མི་ཆུང་སེམས་དཀར་གྱི་ཞུ་བ།

ཚོགས་ཐོག་ཏུ་ཕུལ་བའི་བསམ་འཆར།

༄༅། །ལུགས་གཉིས་མཁྱེན་དཔྱོད་ཀྱི་བདག་ཉིད། ལོ་རྒྱུས་རང་བཞིན་ལྡན་པའི་བཙན་བྱོལ་བོད་མིའི་དམིགས་བསལ་ཚོགས་ཆེན་གྱི་ཚོགས་ཞུགས་པ་ཡོངས་ཀྱི་མདུན་སར།
ཐོག་མར་ད་ལོ་གཞིས་ལུས་བོད་མི་རྣམས་ཀྱིས་༼བོད་མིའི་སྐྱིད་སྡུག་མཉམ་མྱོང་༽ཞེས་པའི་དོན་སྙིང་ལྡན་པའི་འབོད་ཚིག་འདིས་སྣེ་དྲངས་སྟེ། དེ་རིང་བོད་བསྟན་སྲིད་མི་རིགས་དང་བཅས་པའི་འཇིག་ཉེན་འགག་འཕྲང་གི་དུས་པོ་ཆེ་འདིར་དམིགས་བསལ་ཚོགས་ཆེན་ཐོག་ཐུགས་འགན་ཆེ་བཞེས་ཀྱིས་ཆེད་ཕེབས་གནང་མཁན་རྣམ་པར་འཚམས་འདྲི་དང༌། གཞིས་ལུས་བོད་མི་ཡོངས་ལ་གདུང་སེམས་མཉམ་བསྐྱེད་ཀྱིས་སྐབས་དོན་སྙན་གསན་ཞུ་རྒྱུར།
ད་ལན་གྱི་༼ཚོགས་ཆེན་ནང་འདི་ལོ་བོད་ནང་བྱུང་བའི་རླབས་ཆེན་གྱི་ལས་འགུལ་ཁག་དང༌། དེ་འབྲེལ་རྒྱལ་སྤྱིའི་གནས་བབ། ད་ལྟའི་རྒྱ་ནག་གཞུང་གི་བྱེད་ཕྱོགས་བཅས་དངོས་ཡོད་གནས་ཚུལ་རྣམས་གཞི་རྩར་བཞག་སྟེ་འབྱུང༵་འགྱུར༵་བོད༵་མིའི༵་རྩ༵་དོན༵་སྒྲུབ༵་ཕྱོག༵ས་ཁྱོན་ཡོངས་ཀྱི་གནས་ཚུལ་ཐོག་འཕྲལ་ཕུགས་རྒྱང་གསུམ་གྱི་བསམ་བློ་བཏང་སྟེ་ཚོགས་མི་ཚང་མས་བོད་ཀྱི་ཡུལ་མིའམ་སྤྱི་འབངས་གཅིག་གྱུར་ཡིན་པའི་གནས་བབ་ཀྱིས་འདྲ་མཉམ་དང༌། ཕྱར་གྲུ་མཉམ་འདེགས། ཁུར་མཉམ་ལེན་གྱི་སྒོ་ནས་གང་དགའ་ཅི་ལེགས་ཀྱི་གོ་བསྡུར་ལྷུག་པོ་བྱེད་དགོས་པ་དང༌། དེ་ཡང་དེང་རབས་སྲིད་དོན་ཚོགས་པ་ཁག་གི་ཆབ་སྲིད་ལྟ་གྲུབ་མཁྲེགས་འཛིན་གྱིས་རྩོད་གླེང་བྱེད་པ་ལྟ་བུ་མ་ཡིན་པར་མང་ཚོགས་ཀྱི་བསམ་འཆར་ངོ་མ་ལྷད་མེད་ཚོགས་ཆེན་གྱི་སྡིངས་ཆའི་ཐོག་གསལ་འདོན་བྱེད་དགོས། དེའི་ཐད་ཚང་མས་འབད་རྩོལ་བྱ་རྒྱུར་ངས་རེ་སྐུལ་ཆེན་པོ་བྱེད་ཀྱི་ཡོད།
དམིགས་བསལ་ཚོགས་ཆེན་འདི་ནི་གོ་བསྡུར་སྦྱངས་བཤད་ཞིབ་ལྷུག་བྱས་པའི་ལམ་ནས་གཞི་རིམ་མང་ཚོགས་ཀྱི་བསམ་ཚུལ་ངོ་མ་ཇི་ཡིན་ཤེས་རྟོགས་ཡོང་ཐབས་ཁོ་ནའི་ཆེད་དུ་ཡིན་པ་ལས་ཆབ་སྲིད་ཀྱི་ཐབས་བྱུས་སམ་ཁག་དཀྲི་བྱེད་ཡུལ་ལྟ་བུའམ། ཡང་ན་ངེས་ཅན་གྱི་གྲུབ་དོན་གཅིག་གི་ཐོག་འབབ་རེ་བྱེད་པའི་མངོན་པར་མི་གསལ་བའི་དམིགས་ཡུལ་ཡོད་པ་ཞིག་གཏན་ནས་མིན་༽ཞེས་བཀའ་གསུང་སྤྱི་ཕེབས་ལྟར་ང་རང་བོད་མི་མང་སྤྱི་འཐུས་ཤིག་ཡིན་པའི་ཆ་ནས་ཚོགས་ཐོག་འདིར་རྒྱ་ཆེའི་གཞི་རིམ་མང་ཚོགས་ཀྱི་བསམ་ཚུལ་ཇི་ཡིན་བཤད་པ་ལ་འགོག་རྐྱེན་དང༌། གནོན་ཤུགས། རང་འདོད་ཀྱིས་འགྲེལ་བརྗོད་བྱས་ཏེ་ཉ་ཉུང་མཉམ་བསྲེ་ལྟ་བུའི་གཏམ་བཤད་རིང་པོ་གང་ཡང་བྱ་འཆར་མེད་ཀྱང༌། ཅི་ཡང་མི་སྨྲ་བའི་རྟུལ་ཞུགས་བཟུང་ན་ཡང་འགྲིག་ཐབས་མེད་པ་སོང༌། དུས་ཚོད་ཆུད་ཟོས་སུ་མི་འགྲོ་བ་དང༌། སྐབས་དོན་གསལ་རྟོགས་ཡོང་ཆེད་རང་ངོས་ནས་བསམ་འཆར་ཇི་ཡོད་ཡིག་ཐོག་ནས་འབུལ་ལམ་ཞུ་བཞིན་ཡོད།

༡༽ རྒྱ་དམར་སྲིད་གཞུང་གིས་ད་བར་མི་ལོ་བཅུ་ཕྲག་ལྔ་མ་ཟིན་ཙམ་གྱི་རིང་བོད་ཐོག་འཛིན་བཞིན་པའི་སྲིད་བྱུས་འདི་ཉིད་ནོར་འཁྲུལ་ཅན་ཞིག་ཡིན་པའི་བདེན་དཔང་ད་ལོ་གཞིས་ལུས་ཆོལ་གསུམ་བོད་མི་རྣམས་ཀྱིས་ལུས་སྲོག་ལོངས་སྤྱོད་དང་བཅས་པ་བློས་བཏང་ནས་གཞི་རྒྱ་ཆེ་ལ་དོན་སྙིང་ལྡན་པའི་རླབས་ཆེན་གྱི་ལས་འགུལ་རྒྱ་ཆེ་སྤེལ་གནང་བ་འདིས་རྒྱལ་སྤྱིའི་ཐོག་ཕྱི་གསལ་ནང་གསལ་བྱས་ཟིན་པ་ཞིག་ཡིན་པས། གཞིས་བྱེས་བོད་མི་ཡོངས་ཀྱི་སྐུ་ཚབ་མཚོན་པའི་བཙན་བྱོལ་བོད་གཞུང་མང་ཡོངས་རྫོགས་རྡོག་རྩ་གཅིག་སྒྲིལ་གྱིས་ད་ནས་བཟུང་ད་ལྟའི་རྒྱ་ནག་གི་བོད་ཐོག་འཛིན་པའི་སྲིད་བྱུས་ལ་འགྱུར་བ་གཏང་དགོས་པའི་གཞི་རྒྱ་ཆེ་བའི་ལས་འགུལ་འདྲ་མིན་སྤེལ་དགོས་རྒྱུ།

༢༽ རྒྱལ་སྤྱིའི་གནས་བབ་དང་དུས་རབས་ཀྱི་འགྱུར་འགྲོས་གང་ལ་ལྟོས་ཀྱང་སྤྱི་ཚོགས་ཕན་ཚུན་གྱི་འགལ་ཟླ་བསལ་ཐབས་ནི་གྲོས་མོལ་བྱས་པ་ལས་ལྷག་མེད་ཀྱང༌། ང་ཚོའི་ཁ་གཏད་དུ་ཡོད་པའི་ངོ་ཚ་ཁྲེལ་གཞུང་མེད་པའི་རྒྱ་དམར་སྲིད་གཞུང་གིས་བྱབྱཀྲུང་དབྱང་གིས་ཏཱ་ལའི་བླ་མར་འཛིན་པའི་སྲིད་ཇུས་ནི་སྔ་ཕྱི་བར་གསུམ་གང་ཞིག་ཡིན་ཡང་འགྱུར་མེད་ཁ་གསལ་ཡིན།བྱབྱ ཞེས་ཐ་ཚིག་ཡང་ཡང་བསྒྲགས་དང་སྒྲོག་བཞིན་པར་བརྟེན། ང་ཚོས་ཀྱང་རྒྱ་ནག་དང་འབྲེལ་གཏུགས་བྱ་རྒྱུའི་གོ་སྐབས་གང་རྙེད་ལ་དེ་དང་བསྟུན་པའི་བརྡ་ལན་ནན་པོ་ཞིག་སྤྲད་དེ། བོད་ཀྱི་གནད་དོན་གཙང་སེལ་མ་བྱུང་བ་འདིའི་ངན་ཁག་རྒྱ་ནག་སྲིད་གཞུང་ལ་ཡོད་པ་དེ་དངོས་འབྲེལ་ལ་སོང༌། རྒྱ་ནག་གི་ཆེས་མཐོའི་དཔོན་རིགས་ཚོའི་མཐོང་ས་དང༌། ཐོས་ས་ལ་སྐྱེལ་ཐུབ་པ་ཞིག་བྱས་ནས་རྒྱལ་སྤྱིའི་ཐོག་ཁ་ཡོད་ལག་ཡོད་ཀྱི་ཁུངས་སྐྱེལ་ར་སྤྲོད་འཕེར་བ་ཞིག་བཟོ་དགོས་རྒྱུ་དང༌། ང་ཚོས་ལྷག་བསམ་རྣམ་དག་ཇི་ལྟར་བྱས་ཀྱང་རྒྱ་གཞུང་གིས་ཚུལ་མཐུན་ཡ་ལན་རྩ་བ་ནས་བྱས་མེད་པ་མ་ཟད། ྋགོང་ས་མཆོག་ལ་མཚན་སྨད་སྐུར་འདེབས་དང༌། གཞིས་ལུས་བོད་མི་རྣམས་ལ་དམྱལ་བ་མི་ཡུལ་དུ་འཕོས་པ་ལྟ་བུའི་མི་སྤྱོད་ལས་འདས་པའི་གསོད་བརྡུང་མནར་གཅོད་བྱས་དང་བྱེད་བཞིན་པ་ས་རིས་ཐང་གསལ་ཡིན་ནའང༌། ད་དུང་རྒྱལ་སྤྱིའི་ཁྱོན་དུ་སྡིག་པ་མིག་བཙུམ་གྱིས་འཁྱོག་བཤད་མུ་མཐུད་བྱེད་བཞིན་པར་ལྟོས་ཏེ་ང་ཚོས་ཀྱང་རྔ་རྡུང་ལ་དཔག་པའི་འཆམ་ངོ་མ་དེ་རྒྱ་ནག་གི་མདུན་སར་འཁྲབ་དགོས་པས་བོད་རྒྱ་གྲོས་མོལ་གྱི་ཐབས་ལམ་ལ་འགྱུར་བ་ངེས་ཅན་ཞིག་གཏང་དགོས་པར་སྙམ།

༣༽ ༡༩༧༩ ནས་བཟུང་ཏིང་ཞའོ་ཕིང་གིས་བྱབྱྋགོང་སྋསྐྱབས་མགོན་ཆེན་པོ་མཆོག་ནས་བོད་ཀྱི་རང་བཙན་རྩོད་གླེང་མ་གནང་ན། དེ་མིན་གྱི་གནད་དོན་ཐམས་ཅད་གྲོས་མོལ་གྱི་ལམ་ནས་ཐག་གཅོད་གནང་ཆོག་བྱབྱཅེས་གྲོས་འགོ་བཏོན་པ་དེ་ཉིད་ཕྱིས་སུ་རྒྱ་གཞུང་འབྲེལ་ཡོད་ཁག་འགའ་ནས་བེད་སྤྱོད་བཏང་མྱོང་ཡོད་ལ། ང་ཚོས་ཀྱང་འདེང་འཇོག་ཆེན་པོ་བྱས་ཏེ་ད་བར་ཞལ་འདོན་སྐྱོར་སྐྱོར་བྱེད་བཞིན་ཡོད་ཀྱང༌། ཉེ་ཆར་བོད་རྒྱ་འབྲེལ་མོལ་ཐེངས་བརྒྱད་པའི་རྗེས་ཕྱི་ཟླ་ ༡༡ ཚེས་ ༡༠ ཉིན་རྒྱ་ནག་གི་རྒྱལ་སྲིད་སྤྱི་ཁྱབ་ཁང་གསར་འགྱུར་སྡེ་ཚན་ནས་ཆེད་དུ་གཉེར་བའི་གསར་འགོད་ལྷན་ཚོགས་ཐོག རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་རྒྱུན་ལས་གཙོ་འཛིན་གཞོན་པ་ཀྲུའུ་ཝེ་ཆོན་གྱིས་ཏིང་ཞའོ་ཕིང་གིས་སྐད་ཆ་དེ་འདྲ་ཞིག་བཤད་མྱོང་མེད་ལ། དེ་ནི་ཏིང་ཞའོ་ཕིང་གི་གསུང་བཤད་ལ་འཁྱོད་བརྗོད་དང༌། གལ་སྲིད་སུས་རླབས་ཆེན་གྱི་རྒྱལ་གཅེས་པ་ཏིང་ཞའོ་ཕིང་གི་གསུང་བཤད་ཁྲོད་ཁ་བྲལ་རིང་ལུགས་ཀྱི་ལས་འགུལ་སྤེལ་བར་མཁོ་བའི་ཚིག་རེ་གཉིས་བསྒྲུབ་ཐབས་བྱས་ན། དེ་ནི་ལྐུགས་པ་ལྐུགས་རྐྱང་རེད། ཅེས་བཤད་འདུག་པ་མ་ཟད། ༢༠༠༦ ལོར་ཁོས་ཏིང་ཞའོ་ཕིང་གིས་བཤད་པ་རྣམས་ཤེས་རྟོགས་མེད་ཚུལ་ཞིག་ཀྱང་བཤད་ཡོད་འདུག་པས་ང་ཚོས་ཀྱང་མ་ཐོས་མ་ཚོར་ཁུལ་མིན་པར་ཤ་ཡིན་ན་ཟ་ཐག་ཆོད་པ་ཞིག་དང༌། རུས་པ་ཡིན་ན་གཡུག་ཐག་ཆོད་པ་ཞིག་བྱས་ཏེ་མུ་མཐུད་ནས་ཚིག་གཞི་འདི་ཉིད་བེད་སྤྱོད་གཏང་ས་ཡོད་མེད་ཀྱི་འཁྲུན་ཐག་ཆོད་པ་ཞིག་དགོས་འདུག

༤༽ ད་བར་མི་ལོ་སུམ་ཅུ་མ་ཟིན་ཙམ་གྱི་རིང་རང་ཕྱོགས་ནས་སྐུ་ཚབ་སྔ་ཕྱི་མངགས་བཏང་གིས་མ་ལན་མ་འགྱོད་མེད་པའི་ཚུལ་གྱིས་རྒྱ་གཞུང་དང་འབྲེལ་ལམ་བྱས་ཀྱང༌། དོན་དམ་གྱི་གྲུབ་འབྲས་གང་ཡང་སོན་མེད་པ་སོང༌། གཞིས་བྱེས་བོད་མི་ཡོངས་ཀྱི་རེ་འདོད་ནི་ྋགོང་ས་ྋསྐྱབས་མགོན་ཆེན་པོ་མཆོག་བོད་དུ་ཆིབས་བསྒྱུར་གནང་ནས་གཞིས་བྱེས་མཉམ་འཛོམས་ཡོང་ཐབས་ཉག་ཅིག་ཡིན་པ་སུས་ཀྱང་བསྙོན་དུ་མེད་པ་ཞིག་ཡིན་པས་ད་ནི་སྐུ་ཚབ་དང་གསུང་ཚབ་པ་སོགས་མིན་པར་ྋགོང་ས་མཆོག་སྐུ་དངོས་རབ་བྱུང་ན་བོད་ནང་དང༌། དེ་མིན་རྒྱ་ནག་ལ་གདན་འདྲེན་ཞུས་ནས་རྒྱ་ནག་གི་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་དང་ཐད་ཀར་བཀའ་མོལ་གནང་ཐུབ་པའི་ཐབས་ཤེས་ཡོད་རྒུ་རྩལ་སྤྲུགས་གནང་དགོས་པ་གལ་ཆེའི་ནང་གི་དོན་ཆེ་རུ་མཐོང༌།

༥༽ རྒྱལ་ཁབ་གཅིག་དང་མི་རིགས་ཤིག་གི་རང་དབང་འཐབ་རྩོད་ནི་ལོ་རྡོག་རེ་ཟུང་ནང་སེལ་ཐུབ་པ་ཞིག་མིན་ཞིང༌། གཞིས་ལུས་བོད་མི་རྣམས་ཀྱིས་རེ་བའི་མིག་འབུར་གཏོད་ས་ནི་རང་དབང་ལུང་པའི་ནང་གནས་འཁོད་བཙན་བྱོལ་བོད་མི་རྣམས་ཡིན་པས་ང་ཚོས་རང་གིས་རང་ལ་རྩིས་ཤིག་བརྒྱབ་ནས། མ་འོངས་པར་རང་ཡུལ་རང་བདག་བྱུང་ཚེ་མི་རེའི་འགན་རེ་ཁུར་ཐུབ་པའི་དམ་བཅའ་བརྟན་བཟུང་གིས་ཉེ་ཆར་ྋགོང་ས་ྋསྐྱབས་མགོན་ཆེན་པོ་མཆོག་གིས་བུ་ཁྱིམ་མཛད་སྒོར་ཤེས་ཡོན་སྐོར་བཀའ་སློབ་བསྩལ་གནང་མཛད་པ་བཞིན། བོད་གངས་ཅན་པའི་ཐུན་མིན་གྱི་ཁྱད་ནོར་སྤྱི་དང༌། བྱེ་བྲག་བོད་རྒྱ་གཉིས་ཀྱི་ཆབ་སྲིད་ཀྱི་གནད་དོན་སོགས་དེང་རབས་ཀྱི་དགོས་མཁོ་དང་བསྟུན་པའི་ཆེད་མཁས་མི་སྣ་ན་གཞོན་འདབ་གཤོག་གཉིས་ལྡན་ཁ་ཡོད་ལག་ཡོད་ཅན་གང་མང་བདག་སྐྱོང་ཐུབ་པའི་འབད་བརྩོན་དགོས་རྒྱུ།

༦༽ ད་བར་གཞིས་བྱེས་བོད་མི་རྣམས་ཀྱི་བློ་སེམས་གཅིག་ཏུ་སྒྲིལ་ཐུབ་པའི་འགག་རྩ་དང༌། བོད་དོན་གྱི་ཚེ་སྲོག་གསོ་བའི་ནུས་པ་རླབས་ཆེ་ཤོས་ཤིག་ནི་ྋགོང་ས་ྋསྐྱབས་མགོན་ཆེན་པོ་མཆོག་གིས་དབུས་པའི་ཆོས་བརྒྱུད་ཆེན་པོ་བཞི་དང༌། གཡུང་དྲུང་བོན་བཅས་པའི་དབུ་ཁྲིད་བླ་ཆེན་དང༌། མཁན་བླ་འདུས་མང་རྣམས་ཀྱིས་འདོན་ཐུབ་ཡོད་པ་ཉི་ཤར་སྦར་མོས་འགེབས་ཐབས་མེད་པ་ཞིག་ལ་སོང༌། རྒྱ་དམར་ཆོས་མེད་རིང་ལུགས་པས་སྤེལ་བའི་རྒྱལ་གཅེས་ཆོས་གཅེས་ཀྱི་ལས་འགུལ་ཟེར་བ་སོགས་ནི་དོན་དངོས་ཆོས་ལུགས་དང༌། མི་རིགས་ཁ་བྲལ་གཏོང་བའི་ལག་ཆ་ཡོད་ན་མེད་ན་ཞིག་ཡིན་པས་ང་ཚོས་སྔར་ལས་ལྷག་པའི་སྒོ་ནས་ཆོས་རིག་གསོན་གནས་ཐུབ་པའི་དམ་བཅའ་བརྟན་བཟུང་དགོས་རྒྱུ།

༧༽ ཚོགས་ལ་ཉེ་བའི་ཡོ་རོབ་གྲོས་ཚོགས་ཀྱིས་གཙོས་རྒྱལ་སྤྱིའི་ཚོགས་སྡེ་ཁག་དང༌། བོད་དོན་རྒྱབ་སྐྱོར་ཚོགས་པ་རྣམས་སུ་ད་བོད་རྒྱ་འབྲེལ་མོལ་ལ་དོན་དམ་གྱི་གྲུབ་འབྲས་སོན་མེད་པ་གསལ་སྟོན་གྱི་གང་མགྱོགས་ྋགོང་ས་མཆོག་བོད་དང༌། རྒྱ་ནག་ལ་ཕེབས་ཐུབ་པའི་མཐུན་འགྱུར་རྒྱབ་སྐྱོར་དང༌། རྒྱ་གཞུང་ལ་གནོན་ཤུགས་ཡོང་བའི་རེ་སྐུལ་ཚོགས་ཐོག་འདི་ནས་ཞུ་ཐུབ་པ་དགོས་རྒྱུ་མ་ཟད། དེ་དོན་དང་འབྲེལ་བའི་ལངས་ཕྱོགས་བརྟན་བཟུང་གིས་ལས་འགུལ་སྤེལ་དགོས་རྒྱུ།

༨༽ རྒྱ་བོད་གཉིས་སྨན་དབུ་མའི་ལམ་གྱི་དགོངས་དོན་ཇི་ཡིན་ད་ཚོད་རྒྱ་གཞུང་གིས་ཤེས་ཚོད་ཡིན་ལ། དོན་དངོས་ཤེས་རྟོགས་ཡོད་མེད་ཅི་ལྟར་ཡང༌། བོད་རང་བཙན་དང༌། ཕྱེད་རང་བཙན། རྣམ་པ་འགྱུར་བའི་རང་བཙན་སོགས་ཀྱི་མིང་འདོགས་འདྲ་མིན་ལ་ཁག་དཀྲིས་ཏེ་ཉི་མ་ཕུད་ཐབས་ཁོ་ན་ལས་བོད་རྒྱའི་དཀའ་རྙོག་སེལ་ཐབས་ལ་ལྷག་བསམ་རྣམ་དག་མེད་པ་དངོས་འབྲེལ་ལགས་ན། མ་འོངས་པར་རང་སྲིད་རང་སྐྱོང་དང༌། རང་ཐག་རང་གཅོད། རང་བཙན་གཙང་མ། དེ་ལས་གཞན་པ་སོགས་གང་གི་ཐོག་ནས་བསྐྱོད་དགོས་ཀྱང་ཁ་ཡོད་ལག་ཡོད་ཀྱི་འབབ་ས་ཡོད་པའི་འཆར་གཞི་འདི་རེད་བསམ་པ་ཞིག་ཚོགས་ཞུགས་མཁན་སུ་ལ་བཤད་རྒྱུ་ཡོད་ན་གསལ་སྟོན་གནང་རོགས་ཞུ་རྒྱུ་དང༌། བཙན་བྱོལ་བོད་མིའི་མང་གཙོའི་སྤྱི་ཚོགས་ཁྲོད་ཀྱི་ཕན་ཚུན་ཆབ་སྲིད་ཀྱི་ལངས་ཕྱོགས་མཐུན་མིན་ཙམ་ལ་བསྙད་དེ། རང་རིགས་བོད་མི་སྲིད་དོན་པ་ཁག་ཅིག་གི་གོ་སྐབས་གང་རེག་ལ་ཁ་སུ་བདེ་དང་ལྕེ་སུ་རྣོ། གཞུང་མང་ཕན་ཚུན་དབར་སྐྱོན་བརྗོད་བྱས་ནས་བསྡད་པས་ཕན་ཐོགས་གང་ཡང་མེད་ལ། ནང་ཁུལ་འགལ་ཟླ་དང་འཐབ་རྩོད་བྱེད་པའི་དུས་ཚོད་ཤིག་མིན་ཅིང༌། གཞུང་མང་རྡོག་རྩ་གཅིག་སྒྲིལ་གྱིས་འཐབ་རྩོད་བྱེད་ཡུལ་ནི་རྒྱ་ནག་གཞུང་ཡིན་པ་ཀུན་ལ་གསལ་འདེབས་ཞུ་རྒྱུ་བཅས།

མཐའ་དོན་གཞིས་བྱེས་བོད་མི་ཡོངས་ཀྱི་རེ་དོན་ཚོགས་ཆེན་འདི་ལ་བཅོལ་ཡོད་པས་ཁ་ཡོད་ལག་ཡོད་ཀྱི་གྲུབ་འབྲས་སོན་པ་ཞིག་མ་བྱུང་ཚེ་ལྷག་བསམ་དང་སྙིང་སྟོབས་ཞུམ་པ་མེད་པའི་གཞིས་ལུས་བོད་མི་རྣམས་ཀྱི་མདུན་སར་ངོ་གནོང་དགོས་པ་ཞིག་དང༌། རྒྱ་དམར་སྲིད་གཞུང་གི་རེ་ཐོག་ལ་རྟ་རྒྱུག་པ་ལྟ་བུ་ཆགས་ཉེན་ཡོད་པས་ཚོགས་ཞུགས་བ་ཡོངས་གྱིས་དེ་དོན་ལ་དགོངས་དཀྱེལ་ཆེ་བཞེས་གནང་སྐྱོང་ཡོང་བའི་རེ་སྐུལ་མི་ཆུང་སེམས་དཀར་གྱི་ཚུལ་དུ་ཞུ་བཞིན་ལགས་པས་དགོངས་དབྱིངས་ནས་ཐུགས་འགལ་མེད་པ་ཞུ།

སྐབས་བཅུ་བཞི་པའི་བོད་མི་མང་གཡུང་དྲུང་བོན་གྱི་སྤྱི་འཐུས་དགེ་བཤེས་སྨོན་ལམ་མཐར་ཕྱིན་པས།
ཕྱི་ལོ་ ༢༠༠༨ ཟླ་ ༡༡ ཚེས་ ༡༧ ཉིན་གུས་ཕུལ།།