མཚོ་སྔོན་པོའི་ཁ་ཡི་ཉ་འཛིན་པ་དང་ས་གནས་འབྲོག་པ་མང་ཚོགས་ཀྱི་བར་འགལ་ཟླ་བྱུང་བར་བརྟེན། སྲིད་གཞུང་གིས་སྲིད་ཇུས་གསར་བ་ཞིག་གཏན་ལ་ཕབ་ནས་འབྲོག་པ་རྣམས་གནས་སྤོར་དགོས་པའི་བཀའ་བཏང་ཡོད་འདུག
གནས་ཚུལ་འབྱོར་བ་ལྟར་ན། ཉེ་བའི་ལོ་འགའི་ནང་དུ་མཚོ་སྔོན་པོའི་མཐའ་འཁོར་གྱི་ཉ་འཛིན་པའི་གྲངས་འབོར་ཉིན་རེ་བཞིན་ཇེ་མང་དུ་ཕྱིན་པ་དང་མཉམ་དུ་ཉ་པ་རྣམས་ཀྱིས་མཚོ་སྔོན་པོའི་མཐའ་འཁོར་གྱི་འབྲོག་པའི་རྩྭ་སའང་བདག་བཟུང་བྱས་ཡོད་པས། ཉེ་ལམ་རྨོག་རུ་ཞེས་པའི་སྡེ་བའི་མགོ་ཁྲིད་ཀྱིས་ཉ་པ་རྣམས་ལ་མཚོ་སྔོན་པོའི་ནང་ནས་ཉ་འཛིན་རྒྱུ་མཚམས་འཇོག་གིས་འབྲལ་དགོས་སྐོར་བཤད་ཡོད་འདུག་ལ། དགོང་མོ་དེར་ངོ་གདོང་རས་ཀྱིས་བཏུམས་པའི་མི་འགས་མཚོན་ཆ་འདྲ་མིན་བཟུང་སྟེ་སྡེ་དཔོན་གྱི་ཁྱིམ་དུ་འཛུལ་ཡོད་མོད། སྟབས་ལེགས་ནས་སྡེ་དཔོན་ནང་དུ་བཞུགས་ཡོད་མི་འདུག འོན་ཀྱང་ནང་མི་ཚོར་གཅར་རྡུང་བྱས་ཡོད་པ་དང༌། སྡེ་དཔོན་ཚང་གི་སྦག་སྦག་འཁོར་ལོ་སོགས་བཅག་ཡོད་འདུག
ཕྱི་ཉིན་གནས་ཚུལ་དེ་ས་གནས་མང་ཚོགས་ཀྱིས་གོ་རྗེས་སྡེ་དཔོན་ཚང་ལ་རྒྱག་མཁན་ནི་ཉ་པ་ཚོ་ཡིན་པའི་དོགས་གཞིའི་འོག མང་ཚོགས་སྟོང་ཕྲག་ལྷག་འཚོགས་ཏེ། ད་ནས་བཟུང་མཚོ་སྔོན་པོའི་ཁ་ནས་ཉ་འཛིན་མི་ཆོག་པ་དང་། ས་གནས་དེར་སྡོད་མི་ཆོག་སྐོར་བཤད་དེ་འབྲོག་པ་དང་ཉ་པའི་བར་ཕན་ཚུན་རྩོད་རྙོག་བྱུང་ཡོད་འདུག སྐབས་དེར་ས་གནས་ཉེན་རྟོག་པ་ཡོང་ནས་བར་འདུམ་ཕྱེ་ཡོད་མོད། ཡིན་ཡང་རྒྱ་ནག་གཞུང་གིས་སྲིད་ཇུས་གཏན་འབེབས་བྱས་ཏེ་མཚོ་སྔོན་པོའི་མཐའ་འཁོར་གྱི་འབྲོག་པ་མང་ཚོགས་རྣམས་ཡུལ་གཞན་ལ་གནས་སྤོར་བྱ་དགོས་པར་བརྗོད་ཡོད་ལ། དེར་འབྲོག་པ་མང་ཚོགས་ཀྱིས་གལ་ཏེ་ང་ཚོ་ངེས་པར་དུ་གནས་སྤོར་དགོས་ཚེ་ང་ཚོ་ཚང་མ་མཚོ་ནང་ལ་འདེད་རོགས། དེ་མ་གཏོགས་ང་ཚོ་གནའ་ནས་ད་བར་འདིར་གནས་བཟུང་ནས་བསྡད་སྟབས་ཡུལ་གཞན་ལ་འགྲོ་རྒྱུ་མིན་ལུགས་བརྗོད་ཡོད་འདུག
གནས་ཚུལ་ཤེས་གསལ་ལྟར་ན། ད་སྐབས་གཞུང་ངོས་ནས་འདིའི་ཐད་ཐབས་བཀོད་གཞན་པ་འཚོལ་གྱིན་ཡོད་ཚུལ་འདུག
