ཨོ་བྷ་མ་མཆོག་གིས་དམ་འབུལ་དབུ་མནའ་བཞེས་སྐབས་ཁོང་གི་གློ་ཁུག་ནང་དུ་༧གོང་ས་མཆོག་གིས་བསྐུར་གནང་བའི་ཁ་བཏགས་དེ་བཅུག་ཡོད་འདུག
ཁ་ལེ་ཧྥོར་ནི་ཡ་ནས་ཕེབས་པའི་གྲོས་ཚོགས་གོང་མའི་འཐུས་མི་ལྕམ་ ཌེ་ཡ་ནེ་ཧྥིན་སུ་ཊིན་གྱི་སྐུ་ཟླ་སྐུ་ཞབས་རི་ཆར་ཌི་བྷུ་ལུམ་ལགས་ཀྱང་ནང་བའི་ཆོས་ལ་དད་གུས་བྱེད་མཁན་ཞིག་ཡིན་འདུག་ལ། ཕྱི་ཚེས་ ༢༠ ཉིན་ཨ་རིའི་སྲིད་འཛིན་ཨོ་བྷ་མ་མཆོག་གིས་སྲིད་འཛིན་གྱི་དམ་འབུལ་དབུ་མནའ་བཞེས་སྐབས་ཁོང་ཉིད་ཀྱང་སྡིངས་ཆའི་སྟེང་ཡོད་འདུག
སྲིད་འཛིན་མཆོག་གིས་དབུ་མནའ་མ་བཞེས་གོང་དུ་སྐུ་ཞབས་རི་ཆར་ཌི་བྷུ་ལུམ་ལགས་ཀྱིས་ཁ་བཏགས་དཀར་པོ་ཡུག་གཅིག་བླངས་ཏེ་སྲིད་འཛིན་མཆོག་ལ། ཁ་བཏགས་འདི་བོད་མིའི་དབུ་ཁྲིད་༧གོང་ས་ཏཱ་ལའི་བླ་མ་མཆོག་གིས་ཁྱེད་ཉིད་ལ་ཕུལ་སོང་ཞེས་ཞུས་ཡོད་འདུག
འདིའི་རྗེས་ཀྱི་གནས་ཚུལ་སྐོར་སྐུ་ཞབས་རི་ཆར་ཌི་བྷུ་མུལ་ལགས་ཀྱིས་འབྲེལ་ཡོད་མི་སྣ་ཞིག་ལ་འཕྲིན་ཡིག་གི་ནང་འཁོད་དོན། ༼མཛད་སྒོ་དངོས་གཞི་མགོ་མ་བཙུགས་པའི་གོང་དུ་ངས་ཁ་བཏགས་དེ་སྲིད་འཛིན་གྱི་ཕྱག་ཏུ་ཕུལ་བ་ཡིན། ཡིན་ཡང་ངས་ཁོང་ལ་ཁ་བཏགས་དེ་རྗེས་ནས་ངས་ཁོང་ལ་འབུལ་ཆོག་པ་ཞུ་ཞེས་ཞུས་པ་ཡིན། དེར་སྲིད་འཛིན་མཆོག་གིས། ལགས་མིན། ངས་ཁ་བཏགས་དེ་ཁྱེར་ནས་འགྲོ་གི་ཡིན། ཁ་བཏགས་དེ་ང་ལ་དགོས་ཀྱི་འདུག་ཅེས་གསུངས་བྱུང་། དོན་དངོས་ཐོག ཁོང་གིས་དབུ་མནའ་བཞེས་སྐབས་ཁ་བཏགས་དེ་ཁོང་གི་གློ་ཁུག་ནང་དུ་བཅུག་ཡོད་པ་རེད།༽ ཅེས་བརྗོད་ཡོད་པ་རེད།
