དགོན་བདག་བྲོས་བྱོལ་དུ་ཕེབས་པ།

རྒྱ་གཞུང་གིས་ལོ་གསར་སྐབས་འདིར་གསེར་རྟ་རྒྱའུ་གདོང་དགོན་པར་ལོ་གསར་འཚོགས་དགོས་པའི་བཙན་བཀའ་བཏང་སྟབས། གྲྭ་པ་རྣམས་རང་རང་གི་ནང་དུ་ལོག་ཡོད་པ་དང་། དགོན་བདག་མཆོག་བྲོས་བྱོལ་དུ་ཕེབས་ཡོད་ཚུལ་འདུག

མདོ་སྟོད་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་འདི་གར་གནས་ཚུལ་སྤྲད་པ་ལྟར་ན། ཟླ་འདིའི་ཚེས་ ༡༧ ཉིན་གསེར་རྟ་རྫོང་ཁོངས་གསེར་སྨད་རྒྱའུ་གདོང་དགོན་དུ་རྒྱ་གཞུང་གིས་ལས་བྱེད་པ་ཡོང་ནས་ལོ་གསར་གཏོང་དགོས་པ་དང༌། གྲྭ་མང་ལ་ལོ་གསར་གཏོང་ཆེད་རྒྱ་སྒོར་ལྔ་སྟོང་སྤྲོད་རྒྱུ་དང༌། དགོན་བདག་སྤྲུལ་སྐུ་ཤེས་རབ་བློ་ལྡན་ལགས་སུ་ཁྱེད་རང་གིས་རྒྱའུ་གདོང་དགོན་པར་ ལོ་གསར་གཏོང་ཐུབ་པ་ཞིག་གྱིས་དང་ཟླ་རེ་བཞིན་རྒྱ་སྒོར་སུམ་བརྒྱ་རེའི་ཟླ་ཕོགས་ སྤྲད་རྒྱུ་ཡིན་ཚུལ་བརྗོད་ཡོད་ཀྱང༌། གྲྭ་མང་ཡོངས་ཀྱིས་ལོ་སར་གཏོང་བྱེད་དུ་སྤྲད་པའི་རྒྱ་སྒོར་༥༠༠༠ དང་སྤྲུལ་སྐུ་ལ་ཟླ་རེ་བཞིན་སྒོར་༣༠༠ རེ་ཟླ་ཕོགས་སྤྲད་རྒྱུ་བཅས་ལ་དང་ལེན་མ་བྱས་པར་བརྟེན། དགོན་པའི་སྒྲུབ་མཆོད་ཉིན་བཅོ་ལྔའི་རིང་འཚོགས་སྲོལ་ཡོད་པ་བཞིན་འཚོགས་ནས་ དངོས་གཞིའི་གར་འཆམ་འཆམས་མ་བཅུག་པར་མཚམས་འཇོག་བྱེད་དགོས་བྱུང་ཡོད་པ་དང༌། དགོན་པའི་གྲྭ་པ་རྣམས་ཀྱིས་ལོ་གསར་གཏོང་རྒྱུ་མིན་ཞེས་རང་སར་གྲོལ་ནས་ནང་དུ་ལོག་ཡོད་པ་མ་ཟད། དགོན་བདག་སྤྲུལ་སྐུ་ཤེས་རབ་བློ་ལྡན་མཆོག་ལ་ཁྱེད་ཀྱིས་རྒྱ་གཞུང་གིས་བཀའ་དང་ ལེན་མ་བྱས་པར་བརྟེན། དགོན་བདག་གི་ཐོབ་ཐང་དང༌། སྤྲུལ་སྐུའི་མིང་མེད་པ་བཟོ་རྒྱུ་དང༌། ཕྱི་བསྐྱོད་ལག་འཁྱེར་སྔར་ནས་སྤྲད་ཟིན་པ་དེ་དག་ཀྱང་ཕྱིར་བསྡུ་བྱེད་རྒྱུ་ཡིན་ ལུགས། དེ་ལྟར་དང་ལེན་བྱས་ན་གོང་གསལ་ལྟར་ཐོབ་ཐང་དམིགས་བསལ་སྤྲོད་རྒྱུ་ཡིན་པ་མ་ཟད། ཁོང་གིས་རྒྱག་འཆར་ཡོད་པའི་བཤད་གྲྭ་དེ་ལའང་ཆོག་མཆན་སྤྲད་རྒྱུ་ཡིན་ཚུལ་བརྗོད་ ཡོད་ཀྱང༌། རྒྱ་གཞུང་གིས་ག་རེ་བྱེད་དང་མི་བྱེད་ཁྱེད་རང་ཚོའི་དབང་ཆ་རེད། ཕྱི་ལོ་༢༠༠༨ ལོར་མཚོན་ན་བོད་ཡ་ང་བའི་རྐྱེན་ཆག་མང་པོ་ཞིག་བྱུང་ཡོད་པས། མྱ་ངན་དང་མུན་ནག་གི་ལོ་ཞིག་ཡིན་པར་བརྟེན་ལོ་གསར་གཏོང་རྒྱུའི་སྐོར་ལ་ངས་ནུས་ པ་འདོན་ཐུབ་ཐབས་ཡོད་པ་མ་རེད་ཅེས་གསུངས་ཡོད་པ་དང༌། འབྲེལ་ཡོད་རྒྱ་གཞུང་གི་ལས་བྱེད་པས་ཁྱེད་རྒྱ་གཞུང་གི་ཁྲིམས་ལུགས་གང་མང་དང་ འགལ་ཡོད་པས་རང་ཚོད་འཛིན་དགོས་ཚུལ་བཤད་པ་སོགས་ཁོང་རྒྱ་གཞུང་གིས་འཛིན་བཟུང་ བྱེད་ལ་ཉེ་བར་བརྟེན། བྲོས་བྱོལ་དུ་ཕེབས་དགོས་བྱུང་ཡོད་འདུག ༢༠༠༨ ལོར་རྒྱལ་སྤྱིའི་ཨོ་ལིམ་པིག་ལུས་རྩལ་འགྲན་འཚོགས་ལ་རྒྱབ་སྐྱོར་དགོས་ཚུལ་ བརྗོད་པར་སྤྲུལ་སྐུ་ཤེས་རབ་བློ་ལྡན་མཆོག་གིས་དང་ལེན་མ་བྱས་པར་བརྟེན། འཛིན་བཟུང་བྱེད་རྒྱུའི་བཀའ་བཏང་བར་བརྟེན་ལོ་སྔོན་མའང་ཉེན་ཡོལ་ཆེད་བྲོས་ བྱོལ་དུ་ཕེབས་དགོས་བྱུང་ཡོད་པ་དང༌། ཉེ་བའི་ཟླ་ཤས་ཙམ་ནས་ཅུང་ལྷོད་ཡང་གི་རྣམ་པ་ལྟ་བུ་མངོན་པས་ཕྱིར་དགོན་པ་རུ་ སྒྲུབ་མཆོད་དང་སྟབས་བསྟུན་ནས་ཕེབས་པ་ཡིན་འདུག་ཅིང༌། དགོན་པ་འདི་ནི་རབ་བྱུང་བཅུ་གཅིག་པའི་ནང་དུ་རི་ཁྲོད་ཙམ་ཞིག་ལས་མེད་ཀྱང༌། ཕྱིས་སུ་གསེར་པ་ཡེ་ཤེས་སེང་གེས་བཀའ་ལུང་ལྟར་འདུ་ཁང་དང་ལྷ་ཁང་སོགས་གསར་ བཞེངས་ཞུས་པ་ཡིན་འདུག་པ་དང༌། ཆོས་བརྒྱུད་སྔ་འགྱུར་རྙིང་མ་དཔལ་ཡུལ་བའི་དགོན་ལག་ཅིག་ཡིན་ཞིང༌། ད་ལྟའི་ཆར་རྒྱའུ་གདོང་དགོན་པ་ལ་དགེ་འདུན་པ་གྲངས་༡༢༠ ཙམ་ཡོད་འདུག།