རྒྱ་རིགས་བུད་མེད་རྩོམ་པ་པོ་ཞིག་གི་གཏམ་བརྒྱུད།

བོད་པས་རང་བཙན་བརྩད་ན་འདྲ་ལ། དབུ་མའི་ལམ་བརྩད་ཀྱང་ཆོག མཐའ་མའི་ཐག་གཅོད་ཀྱི་དབང་ཆ་དེ་བོད་མི་རིགས་ལ་ཡོད་པ་ཞིག་ལས་རྒྱ་ནག་གཞུང་དམངས་གཉིས་ཀྱིས་ཐེ་གཏོགས་བྱེད་ཆོག་པ་ཞིག་མ་རེད། བོད་པར་བདེ་སྐྱིད་ཡོད་པའི་ལམ་ཁ་གང་ཞིག་བདམས་ཀྱང༌། ངས་དེ་ལ་མཐའ་གཅིག་ཏུ་རྒྱབ་སྐྱོར་བྱེད་ཀྱིན་ཡོད་ཟེར།

ཁ་སང་གཟའ་སྤེན་པའི་ཕྱི་དྲོ་ཆུ་ཚོད་ ༥ སྟེང་བཞུགས་སྒར་ངྷ་རམ་ས་ལའི་བདེ་དོན་ཚོགས་ཁང་དུ། བོད་དོན་གླེང་བ་ཞུ་བའི་གོ་སྒྲིག་འོག རྒྱ་ནག་སྐམ་ས་ཆེན་མོའི་རྒྱ་རིགས་བུད་མེད་རྩོམ་པ་པོ་ལྕམ་སྐུ་ཀྲུའུ་རེའི་ལགས་ཀྱིས་མོ་རང་གིས་བོད་ཐོག་ལ་འཛིན་པའི་ལྟ་བ་དང་ཉམས་མྱོང་སྐོར་ལ་གཏམ་བཤད་དང༌། གསན་མཁན་རྣམ་པའི་དྲི་བར་ལན་འདེབས་བྱས་ཡོད། སྐབས་དེར་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་རྒྱ་རིགས་བུད་མེད་རྩོམ་པ་པོ་ཁོང་ངོ་སྤྲོད་བྱས་དོན། རྒྱ་རིགས་རྩོམ་པ་པོ་ཀྲུའུ་རེའུ་ལགས་ནི་བོད་དོན་ལ་རྒྱབ་སྐྱོར་བྱེད་མཁན་ཞིག་ཡིན་པ་མ་ཟད། སྔོན་མ་ནས་བོད་ཀྱི་བུད་མེད་རྩོམ་པ་པོ་འོད་ཟེར་ལགས་ཀྱི་ལས་རོགས་རེད། གཞུང་གི་ལས་ཀའི་ཞོར་དུ་རྩོམ་ཡིག་མང་པོ་བྲིས་ཤིང༌། མཐར་རྒྱ་ནག་གཞུང་དང་ལྟ་བ་མ་མཐུན་སྟབས། ཕྱི་རྒྱལ་ལ་བཙན་བྱོལ་དུ་ཕྱིན་ཏེ་ད་སྐབས་ཁེ་ན་ཌར་བཞུགས་ཡོད་པ་རེད། མོ་རང་གིས་རྒྱ་ཡིག་ཐོག་བོད་དོན་དང་འབྲེལ་བའི་རྩོམ་ཡིག་སྤེལ་ཏེ། རྒྱ་རིགས་ཁྲོད་བོད་དོན་ལ་གོ་རྟོགས་སེལ་རྒྱུར་ནུས་པ་ཆེན་པོ་ཐོན་ཡོད།  ཅེས་ངོ་སྤྲོད་བྱས་སོང༌།

དེ་རྗེས་བོད་དོན་གླེང་བའི་ཚོགས་མིའི་སྐད་སྒྱུར་འོག རྒྱ་རིགས་བུད་མེད་རྩོམ་པ་པོ་ཀྲུའུ་རེའུ་ལགས་ཀྱིས་གཏམ་བཤད་གནང་དོན། གྲོགས་པོ་བསྟན་འཛིན་བརྩོན་འགྲུས་དང་བོད་ཀྱི་གཞོན་ནུ་ཚོགས་པ་སོགས་ངས་སྔོན་མ་ནས་གོ་མྱོང་ཡོད་ཀྱང༌། སྐབས་དེར་འཇིགས་སྐུལ་རིང་ལུགས་རྐྱང་རྐྱང་ཡིན་རྒྱུ་རེད་དྲན་ཡོད། རྗེས་སུ་ང་རང་འདིར་འབྱོར་ཏེ་དངོས་སུ་འབྲེལ་འདྲིས་བྱུང་སྐབས། ང་རང་གི་སྔོན་ཆད་ཀྱི་བསམ་ཚུལ་ཚང་མ་ནོར་འཁྲུལ་རེད་འདུག དེ་རིང་འདིར་ང་རང་གི་མྱོང་ཚོར་འགའ་ཞིག་ཞུ་འདོད་བྱུང་ལ། ཁྱེད་ཚོར་དྲི་བ་གང་ཞིག་ཡོད་ཀྱང་ཐད་ཀར་དྲིས་ཆོག ང་རང་སྐྱེས་ས་རྒྱ་ནག་བྱང་ཤར་ས་ཁུལ་ཡིན། ཆུང་དུས་ངའི་ཕ་ཡུལ་དུ་རྟག་པར་ཚོགས་འདུ་ཞིག་འཚོགས་ཀྱིན་འདུག ཚོགས་འདུ་དེའི་སྟེང་སྔོན་མ་བོད་བཅིངས་འགྲོལ་མ་བཏང་གོང་གི་བྲན་གཡོག་ཅིག་གིས་བོད་པའི་སྤྱི་ཚོགས་རྙིང་པའི་སྐོར་བཤད་ཀྱིན་ཡོད། སྤྱི་ཚོགས་རྙིང་བའི་རོ་སྐྱུར་མོ་ལ་དགག་རྒྱག་དང༌། སྤྱི་ཚོགས་གསར་བའི་རོ་མངར་མོ་ལ་དགའ་ཞེན་བྱ་དགོས་ཟེར་གྱིན་ཡོད། སྤྱི་ཚོགས་རྙིང་བའི་སྐབས་ཀྱི་བཀས་བཀོད་རྒྱུད་འཛིན་པ་དང་ཞིང་བྲན་ལམ་ལུགས། ཕྱུག་བདག་གྲལ་རིམ་སོགས་ཀྱིས་མང་ཚོགས་ལ་སྡུག་པོ་གཏོང་སྟངས་དང༌། མང་ཚོགས་ལ་ཟ་མ་སྐྱུར་མོ་སྤྲད་དེ། འདི་ནི་བོད་ནང་གི་བྲན་གཡོག་ཚོའི་ཟ་མ་རེད་ཟེར་གྱིན་ཡོད། སྐབས་དེར་ང་ཚོ་ཚང་མས་སྐད་ཆ་དེ་ལ་ཡིད་ཆེས་བྱས་ཏེ། ཏཱ་ལའི་བླ་མ་ཟེར་བ་དེ་མིའི་པགས་པ་བཤུ་མཁན་གྱི་སྡིག་ཆེན་ཞིག་ཡིན་པའི་ཚོར་སྣང་བྱུང་སོང༌།

ལོ་རབས་བརྒྱད་ཅུའི་ནང་རྒྱ་ནག་ཅུང་གུ་ཡངས་སུ་ཕྱིན་སྐབས། བོད་ནང་ལོ་བདུན་ཟེར་བ་སོགས་ཀྱི་ཕྱི་རྒྱལ་གྱི་རྩོམ་ཡིག་འགའ་རེ་ཀློག་རྒྱུ་བྱུང༌། རྩོམ་ཡིག་གི་ནང་དོན་དེ་འདྲའི་ཡིད་འགུག་པ་ཞིག་མིན་ཡང༌། བོད་ཀྱི་ཡུལ་ལྗོངས་དང༌། རང་བྱུང་ཁོར་ཡུག་བྲིས་ཡོད་པ་དེ་དག་གིས་ཡིད་འཕྲོག་པ་ཞིག་བྱུང་སོང༌། སྤྱི་ལོ་ ༡༩༩༧ ལོར་ང་བོད་ལ་ཐོག་མར་ཕྱིན་པ་ཡིན། སྐབས་དེར་ཨ་མདོ་མཚོ་སྔོན་རྩྭ་ཐང་བརྒྱུད་དེ་འགྲོ་སྐབས། ཕྱི་རྒྱལ་གྱི་རྩོམ་ཡིག་ནང་བཀོད་པའི་མཛེས་སྡུག་ལྡན་པའི་རྩྭ་ཐང་དང་འབྲོག་པའི་སྦྲ་གུར་མཐོང་བས། ང་རང་རླངས་འཁོར་ལས་བབས་ཏེ་འབྲོག་པའི་སྦྲ་གུར་གྱི་ཕྱོགས་སུ་སོང་བ་ཡིན། འབྲོག་པ་ཚོས་ཡུན་རིང་མ་ཐུག་པའི་གཉེན་ཉེ་ཞིག་སླེབས་པ་དང་འདྲ་བར་ངའི་ཕྱོགས་སུ་ཡོང་སྟེ། དགའ་དགའ་སྤྲོ་སྤྲོའི་མགྲོན་བསུ་བྱས་སོང༌། ང་རང་སྦྲ་གུར་ནང་འཛུལ་སྐབས། ཁོ་ཚོའི་འཚོ་བ་ཧ་ཅང་སྐྱོ་བོ་ཡིན་པའི་ཚོར་སྣང་བྱུང་ལ། ཉལ་ཆས་འགའ་རེ་ལས་སྦྲ་ནང་དུ་བཅའ་དངོས་སྤུས་གཙང་ཞིག་མཐོང་རྒྱུ་མི་འདུག ཁོ་ཚོས་ཉལ་ཆས་དེ་དག་སར་བཏིང་སྟེ། ང་དེའི་སྟེང་སྡོད་དུ་བཅུག་ཅིང༌། མར་ཆེན་པོ་འཕངས་ཏེ་ཇ་བླུད་སོང༌། སྐབས་དེར་བོད་པ་ཚོ་སེམས་པ་བཟང་བ་དང་རྒྱ་གུང་ཁྲན་གྱིས་བོད་བཅིངས་འགྲོལ་བཏང་ཡོད་ཟེར་ཡང༌། བོད་པའི་གནས་སྟངས་ཧ་ཅང་སྐྱོ་བ། མང་ཚོགས་ཀྱི་འཚོ་བ་འདྲ་མཉམ་མིན་པ་བཅས་ཀྱི་སེམས་ཚོར་བྱུང་སོང༌།

དེ་རྗེས་སྐུ་འབུམ་དགོན་པར་ཕྱིན་ཏེ་གྲྭ་བ་ཞིག་གི་ནང་འཛུལ་སྐབས། ཕོ་བྲང་པོ་ཏ་ལ་དང་དེའི་སྟེང་འཇའ་ཤར་ཡོད་པ། མདུན་དུ་དགེ་འདུན་པ་ཞིག་འཛུམ་དམུལ་ལེར་བཞུགས་ཡོད་པའི་དཔར་ཆེན་པོ་ཞིག་མཐོང་སོང༌། གྲྭ་བ་ཞིག་གིས་དཔར་གྱི་སྟེང་གི་དགེ་འདུན་པ་དེ་༧རྒྱལ་བ་རིན་པོ་ཆེ་རེད་ཅེས་འགྲེལ་བཤད་བྱས་སྐབས། ང་རང་གི་སེམས་ལ་ཏཱ་ལའི་བླ་མ་ཟེར་བ་དེ་མིའི་པགས་པ་བཤུ་མཁན་ཞིག་ཨེ་ཡིན་ནམ་སྙམ་ཞིང༌། དུས་དེ་ནས་བཟུང་རྒྱ་གུང་ཁྲན་གྱིས་བཤད་པའི་སྐད་ཆ་དག་ལ་དོགས་པ་དང༌། ཞིབ་འཇུག་བྱ་རྒྱུའི་འདུན་པ་འཁོར་སོང༌། དེ་རྗེས་ང་རང་ལྷ་སར་སྐྱོད་སྐབས་སྔོན་མའི་སྐུ་དྲག་ཕོ་ལྷ་བ་ཟེར་བའི་གཞིས་ཀར་ཕྱིན་པ་ཡིན། དེ་ནི་གསར་བརྗེ་སློབ་གསོ་སྤྲོད་སའི་འགྲེམས་སྟོན་ཁང་ཞིག་ཆགས་འདུག གཞིས་ཀ་དེའི་ནང་འཛུལ་མ་ཐག་ཕོ་ལྷ་བའི་དཔར་ཞིག་མཐོང་སོང༌། དཔར་དེའི་སྟེང་ཕོ་ལྷ་བ་ཟེར་བ་དེ་ཧ་ཅང་གཟི་བརྗིད་ཆེན་པོ་ཅན་ཞིག་འདུག ལྷ་སའི་རྒྱ་ནག་གི་མགོ་ཁྲིད་ཚོ་དང༌། བོད་རིགས་ལས་བྱེད་མཐོ་བོ་ཚོས་ང་དགུའི་གོང་གི་གནས་སྟངས་ལ་ཁ་རྡུང་གཏོང་གིན་འདུག་མོད། ང་རང་གིས་གུང་ཁྲན་ཏང་གིས་བོད་པར་སྡུག་པོ་ཅི་ཙམ་བཏང་ཡོད་པ་དང༌། བོད་རིགས་མང་ཚོགས་ད་ལྟའི་འཚོ་བར་འདོད་པ་མེད་པ་ཤེས་སོང༌།

སྐབས་དེ་ནས་ང་ལ་བོད་སྐོར་གྱི་རྩོམ་ཡིག་འབྲི་འདོད་སྐྱེས་སོང༌། བོད་ནང་སྡོད་སྐབས་བྱ་བའི་ཞོར་དུ་དེབ་ཅིག་བཏོན་ཡོད་མོད། བོད་ཀྱི་ཆོས་ལུགས་དང་རིག་གཞུང་སྐོར་བྲིས་ཡོད་པ་མང་པོ་ཞིག་མེད་པ་བཟོས་འདུག སྐབས་དེར་བོད་རིགས་རྩོམ་པ་པོ་ཞིག་གིས་ང་ལ་ཁྱོད་ཀྱིས་བོད་སྐོར་ད་དུང་ཞེ་དྲག་ཧ་གོ་མི་འདུག་ཟེར་ནས། བོད་ཀྱི་རིག་གཞུང་གི་གནད་འགག་ཁ་ཤས་ངོ་སྤྲོད་གནང་བ་དེས་ང་རང་ཡིད་འཕྲོག་པ་ཞིག་བྱུང་སོང༌། དེ་དང་མཉམ་དུ་བོད་པའི་ཡུལ་སྲོལ་གོམས་གཤིས་དང་སྲོལ་རྒྱུན་རིག་གཞུང་ལ་གོ་རྟོགས་ཡག་པོ་ཞིག་ལེན་རྒྱུར་ད་དུང་ལམ་ཐག་རིང་བ་དང༌། བོད་རྒྱ་མི་རིགས་གཉིས་བར་ཕན་ཚུན་རྒྱུས་ལོན་དང་གོ་རྟོགས་སེལ་རྒྱུར་ད་དུང་གང་འཚམ་ཡོད་པའི་ཚོར་སྣང་བྱུང༌། འོན་ཀྱང༌། རྒྱ་རིགས་མང་པོར་ང་བཞིན་བོད་པར་རྒྱུས་ལོན་གྱི་གོ་སྐབས་རག་ན། བོད་པའི་རིག་གཞུང་ལ་དགའ་ཞེན་དང༌། བོད་པ་སྲུང་སྐྱོབ་ཀྱི་འདུ་ཤེས་ཤིག་ཏན་ཏན་སླེབས་གི་རེད། 

ང་རང་ཉེ་ཆར་ཏཱ་ལའི་བླ་མར་ཞལ་མཇལ་སྐབས། ཁོང་ནི་བྱམས་དང་སྙིང་རྗེ་ཆེན་པོ་ལྡན་པའི་བོད་པའི་རྒྱལ་བོ་ངོ་མ་ཞིག་དང༌། ལྷག་པར་དུ་བག་ཡོད་ཞི་དུལ་ཅན་གྱི་སྐྱེས་བུ་དམ་པ་ཞིག་ཡིན་པའི་ཚོར་སྣང་བྱུང་ལ། ཁོང་ནི་བོད་ཕྱི་ནང་གཉིས་གཙོས་པའི་འཛམ་གླིང་ཡོངས་ཀྱི་གནས་ཚུལ་ལ་རྒྱུས་མངའ་ཆེ་བའི་རླབས་ཆེན་ཞིག་རེད། དཔེ་མཚོན་ཆུང་ཆུང་ཞིག་ཞུས་ན། ང་ཚོས་མཉམ་དུ་བཀའ་མོལ་གནང་སྐབས། གཟིམ་ཤག་ཅུང་གྲང་མོ་འདུག ལས་ཀ་བྱེད་མཁན་དང་སྐུ་སྲུང་བ་མང་པོ་ཡོད་བཞིན་དུ། ཏཱ་ལའི་བླ་མ་ཁོ་རང་བཞེངས་ནས་ཕར་སོང་སྟེ། ཚ་གློག་བཏང་སོང་ལ། བར་སྐབས་ཤིག་ལ་ཅུང་ཚ་དྲག་སྟབས། ཡང་བསྐྱར་ཕར་སོང་སྟེ་གློག་ཤུགས་ཆུང་དུ་བཏང་སོང༌། མི་སུ་ཞིག་ཡིན་རུང་སེམས་འགུལ་ཐེབས་པ་ཞིག་རེད། གནས་སྟངས་འདི་ཧུའུ་ཅིན་ཐའོ་ཡིས་མཐོང་ན་སེམས་ཚོར་གང་འདྲ་སླེབས་སྲིད་དམ། བོད་པས་རང་བཙན་བརྩད་ན་འདྲ་ལ། དབུ་མའི་ལམ་བརྩད་ཀྱང་ཆོག མཐའ་མའི་ཐག་གཅོད་ཀྱི་དབང་ཆ་དེ་བོད་མི་རིགས་ལ་ཡོད་པ་ཞིག་ལས་རྒྱ་ནག་གཞུང་དམངས་གཉིས་ཀྱིས་ཐེ་གཏོགས་བྱེད་ཆོག་པ་ཞིག་མ་རེད། བོད་པར་བདེ་སྐྱིད་ཡོད་པའི་ལམ་ཁ་གང་ཞིག་བདམས་ཀྱང༌། ངས་དེ་ལ་མཐའ་གཅིག་ཏུ་རྒྱབ་སྐྱོར་བྱེད་ཀྱིན་ཡོད། ཅེས་བརྗོད་བྱུང༌།