རྒྱ་གཞུང་གིས་བོད་ནང་གི་སློབ་འབྲིང་དང་སློབ་ཆེན་ཁག་ཏུ་དམ་དྲག་ཤུགས་ཆེན་བྱེད་ཀྱིན་ཡོད་པ་མ་ཟད། རེས་གཟའ་ཉི་མའི་གུང་སེང་ཡང་མེད་པ་བྱས་ཏེ། དགེ་སློབ་ཚོར་སྲིད་གཞུང་གི་སློབ་གསོ་དྲིལ་བསྒྲགས་བྱེད་ཀྱིན་ཡོད་འདུག
བོད་ནང་གི་སློབ་ཆེན་སློབ་མ་ཞིག་གིས་གློག་ཀླད་བརྒྱུད་མཚོ་སྔོན་ཞིང་ཆེན། མཚོ་ལྷོ་ས་ཁུལ་གྱི་གནས་སྟངས་ཁག་ཅིག་བརྗོད་དོན། ཉིན་འདི་འགར་མཚོ་ལྷོ་ཁུལ་ཆབ་ཆ་གྲོང་བརྡལ་གྱི་མཁའ་དབྱིངས་སུ་ཉི་མ་རེ་རེར་དམག་མིའི་གྱེན་འཕུར་གནམ་གྲུ་བཞི་ལྔ་ཙམ་གྱིས་ལྡིང་སྐོར་བརྒྱབས་ཏེ། ས་གནས་བོད་རིགས་མང་ཚོགས་ལ་འཇིགས་སྣང་སྐུལ་གྱིན་འདུག་ལ། མཚོ་ལྷོ་ཁུལ་མི་རིགས་དགེ་ཐོན་ཆེད་སྦྱོང་སློབ་གྲྭ་ཆེན་མོའི་མཐའ་འཁོར་དུ་དམག་མིའི་རླངས་འཁོར་བཅུ་གྲངས་རེ་ཡིས་སྐོར་གཡེང་བྱས་ཏེ་སློབ་མ་ཚོར་དམ་དྲག་ཤུགས་ཆེན་བྱེད་ཀྱིན་འདུག རྒྱུན་ལྡན་གྱི་གཟའ་ཉི་མའི་གུང་སེང་དེའང་མེད་པ་བྱས་ཏེ། སློབ་མ་ཡོངས་རྫོགས་སློབ་གྲྭའི་ནང་བཀག་འགོག་གིས་ཁུལ་དང་ཞིང་ཆེན་རིམ་པའི་མི་སྣ་ཡོང་ནས་དགེ་སློབ་ཡོངས་ལ་ཚོགས་འདུ་འཚོགས་ཏེ། ཡིག་ཆ་འགྲེམས་སྤེལ་དང་སློབ་གསོ་གཏོང་བ་སོགས་ཀྱི་བྱ་འགུལ་སྤེལ་གྱིན་འདུག གོ་ཐོས་ལྟར་ན། གནས་སྟངས་འདི་མཚོ་ལྷོ་ས་ཁུལ་གཅིག་པུ་མ་ཡིན་པར་བོད་ཁུལ་གྱི་སློབ་གྲྭ་གཞན་དག་དང༌། རྒྱ་ནག་གྲོང་ཁྱེར་ཁག་གི་བོད་རིགས་སློབ་མ་ཡོད་པའི་སློབ་ཆེན་དག་ཏུའང་གཅིག་མཚུངས་ཀྱིས་དམ་དྲག་བྱེད་ཀྱིན་འདུག་ཟེར།
ཁོས་མུ་མཐུད་དུ་བོད་ནང་གི་སློབ་ཆེན་གྱི་གནས་སྟངས་བརྗོད་དོན། དེང་སྐབས་སློབ་གྲྭ་མཐོ་འབྲིང་མཐར་ཕྱིན་ཏེ་སློབ་ཆེན་ལ་རྒྱུག་སྤྲོད་སྐབས། རིག་གནས་སློབ་གསོ་སྡེ་མཚན་གྱིས་བོད་ཡིག་གི་སྐར་གྲངས་ལ་ཚད་འཛིན་མེད་པ་བཟོས་ཏེ། རྒྱ་ཡིག་སོགས་སློབ་ཚན་གཞན་གྱི་སྐར་གྲངས་ལོང་བ་ཡིན་ན། གང་འདོད་དུ་སློབ་ཆེན་ལ་འཛུལ་ཞུགས་བྱ་ཐུབ་ཀྱིན་ཡོད་སྟབས། མི་རིགས་སློབ་ཆེན་ཁག་གི་བོད་ཡིག་སྡེ་ཁག་གི་སློབ་མ་ཕལ་ཆེ་བར་བོད་ཡིག་གི་ཤེས་ཚད་སྐྱོ་རུ་འགྲོ་བཞིན་ཡོད་པ་དང༌། འཛིན་གྲྭ་རེར་བོད་ཡིག་གི་སློབ་ཆེན་སློབ་མའི་ཤེས་ཚད་འདང་མཁན་གྱི་སློབ་མ་ལྔ་དྲུག་རེ་ལས་མེད། གནད་དོན་དེས་རྐྱེན་གྱིས་སློབ་གྲྭ་ཆུང་འབྲིང་གི་བོད་རིགས་སློབ་མ་ཚོའང་བོད་ཡིག་ལ་དོ་སྣང་ཆུང་དུ་འགྲོ་བཞིན་འདུག་ལ། སློབ་མའི་ཁྱིམ་བདག་ཚོས་ཀྱང་སོ་སོའི་བྱིས་པར་རྒྱ་ཡིག་གཙོ་བོ་བྱེད་དུ་འཇུག་གིན་འདུག མི་རིགས་སློབ་ཆེན་ཁག་གི་བོད་ཡིག་སྡེ་ཁག་ཏུ་འཛུལ་ཞུགས་བྱ་སྐབས། བོད་ཡིག་གི་ཆུ་ཚད་མི་དགོས་པ་འདི་ཧ་ཅང་གི་གནད་དོན་ཚབས་ཆེན་རེད། ང་ཚོས་དོ་སྣང་དང་དོགས་ཟོན་བྱ་དགོས་པའི་ཤེས་ཡོན་ཐད་ཀྱི་སྲིད་ཇུས་ཡ་མཚན་ཞིག་ཀྱང་རེད། ཅེས་བརྗོད་བྱུང༌།
