༧གོང་ས་མཆོག་མགྱོགས་པོར་བོད་དུ་ཕེབས་དགོས། བོད་རྒྱ་ཞི་བའི་གྲོས་མོལ་ལ་རྒྱ་གཞུང་གིས་ཆེད་དུ་འགོག་རྐྱེན་བཟོ་བཞིན་ཡོད་པ་བོད་པ་ཚང་མས་ཤེས་དགོས། ཞེས་མགོ་ལོག་གསེར་རྟའི་དགེ་འདུན་པ་ཞིག་གིས་སྐད་འབོད་བྱས་ཡོད་འདུག
དེ་རིང་ཕྱི་དྲོ་བོད་མི་མང་སྤྱི་འཐུས་གསེར་རྟ་ཚུལ་ཁྲིམས་འོད་ཟེར་ལགས་འདི་གའི་གསར་ཁང་ལ་ཆེད་དུ་བཅར་ཏེ། ཉེ་ཆར་བོད་ནང་གི་ལོ་གསར་སྐབས་མགོ་ལོག་གསེར་རྟ་ས་ཁུལ་ཀྱི་ཞི་རྒོལ་ཁག་གསུམ་བྱུང་ཡོད་སྐོར་ངོ་སྤྲོད་གནང་དོན། ཉེ་ཆར་ལོ་གསར་ཚེ་གཅིག་ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༡ ཡས་མས་སུ་མདོ་སྨད་མགོ་ལོག་གསེར་རྟ་སེ་ར་དགོན་པའི་གྲྭ་བ་ ༧༠ ཙམ་གྱིས་༧གོང་ས་མཆོག་མྱུར་དུ་བོད་ལ་ཕེབས་དགོས། རྒྱ་གཞུང་གི་སྲིད་བྱུས་ལ་མཐའ་གཅིག་ཏུ་ངོ་རྒོལ་ཡོད། ཅེས་སྐད་འབོད་རྒྱག་ཞོར་ས་གནས་ཀྱི་ཁེས་སྐོར་ཞང་སྲིད་གཞུང་གི་སྒོ་ཆེན་མདུན་ནས་ཟས་བཅད་ངོ་རྒོལ་བྱས་ཡོད་པ་དང༌། སྐབས་དེར་ས་གནས་གནད་ཡོད་མི་སྣ་མང་པོ་ཡོང་སྟེ། ཁྱེད་ཚོས་ཟས་བཅད་ངོ་རྒོལ་འཕྲལ་དུ་ཕྱིར་འཐེན་མ་གནང་ཚེ། སྔར་ལོ་ལྟར་རྒྱ་གཞུང་གི་ཡ་ང་སྙིང་རྗེ་མེད་པའི་དམག་མི་དང༌། ཉེན་རྟོག་པས་ཁྱེད་རྣམས་དམར་གསོད་གཏོང་ངེས་རེད། ཅེས་འབོད་སྐུལ་ཞུས་ཡོད་སྟབས། ཟས་བཅད་ངོ་རྒོལ་ཆུ་ཚོད་ ༣ ཙམ་གནང་རྗེས་ཕྱིར་འཐེན་བྱས་འདུག ཅེས་གསུངས་བྱུང༌།
ཁོང་གིས་མུ་མཐུད་དུ་གསུངས་དོན། ད་ལོ་གསེར་རྟ་ས་ཆར་ལོ་སར་གཏོང་མཁན་མེད་པ་མ་ཟད། ཁྱིམ་ཚང་སོ་སོའི་སྒོ་འགྲམ་དང་ཁང་སྟེང་སོགས་སུ་དར་ནག་ཕྱར་ཡོད་པ་དང༌། དེ་ནི་འདས་ལོའི་རྒྱལ་གཅེས་དཔའ་བོ་དཔའ་མོ་ཚོར་གདུང་སེམས་མཉམ་སྐྱེད་དང༌། རྒྱ་གཞུང་ལ་ངོ་རྒོལ་མཚོན་ཆེད་ཡིན་འདུག ད་དུང་ཉིན་དེར་གསེར་རྟ་རྫོང་ཐོག་ཏུ་གྲྭ་བ་ཞིག་གིས་༧གོང་ས་མཆོག་མགྱོགས་པོར་བོད་དུ་ཕེབས་དགོས། བོད་རྒྱ་ཞི་བའི་གྲོས་མོལ་ལ་རྒྱ་གཞུང་གིས་ཆེད་དུ་འགོག་རྐྱེན་བཟོ་བཞིན་ཡོད་པ་བོད་པ་ཚོས་ཤེས་དགོས། རྒྱ་གཞུང་ལ་ང་ཚོས་ངོ་རྒོལ་ཡོད། བོད་ནི་གནའ་ནས་རང་བཙན་གཙང་མའི་རྒྱལ་ཁབ་ཡིན། ཞེས་སྐར་མ་བཅུ་ཙམ་ལ་སྐད་འབོད་བྱས་ཡོད་པ་དང༌། སྐབས་དེར་རྫོང་ཉེན་རྟོག་པ་དང་དམག་མི་ཡོང་སྟེ་རུབ་རྡུང་བྱེད་བཞིན་དགེ་འདུན་པ་དེ་བཙན་ཁྲིད་བྱས་ཡོད་འདུག དགེ་འདུན་པ་དེ་དགོན་པ་གང་ནས་ཡིན་པ་དང་མཚན་ལ་ཅི་ཟེར་བ་སོགས་ཀྱི་གནས་ཚུལ་ཁ་གསལ་ཤེས་རྟོགས་མི་འདུག གནད་དོན་དེའི་ཐད་ཉིན་འདི་གར་གསེར་རྟ་ས་ཁུལ་གྱི་དགོན་པ་ཁག་དང་རྫོང༌། དཀར་མཛེས་ཁུལ་བཅས་ཀྱི་ངོ་ཤེས་ཚོར་ཁ་པར་ཐེངས་མང་བརྒྱབས་ཀྱང༌། ཐེངས་གཅིག་ལའང་མཐུད་ཐུབ་མ་སོང༌། ད་ལྟ་གསེར་རྟ་ས་ཁུལ་གྱི་གནས་སྟངས་ཅི་ཆགས་ཤེས་རྟོགས་བྱ་ཐབས་མི་འདུག བོད་ནང་ལ་ཁ་པར་མཐུད་ཐུབ་མེད་པ་དེར་བློ་འཚབ་ཧ་ཅང་ཆེན་པོ་འདུག གནད་དོན་དེ་བོད་གཞུང་བདེ་སྲུང་ལའང་དེ་རིང་འབྲེལ་བ་ཞུས་པ་ཡིན། ཞེས་གསུངས་སོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
