ལོ་གསར་སྐབས་ཀྱི་ལྷ་ས།

བོད་ཀྱི་ལོ་སར་ལ་ཉེ་བའི་སྐབས་འདིར་ལྷ་སར་དམིགས་བསལ་གྱིས་དམ་དྲག་དང་དམག་མི་འབོར་ཆེན་གཏོང་གི་ཡོད་པ་མ་ཟད་རྒྱ་ནག་གིས་བོད་ས་ཡོངས་དང༌། ལྷག་པར་དུ་ལྷ་ས་དང་རང་སྐྱོང་ལྗོངས་སུ་དམ་དྲག་ཤུགས་ཆེར་བྱེད་བཞིན་ཡོད་པ་མ་ཟད་དམག་མི་དང་ཉེན་རྟོག་པ། དྲག་ཆས་ཉེན་རྟོག་པ། སྤྱི་བདེ་མི་སྣ། ཏང་གི་ཐད་ཀའི་འགན་ཡོད་ལས་བྱེད་ཚང་མས་ཁ་བྲལ་བའི་རིགས་མཐོང་ཚད་ཕམ་པར་རྒྱོབ་ཅེས་བཀའ་རྒྱ་ཞིག་ཀྱང་བཏང་ཡོད་པ་རེད། 

ལོ་སར་ལ་ཉི་མ་གཅིག་གཉིས་ལས་མེད་པའི་སྐབས་འདིར་ལྷ་སའི་ཁྲོམ་དང་བར་སྐོར་གྱི་གཡས་གཡོན་བདེ་འཇགས་དང་ཡང་ན་དམིགས་བསལ་གྱི་དམ་དྲག་འདྲ་ཡོད་མེད་སྐོར་ལྷ་སའི་བར་སྐོར་དུ་མགྲོན་ཁང་གཉེར་བའི་འབྲེལ་ཡོད་མི་སྣ་ཞིག་ལ་ཁ་པར་གྱི་ལམ་ནས་དྲིས་པར་ཁོང་གིས་བརྗོད་དོན། དེ་རིང་ང་ཁྲོམ་དུ་སོང་བ་ཡིན། ཁ་སང་ལ་བལྟས་ན་དེ་རིང་ཁྲོམ་སྲང་གི་དམག་མི་མང་དུ་ཕྱིན་འདུག ཁོང་ཚོས་དམིགས་བསལ་གྱིས་ལོ་སར་སྐོར་ལ་དམ་དྲག་བྱེད་ཀྱི་ཡོད་པའི་རྣམ་པ་སྟོན་གྱིན་མི་འདུག་སྟེ། རྩེད་ཐང་དང་ཁྲོམ་རྭ་ན་ཡོད་པའི་དམག་མི་དེ་ཚོ་ལྷོད་ལྷོད་ཅིག་འདུག་ཐུབ་ཀྱི་མི་འདུག ཕར་བལྟས་ཚོད་ལ་ཁོང་ཚོས་ཅི་ཞིག་བོར་སོང་བའི་རྣམ་པ་འདྲ་བོ་འདུག ཁོང་ཚོས་ཅི་ཞིག་འཛིན་ཐུབ་ཀྱི་མེད་པའི་རྣམ་པ་འདྲ་བོ་འདུག གང་ལྟར་དམག་མི་དེ་ཚོ་སྤྱིར་བཏང་གི་གྲོང་ཁྱེར་སྲུང་སྐྱོབ་བྱེད་པའི་དམག་མི་འདྲ་བོ་མི་འདུག་ཟེར།

མི་མང་གི་ངོས་ནས་ལོ་སར་གྱིན་ཡོད་མེད་སྐོར་དྲིས་པར། མི་མང་གིས་ལོ་སར་གྱི་མིན་ཟེར་ནས་དེ་འདྲ་བྱེད་ཀྱིན་འདུག ནམ་རྒྱུན་ཡིན་ན་ལོ་སར་གྱི་ཡོ་ཆས་མང་བོ་ཉོ་གི་ཡོད་པ་རེད་དེ། ད་ལོ་དེ་འདྲ་བྱེད་ཀྱི་མི་འདུག་ཟེར། ཡང་ལྷ་ས་གཙོས་དགོན་སྡེ་ཁག་གི་བདེ་འཇགས་ཐད་ཁོང་གིས་བརྗོད་དོན། དགོན་སྡེ་ཁག་ལ་དམ་དྲག་བྱེད་ཀྱིན་ཡོད་པ་རེད་ཟེར་གྱིན་འདུག ང་དགོན་སྡེ་ཁག་ལ་མཆོད་མཇལ་ལ་མ་སོང་བར་ཡུན་རིང་ཞིག་འགོར་སོང་། ད་སྐབས་བར་སྐོར་དང་ལྷ་སའི་ཁྲོམ་སྲང་དུ་དམག་མི་ཚོས་རེས་བསྐོར་ནས་ཉིན་མཚན་གཉིས་ཀར་སྲུང་བསྡད་ཡོད་པ་རེད་ཟེར།

ཕྱི་ཚེས་ ༢༣ ཉིན་འདི་གའི་གསར་འགོད་པས་དེའི་ཐད་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་དོན་གྲུབ་ལྷ་དར་ལགས་སུ་དྲིས་པར་ཁོང་གིས་བརྗོད་དོན།  ལྷ་སའི་གནས་སྟངས་དང་བོད་སྤྱི་ཡོངས་ཀྱི་གནས་སྟངས་གཅིག་པ་འདྲ་བོ་རེད། ཡིན་ནའང་ཁ་སང་དེ་རིང་ལྷ་ས་ནས་དབྱེ་བ་ཞིག་བྱས་ནས་མདོ་སྟོད་སྨད་ནས་ཡོང་བའི་བོད་མི་དེ་ཚོ་ཕྱིར་འབུད་བཏང་བ་དང༌། དེའི་ཐོག་ལ་ལྷ་ས་ན་ཡོད་པའི་དམག་མིའི་ཐོག་ལ་དམག་མི་སྟོང་ཕྲག་མང་བོ་འཕར་སྣོན་བྱས་ནས་དམ་དྲག་བྱས་ཡོད་པ་རེད། ཉེ་ཆར་དམ་དྲག་ཤུགས་ཆེན་པོ་བྱེད་ས་ཁག་ནི་ལི་ཐང་དང་དཀར་མཛེས། ནག་ཆུ། ལྷ་ས་སོགས་ཆགས་ཡོད་པ་རེད། ཟླ་འདིའི་ཚེས་ ༡༨ ཉིན་ལྷ་ས་ནས་དམག་ཕྱོགས་ཀྱི་ཚོགས་འདུ་ཞིག་འཚོགས་ཡོད་པ་རེད། ཚོགས་འདུ་དེ་དམིགས་བསལ་གྱིས་ལོ་སར་སྐབས་སུ་དམ་དྲག་བྱེད་དགོས་སྐོར་གྱི་ཚོགས་འདུ་ཞིག་རེད། ལོ་སར་སྐབས་མྱ་ངན་བྱེད་མཁན་དེ་ཚོ་ཏཱ་ལའི་རུ་ཚོགས་ལ་རྒྱབ་སྐྱོར་བྱེད་ཉན་དང༌། ཏཱ་ལའི་རུ་ཚོགས་ཀྱི་ཚོགས་མི་ཡིན་པ་ངེས་འཛིན་བྱེད་ཀྱི་ཡིན་པ་དང་དེའི་རིགས་ཕམ་ཉེས་སུ་གཏོང་དགོས་ཞེས་གཏམ་བཤད་བྱས་ཡོད་པ་རེད། གཞོན་ནུ་ལྷན་ཚོགས་ཀྱི་ངོས་ནས་བློ་འཚབ་ཆེན་པོ་བྱེད་ཀྱིན་ཡོད། རྒྱ་ནག་གིས་ད་ལོ་བོད་ཞི་བའི་བཅིངས་འགྲོལ་བཏང་ནས་ལོ་ངོ་ལྔ་བཅུ་འཁོར་གྱིན་ཡོད་པས་དེར་དགའ་སྟོན་བྱེད་ཀྱི་ཡིན་སྐོར་གླེང་གི་ཡོད་པ་རེད། དེ་ཚོ་དམར་གསོད་དང་དམ་དྲག་གི་འོག་ནས་ལོ་ངོ་ལྔ་བཅུ་འགོར་བ་རེད། ང་ཚོའི་ངོས་ནས་རིག་གནས་གསར་བརྗེ་གསར་དུ་བཙུགས་པར་ངོས་འཛིན་བྱེད་ཀྱིན་ཡོད། དེ་ག་རེ་རེད་ཟེར་ན། རིག་གནས་གསར་བརྗེའི་སྐབས་མི་ཤི་སོང་ན་ནང་ནས་འདས་མཆོད་བྱེད་ཆོག་གི་ཡོད་པ་མ་རེད། ལོ་སྔོན་མའི་ནང་རང་གི་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་ཤོར་བ་མང་བོ་ཞིག་བྱུང་ཡོད་པ་རེད། དེ་དག་ལ་མྱ་ངན་གྱི་ཚུལ་དུ་བོད་པ་ཚོས་ལོ་སར་གྱི་མིན་ཟེར་ནའང་རྒྱ་ནག་གིས་བཙན་གྱིས་ལོ་སར་དུ་འཇུག་གི་ཡོད་པ་རེད། དེ་རིག་གནས་གསར་བརྗེ་སྐབས་དང་གཅིག་པ་འདྲ་བོ་རེད། ཟེར།

ལྷ་ས་མ་ཡིན་པའི་ས་ཁུལ་གཞན་གང་དུ་དམ་དྲག་བྱེད་ཀྱིན་ཡོད་མེད་དྲིས་པར་ཁོང་གིས། སྤྱིར་བཏང་བོད་མདོ་དབུས་ཁམས་གསུམ་དུ་དམ་དྲག་བྱེད་ཀྱིན་ཡོད་པ་རེད། ལྷག་པར་དུ་ཉེ་ཆར་ལི་ཐང་དང་ནག་ཆུ། དཀར་མཛེས་སོགས་སུ་དམ་དྲག་ཤུགས་ཆེན་པོ་བྱེད་ཀྱིན་ཡོད་པ་རེད། དཔེར་ན་ཟླ་འདིའི་ཚེས་  ༡༩ ཉིན་ནག་ཆུ་ནས་བོད་པའི་རླངས་འཁོར་ཁ་ལོ་བ་ཞིག་གི་འགྲུལ་བ་རྒྱ་མིའི་རླངས་འཁོར་ཁ་ལོ་བ་ཞིག་གིས་བཙན་འཕྲོག་བྱས་ཡོད་པ་རེད། རྒྱ་མིའི་རླངས་འཁོར་ཁ་ལོ་བ་དེའི་རྒྱབ་ནས་རྒྱ་དམག་ལངས་ནས་ཁ་སང་དེ་རིང་ནག་ཆུ་ལྟ་བུར་མཚོན་ན་རྒྱ་མི་རིགས་དང་བོད་མི་རིགས་གཉིས་ཀྱི་བར་ལ་འགལ་ཟླ་འདྲ་བོ་ལྷུང་ཡོད་པ་རེད་ཟེར། ཉེ་ཆར་དར་མདོ་དང་ལི་ཐང་དཀར་མཛེས་སོགས་སུ་དམག་སྒར་གསར་རྒྱག་དང་དམག་མི་འཕར་བསྣོན་བྱེད་ཀྱིན་ཡོད་པའི་གནས་ཚུལ་སྐོར་དྲིས་པར་ཁོང་གིས་བརྗོད་དོན། དེའི་ཐད་ནས་བལྟས་ཀྱང་བོད་ས་ཡོངས་རྫོགས་བདེ་འཇགས་མིན་པ་གསལ་བོ་རེད། ད་དུང་རྒྱ་ནག་གིས་ཕྱི་རྒྱལ་གྱི་གསར་འགོད་པ་དང་ཡུལ་སྐོར་བའི་སྒོ་ཡང་རྒྱབ་ཡོད་པ་རེད། དེ་དག་ནས་བལྟས་ཡོང་ན་རྒྱ་ནག་གིས་བོད་ཐོག་དྲག་གནོན་གང་འདྲ་ཞིག་བྱེད་ཀྱིན་ཡོད་མེད་བཤད་མ་དགོས་པ་རེད་ཟེར།