བོད་མི་སྐྱབས་བཅོལ་བར་རྒྱ་གར་གཞུང་དམངས་གཉིས་ཀྱི་ལྟ་སྐྱོང་རོགས་རམ་འོག མི་ལོ་ཧྲིལ་བོ་ལྔ་བཅུ་བསྐྱལ་བར་ཐུགས་རྗེ་ལེགས་གསོལ་དང་འབྲེལ། མ་འོངས་པར་བོད་མི་སྐྱབས་བཅོལ་བ་དང་རྒྱ་གར་ཡུལ་མིའི་བར་གྱི་ནང་སེམས་ཀྱི་མཛའ་བརྩེ་གོང་སྤེལ་ལ་ཤུགས་སྣོན་དང༌། སྤྱི་ཚོགས་གཉིས་མུ་མཐུད་མཉམ་གནས་མཉམ་ལས་ཀྱི་ཐབས་ལམ་གསར་བ་འཚོལ་རྒྱུ་ཡིན་ཟེར།
ཕྱི་ཚེས་ ༦ ཉིན་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་གོ་སྒྲིག་འོག མེག་གྷན་སོ་རི་ཡ་གསོལ་མགྲོན་ཁང་དུ། བོད་པ་དང་རྒྱ་གར་གནད་ཡོད་མི་སྣ་ཁག་ཅིག་འདུ་འཛོམས་ཀྱིས་མི་ལོ་ ༥༠ རིང་གི་བཙན་བྱོལ་དང༌། མི་ལོ་ ༥༠ རིང་གི་མཉམ་གནས། ཞེས་པའི་བརྗོད་གཞིའི་ཐོག་བགྲོ་གླེང་གོ་བསྡུར་གྱི་འདུ་འཛོམས་ཤིག་འཚོགས་ཡོད། འདུ་འཛོམས་དེའི་སྟེང་རྒྱ་གར་ཀཱང་ར་རྫོང་ས་གནས་སྐོར་སྲུང་སྤྱི་ཁྱབ་ལས་ཁུངས་ཀྱི་འགན་འཛིན་གཞོན་པ་ཧིན་བོད་འབྲེལ་མཐུད་ཚོགས་པའི་ཚོགས་གཙོ། ངྷ་རམ་ས་ལ་གྲོང་སྡེ་ལས་ཁུངས་ཀྱི་ཚོགས་གཞོན། དེ་བཞིན་ཁྲིམས་རྩོད་པ་སོགས་ངྷ་རམ་ས་ལ་ཁུལ་གྱི་རྒྱ་གར་གྱི་གནད་ཡོད་མི་སྣ་དང༌། བོད་ཀྱི་གཞོན་ནུ་དང་བུད་མེད་གཙོས་པའི་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གི་སྐུ་ཚབ་བཅས་མི་གྲངས་ ༢༥ ཙམ་འདུ་འཛོམས་ཐོག བོད་པ་དང་རྒྱ་གར་ཡུལ་མིའི་བར་མཐུན་ལམ་དང་མཛའ་བརྩེ་སྲ་བརྟན། མཉམ་གནས་མཉམ་སྒྲིལ་ཡར་རྒྱས་སུ་གཏོང་ཐབས་བཅས་ལ་བགྲོ་གླེང་གོ་བསྡུར་ཞིབ་ལྷུག་བྱས་སོང༌།
སྐབས་དེར་གསར་འགོད་པས་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་སུ། ཐེངས་འདིའི་བགྲོ་གླེང་སྐོར་བཅར་འདྲི་ཞུས་པར་ཁོང་གིས་ངོ་སྤྲོད་བྱས་དོན། སྤྱིར་སྔོན་མ་ནས་ང་ཚོས་ང་ཚོས་རྒྱ་གར་དང་བོད་པའི་སྤྱི་ཚོགས་ནང་ཟབ་སྦྱོང་མང་པོ་ཞིག་སྤྲོད་བཞིན་ཡོད། སྐྱབས་བཅོལ་བོད་མི་ཚོ་གང་ཞིག་ཏུ་བསྡད་ཡོད་ན། རྒྱལ་ཁབ་དེ་དང་ས་གནས་དེའི་ཡུལ་མི་དང་མཐུན་ལམ་བྱ་རྒྱུ་དེ་གལ་ཆེན་པོ་ཆགས་ཡོད། ཐེངས་འདིར་ང་ཚོའི་དམིགས་ཡུལ་ནི། རྒྱ་གར་དང་བོད་པའི་བར་མཐུན་ལམ་ཡར་རྒྱས་དང་མཉམ་སྒྲིལ་གྱི་ནུས་པ་ཤུགས་ཆེ་རུ་གཏོང་ཆེད་ཡིན། མཐོ་རིམ་སྤྱི་ཚོགས་ཀྱི་རྒྱ་གར་དང་བོད་པའི་བར་འབྲེལ་བ་ཡག་པོ་ཡོད་ཀྱང༌། དམའ་རིམ་སྤྱི་ཚོགས་ནང་དུས་རྒྱུན་གནས་ཚུལ་ཆུང་ཚགས་རེ་ཡོང་གིན་ཡོད་པ་རེད། ངྷ་རམ་ས་ལ་ནས་གནས་ཚུལ་ཐེངས་ཁ་ཤས་བྱུང་བ་རེད། དེ་དག་གནས་སྐབས་རིང་འགྲིག་ཐབས་བྱས་ཡོད་ཀྱང༌། མཐོ་རིམ་མི་སྣ་ནང་ཁུལ་འགྲིག་ཐབས་བྱས་པ་ཙམ་རེད། གནས་ཚུལ་བྱུང་ཡུལ་ཕྱོགས་གཉིས་ཀྱི་མི་སྣ་ངོ་ཐུག་སྟེ། ཕན་ཚུན་ལ་ཉན་བཤད་དང་དོགས་པ་རྣམ་རྟོག་གསལ་བཤད་བྱས་པ་དེ་འདྲ་ཉུང་ཉུང་རེད། དེར་བརྟེན། ང་ཚོས་དེ་འདྲའི་དཀའ་ངལ་སྐབས་ཕྱོགས་གཉིས་ངོ་ཐུག་སྟེ། སེམས་ཀྱི་མཛའ་བརྩེ་ཇི་ལྟར་བསྐྲུན་དགོས་པ་སོགས་ལ་བསམ་བློ་བཏང་སྟེ། ལོ་སྔོན་པར་ཟབ་སྦྱོང་ཐེངས་ ༢ ཙམ་སྤྲད་ཡོད།
ལྷག་པར་དུ་ད་ལོ་ང་ཚོ་བཙན་བྱོལ་བ་ཆགས་ཏེ་ལོ་ ༥༠ འགྲོ་བཞིན་ཡོད། རྒྱ་གར་མི་དམངས་ལ་ཐུགས་རྗེ་ཆེ་ཞུ་རྒྱུ་དེ་གལ་ཆེན་པོ་ཆགས་ཡོད། ང་ཚོའི་ལྟེ་གནས་ཁང་གི་ངོས་ནས་ཁོང་ཚོར་ཐུགས་རྗེ་ཆེ་ཞུ་རྒྱུ་དང༌། ཕར་ཕྱོགས་ཚུར་ཕྱོགས་ཀྱི་ཐུགས་རྗེ་ཆེ་དེ་ཡང་ཚིག་ཙམ་མ་ཡིན་པར་དོན་དང་ལྡན་ཞིང་མ་འོངས་པར་ཕན་ཐོགས་པ། ནང་གི་མཛའ་བརྩེ་སྐྲུན་ཐུབ་པ་ཞིག་ཡོང་རྒྱུ་དེ་གལ་ཆེན་རེད། དེ་འདྲ་ཞིག་ཡོང་བར་གཞི་རྩ་ཞིག་བཟོ་དགོས་པ་རེད། དེ་འདྲའི་ལས་འགུལ་ནང་རྒྱ་གར་འཛུལ་ཞུགས་ཡོང་བར་ཐབས་ཤེས་གང་ཡོད་སོགས་ཀྱི་ཆེད་དུ་འདི་ལྟ་བུའི་བགྲོ་གླེང་གོ་བསྡུར་ཞིག་གྲ་སྒྲིག་བྱས་པ་ཡིན། ཐེངས་འདིར་རྒྱ་གར་ཉེན་རྟོག་ལས་ཁུངས་དང་གནད་ཡོད་སྡེ་ཚན་ཁ་ཤས་ཀྱི་མི་སྣ་འཛོམས་ཡོད། ང་ཚོའི་དམིགས་ཡུལ་ལྟར་དེ་རིང་གི་ཚོགས་འདུའི་ནང་ནས་ཕན་ཚུན་ལ་སྐད་ཆ་ལྷུག་པོ་དང་ལམ་སྟོན་ཡག་པོ་བྱུང་སོང༌། མ་འོངས་པར་ཡང་མཉམ་ལས་ཡོང་ཐབས་བཅས་ལ་འདོད་པ་ཁེངས་པ་ཞིག་བྱུང་སོང༌། ཞེས་གསུངས་སོང༌།
ཡང་རྒྱ་གར་ས་ཁང་གི་འཐུས་ཚབ་རྒྱ་གར་བ་ཞིག་ལ་ཐེངས་འདིའི་འདུ་འཛོམས་ཐད། དགོངས་ཚུལ་དང་བསམ་འཆར་གང་ཡོད་བཀའ་འདྲི་ཞུས་པར་ཁོང་གིས་བརྗོད་དོན། འདི་ལྟ་བུའི་བགྲོ་གླེང་གོ་བསྡུར་ཡང་ཡང་གོ་སྒྲིག་ཞུ་ཐུབ་ན་ཡག་པོ་འདུག་བསམ་པ་བྱུང་སོང༌། འོན་ཀྱང༌། ཚོགས་ཐོག་ལ་མི་སྣ་གལ་ཆེན་གཅིག་པུ་མ་ཡིན་པར་མི་དམངས་དཀྱུས་མ་མང་པོ་ཞིག་འཛུལ་ཞུགས་བྱས་ཏེ། ཕན་ཚུན་ཉན་བཤད་དང་བགྲོ་གླེང་གོ་བསྡུར་བྱ་ཐུབ་ན་ཡག་པོ་འདུག འོན་ཀྱང༌། ཐེངས་འདིའི་ཚོགས་ཐོག་ནས་བོད་རང་བཙན་སོགས་སྲིད་དོན་གྱི་སྐད་ཆ་མང་པོ་ཞིག་བྱུང་སོང༌། དེ་ཡག་པོ་མི་འདུག ཐེངས་འདིར་ང་ཚོ་དགོས་པ་ཅིའི་ཕྱིར་འཛོམས་པ་རེད་ཟེར་ན། བོད་པ་དང་རྒྱ་གར་གྱི་སྤྱི་ཚོགས་གཉིས་ནང་ཁུལ་མཐུན་སྒྲིལ་ཡོང་ཐབས་ལ་འཚོགས་པ་རེད། རྗེས་མ་དེ་འདྲ་མིན་པར་སྤྱི་ཚོགས་གཉིས་ཀྱི་མཐུན་ལམ་དང༌། མི་དམངས་དཀྱུས་མའི་བར་གྱི་མཛའ་བརྩེ་ཡར་རྒྱས་སུ་ཇི་ལྟར་གཏོང་དགོས་པ་སོགས་ལ་གོ་བསྡུར་བྱ་དགོས་པ་རེད་ཟེར།
ཡང་ཁོང་ལ་སྔོན་མ་བོད་པ་དང་རྒྱ་གར་བར་གནས་ཚུལ་ཕྲན་བུ་རེ་འབྱུང་གིན་ཡོད་པ་དེ་རྒྱུ་རྐྱེན་གང་ལ་ཐུག་ཡོད་པ་དང༌། མ་འོངས་པར་དེ་འདྲ་མི་ཡོང་ཆེད་ལས་ཀ་ག་རེ་བྱ་དགོས་མིན་སྐད་ཆ་དྲིས་པར་ཁོང་གིས། སྔོན་མ་རྩོད་རྙོག་ཕྲན་བུ་རེ་བྱུང་དོན་ནི། རྒྱ་གར་ནང་སྔོན་མ་ནས་གཞིས་ཆགས་ཡོད་པའི་བོད་པ་ཚོ་དང་རྒྱ་གར་བར་རྙོག་དྲ་མི་འདུག བོད་ནས་གསར་དུ་ཡོང་བ་ཚོ་དང་རྒྱ་གར་ཡུལ་མིའི་བར་རྙོག་དྲ་ཅུང་རེ་ཡོང་གིན་འདུག དེ་ནི་འདིར་ཡོད་པའི་བོད་པའི་སྤྱི་ཚོགས་ཀྱི་ངོས་ནས་གསར་དུ་འབྱོར་བ་ཚོར་ཡུལ་ཁྲིམས་དང་ས་ཁུལ་གྱི་འགྲོ་སྟངས་གསལ་བཤད་བྱེད་ཐུབ་ཀྱིན་ཡོད་པ་མ་རེད། འགྲོ་སྟངས་འདུག་སྟངས་ལམ་སྟོན་བྱ་མ་ཐུབ་པ་རེད། ཡུལ་ཁྲིམས་དང་ས་གནས་ཀྱི་ལུགས་སྲོལ་ཅུང་ཤེས་རྟོགས་བྱུང་ན། རྙོག་དྲ་ཆུང་དུ་འགྲོ་གི་རེད། ཅེས་བརྗོད་སོང༌།
རྒྱ་གར་གཞུང་དམངས་གཉིས་ནི་བོད་བཙན་བྱོལ་ཚང་ལ་དམིགས་གསལ་གྱིས་བཀའ་དྲིན་ཆེན་པོ་ཆགས་ཡོད་པ་ནི། བོད་པ་བཙན་བྱོལ་བ་མགོ་ཐོག་ཚད་ཀྱིས་ཤེས་ན་དངོས་ནས་ཡག་པོ་རེད། འོན་ཀྱང་། གནས་ས་གནས་ཡུལ་ཁ་ཤས་ཀྱི་མི་མང་ཁ་ཤས་ཀྱི་སྤྱོད་ལམ་དང་ལྟ་སྟངས་ནི་སྔོན་མ་ལས་སྡུག་དུ་འགྲོ་བཞིན་པའི་རྒྱ་གར་རྡ་སའི་ཁོར་ཡུག་གི་ཕྱི་ཡོང་བ་ཀ་ཤི་མར་གྱི་ཚོང་བ་དང་ཡུལ་མི་ཁ་ཤས་ཀྱི་བྱེད་སྟངས་ཀྱིས་བོད་པ་ཚང་གི་མི་མང་བོ་ཞིག་གི་སེམས་ནང་དུ་མངར་སྐྱུར་ཁ་གསུམ་གྱི་གཏམ་རྒྱུད་རེ་ཟུང་ཡོད་ཀྱང་། དེ་དག་ནི་ངེད་ཅག་གི་བསམ་ཤེས་བྱས་དེ་སྡུག་བསྒོམ་རྒྱག་པ་ལས་གཞན་དེ་དག་རེ་ཟུང་གི་བྱ་སྤྱོད་ལས་བོད་མི་བཙན་བྱོལ་བ་དང་རྒྱ་གར་གཞུང་དམངས་གཉིས་ཀྱི་མཐུན་སྒྲིལ་ལ་གནོད་ཚབ་ཡོད་པས་སྐད་ཆ་དྲ་གྲོགས་སུས་ཀྱང་མ་བཤད་ཀྱང་ཡག་པོ་ཞིག་མཐོང་གི་འདུག
ཉམ་ང་བ་འདིར་བསམ་སྐབས་རྒྱ་གར་གཞུང་དམངས་གཉིས་བཀའ་དྲིན་དྲན་འོས་པ་ཡིན་ལ་ཐུགས་རྗེ་ཆེ་ཡང་ངེས་པར་དུ་ཞུ་དགོས་ཡིན།
འཆམ་མཐུན་གྱི་སྤྱི་ཚོགས་དགོས་ན།
རང་ཉིད་ནས་འགོ་བརྩམས་ཏེ་འགྲོ་མཁས་སྡོད་མཁས་དགོས་ལ།
ཡུལ་ཆུ་བཏུང་ནས་ཡུལ་ཁྲིམས་འཁུར་དགོས་པ་དེ་ང་ཚོའི་ལས་འགན་ཡང་རེད།
རྒྱ་གར་གཞུང་དམངས་གཉིས་ལ་ཐུགས་རྗེ་ཆེ་ཞུ་དགོས་དང་དགོས།
ང་ཚོ་མི་ལོ་ཧྲིལ་པོ་ལྔ་བཅུ་ཙམ་འདི་ཕྱོགས་སུ།
ས་སེན་མོ་གང་དང་ཆུ་ཐིགས་པ་གཅིག་ཙམ་ཡང་རང་ཉིད་ལ་མ་དབང་བའི་གནས་སྟངས་ཉ
སྐབས་འདིར་ཀརྨ་ལེགས་བཤད་ཀྱིས་བཤད་བཞིན་པའི་མཐོ་རིམ་སྤྱི་ཚོགས་ཟེར་བ་གཞུང་འབྲེལ་དང་གཞུང་འབྲེལ་མ་ཡིན་པའམ་མི་སྒེར་བར་གོ་བ་མིན་ན་བཞུགས་ཁྲི་ཐོག་དང་འགྲོ་ཁྲེ་ཐོག་ཡིན་པའི་སྐུ་ངོ་རྒྱགས་པ་དེ་ཚོར་གོ་དགོས་བར་འདོད་མོད། སྤྱི་ཚོགས་གང་ཞིག་དུ་ཡང་འཁྲུག་འཛིང་གི་རྩོག་ཉོག་ཙག་ཙིག་ན་གཞོན་ཚོའི་བར་དུ་ཡོང་གི་ཡོད་མོད། སྐུ་ངོ་དེ་དག་གི་གཅེས་ཕྲུག་ཚོ་ཡར་འཚར་ལོངས་མ་བྱུང་གོང་སྔ་མོ་ནས་ཨ་རི་དང་ཡོ་རུབ་ཁག་ཏུ་བསྐྱལ་ཚར་སྟབས་འདིར་མྱོང་མཁན་ཚོ་བོད་ནས་གསར་དུ་འབྱོར་ཙམ་གྱི་ན་གཞོན་ཚོའི་གྲས་ཡིན་ལ། གཞུང་གིས་འདི་ལ་ཁ་ཡོད་ལག་ཡོད་ཀྱིས་བདག་པོ་ཞིག་རྒྱག་ན་རྒྱ་གར་གཞུང་ལ་ཞུས་ཏེ་དམག་སྒར་ཨང༢༢་བའི་བོད་དམག་སྟོང་ཕྲག་དུ་མ་དེ་པ་ཀི་སི་ཐན་དང་བྷང་ལ་རྡེ་ཞེའི་བར་གྱི་ས་མཚམས་སྲུང་བྱེད་གཅིག་བུ་མ་ཡིན་པར་དམག་མིའི་གནས་རིམ་དང་ཤེས་ཚད་ངེས་ཅན་ཡོད་པ་ཚོ་བོད་པ་འདུས་སྡོད་བྱེད་སའི་ས་ཁུལ་ཁག་ཏུ་ཉེན་རྟོགས་པའི་ནང་གཏོང་དགོས། འདིས་རྒྱ་གར་སྐད་མི་ཤེས་བའི་གསར་འབྱོར་བ་ཡིན་ནའང་ཁྲིམས་ལུགས་ཀྱི་མདུན་ནས་མི་ལ་དབྱེ་འབྱེད་མི་བྱེད་པའི་ཡིད་ཆེས་སྟེར་ཐུབ་ལ་སྤྱི་ཚོགས་ཡོངས་ཀྱི་དཀའ་ངལ་མི་ཉུང་བ་ཞིག་རང་འགུལ་གྱིས་སེལ་ཐུབ། གཉིས་བ་དེ་བདེ་དོན་ལས་ཁུངས་སུ་མདོ་དབུས་ཁམས་གསུམ་ནས་ཡོང་བའི་ལས་བྱེད་པ་མང་ཙམ་ཞིག་༼གསར་འབྱོར་བ་ཡིན་དགོས༽ངེས་བར་དུ་འཇོག་དགོས་ལ་བདེ་དོན་ལས་ཁུངས་ཀྱིས་ལོ་རེ་བཞིན་འཕར་བཞིན་པའི་རྒྱ་གར་བའི་ཁང་གླ་དང་གློག་རིན་ཆུ་རིན་སོགས་བསམ་བསམ་འདོད་འདོད་མ་ཡིན་པར་རྒྱ་གར་བའི་ཁྲིམས་དང་མཐུན་པ་བཟོ་རུ་འཇུག་དགོས། འདིར་དཔེ་མཚོན་ཞིག་དྲངས་ན་སྔོན་ཆད་ལྡི་ལི་བསམ་ཡས་གླིང་དུ་རྒྱ་དཔོན་དམ་སེང་༼ད་ལྟ་གྲོངས་ཟིན༽ཟེར་བ་ཞིག་ཡོད་པའི་སྐབས་རྒྱ་གར་ཉེན་རྟོགས་པས་རྒྱ་དཔོན་ཡིག་ཚང་དང་བདེ་དོན་གང་རུང་ལ་སྙན་གསེང་མ་ཞུས་བར་གང་བྱུང་གིས་བོད་པའི་ཁྱིམ་ཚང་ནང་བསྔོགས་བཤེར་དང་མི་འཛིན་བཟུང་བྱེད་མི་ཆོག་ལ། ཁང་བདག་ཚོས་ཁང་གླ་ཡང་རྒྱ་གར་གྱི་ཁྲིམས་ལྟར་ལོ་དུ་མའི་རྗེས་སུ་བརྒྱ་ཆར་བཀུག་ནས་ཁང་གླ་སྤར་བ་ལས་མི་མང་འདུ་འཛོམས་ཆེ་དུས་གང་བྱུང་གིས་ཁང་གླ་འཕར་ལྕོག་བྱེད་མི་ཆོག་པ་བཟོས་ཡོད། འདི་མི་གཅིག་ཁོ་ནའི་ནུས་བ་རེད། གསུམ་པ་གླ་འཁོར་ཁ་ལོ་བ་ཚོ་དང་ཉིན་རེའི་བཟའ་བཏུང་ཉོ་སའི་ཚོང་ཁང་ཁག་རེད། ཁོ་ཚོས་རྒྱ་གར་སྐད་མི་ཤེས་བར་ལྟོས་ནས་ལམ་སངས་མགོ་སྐོར་བཏང་མི་ཆོག་པར་རྩོད་ཉོག་ཅི་ཞིག་བྱུང་ན་ལམ་སངས་བདེ་དོན་ནམ་ཡང་ན་བོད་རིགས་ཉེན་རྟོགས་པ་འབོད་དུ་འཇུག་དགོས། འདིས་ད་བཟོད་རྒྱ་གར་བ་དང་བོད་པ། མི་སྒེར་བར་དང་སྤྱི་ཚོགས་ཡོངས། ཁྲིམས་ལུགས་ཀྱི་མདུན། གང་དུའང་ཚང་མར་འཆམ་མཐུན་གྱི་གཞི་མ་བསྐྲུན་ཐུབ།
ནོར་བཅོས། རྡ་ལམ་ས་ལ།
སྒང་གི་ཤེས་ཡོན་ཅུང་ཙམ་ཡོད་མཁན་ཚོས་སྐད་ཆ་ཅི་ཙམ་བཤད་ན་མ་བཤད་ན། གཙོ་བོ་གཞི་རིམ་མི་མང་དཀྱུས་མའི་ཁྲོད་དུ་ཕན་ཚུན་ལ་མཐུན་ལམ་དང་མཛའ་བརྩེ་ཡག་པོ་དགོས་རྒྱུ་ཧ་ཅང་ནས་གལ་ཆེ་གི། འདིའི་ཕྱོགས་ལ་མི་སྒེར་བ་ཚང་མས་ཉིན་རེ་ཉིན་རེའི་མི་ཚེ་སྐྱེལ་སྟངས་ཚུན་ལས་བསམ་བློ་གཏོང་དགོས་རྒྱུ་འདུག
རྡ་ལས་ས་ལ་ལྟ་བུར་མཚོན་ན། དཀའ་ངལ་ཅུང་ཙམ་འཕྲད་ཡོང་བ་འདི་ཚོའི་རྐྱེན་རྩ་དངོས་གནས་དེ་བོད་ནས་གསར་དུ་འབྱོར་བ་ཚོའི་བརྡ་སྤྲོད་སྟངས་མ་ཤེས་བའི་དཀའ་ངལ་གྱི་ཐོག་ནས་མིན་པ་འདྲ། བོད་པ་ཚོང་ལས་ཙག་ཙིག་གཉེར་མཁན་ཚོའི་ངོས་ནས་ཏན་ཏན་བསམ་བློ་གཏོང་དགོས་རྒྱུ་མང་པོ་འདུག
རྒྱ་གར་ལ་ཐུགས་རྗེ་ཞུ་བ་ལ་སྔ་འགོར་གང་ཡང་ཡོད་པ་མ་རེད། གོང་ས་མཆོག་གིས་ཀྱང་རྒྱ་གར་ཐུགས་རྗེ་ཆེན་པོ་ཡིན་ཞེས་ཚར་ཁྲི་ཕྲག་མང་བོར་གསུང་ཡོད་པ་རེད། ནམ་ཡང་ང་ཚོས་རྒྱ་གར་གྱི་བཀའ་དྲིན་ཐུགས་རྗེ་བརྗེད་མི་ཉན། ཡིན་ནའང་ཚོགས་འདུ་འདིའི་ནང་ན་སྟོང་བཤད་རྒྱག་མཁན་མང་ཙམ་ཡོད་རབས་འདུག འདིའི་ཐད་ལ་དྲ་གྲོགས་རྣམས་ཀྱིས་དཔྱོད་གླེང་རེ་བྱས་ན་མི་འོས་པ་གང་ཡང་མི་འདུག་སྙམ།
རྒྱ་གར་ལ་ཐུགས་རྗེ་ཞུ་བ་སྔ་དྲག་སོང་། ད་དུང་བོད་ཀྱི་ཚོགས་བཅར་བ་ཚོར་འཚོགས་འདུ་གང་ཞིག་ལ་དགོས་པ་གང་ཞིག་གིས་འཛོམས་པ་ཤེས་ནས་སྐད་ཆ་བཤད་དགོས། དེ་ལྟ་མ་ཡིན་པར་ཡིན་མིན་གཉིས་ལ་རང་བཙན་དང་འཐབ་རྩོད་བཤད་ན་དགོས་དོན་ཡོད་པ་མ་རེད། སྐབས་འདིར་ཡང་སུ་ཞིག་གིས་བཤད་པ་མི་ཤེས་མོད ” ཐེངས་འདིའི་ཚོགས་ཐོག་ནས་བོད་རང་བཙན་སོགས་སྲིད་དོན་གྱི་སྐད་ཆ་མང་པོ་ཞིག་བྱུང་སོང༌། དེ་ཡག་པོ་མི་འདུག” སྐད་ཆ་འདི་བཤད་པ་ཡག་པོ་མ་རེད། ང་ཚོས་གཟབས་གཟབས་གནང་དགོས།