གལ་ཆེའི་གསལ་བསྒྲགས།

ཉེ་ཆར་གསར་འགྱུར་བརྒྱུད་ལམ་ཁག་ནང་གནས་ཚུལ་མུ་མཐུད་ཐོན་བཞིན་པ་ལྟར་ན། རྒྱ་ནག་ཏུ་འོ་རྩམ་ནང་ Melamine  ཞེས་པའི་རྫས་སྦྱོར་བསྲེས་ལྷད་བྱས་ཡོད་པའི་རྐྱེན་གྱིས་ད་བར་བྱིས་པ་བཞི་འཆི་སྐྱོན་དང༌། ཁྲི་ཚོ་ལྔ་ལྷག་ནད་མནར་གྱུར་ཡོད་སྐོར་རྒྱ་ནག་རང་གི་ཚགས་ཤོག་ The China Post དང༌། དེ་བཞིན་བྷི་བྷི་སཱི་དང་སཱི་ཨེན་ཨེན་སོགས་བརྙན་འཕྲིན་དང་རླུང་འཕྲིན་མང་པོའི་བརྒྱུད་ལམ་ཁག་ཏུ་གསལ་བསྒྲགས་འགྲོ་བཞིན་པ་ཡོང་གྲགས་ཡིན་པ་ལྟར། གོང་གསལ་རྫས་སྦྱོར་བསྲེས་ལྷད་ཅན་གྱི་འོ་མས་ཕྲུ་གུའི་འཕྲོད་བསྟེན་ལ་གནོད་སྐྱོན་ཚབས་ཆེ་བྱེད་ཀྱི་ཡོད་པ་སྨན་པ་དང་ཚན་རིག་བརྟག་དཔྱད་བརྒྱུད་ཤེས་རྟོགས་བྱུང་སྟེ་རྒྱ་ནག་གཞུང་ནས་འོ་མ་དེ་རིགས་གནས་སྐབས་བཟོ་འདོན་མི་ཆོག་པའི་བཀའ་ཁྱབ་བཏང་ཡོད་འདུག་རུང༌། བོད་ཀྱི་ས་ཁུལ་གང་སར་ཁྲོམ་རའི་ནང་འོ་རྩམ་དེ་རིགས་ཉོ་ཚོང་ཆེད་བསླེབས་ཡོད་ངེས་ལ་བོད་མི་རྣམས་ནས་དོ་སྣང་དང་སྐྱོན་གནད་ཤེས་པ་བྱ་རྒྱུ་ཧ་ཅང་གལ་ཆེ་བ་མ་ཟད། རྒྱུན་དུ་ཟ་དངོས་དེ་རིགས་ལ་དོགས་ཟོན་དང་དོ་སྣང་ཡིད་གཟབ་བྱ་དགོས་པ་དང་ཁྲོམ་རར་ཉོ་ཚོང་བྱ་རྒྱུའང་མཚམས་འཇོག་ངེས་པར་བྱ་དགོས།
རང་རེའི་བཙན་བྱོལ་བོད་མིའི་སྤྱི་ཚོགས་སྤྱི་དང་ལྷག་པར་དུ་སློབ་གྲྭ་ཁག་ནང་འོ་མ་བྱི་རིལ་གྱིས་གཙོ་གྱུར་རྒྱ་ནག་ནས་ཐོན་པའི་ཟ་དངོས་མང་དག་ཅིག་བེད་སྤྱོད་བྱེད་བཞིན་མངར་བྲོ་བར་རྔམ་ན་ནམ་ཞིག་གཅེས་པའི་སྲོག་དང་བྲལ་ཉེན་ཡོད་པས་སློབ་གྲྭའི་འཛིན་སྐྱོང་དང་དགེ་རྒན་ཕ་མ་ཐུན་མོང་མཉམ་རུབ་ཐོག་ནས་དོ་འཁུར་དགོངས་པ་ཟབ་བཞེས་དགོས་པ་བཅས་ཀྱི་གསལ་བསྒྲགས་སུ།
བཙན་བྱོལ་བོད་གཞུང་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༠༨ ཟླ་ ༡༠ ཚེས་ ༣ ལ།