མདོ་སྨད་རྔ་པའི་ཡུལ་ནས་དགེ་འདུན་པ་ཚོས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་ཡོད་པ་དང༌། དགོན་པའི་ཕྱི་ནང་ཀུན་ལ་དམག་མིས་བསྐོར་ཏེ་དམ་དྲག་བྱས་རྐྱེན། ད་ལྟ་གྲྭ་བ་རྣམས་ཀྱི་གནས་སྟངས་གསལ་བོ་ཤེས་རྟོགས་ཐུབ་ཀྱི་ཡོད་མི་འདུག
བཞུགས་སྒར་ཀིརྟིའི་བྱེས་པ་གྲྭ་ཚང་གི་ཛ་དྲག་འབྲེལ་མཐུད
་ཚོགས་ཆུང་གིས་འདི་གར་གནས་ཚུལ་སྤྲད་པ་ལྟར་ན། མདོ་སྨད་རྔ་པ་ཇོ་ནང་བསྭེ་དགོན་ཐུབ་བསྟན་ཕྱོགས་རྒྱལ་གླིང་གི་དགེ་འདུན་པ་རྣམས་ཀྱིས། ཕྱི་ཟླ་ ༣ པའི་ཚེས་ ༡ ཉིན་རྒྱ་ནག་གཞུང་ལ་ངོ་རྒོལ་སྐད་འབོད་བྱས་ཡོད་པ་དང༌། ད་ལྟ་རྔ་པ་ཁུལ་གྱི་དགོན་པ་མང་པོ་ཞིག་སྨོན་ལམ་འཚོགས་པའི་དུས་ཚིགས་སུ་འཁེལ་ཡོད་ནའང༌། རྒྱ་གཞུང་གིས་བཀག་སྡོམ་བྱས་ནས་སྨོན་ལམ་འཚོགས་ཆོག་གི་མེད་སྟབས། ཕྱི་ཚེས་ ༡ ཉིན་གྱི་བོད་ནང་གི་དུས་ཚོད་ ༨ པ་ཙམ་ལ་རྔ་པའི་ཇོ་ནང་བསྭེ་དགོན་ཐུབ་བསྟན་ཕྱོགས་རྒྱལ་གླིང་གི་དགེ་འདུན་པ་ཉིས་བརྒྱ་ཙམ་རང་འགུལ་གྱིས་དགོན་པའི་འདུ་ཁང་ནང་འཚོགས་འདུག་མོད། དེ་མ་ཐག་དགོན་པའི་ཉེ་འཁྲིས་སུ་ཡོད་པའི་དུས་རྒྱུན་དགོན་པར་ལྟ་རྟོག་བྱེད་མཁན་གྱི་ཉེན་རྟོག་མི་སྣ་དང་ལས་བྱེད་ཚོ་ཡོང་ནས་གདུགས་དཀར་འདོན་བཞིན་པའི་མཚམས་བཅད་ཡོད་པ་དང༌། སྔོན་མ་ནས་སྨོན་ལམ་འཚོགས་མི་ཆོག་པའི་བཀའ་རྒྱ་བཏང་ཡོད་པ་ལྟར། ད་ལྟ་ཉིད་དུ་སྨོན་ལམ་མཚམས་འཇོག་དགོས་ཚུལ་བརྗོད་འདུག་པར། དགེ་འདུན་པ་ཞིག་གིས། གདུགས་དཀར་འདོན་ཚར་ན་ང་ཚོ་འཚོགས་གྲོལ་ཆོག་ཅེས་བཤད་རྐྱེན་དེ་མ་ཐག་མཚམས་འཇོག་དགོས་ཡོད་མི་འདུག གདུགས་དཀར་འདོན་བཞིན་པ་མཇུག་མ་གྲུབ་སྔོན་དགེ་འདུན་པ་ཕལ་ཆེ་བ་ཡར་ལངས་ཏེ་ང་ཚོ་སྨོན་ལམ་ཅིའི་ཕྱིར་འཚོགས་མི་ཆོག་པ་རེད། ངེས་པར་འཚོགས་དགོས་ཡོད། ན་ནིང་ནས་ད་བར་བོད་པ་མང་པོ་ཞིག་བཙོན་འཇུག་བྱས་ཡོད་པ་ཚང་མ་གློད་གྲོལ་གཏོང་དགོས་ཀྱི་ཡོད་ཅེས་པ་སོགས་ཀྱི་འབོད་ཚིག་སྒྲོག་བཞིན་འདུ་ཁང་ཕྱི་ལོགས་ལ་ཐོན་ཡོད་པ་དང༌། དགོན་པའི་རྒྱབ་ཀྱི་ལམ་ཆེན་ནས་ཡར་རྔ་པ་རྫོང་གི་ཕྱོགས་ལ་བསྐྱོད་དེ་ལམ་བར་གྱི་རླངས་སྣུམ་བླུག་ས་ཞིག་ཡོད་པ་དེར་སླེབས་སྐབས། རྫོང་ཐོག་ནས་དམག་མི་བརྒྱ་ཕྲག་ཁ་ཤས་ཡོང་ནས་དགེ་འདུན་པ་རྣམས་ཀྱི་མདུན་བཀག་ཅིང༌། དུས་མཚུངས་སུ་དགོན་པའི་ལས་སྣེ་དང་བླ་མ་སོགས་སླེབས་ནས་དེ་ལྟར་མ་བྱེད་རོགས་གྱིས། དམག་མི་ལ་གདོང་ཐུག་བྱས་ན་ཛ་དྲག་པོ་དང༌། གྱོང་ཆེན་པོ་ཡོང་གི་རེད་ཅེས་བཀའ་སློབ་མང་པོ་གནང་མཐར་དགེ་འདུན་པ་རྣམས་ཕྱིར་དགོན་པའི་ནང་ཕེབས་འདུག་ཀྱང༌། དམག་མི་རྣམས་ཀྱིས་དགེ་འདུན་པ་ཚོའི་རྗེས་དེད་དེ་དགེ་འདུན་པ་རྣམས་དགོན་པའི་ནང་ལ་སོང་མཚམས་སུ་དགོན་པའི་མཐའ་ཚང་མ་དམག་མིས་སྐོར་ཡོད་པ་དང༌། དེ་བཞིན་དགོན་པའི་ནང་ལ་ཡང་དམག་མི་མང་པོ་སླེབས་ནས་དུས་ཚོད་ཐུང་ཐུང་ནང་དགོན་པའི་ཕྱི་ནང་གཉིས་ཀ་དམག་མིས་བཀག་སྡོམ་ནན་མོ་བྱས་འདུག་པས། དགེ་འདུན་པ་རྣམས་འཛིན་བཟུང་བྱས་ཡོད་མེད་ཀྱི་གནས་སྟངས་དངོས་ཤེས་རྟོགས་བྱུང་ཐུབ་མི་འདུག
བསེ་དགོན་ཐུབ་བསྟན་ཕྱོགས་རྒྱལ་གླིང་ནི་རྔ་པ་ཁུལ་གྱི་ཇོ་ནང་དགོན་པ་ཆེ་ཤོས་དེ་ཡིན་པ་དང༌། དགེ་འདུན་པ་ཞལ་གྲངས་ ༧༠༠ ཙམ་ཡོད་འདུག ལོ་སྔོན་མའི་གསུམ་བཅུའི་དུས་དྲན་སྐབས་དང་དེ་རྗེས་ཕྱི་ཟླ་ ༦ པའི་ཚེས་མགོ་སོགས་ལ་རྒྱ་ནག་གཞུང་ལ་ངོ་རྒོལ་གྱི་སྦྱར་ཡིག་བཀྲམས་པ་དང་བོད་དར་འཕྱར་བ་སོགས་བྱས་ནས་དགོན་པའི་གྲྭ་ཤག་ཡོངས་རྫོགས་སྔོག་བཤེར་དང་གྲྭ་པ་མང་པོ་འཛིན་བཟུང་བྱས་པ་མ་ཟད། ལོ་གསུམ་ཆོས་གསུམ་ལ་བཞུགས་ཡོད་པའི་དགེ་འདུན་པ་རྣམས་ཀྱང་མཚམས་ཁང་ནས་ཕྱིར་ཐོན་དགོས་པ་ལ་སོགས་པའི་གནས་ཚུལ་སྐྱོ་བོ་མང་པོ་བྱུང་ཡོད་འདུག
དངོས་གནས་བཤད་ན་དཔལ་ལྡན་ཇོ་ནང་བའི་ཆོས་བརྒྱུད་ཆེན་པོ་འདིའི་རིང་ལུགས་འཛིན་མཁན་དག་གི་སེམས་ཤུགས་ནི་བརྗོད་ག་ལ་དགོས་ཀྱང༌། ང་ཚོའི་གཞུང་ངོས་ནས་ཁོང་ཚོར་ཆོས་བརྒྱུད་ཀྱི་ཐོབ་ཐང་མ་སྤྲད་པ་འདིས་གཞིས་ལུས་ཇོ་ནང་བ་ཚོའི་སེམས་ཤུགས་མི་གཅོག་པའི་ངེས་པ་མེད།
ངོ་མ་ཡག་པོ་འདུག དེའི་ནང་དོན་དངོས་དེ་ནི་གླང་དར་མ་འདས་པ་ནས་ད་པར་དུ་སུ་ཞིག་གིས་མ་རྟོགས་ལ་སུ་ཞིག་གིས་ཀྱང་མ་བཙལ། དེ་ནི་ང་ཚོ་མི་གྲལ་དུ་འགྲོ་བའི་ལམ་ཆེན་ཞིག་དང་ང་ཚོའི་དགྲ་བོ་བཙོམ་བྱེད་ཀྱི་གཟུག་མེད་པའི་མཚོན་ཆ་ཞིག་མ་རེད་དམ
ངོ་མ་རེ། ང་ཚོའི་གཞུང་གིས་ཇོ་ནང་བའི་གྲུབ་མཐའ་ཆོས་བརྒྱུད་ནང་ལ་བཞག་མེད་པ་མ་ཟད་ཇ་ན་ཆོས་བརྒྱད་སྤྱི་མཚུང་གི་ཐོབ་ཐང་ཡང་སྤྲད་མེད། ཡིན་ན་ཡང་གཞི་ལུས་ཇོ་ནང་མི་མང་ནི་འཇིགས་པ་མེད་པའི་ཕ་ལམ་བཞིན་ནམ་ཡང་འགྱུར་བ་མེད་པ་མ་ཟད་ཡང་ནས་ཡང་དུ་རང་སྲོག་ལ་མ་འཛེམ་པར་རྒྱ་གཞུང་ལ་ངོ་རྒོལ་གྱི་གདོང་མཆོང་བྱེད་ཀྱིན་འདུག ངས་མིག་ལམ་དུ་ཇོ་ནང་བ་དེ་དག་བོད་གྲལ་དུ་མ་ཆུད་པའི་སྡར་མ་ཞིག་དང་། རྒྱ་་གྲལ་དུ་མ་འདུག་པའི་དཔའ་བོ་ཞིག་མཐོང་གི་འདུག
བཙན་གནོན་འདི་ལྟ་བུའི་འོག་ཏུ་ཡང་སྙིང་སྟོབས་ལ་ཞུམ་པ་མེད་པ་ནི་དངོས་གནས་ངོ་མཚར་འོས་པ་ཞིག་རེད།