གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་དབལ་ཕུར
་ཞི་ཁྲོ་སྨན་གསུམ་གྱི་སྒྲུབ་ཆེན་དང༌། ༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད།
སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། རང་རེ་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ ༥༠ ཙམ་ཕྱིན་པའི་རིང་བོད་གངས་ཅན་པའི་རིས་སུ་མ་ཆད་པའི་ཆོས་སྡེ་ཁག་སོ་སོས་ཐོས་བསམ་འཆད་ཉན་གྱི་བཤད་སྲོལ་དང༌། སྒོམ་སྒྲུབ་ཉམས་ལེན་གྱི་སྒྲུབ་སྲོལ་རྣམས་མི་ཉམས་རྒྱུད་འཛིན་རྒྱ་ཆེར་གནང་བཞིན་ཡོད་པའི་ཁོངས་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་ཕྱི་ཟླ་ ༡ ཚེས་ ༢༧ ནས་ཕྱི་ཟླ་ ༢ ཚེས་ ༡༠ བར་ཡི་དམ་དབལ་ཕུར་ཞི་ཁྲོ་སྨན་གསུམ་གྱི་སྒྲུབ་བ་ཆེན་མོའི་བསྙེན་སྒྲུབ་ལས་གསུམ་དང༌། སྦྱོར་དངོས་རྗེས་གསུམ་གྱི་ཕྱག་རྒྱུན་དང༌། ལམ་སྲོལ་མཐར་ཕྱིན་པ་གནང་སྟེ་དཔོན་གསས་བླ་མ་༧སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་
གིས་ཕྱི་རྒྱུད་རྣམ་དག་པདྨ་ཀློང་ཡངས་དང༌། ཡི་དམ་དབལ་ཕུར་འབྲུག་གསས་ཆེམས་པའི་དབང་བཞི། བདུད་རྩི་འོད་ཟེར་འབར་བའི་སྨན་དབང་དང༌། ཚེ་དབང༌། ལེགས་ཉེས་བླང་དོར་གྱི་བཀའ་སློབ་བཅས་བསྩལ་གནང་མཛད་ཡོད་པ་རེད། དེ་སྔོན་བོད་གངས་ཅན་ཞིང་དུ་བསྟན་པ་ཡར་དར་སྐབས་གཡུང་དྲུང་བོན་གྱི་གདན་ས་གོང་མ་བཀྲ་ཤིས་སྨན་རིའི་གླིང་དུ་ཡི་དམ་ཁྲོ་བོ་གཙོ་མཆོག་མཁའ་འགྱིང་གི་སྨན་སྒྲུབ་འོད་ཟེར་འཁྱིལ་བའི་སྒྲུབ་བ་ཆེན་མོ་ཚོགས་སྲོལ་དང༌། གདན་ས་འོག་མ་རབ་ལེགས་གཡུང་དྲུང་གླིང་དུ་ཡི་དམ་དབལ་ཕུར་འབྲུག་གསས་ཆེམས་པའི་སྨན་སྒྲུབ་འོད་ཟེར་འབར་བའི་སྒྲུབ་བ་ཆེན་མོ་རེ་ཁྲི་འཛིན་མཁན་རབས་སོ་སོར་ཐེངས་རེ་ཚུགས་སྲོལ་ཡོད་པ་ལྟར་ཁྲི་འཛིན་སོ་གསུམ་པ་མཆོག་གིས་སྨན་སྒྲུབ་འོད་ཟེར་འཁྱིལ་བའི་སྒྲུབ་བ་དེ་ཉིད་ཕྱི་ལོ་ ༡༩༨༨ ལོར་བཙུགས་གནང་མཛད་ཡོད་པ་དང༌། སྨན་སྒྲུབ་འོད་ཟེར་འབར་བའི་སྒྲུབ་བ་འདི་ཉིད་ད་ལོ་སླར་གསོ་གནང་ཡོད་པ་རེད། ད་སྐབས་ཆེས་སྙིགས་ཀྱི་དུས་འདིར་འགྲོ་རྣམས་དུས་མིན་འབྱུང་འཁྲུག་སྣ་ཚོགས་ཀྱིས་མནར་བ་རྣམས་ལ་སྨན་ཕྱིར་དང༌། དད་ལྡན་སྐྱེ་འགྲོ་ཡོངས་ཀྱི་སྤྱི་མཐུན་གྱི་བསོད་ནམས་གོང་དུ་འཕེལ་ཞིང་སྔར་སྲོལ་བཟང་པོ་རྣམས་ཕྱི་རབས་བསྟན་པའི་མཛེས་རྒྱན་དུ་བསྐྲུན་ཕྱིར་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་དང༌། ༧སྐྱབས་རྗེ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་ཟུང་གིས་མཐོང་བ་རྒྱུད་པའི་ཕྱག་སྲོལ་ཇི་བཞིན་དམར་ཁྲིད་གནང་ནས་སྨན་རིའི་མཁན་རབས་རིམ་བྱོན་གྱི་སྒྲུབ་ཆེན་ཀུན་ལས་མཐུན་རྐྱེན་འཛོམས་ཤོས་དང་གྲ་འགྲིག་ཤོག་ཤིག་ཆགས་ཡོད་པ་རེད། སྨན་སྒྲུབ་འོད་ཟེར་འབར་བའི་སྨན་སྐོར་གཏང་རག་དང༌། བཀྲ་ཤིས་ཆེན་མོའི་སྐབས་༧སྐྱབས་རྗེ་སྨན་རིའི་
ཁྲི་འཛིན་རིན་པོ་ཆེ་མཆོག་གིས་མཐོང་བ་རྒྱུད་པའི་ཕྱག་ལེན་འདི་དག་དང༌། བོན་མདོ་སྔགས་སེམས་གསུམ་གྱི་དབང་ལུང་མན་ངག་དང་བཅས་པའི་རྒྱུད་རིམ་རྣམས་གཞོན་སྐྱེས་ཚོས་མ་འོངས་པར་བོད་གངས་ཅན་ཞིང་དུ་ཁྱབ་སྤེལ་ཐུབ་པ་དགོས་རྒྱུ་དང༌། ལྷག་ཏུ་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་གིས་ཡང་ནས་ཡང་དུ་ནན་གསུང་གནང་དོན་ལྟར་བོད་གངས་ཅན་པའི་མི་རབས་གསར་པ་རྣམས་ཀྱིས་རིགས་གཅིག་རྐང་འཛིན་མཐར་ཕྱིན་པ་གནང་སྟེ་བོད་པ་ཡིན་པའི་གོ་ཆོད་པ་བྱ་དགོས་སྐོར། ང་ཚོ་སྐྱབས་བཅོལ་བ་རྣམས་སོ་སོའི་སྡོད་གནས་ནས་གོམ་པ་བཅུ་ཕྲག་ཁ་ཤས་ལས་སྤོ་མ་དགོས་པ་སྐད་ཡིག་དང་ཡུལ་གོམས་གཤིས་ལུགས་གང་ཡང་མི་མཐུན་ཞིང་ས་ཆ་སྦར་མཐིལ་ཙམ་ཡང་མེད་པའི་མི་ཡུལ་ཤིག་ཏུ་གནས་ཡོད་པ་འདི་ཉིད་ངོས་ཟིན་པའི་ཐོག་ཡུལ་མི་དང་མཐུན་ལམ་སྔར་ལྷག་དང་བཀའ་དྲིན་རྗེས་དྲན་གནང་དགོས་པ་སོགས་ཀྱི་བཀའ་སློབ་བསྩལ་གནང་མཛད། སྐབས་དེ་དང་བསྟུན་ནས་བོན་སྒོ་རྩོམ་སྒྲིག་ཚོགས་པས་པར་བསྐྲུན་གནང་བའི་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བརྒྱད་ཅུའི་དགུང་སྟོན་ལ་ཕུལ་བའི་ཤིས་རྩོམ་བདམས་བསྒྲིགས་༼དཔོན་གསས་མཆོད་པའི་གཤེན་དབྱངས་༽ཞེས་པའི་དཔེ་དེབ་སྟོད་སྨད་བར་གསུམ་ཅན་ཞིག་དབུ་འབྱེད་གནང་བ་མ་ཟད། ༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ཞབས་པད་བསྐལ་བརྒྱར་བརྟན་ཅིང་གསང་གསུམ་མཛད་པའི་འཕྲིན་ལས་མི་འགྱུར་གཡུང་དྲུང་གི་ངོ་བོར་གནས་པའི་ཕྱིར། བོད་གཞིས་བྱེས་གཉིས་ཀྱི་གཡུང་དྲུང་བོན་གྱི་ལྷ་སྡེ་མི་སྡེ་ཡོངས་ནས་ཤེས་རབ་སྨྲ་བའི་སེང་གེའི་ཚེ་སྒྲུབ་གཡུང་དྲུང་ཚེ་དཔག་མེད་ཀྱི་ཆོ་གའི་སྒོ་ནས་བརྟན་བཞུགས་རྒྱས་འབུལ་ཞུས་ཡོད་པ་རེད།
ང་རང་ནང་པ་ཞིག་ཡིན་ན་ཡང་གྲུབ་མཐའ་ཕྱོགས་འཐེན་གྱི་གྲིབ་མ་ནག་པོས་དུལ་ཙམ་ཡང་གོས་མེད། གྲུབ་མཐའ་ཕྱོགས་འཐེན་ནི་མི་རིགས་དང་ཆོས་ལུགས་ཀྱི་ཕམ་ཁ་ཆེན་པོ་ཞིག་ཡིན་པ་འདས་བའི་ལོ་རྒྱུས་ཀྱིས་གསལ་བོ་བཟོས་ཡོད། དེའི་དབང་གིས་ནམ་ཡང་ངས་དེའི་ཕྱོགས་ནས་ཞབས་འདྲེན་ཅུང་ཙམ་གྱང་མི་ཞུ་བའི་དམ་བཙའ་ཡོད། འདིར་བརྗོད་བྱ་གཙོ་བོ་ནི་བོན་གྲོགས་ཡོང་ལ་རྟེན་འབྲེལ་ཞུ་བ་ཡིན