མཐའ་གཅིག་ལ་ལྷུང་འདུག

བོད་ཀྱི་དུས་བབ་སྤྱིའི་འདོན་ཐེངས་ ༤༢༨ པའི་སྟེང་གི་རྩོམ་སྒྲིག་པའི་གཏམ།

ཉིན་འདི་དག་གི་རིང་ངྷ་སའི་རི་ངོགས་འདི་རྩོད་པར་ཞུགས་བསྡད་འདུག རླུང་འཕྲིན་དང་ཁ་པར། དེ་བཞིན་དྲ་ངོས་སུའང་གཅིག་མཚུངས་རེད། ངའང་ཁོར་ཡུག་འདི་གཉིས་ཀའི་ནང་དུ་འཚང་བ་ཡིན། རང་ཉིད་ཀྱིས་མཐོང་བའི་གནས་ལུགས་ཆུང་ཆུང་ཞིག་གླེང་རྩིས་བྱས་ཤིང་། ངས་གནས་ལུགས་ཆུང་ཆུང་དེ་གནད་དོན་ཆེན་པོ་ཞིག་གི་ངོར་བཞག་ནས་བཤད།

དགོང་མོ་དེར་ངས་བོད་གཞུང་ཟློས་གར་ཁང་ནས་རང་དབང་གི་ཁོར་ཡུག་དེ་བཤད། དེའི་རྗེས་ནས་བཟུང་ངས་མུ་མཐུད་དུ་བཤད། ངས་རང་དབང་གི་ཁོར་ཡུག་དེ་ཁ་སང་དེ་རིང་ལྷག་པར་དུ་བསྣུབ་ཀྱིན་པའི་སྐོར་བཤད། བོད་མི་རིགས་ཀྱི་མངོན་འདོད་གླེང་བའི་སྐབས་སུ། རང་དབང་གི་ཁོར་ཡུག་འདི་ལས་གཡོལ་ས་མི་འདུག བོད་མི་རིགས་ཀྱིས་ཀྱང་རང་དབང་གི་ཁོར་ཡུག་འདིའི་ཆེད་དུ་རང་བཙན་རྩོད་སྲིད་གི་རེད་ལ། རང་སྐྱོང་ཡང་རྩོད་སྲིད་པ་རེད། ག་ཚོད་ཅིག་བརྩད་ཐུབ་མིན་གྱི་སྟེང་ནས་རང་དབང་གི་ཆེ་ཆུང་དེ་འཐོབ་གི་རེད། རྦད་དེ་རྩོད་མ་ཐུབ་ཚེ་རང་དབང་ཡོངས་སུ་ཤོར་འགྲོ་གི་རེད། ཡིན་ནའང་མི་རིགས་ཤིག་ལ་རང་དབང་རྩ་ནས་མེད་པ་ཡིན་ན་མི་རིགས་དེ་དུས་ཡུན་ཅི་ཙམ་ཞིག་ལ་གནས་ཐུབ་གི་རེད། ངས་འདི་ལྟར་དོགས་སེལ་གྱི་སྣེ་ལ་དྲི་བ་བཏགས་ནས་ཀྱང་བཤད།

ང་ཚོས་རང་བཙན་རྩོད་གི་ཡིན་ལབ་ན་ལོན་འདུག་མི་ཤེས། ང་ཚོར་རང་སྐྱོང་ཞིག་སྤྲོད་རོགས་གནང་ལབ་ན་སྟེར་འདུག་མི་ཤེས། ད་སྐབས་མི་མང་པོ་ཞིག་གིས་དམིགས་བསལ་ཚོགས་ཆེན་གྱི་ཐོག་ལ་རྩོད་པ་འདི་འདྲ་ཞིག་འཕེན་གི་འདུག མཐའ་མར་ཐེ་ཚོམ་འདི་གཉིས་འཁྱེར་ནས་ཚོགས་ཞུགས་བྱེད་གི་རེད། འོན་ཀྱང་བཤད་རྒྱུ་ཞིག་ལ། ལོ་འདིའི་ཚོགས་ཆེན་ནི་རང་བཙན་དང་དབུ་མའི་ལམ་གྱི་གང་འོས་ཐོག་ལ་འཚོགས་གི་ཡོད་པ་མ་རེད། དབུ་མའི་ལམ་གྱི་ཐོག་མའི་གོ་དོན་དང་བཀའ་ཁྲིའི་དབུ་མའི་ལམ་གྱི་གོ་དོན་གཉིས་ཀྱི་ཐོག་ལ་འཚོགས་གི་རེད། གོ་བསྡུར་ཅེས་པ་ཡང་དབུ་མའི་ལམ་གྱི་གོ་བ་ལེན་སྟངས་འདི་གཉིས་བསྡུར་གི་རེད། ངས་འདི་ལྟར་རྩོད་པ་ཆེན་པོ་དག་གི་ཕ་རོལ་ལ་ཡིབ་བསྡད་པའི་འགལ་བ་གཞན་པ་དེ་བཤད།

ངས་སླར་ཡང་རང་དབང་གི་ཁོར་ཡུག་དེ་བཤད་དགོས་བྱུང་། དབུ་མའི་ལམ་གྱི་ཐོག་མའི་གོ་དོན་གྱི་ནང་དུ་བོད་མིའི་རང་དབང་གི་ཁོར་ཡུག་དེ་ཡོད་པ་རེད། བཀའ་ཁྲི་མཆོག་གིས་གསུང་གིན་པའི་ད་ལྟའི་དབུ་མའི་ལམ་གྱི་སྲིད་བྱུས་འདིའི་ནང་དུ་རང་སྐྱོང་གི་མིང་ཙམ་ཡོད་ཀྱང་རང་དབང་གི་ཁོར་ཡུག་ཆེན་པོ་དེ་མི་འདུག རྒྱ་རི་རིན་པོ་ཆེས་ཀྱང་རང་དབང་གི་ཁོར་ཡུག་འདི་ཕར་གཡུག་ནས་སྐད་ཆ་བཤད་གི་ཡོད། ད་དུང་ཁོར་ཡུག་འདི་འདྲ་ཞིག་དགོས་ཞེས་རྒྱལ་བ་རིན་པོ་ཆེས་གཏན་ནས་གསུང་མྱོང་མེད་སྟབས། རྒྱ་ནག་གིས་སྐུ་མདུན་གྱི་གསུང་ལ་ལོག་འགྲེལ་རྒྱག་གི་འདུག་ཅེས་རྒྱལ་སྤྱིའི་སྤྱི་ཚོགས་ལ་བསྒྲགས་གི་ཡོད།

རྒྱ་ནག་གིས་ཀྱང་རང་དབང་གི་ཁོར་ཡུག་འདི་འདྲ་ཞིག་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་ནས་སྟེར་ཐབས་མེད་ལ། མ་གཞི་རང་དབང་གི་ཁོར་ཡུག་འདི་བཤད་གི་ཡོད་དུས། ཀྲུང་གོའི་རྩ་ཁྲིམས་ལ་འགལ་བ་མ་ཟད། འགྲོ་བ་མིའི་གཞི་རྩའི་ཐོབ་ཐང་ལ་ཡང་འགལ་བ་རེད། ཅེས་རྩོད་པ་རྒྱག་གི་འདུག

རང་དབང་གི་ཁོར་ཡུག་འདིའི་ནང་དུ་བོད་ཀྱི་ཕྱི་སྲིད་དང་ནང་སྲིད་གཉིས་དབྱེ་ནས་གསུངས་ཡོད། བོད་འདི་འཛམ་གླིང་ཡང་སྟེང་གི་ཞི་བདེའི་བསྟི་གནས་ཤིག་ལ་བསྐྲུན་རྒྱུ་བསྟན་ཡོད། བོད་ཆོལ་ཁ་གསུམ་གཅིག་ཏུ་སྒྲིལ་བའི་ཚད་མཐོའི་རང་སྲིད་རང་སྐྱོང་ཞིག་བཤད་ཡོད། བཀའ་ཁྲི་མཆོག་གིས་རང་དབང་འདི་ནི་ད་ལྟའི་ཧོང་ཀོང་གི་རང་སྐྱོང་ལས་ལྡབ་ ༢༠ ཆེ་བ་ཡོད་སྐོར་གསུངས་མྱོང་།

འོན་ཀྱང་། ད་ནི་ཅི་བཤད་ཏང་གི་བཀའ་རེད། འདིའི་དབང་གིས། གནའ་སྔ་མོར་བཤད་པའི་དབུ་མའི་ལམ་གྱི་གཉིས་ཕན་ཅེས་པ་དང་། མཐའ་གཉིས་སུ་མ་ལྷུང་བ་ཞེས་པའི་གོ་དོན་ཡོད་པའི་དབུ་མའི་ལམ་དེ་ད་ཆར་མཐའ་གཅིག་ལ་ལྷུང་བསྡད་འདུག་ཅེས་བཤད་གི་ཡོད་དོ།།