ཕྱི་ཚེས་ ༢ ཉིན་སྟེ། གྷན་ངྷི་མཆོག་གི་འཁྲུངས་སྐར་ཉིན་མོ་འཚེ་མེད་ཞི་བའི་ཉིན་མོར་སྲུང་གཙི་བྱེད་སྐབས་དང་བསྟུན། མདོ་སྨད་བཙན་རྒོལ་བདེན་རྒྱབ་མནའ་འབྲེལ་ཞེས་པས་བཞུགས་སྒར་གངས་སྐྱིད་སྤྱི་ཐབ་ཚོགས་ཁང་དུ་ལོ་འདིར་གཞིས་ལུས་མི་དམངས་ཀྱིས་རྒྱ་ནག་གཞུང་ལ་ཞི་བའི་ངོ་རྒོལ་བྱས་སྐབས་མདོ་སྨད་མི་དམངས་ཀྱིས་ས་གནས་གང་སར་ངོ་རྒོལ་བྱས་པའི་བྱུང་རབས་ཀྱི་ཟིན་ཐོ་དཔེ་དེབ་དུ་བསྐྲུན་པ་དབུ་འབྱེད་གནང་ཡོད་པ་རེད།
བཀའ་ཟུར་ཀིརྟི་རིན་པོ་ཆེ་མཆོག་གིས་ཉིན་དེར་དཔེ་དེབ་དེ་དབུ་འབྱེད་གནང་ཡོད་པ་དང་། སྤྱི་ཟུར་ཧོར་གཙང་འཇིགས་མེད་ལགས་ཀྱིས་དཔེ་དེབ་དབུ་འབྱེད་ཀྱི་ངོ་སྤྲོད་གསུང་བཤད་གནང་ཡོད་པ་རེད། ཉིན་དེའི་སྐུ་མགྲོན་དུ་སྤྱི་འཐུས་རྒྱུན་ལས་རྣམ་པ་དང་། བཀའ་དྲུང་མི་འགྱུར་རྡོ་རྗེ། བཀའ་ཟུར་ཨ་ལགས་འཇིགས་མེད་བཅས་ཕེབས་ཡོད་པ་རེད།
དཔེ་དེབ་དབུ་འབྱེད་ཀྱི་ཐོག་མར་ཚང་མ་ཡར་བཞེངས་ཏེ་ཚེ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་དང་། བཙོན་འཇུག་དང་མནར་གཅོད་ཕོག་མཁན་རྣམས་ལ་སྐར་མ་གཅིག་གི་རིང་ལ་གུས་འདུད་ཞུས་ཡོད་པ་རེད།
སྤྱི་ཟུར་ཧོར་གཙང་འཇིགས་མེད་ལགས་ཀྱིས་དཔེ་དེབ་ངོ་སྤྲོད་སྐབས་གསུངས་དོན། དཔེ་དེབ་འདི་ནི་རྒྱ་ནག་གི་བཙན་གནོན་འོག་ཡོད་པའི་བོད་མི་རྣམས་ལ་ང་ཚོས་གདུང་སེམས་མཉམ་སྐྱེད་བྱེད་པ་མཚོན་ཆེད་དང་། བོད་ཀྱི་ལོ་རྒྱུས་ཁྲོད་བྱས་རྗེས་ཆེན་པོ་བཞག་པར་རྗེས་སུ་ཡི་རངས་ཞུ་ཆེད་ཡིན་ཟེར་ལ། དཔེ་དེབ་དེའི་ནང་དུ་སྐབས་བོད་མི་ཅི་ཙམ་བསད་པ་དང་། རྨས་པ། བཀག་ཉར་དང་བཙོན་འཇུག་བྱས་པ་རྣམས་ཞིབ་ཆའི་སྒོ་ནས་བྲིས་ཡོད་ལ། དངོས་ཡོད་ཀྱི་སྙན་ཐོ་འདིའི་ཐོག་ནས་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ལ་འབོད་སྐུལ་བྱས་ཏེ། ད་ཆར་བཙོན་དུ་ཡོད་པ་རྣམས་གློད་གྲོལ་དང་། རྨས་སྐྱོན་ཕོག་པ་རྣམས་ལ་སྨན་བཅོས་བྱེད་ཐུབ་པའི་རེ་བ་རྒྱག་གི་ཡོད་ཅེས་གསུངས་ཡོད་པ་རེད།
བཀའ་ཟུར་ཀིརྟི་རིན་པོ་ཆེ་མཆོག་གིས་གསུངས་དོན། བོད་ནང་གི་གཞིས་ལུས་མི་དམངས་ཀྱིས་ཞི་བའི་ངོ་རྒོལ་བྱས་པ་འདིས་རྒྱ་ནག་གིས་བོད་ནང་ནོར་འཁྲུལ་གྱི་སྲིད་བྱུས་ལག་བསྟར་བྱས་པ་རེད་བོད་མི་རྣམས་ཀྱིས་ངོ་རྒོལ་བྱེད་ཀྱིན་པ་གསལ་བོར་མཚོན་ཐུབ་ལ། བོད་མི་གནས་སྡོད་ཀྱི་མངའ་ཁུལ་གསུམ་པོའི་ནང་གི་བོད་མི་རྣམས་ཀྱིས་ངོ་རྒོལ་གྱི་ལས་འགུལ་སྤེལ་བ་འདིས་བོད་མི་རིགས་ཀྱི་ནུས་ཤུགས་དང་ཆིག་སྒྲིལ་གྱི་ངོ་བོ་མཚོན་གྱི་ཡོད་ཅེས་ཀྱང་གསུངས་ཡོད་པ་རེད།
ཁོང་གིས་བོད་མི་རིགས་ཀྱི་ལས་འགུལ་ནི་མཐའ་གཅིག་ཏུ་འཚེ་མེད་ཞི་བའི་སྟེང་འདུག་དགོས་ལ། དེ་བཞིན་ལས་འགུལ་ནི་རྒྱུན་མཐུད་ནས་གནས་པ་ཡིན་ན་ཕུགས་རྒྱང་རིང་པོའི་ཐོག་ནས་བོད་དོན་ལ་ཕན་ཐོགས་ཆེན་པོ་ཡོད་པ་རེད་ཅེས་གསུངས་བྱུང་།
བཀའ་ཟུར་ཨ་ལགས་འཇིགས་མེད་མཆོག་གིས་གསུངས་དོན། དེབ་འདི་ནི་འདས་པའི་ལོ་ ༥༠ ཙམ་གྱི་རིང་རྒྱ་ནག་གི་བཙན་གནོན་མནར་གཅོད་འོག་རང་རང་གི་ལུས་སྲོག་ལོངས་སྤྱོད་བློས་གཏོང་མཁན་རྣམས་ལ་གུས་འདུད་དང་རྗེས་སུ་ཡི་རངས་ཞུ་བ་མཚོན་བྱེད་ཙམ་ཡིན་ཅེས་དང་། ཁོང་གིས་རྒྱ་ནག་གཞུང་གིས་རྒྱལ་བ་རིན་པོ་ཆེ་མཆོག་ལ་མཚན་སྨོད་གནང་བཞིན་པ་དེ་གཞི་རྩ་མེད་པ་ཞིག་རེད་ཅེས་ཤུགས་ཆེ་སྐྱོན་བརྗོད་གནང་ཡོད་ལ། རྒྱ་ནག་གཞུང་གིས་རྒྱལ་བ་རིན་པོ་ཆེ་མཆོག་ལ་བོད་ཀྱི་གནད་དོན་གླེང་བའི་ཐོབ་ཐང་མེད་ལུགས་བཤད་ཀྱིན་པ་དེར་བོད་མི་རྣམས་ཀྱི་ངོས་ནས་ཚིག་གསལ་བོ་དང་ཤུགས་ཆེན་པོའི་སྒོ་ནས་ལན་འདེབས་བྱེད་དགོས་པ་རེད་ཅེས་གསུངས་ཡོད་པ་རེད།
