སྦེལ་ཀོབ་སེར་སྐྱ་མི་མང་གིས་ལོ་སྔོན་མའི་ཞི་རྒོལ་ཆེན་མོའི་ནང་སྐུ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་དག་ལ། དྲན་རྟེན་རྡོ་རིང་ཞིག་གསར་བཞེངས་ལེགས་གྲུབ་དང་དབུ་འབྱེད་གནང་ཡོད།
ཕྱི་ཚེས་ ༡༤ ཉིན་ནི་ལོ་སྔོན་མའི་བོད་ནང་གི་ཞི་རྒོལ་ཆེན་མོ་བྱུང་སྟེ་ལོ་གཅིག་འཁོར་བའི་ཉིན་ཡིན་ལ། ཉིན་དེའི་ཞོགས་པར་སྦེབ་ཀོབ་ས་གནས་བོད་ཀྱི་གཞོན་ནུས་གོ་སྒྲིག་འོག་སྤེབ་ཀོབ་སེར་སྐྱ་མི་མང་གིས་གསར་བཞེངས་ལེགས་འགྲུབ་བྱུང་བའི་རྒྱལ་གཅེས་དཔའ་བོའི་དྲན་རྟེན་རྡོ་རིང་ཞིག གཞིས་སྤྱི་༸རྒྱལ་བའི་ཕོ་བྲང་དུ་དབུ་འབྱེད་གནང་ཡོད་ལ། དབུ་འབྱེད་མཛད་སྒོའི་སྟེང་སྐུ་མགྲོན་གཙོ་བོ་སེར་སྨད་འོད་ཟེར་རིན་པོ་ཆེ་མཆོག་ཕེབས་ཏེ། རབ་གནས་དང་དབུ་འབྱེད་གནང་ཡོད། ཉིན་དེར་གཞིས་ཆགས་གསར་རྙིང་གཉིས་ཀྱི་གཞིས་མགོ་རྣམ་གཉིས་དང་། ས་གནས་ཁྲིམས་དཔོན། མཉམ་འབྲེལ་གྱི་ཚོགས་གཙོ་རྣམ་གཉིས། བུད་མེད་ཚོགས་གཙོ་དང་དགོན་སྡེ་དང་གཞིས་གྲོང་ཁག་གི་འགན་འཛིན་སོགས་གནད་ཡོད་མི་སྣ་སུམ་ཅུ་ལྷག་ཅིག་ཕེབས་ཡོད།
དྲན་གསོའི་རྡོ་རིང་དེའི་མཐོ་ཚད་ལ་ཕུ་ཌི་ཉི་ཤུ་དང་ཟུར་ངོས་བཞི་ཡོད་པའི་སྟེང་དུ་བོད་དབྱིན་དང་ཧིན་ངྷི། ཀར་ན་ཊ་ཀའི་ཡི་གེའི་སྟེང་། ༼ ཕྱི་ལོ་ ༡༩༥༩ ནས་བཟུང་བོད་རྒྱལ་ཁབ་དང་བསྟན་སྲིད་མི་རིགས་ཀྱི་དོན་དུ་སྐུ་སྲོག་ཤོར་བའི་རྒྱལ་གཅེས་དཔའ་བོ་དང་དཔའ་མོ་རྣམས་ཀྱི་ཞུམ་པ་མེད་པའི་སྙིང་སྟོབས་དང་། རླབས་ཆེན་མཛད་རྗེས་ལ་རྗེས་དྲན་མཚོན་བྱེད་དྲན་རྟེན་རྡོ་རིང་འདི་བཞིན་སྦེལ་ཀོབ་སེར་སྐྱ་མི་མང་ཡོངས་ནས་གུས་བཀུར་དང་བསྔོ་སྨོན་མཚམས་སྦྱར་གྱི་གསར་བཞེངས་ཞུས།༽ ཞེས་གསལ་ཡོད་འདུག་ལ། ཉིན་དེར་སྦེལ་ཀོབ་བདེ་སྐྱིད་སླར་གསོའི་ཚོགས་ཁང་དུ་མི་མང་གིས་བསྔོ་སྨོན་དང་ཞལ་འདོན་ཡང་གནང་ཡོད་འདུག
གཞོན་ནུ་ཚོགས་གཙོས་རྡོ་རིང་དེ་ནི་གཞོན་ནུས་འགན་བླངས་ཏེ་གསར་བཞེངས་གནང་བ་ཞིག་ཡིན་ནའང་། སྦེབ་ཀོབ་གཞིས་ཆགས་གསར་རྙིང་གཉིས་ཀྱི་སེར་སྐྱ་མང་ཚོགས་ཀྱིས་བཞེས་པ་ཞིག་ལ་ངོས་འཛིན་དང་རྡོ་རིང་སྟེང་ཡང་དེ་ལྟར་འཁོད་ཡོད་ལ། དེ་རིང་གི་ཉིན་འདིར་དབུ་འབྱེད་གནང་དགོས་དོན་ལོ་སྔོན་མའི་དེ་རིང་ཉིན་ནས་བཟུང་བོད་ནང་ཞི་བའི་གྱེན་ལངས་བྱས་ཏེ་ལོ་གཅིག་འཁོར་ཡོད་པས་ཡིན་ལ། ད་ལོ་ནི་བོད་ནང་ཞི་བའི་སྒེར་ལངས་བྱས་ཏེ་ལོ་ལྔ་བཅུ་འཁོར་བའི་ལོ་ཡང་ཡིན་ཞེས་གསུངས་སོང་།
འོད་ཟེར་རིན་པོ་ཆེ་མཆོག་གིས་རྡོ་རིང་དེ་ནི་ལོ་རྒྱུས་ཀྱི་གལ་འགངས་ཆེ་བ་ཞིག་ཆགས་རྒྱུ་ཡིན་པ་མ་ཟད། བོད་མིའི་སེམས་ཁོང་གི་རྒྱལ་གཅེས་དཔའ་བོ་དཔའ་མོ་དག་ལོ་བརྒྱ་ཕྲག་མང་བོར་གནས་རྒྱུ་རེད། དེ་བཞིན་ཕོ་བྲང་མདུན་དུ་བཞེངས་པ་དེ་ནི་ཕྱིའི་རྒྱལ་ཁབ་ཁག་གི་འདས་སོང་གི་དཔའ་བོ་དཔའ་བོ་རྣམས་དང་ལོ་རྒྱུས་ཀྱི་མི་སྣ་གལ་ཆེན་དག་ལ་རྗེས་དྲན་རྡོ་རིང་བཞེངས་སྐབས། གནད་ཡོད་གྱི་ལས་ཁུངས་དང་ཚོགས་ཁང་སོགས་ཀྱི་ཉེ་འཁྲིས་སུ་བཞེངས་པའི་ལུགས་སྲོལ་ཡོད་པ་མ་ཟད། དཔའ་བོ་རེ་རེ་བཞིན་རྡོ་རིང་བཞེངས་སྲོལ་ཡོད་པས། རྡོ་རིང་འདི་བཞེངས་སའི་ས་ཆ་ཡག་པོ་འདུག་ཅེས་དང་།
དེ་བཞིན་གཞོན་ནུ་ཚོགས་པ་ནི་བཙན་བྱོལ་སྤྱི་ཚོགས་ཁྲོད་ཀྱི་གལ་འགངས་ཆེ་བའི་ཚོགས་པ་ཞིག་དང་ཁྱབ་ཆེ་ཤོས་ཀྱི་ཚོགས་པ་ཞིག་རེད་ལ། ད་ལྟ་བོད་གཞུང་གཞུང་ཞབས་དང་སྤྱི་འཐུས་གྲོས་ཚོགས་སོགས་སུ་ཡོད་པའི་གནད་ཡོད་མི་སྣ་མང་བོ་ཞིག་ཀྱང་། དང་ཐོག་གཞོན་ནུ་ཚོགས་པའི་ནང་ཕྱག་ལས་གནང་མྱོང་བ་ཤ་སྟག་ཡིན་སྟབས། ཚོགས་པ་འདི་ནས་ཐོན་པའི་མི་སྣ་དག་ནི་ཤེས་འཇོན་གཉིས་ལྡན་རྐྱང་རེད་ལ། ཚོགས་པ་འདི་ནི་རྒྱ་ནག་གི་ཁ་གཏད་དུ་ལངས་མཁན་གཅིག་པུ་དང་། བོད་དོན་འཐབ་རྩོད་རྒྱུན་བསྲིང་རྒྱུར་ནུས་ཤུགས་ཆེན་པོ་འདོན་ཐུབ་མཁན་གྱི་ཚོགས་པ་གཅིག་པུ་དེ་རེད། གཞིས་ཆགས་ཁག་གི་གཞོན་སྐྱེས་རྣམས་གཞོན་ནུ་ཚོགས་པར་ངེས་པར་དུ་འཛུལ་ཞུགས་བྱ་འཇུག་དགོས་ཞེས་གཞོན་ནུ་ཚོགས་པར་བསྟོད་བསྔགས་དང་། དེའི་གལ་ཆེན་རང་བཞིན་གསུངས་ཡོད།
