ལི་ཐང་ལ་དམག་མི་བཞི་སྟོང་ཡོང་ནས་མི་མང་ཚོགས་འདུ་འཚོགས་དགོས་པའི་བཀའ་བཏང་ཡོད་འདུག
དེ་རིང་དགའ་ལྡན་བྱང་རྩེ་གྲྭ་ཚང་ཕ་ར་ཁང་ཚན་གྱི་གྲྭ་བློ་བཟང་ཆོས་སྐྱབས་ཀྱིས་གནས་ཚུལ་སྤྲད་པ་ལྟར་ན། ཚེས་ ༡༥ དང་ ༡༦ གི་ཉིན་གཉིས་ཀྱི་རིང་ལི་ཐང་རྫོང་ཐོག་ཏུ་བོད་མི་ཚོས་ཞི་རྒོལ་བྱས་རྗེས་ལི་ཐང་གི་ས་གནས་གང་སར་ཧ་ཅང་དམ་དྲག་བྱས་ཡོད་པ་དང༌། ཚོང་ཁང་དང་སྨན་ཁང༌། ཟ་ཁང་སོགས་ཀྱི་སྒོ་རྒྱག་དགོས་པའི་བཙན་བཀའ་བཏང་ཡོད་འདུག ཉིན་འདི་གཉིས་ཀྱི་ནང་དུ་བོད་མི་ཞི་རྒོལ་བའི་ཁྲོད་ནས་མི་ ༢༠ ལྷག་བཟུང་ཡོད་པ་དང༌། དེའི་ནང་གི་བོད་མི་ ༡༦ ནི་འབའ་ཐང་རྫོང་ཁོངས་ནས་ལི་ཐང་ས་ཁུལ་ལ་གནས་སྤར་བའི་གད་མོ་གྲོང་སྡེ་ཞེས་པ་ནས་ཡིན་འདུག ཚེས་ ༡༩ ཉིན་འབའ་ཐང་རྫོང་གི་ཉེན་རྟོག་པས་དམག་མི་སྟོང་ཕྲག་བཞི་ཁྲིད་ནས་ལི་ཐང་རྫོང་ཐོག་ལ་ཡོང་ཡོད་པ་དང༌། འབའ་རྫོང་ནས་གནས་སྤོར་བའི་ཁྱིམ་ཚང་ཡོད་ཚད་ཚེས་ ༢༠ ཉིན་ཚོགས་འདུ་ལ་ཡོང་དགོས་པའི་བཀའ་བཏང་ཡོད་འདུག་ལ། ཚོགས་འདུའི་ནང་དོན་ག་རེ་ཡིན་མིན་གང་ཡང་གསལ་བཤད་བྱས་མེད་ཀྱང༌། གལ་ཏེ་མི་མང་གི་རྣམ་འགྱུར་ཡག་པོ་ཡོད་ན་གནས་ཚུལ་ལྷག་གི་མ་རེད་ཅེས་ཉེན་བརྡ་བཏང་ཡོད་འདུག དེ་རིང་ས་ཁུལ་དེ་གར་ཁ་པར་འཕྲོད་ཐབས་མེད་པས་གནས་ཚུལ་ཅི་བྱུང་གི་སྐོར་ཤེས་རྟོགས་ཐུབ་མི་འདུག ཉིན་ཤས་སྔོན་ནས་འབའ་ཐང་རྫོང་དང་ལི་ཐང་རྫོང་གི་བར་གྱི་རླངས་འཁོར་དང་འགྲིམ་འགྲུལ་ཡོད་ཚད་བཀག་ཡོད་འདུག
ང་ཚོའི་མི་རིགས་འདི་དུས་ཇི་སྲིད་བར་རྒྱ་དམག་གིས་བསྐོར་ནས་གནས་རྒྱུ་ཡིན་ནནམ།
ཕ་ཡུལ་ནི་དམག་ས་འདྲ་ལ།ཕ་མ་སྤྲུན་མཆེད་རྣམས་ནི་གཡུལ་ངོར་ལྷག་པའི་ཉམ་ཆུང་གི་ཚེ་སྲོག་མ་ཡིན་ནམ།