ཕྱི་གླིང་བ་གསུམ་འཛིན་བཟུང་།

ཕྱི་ཚེས་ ༡༥ ཉིན་བལ་ཡུལ་དུ་ཕྱི་གླིང་བའི་མི་སེར་གསུམ་གྱིས་བོད་དོན་ཆེད་ཞི་བའི་ངོ་རྒོལ་གྱི་ལས་འགུལ་སྤེལ་སྟབས་བལ་ཡུལ་ཉེན་རྟོག་པས་འཛིན་བཟུང་བྱས་ཡོད་འདུག

འདི་ལོར་བལ་ཡུལ་དུ་བོད་མི་ཚོར་དམིགས་བསལ་གྱིས་དམ་དྲག་བྱེད་ཤུགས་ཆེ་རུ་བཏང་ཞིང་། གསུམ་བཅུའི་དུས་དྲན་སྲུང་གཙི་དང་དེ་མིན་གྱི་ལས་འགུལ་གང་ཡང་སྤེལ་འཇུག་གི་མེད་པར་ཉེན་རྟོག་པ་དང་དམག་མིས་ཉིན་མཚན་མེད་པར་སྐོར་སྲུང་ནན་མོ་བྱེད་ཀྱིན་ཡོད་ལ། ཕྱི་ཚེས་ ༡༥ ཉིན་བལ་ཡུལ་རྒྱལ་ས་ཀ་ཐི་མན་ཀྲུའི་རྒྱ་ནག་གཞུང་ཚབ་ཁང་མདུན་དུ་ཕྱི་གླིང་བའི་མི་སེར་ Meela Yenssen, དང་ Giinarne Hanshen.Gaisy Karen Wood གསུམ་གྱིས། བོད་རང་བཙན་ཡིན་དང་རྒྱ་ནག་བོད་ནས་ཕར་རྒྱུག་ཅེས་ངོ་རྒོལ་སྐད་འབོད་བྱས་ཡོད་པ་དང་། ཁོང་ཚོས་བོད་རང་བཙན་གྱི་འབོད་ཚིག་འཁོད་པའི་སྟོད་ལྭ་རེ་གྱོན་ཡོད་འདུག

རྒྱ་ནག་གི་ཕྱི་སྲིད་བློན་ཆེན་ Hu Zhengyue ཟླ་སྔོན་མའི་ནང་བལ་ཡུལ་དུ་ཡོང་ཡོད་ལ། སྐབས་དེར་ཁོས་བལ་ཡུལ་གཞུང་ལ་རྒྱ་ནག་ཁ་བྲལ་གྱི་ལས་འགུལ་སྤེལ་མཁན་ལ་དམ་དྲག་བྱེད་དགོས་པའི་རེ་སྐུལ་ཞུས་ཡོད་པ་མ་ཟད།  རྒྱ་ནག་གི་གནོན་ཤུགས་འོག་ བལ་ཡུལ་རྒྱལ་སར་ཡོད་པའི་རྒྱ་ནག་གཞུང་ཚབ་ཁང་ལས་ཀི་ལོ་མི་ཊར་ ༢༠༠ ཙམ་ནས་བཟུང་དམག་མི་འགྲེམས་འཇོག་གིས་བཀག་སྡོམ་ནན་མོ་བྱས་ཏེ་བོད་མི་ཚོར་རྒྱ་ནག་གཞུང་ཚབ་ཁང་མདུན་དུ་ངོ་རྒོལ་བྱེད་འཇུག་མེད་པ་རེད།