མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཕྱི་ཚེས་ ༩ ཉིན་རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་ཐད་ཉན་ཞིབ་བྱས་ཡོད་ལ། རྒྱལ་ཚོགས་ཀྱི་བགྲོ་གླེང་གཞན་དག་ལྟར། ད་རེབ་ཀྱང་གྲུབ་འབྲས་ཤིག་ཐོན་མདོག་གཏན་ནས་མེད། ཡིན་ཡང་པེ་ཅིན་གྱི་བྱ་སྤྱོད་ལས་འཕྲོས་པའི་སྤྱི་ཚོགས་ཀྱི་བགྲོ་གླེང་ནི་མེད་པ་ལས་དྲག་ལ། ཐ་ན་རྒྱ་ནག་མི་དམངས་ལ་ལྷག་འཕྲོས་ཀྱི་འཛམ་གླིང་འདིས་ཁོང་ཚོའི་མགོར་ཅི་ཞིག་འབྱུང་བཞིན་པའི་ཐད་སེམས་ཁུར་ཙམ་མཚོན་ནའང་འགྲིག དྲུག་བཞིའི་དོན་རྐྱེན་བྱུང་ནས་ལོ་ ༢༠ འཁོར་གྱིན་ཡོད་སྟབས་འདི་ལྟའི་ལས་དོན་ནི་དུས་ཐོག་ལ་འཁེལ་ཡོད་པ་རེད་ཅེས་ཨ་རིའི་མ་རྐང་ཁྲོམ་རའི་གསར་ཤོག་གིས་སྤེལ་ཡོད། བཀའ་ཁྲི་མཆོག་གིས། ཚོགས་ཆེན་འདི་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཆོ་ག་ཕྱག་ལེན་ཙམ་ལས་ཅི་ཡང་མིན་པའི་དགོངས་ཚུལ་བཏོན་ཡོད།
གཟའ་ཟླ་བའི་ཉིན་གྱི་རྗེ་ནེ་ཝའི་ཚོགས་འདུ་ནི་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་དག་གི་འགྲོ་བ་མིའི་ཐོབ་ཐང་གི་གནས་བབ་ལ་ལོ་རེའི་བསྐྱར་ཞིབ་བྱེད་པའི་སྒྲིག་གཞི་ལྟར་འཚོགས་ཡོད་ལ། འགྲོ་བ་མིའི་ཐོབ་ཐང་གི་ལྷན་ཚོགས་འཐུས་མིའི་རྒྱལ་ཁབ་ ༤༧ དང༌། ཟུར་ཉན་རྒྱལ་ཁབ་དག་གིས་དུས་ཚོད་གསུམ་གྱི་རིང་རྒྱ་ནག་གི་འགྲོ་བ་མིའི་ཐོབ་ཐང་ཐད་བགྲོ་གླེང་བྱས་ཡོད་ལ། དེ་རྗེས་ལྷན་ཚོགས་ཀྱི་སྒྲིག་གཞི་ལྟར། རྒྱལ་ཁབ་གསུམ་གྱི་སྐུ་ཚབ་སྟེ། ནེ་ཇི་རི་ཡ་དང་རྒྱ་གར། ཁེ་ན་ཌ་བཅས་ཀྱིས་རྒྱབ་གཉེར་གྱི་ཡིག་ཆ་ཞིག་བདུན་ཕྲག་འདིའི་མཇུག་ཙམ་ལ་འབུལ་རྒྱུ་ཡིན་འདུག འོན་ཀྱང༌། འདིའི་མཇུག་འབྲས་སྣང་མེད་དུ་གཏོང་བའི་རང་དབང་རྒྱ་ནག་གི་ལག་ན་ཡོད་པ་རེད་ཅེས་གོང་གསལ་གསར་འགྱུར་བརྒྱུད་ལམ་གྱིས་སྤེལ་ཡོད།
ཕྱི་ཚེས་ ༦ ཉིན་ལོན་ཌོན་དུ་རྟེན་གཞི་བྱས་པའི་རྒྱལསྤྱིའི་ཉེས་ཡངས་ཚོགས་པས། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ལ་ཕུལ་བའི་བསྐྱར་ཞིབ་སྙན་ཐོའི་ནང་དུ་འགྲོ་བ་མིའི་ཐོབ་ཐང་གི་ཛ་དྲག་གི་གནས་ཚུལ་ཁག་ཅིག་ནག་སུབ་བཏང་འངུག་ཅེས་སྐྱོན་བརྗོད་བྱས་ཡོད་པ་རེད།
རྒྱལ་སྤྱིའི་ཉེས་ཡངས་ཚོགས་པས་བཤད་དོན། རྒྱ་ནག་གིས་འགྲོ་བ་མིའི་ཐོབ་ཐང་གི་ཁྱབ་ཁོངས་རེ་ཟུང་ནས་ཡར་རྒྱས་བཏང་ཡོད་ཀྱང༌། བོད་ནང་གི་ད་ཡོད་ཀྱི་དཀའ་རྙོག་གི་གནས་སྟངས་དང༌། ཡུ་གར་མི་རིགས་ཀྱི་གནད་དོན། ཧཕ་ལུང་ཀོང་ཆོས་ཚོགས་ཀྱི་གནད་དོན་སོགས་གླེང་མི་འདུག ཅེས་དང༌།་ ཟླ་སྔོན་མའི་ཚེས་ ༡༨ ཉིན་ནས་སྤེལ་བའི་དགུན་དུས་ཀྱི་དྲག་རྡུང་གི་འོག་ནས་མི་ ༨༡ འཇུས་པ་དང་སྟོང་ཕྲག་འགའ་ཤས་ལ་དོན་མེད་འདྲི་བརྩད་བྱས་པའི་གནས་སྟངས་སོགས་བཀོད་ཡོད་པ་རེད།
ཕྱི་ཚེས་ ༦ ཉིན་འགྲོ་བ་མིའི་ལྟ་རྟོག་ཚོགས་པའི་ཨེ་ཤ་ཡའི་ཁྲིམས་དོན་འགན་འཛིན་སོ་ཧཕེ་ རི་ཆར་ཌི་སོན་གྱིས། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འཐུས་མི་རྣམས་ཀྱིས་ཕྱི་ཚེས་༩ ཉིན་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ལ་བསྐྱར་ཞིབ་བྱ་སྐབས་རྒྱ་ནག་གི་ཐོག་སྐད་ཆ་མ་བཤད་པར་མུ་མཐུད་ནས་འགྲོ་བ་མིའི་ཐོབ་ཐང་རྡོག་རོལ་ལ་གཏོང་དུ་འཇུག་རུང་གི་མ་རེད། ཐེངས་འདིའི་བགྲོ་གླེང་སྐབས་བོད་ཀྱི་གནད་དོན་དང་ཞིན་ཅང་གི་གནད་དོན། གཞན་ཡང་སྨྲ་བརྗོད་རང་དབང་སོགས་འགྲོ་བ་མིའི་གཞི་རྩའི་ཐོབ་ཐང་རྡོག་རོལ་གཏོང་བཞིན་པའི་སྐོར་གླེང་སློང་ཚ་ནན་བྱ་དགོས་སྐོར་བརྗོད་ཡོད་པ་རེད།
རྒྱ་ནག་གིས་བཤད་དོན། ཁོང་ཚོས་ཡོངས་ཁྱབ་འགྲོ་བ་མིའི་ཐོབ་ཐང་གི་རྩ་འཛིན་ལ་བརྩི་བཀུར་བྱེད་ཀྱིན་ཡོད་ལ། མི་སེར་རྣམས་ཀྱི་སྤྱི་ཚོགས་དང་དཔལ་འབྱོར། ཁྲིམས་དོན་ཐོབ་ཐང་བཅས་ཡར་རྒྱས་བཏང་ཡོད་སྐོར་བཤད་ཡོད་པ་རེད།
གཟའ་ཟླ་བའི་ཉིན་གྱི་བགྲོ་གླེང་སྐབས་བོད་དོན་ལས་འཕྲོས་ཏེ་རྒྱ་ནག་མཉམ་དུ་རྣོ་ངར་གྱིས་ཐུག་མཁན་རྒྱལ་ཁབ་ནི་ཨོ་སི་ཊོ་ལི་ཡ་ཡིན་ལ། ཨོ་སི་ཊོ་ལི་ཡའི་བོད་དོན་ལྷན་ཚོགས་དེ་ཕྱི་ཚེས་ ༩ ཉིན་གྱི་ཉན་ཞིབ་སྟེང་ཞུགས་པར་འབད་བརྩོན་བྱས་རུང་རྒྱ་ནག་གིས་ངོ་རྒོལ་བྱས་པར་བརྟེན། ཨོ་སི་ཊོ་ལི་ཡའི་གཞུང་གིས་རྒྱ་ནག་ལ་སྐྱོན་བརྗོད་བྱས་ཡོད་ལ། རྒྱ་ནག་གིས་ཕྱིར་ཨོ་སི་ཊོ་ལི་ཡས་བོད་དོན་ཐོག་བཤད་པའི་བསམ་ཚུལ་དེ་དག་ནི་ནད་མ་ཐེག་པ་དང་ཀུན་སློང་མ་དག་པའི་རིགས་རེད་ཅེས་སྐྱོན་བརྗོད་བྱས་ཡོད།
ཕྱི་ཚེས་ ༩ ཉིན་བོད་དོན་ལས་འཕྲོས་ཏེ་རྒྱ་ནག་གི་ཁ་གཏད་དུ་ལངས་མཁན་རྒྱལ་ཁབ་གཙོ་བོ་ནི་ཨོ་སི་ཊོ་ལི་ཡ་དང་ཁེ་ན་ཌ་གཉིས་ཡིན་འདུག དེ་བཞིན་ནུབ་ཕྱོགས་དང་ལ་ཊིན་ཨ་མེ་མི་ཁའི་རྒྱལ་ཁབ་འགས་ཀྱང་རྒྱ་ནག་གི་འགྲོ་བ་མིའི་ཐོབ་ཐང་ཐད་ཡིད་མ་ཚིམས་པའི་རྣམ་འགྱུར་བསྟན་ཡོད་འདུག
བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཕྱི་ཚེས་ ༧ ཉིན་གསར་ལམ་དུ་གསུངས་དོན། རྒྱ་ནག་ལ་ཁྲིམས་ཀྱི་དབང་སྒྱུར་མེད་ལ། དྲང་བདེན་གྱི་ཁྲིམས་བཤེར་ཡང་མེད་སྟབས། བོད་མི་མང་པོ་ཞིག་ནི་ཁྲིམས་མེད་ལུགས་མེད་ཀྱི་སྒོ་ནས་ལོ་ཐག་རིང་བའི་བཙོན་འཇུགབྱས་ཡོད་པ་རེད། ང་ཚོའི་བོད་མི་རྣམས་ལ་རང་གི་གྱོད་དོན་ཞུ་གཏུགས་བྱེད་པའི་དབང་ཚད་ཡོད་པ་མ་རེད། ཐབས་སྐྱོ་བ་ཞིག་ལ་རྒྱལ་སྤྱིའི་སྤྱི་ཚོགས་ཀྱིས་འདི་ཏད་གང་ཡང་སྒྲུབ་ཐུབ་ཡོད་པ་མ་རེད་ཅེས་དང༌། ༢༠༠༨ ལོའི་གསུམ་པའི་ཚེས་ ༡༠ ཉིན་ནས་བཟུང་བོད་ནང་གི་བོད་མི་རྣམས་ལ་དྲག་གནོན་ག་ཚོད་ཅིག་བྱེད་མཞིན་པ་འཛམ་གླིང་གིས་དངོས་སུ་མཐོང་ཡོད་པ་རེད། རྒྱལ་སྤྱིའི་དབུ་ཁྲིད་མང་པོ་ཞིག་གིས་བོད་མི་ཚོར་རྒྱབ་སྐྱོར་གྱི་སྐད་ཆ་བཤད་ཡོད་ཀྱང༌། རྒྱ་ནག་གཞུང་གིས་མུ་མཐུད་ནས་དྲག་གནོན་དང་སྡུག་སྦྱོང་བྱས་ཡོད་པ་རེད། རྒྱལ་གཅེས་ཆོས་གཅེས་ཟེར་བའི་ལས་འགུལ་ནི་དཔེ་མཚོན་ཙམ་རེད། ༡༩༩༦ ལོ་ནས་བཟུང་རྒྱལ་གཅེས་ཆོས་གཅེས་ཟེར་བའི་ལས་འགུལ་ལ་ངོས་ལེན་མ་བྱས་པར་གྲྭ་བཙུན་ ༡༡༠༠༠ ལྷག་དགོན་པ་ཁག་གི་སྒྲིག་ཁོངས་ནས་ཕྱིར་ཕུད་བཏང་ཡོད་པ་རེད་ཅེས་གསུངས།
བཀའ་ཁྲི་མཆོག་གིས་ཐེངས་འདིའི་རྗེ་ནེ་ཝའི་ཚོགས་ཆེན་གྱི་ཐད། འདས་པའོ་ལོ་ ༥༠ རིང་འགྲོ་བ་མིའི་ཐོབ་ཐང་ལྷན་ཚོགས་ཀྱིས་འཛམ་གླིང་གི་མནར་གཅོད་སྡུག་སྦྱོང་རིགས་རྐང་གཅིག་གི་ཐོག་ལའང་སྐྱོན་བརྗོད་ཀྱིས་གྲུབ་འབྲས་ཐོན་པ་ཞིག་ཡོད་པ་མ་རེད། ཁོང་ཚོར་འགྲོ་བ་མིའི་ཐོབ་ཐང་རྡོག་རོལ་ལ་ཚོད་འཛིན་བྱེད་པའི་ནུས་པ་མེད་པ་འདི་སེམས་ལ་དྲན་ཚེ། ངས་ཤེས་ཚོད་ལ་ད་རེབ་ཀྱི་ཚོགས་འདུ་དེའང་ཆོ་ག་ཕྱག་ལེན་རིགས་ཤིག་མིན་འགྲོ་སྙམ། ཞེས་གསུངས་ཡོད་པ་རེད།
