཡིན། ད་དུང་ཁྱེད་ཀྱིས་ཨེ་མ་ཧོ་ཞེས་པའི་དེབ་ཆུང་ཞིག་མཛད་ཡོད་ཚུལ་གསུངས་འདུག་པ་དེ་ལ་ཡང་གང་མགྱོགས་ཀྱིས་མཇལ་ཏེ། ལུང་རིགས་གི་སྲང་ལ་ཡང་ཡང་གཞལ་ཆོག་པའི་བཀའ་དྲིན་རྒྱ་མི་ཆུང་བར་ཞུ་ཞུ་ཞུ།