བཀའ་ཟུར་བཀྲ་ཤིས་དབང་འདུས་ལགས་སུ་བཅར་འདྲི།

བཀའ་ཟུར་བཀྲ་ཤིས་དབང་འདུས་ལགས་ནི་ད་སྐབས་ཡུ་རོབ་མཉམ་འབྲེལ་གྱི་རྒྱལ་ས་བྷུ་རུ་སེལ་དུ་བཙན་བྱོལ་བོད་གཞུང་གི་སྐུ་ཚབ་དོན་གཅོད་ཡིན་ལ། ཕྱི་ཚེས་ ༡༩ ཉིན་འདི་ག་གསར་ཁང་གིས་ཁོང་ལ་ཉེ་ལམ་གྱི་བོད་རྒྱ་གཉིས་བར་གྱི་སྲིད་དོན་འབྲེལ་བའི་འཕེལ་རིམ་དང་རྒྱལ་སྤྱིའི་སྟེང་གི་བོད་དོན་རྒྱབ་སྐྱོར་གྱི་ནུས་པ་བཅས་ཀྱི་ཐད་བཀའ་འདྲི་ཞུས་པ་གཤམ་དུ་བཀོད་པ་ལྟར་ཡིན།

ཐོག་མར་སྐུ་ངོ་ལགས་ལ་འཚམས་འདྲི་ཞུ་བ་དང་ཆབས་ཅིག་འདྲི་རྒྱུར། ད་ལོ་ནས་བཟུང་ང་ཚོ་བཙན་བྱོལ་དུ་གྱར་ནས་མི་ལོ་ ༥༠ འཁོར་བ་རེད། ཡིན་ཡང་དུས་རབས་ཕྱེད་ཅིག་གི་རྗེས་འདིར་བོད་དོན་གྱི་བདེན་པའི་མཐའ་ནི་མུ་མཐུད་ནས་རབ་རིབ་ཏུ་གྱུར་ནས་ཡོད་པ་རེད། སྐུ་ངོ་ལགས་ནི་ལོ་མང་རིང་༧རྒྱལ་བ་རིན་པོ་ཆེ་མཆོག་གི་དབུ་ཁྲིད་འོག་བོད་དོན་གྱི་ཕྱག་ལས་གནང་མཁན་ཞིག་ཡིན་དུས། ད་སྐབས་བོད་དོན་གྱི་བདེན་པའི་མཐའ་གསལ་རྒྱུར་སྤྱི་ཡོངས་ཀྱི་གཟིགས་ཚུལ་གང་འདྲ་ཞིག་བཟུང་ཡོད་དམ།

ལན། ༧སྤྱི་ནོར་༧གོང་ས་མཆོག་གིས་དུས་རྒྱུན་ནས་བཀའ་གནང་གི་ཡོད་པ་བཞིན། བོད་པའི་རྩ་དོན་ནི་བདེན་པའི་འཐབ་རྩོད་རེད། ངས་ནི་ག་དུས་ཡིན་ནའང་སྔ་ཕྱི་ཙམ་མ་གཏོགས་བདེན་པ་ལ་མཐའ་གསལ་རྒྱུ་ཡོད་པ་རེད་དྲན་བསྡད་ཡོད། བདེན་པ་འདི་གསལ་བོར་འགྲེལ་བཤད་སྐྱོན་ཐུབ་པ་ཡིན་ན་འཛམ་གླིང་སྟེང་བདེན་པ་ལ་རྒྱབ་སྐྱོར་མི་བྱེད་མཁན་ཡོད་པ་མ་རེད། ང་ཚོའི་འཐབ་རྩོད་ཀྱི་ནུས་པ་མཐར་ཐུག་དེའང་བདེན་པར་ཐུག་ཡོད་པ་རེད། རྒྱ་མི་རིགས་ལ་ཆགས་བཞག་ན་ད་ལྟའི་ཆར་ཐབས་རྡུགས་པ་ཞིག་ལ་རྒྱ་ནག་གཞུང་གིས་ཕྱོགས་གཅིག་གི་གནས་ཚུལ་དེ་འཁྱོག་བཤད་དང་། ལྷག་དོན་དུ་༧གོང་ས་མཆོག་གིས་དགོངས་པ་རྒྱ་ཆེན་པོ་བཞེས་ནས་བོད་རྒྱ་གཉིས་ཀར་ཕན་པའི་ཐབས་ཤེས་གནང་གི་ཡོད་པ་རེད་དེ། ད་ལྟ་རྒྱ་ནག་གཞུང་གིས་འཁྱོག་བཤད་ཀྱི་དྲིལ་བསྒྲགས་བྱས་པར་བརྟེན་དེང་སང་རྒྱ་མི་མང་པོ་ཞིག་གི་སེམས་ལ་གནས་ཚུལ་ངོ་མ་མ་ཤེས་པར་བརྟེན་ཕན་ཚུན་འགལ་ཟླའི་བསམ་བློ་དེ་ཤུགས་ཆེན་པོ་ཞིག་བསླེབས་བསྡད་འདུག ཡིན་ཡང་། འདས་པའི་ཉམས་མྱོང་ལ་གཞིགས་ན་༧རྒྱལ་བ་རིན་པོ་ཆེ་མཆོག་གི་དགོངས་གཞི་གསལ་བོར་ཤེས་མཁན་མང་པོ་ཞིག་ནི་ཡིད་འཕྲོག་པའི་ཐོག་ནས་རྒྱབ་སྐྱོར་བྱེད་མཁན་ཆགས་བསྡད་ཡོད་པ་རེད། རིམ་པ་བཞིན་གནས་ཚུལ་གསལ་བོར་ཤེས་པ་ཡིན་ན་རྒྱ་ནག་མི་དམངས་ཀྱིས་ཀྱང་རྒྱབ་སྐྱོར་ཏན་ཏན་བྱེད་གི་རེད་བསམ་གྱི་འདུག དུས་ཚོད་སྔ་ཕྱི་ཙམ་མ་གཏོགས་ད་ཆ་༧རྒྱལ་བ་རིན་པོ་ཆེ་མཆོག་གིས་བཏོན་གནང་བའི་དབུ་མའི་ལམ་གྱི་ཐབས་ལམ་ལ་ཕྱིན་པ་ཡིན་ན་བོད་ཀྱི་གནད་དོན་འདི་སེལ་མི་ཐུབ་པ་ཡོང་གི་མ་རེད་བསམ་གྱི་ཡོད། ངས་ཡིད་ཆེས་བྱེད་ཀྱིན་ཡོད། ཡིད་ཆེས་མེད་ན་ལས་ཀའང་བྱེད་གི་མ་རེད། བོད་གཞུང་གི་རྐུབ་སྟེགས་འདི་སོ་སོ་སྒེར་གྱི་ཁེ་ཕན་སྒྲུབ་ས་མ་རེད། རྩ་དོན་ཞིག་གི་སྒང་ལ་ལས་ཀ་བྱེད་ས་རེད། རྩ་དོན་དེ་ལའང་ཡིད་ཆེས་མེད་ན་དཀའ་ལས་བརྒྱབས་པ་འཕྲོ་བརླག་རེད།

དྲི་བ། ཁ་སང་དེ་རིང་རྒྱ་ནག་གཞུང་གིས་ཡང་བསྐྱར་༧གོང་ས་མཆོག་གི་སྐུ་ཚབ་རྣམ་པ་དང་ལྷན་དུ་བཀའ་མོལ་གནང་གི་ཡིན་ཚུལ་བཤད་འདུག དེ་བྱས་དུས་བོད་རྒྱ་འབྲེལ་མོལ་འདི་བསྐྱར་དུ་མགོ་འཛུགས་པར་རེ་བ་གནང་དགོས་པ་རེད་དམ།

ལན། རེ་བ་ཡོད་པ་རེད་བསམ་གི་འདུག མ་གཞི་བཀའ་བློན་ཁྲི་པའི་མཚན་ཐོག་ནས་དེ་ལ་ལན་འདེབས་ཤིག་གནང་ཡོད་པ་རེད། སྲིད་བློན་ཝན་ཅ་པའོ་ཁོ་རང་གི་གསུང་སྟངས་ལ་བལྟས་པ་ཡིན་ན་ཏོག་ཙམ་དགོངས་པ་གུ་ཡངས་པོའི་ཐོག་ནས་གསུངས་པའི་བཟོ་འདྲ་ཞིག་འདུག དམིགས་བསལ་གྱི་སྔོན་འགྲོའི་ཆ་རྐྱེན་མེད་པའི་ཐོག་ནས་རྒྱལ་བ་རིན་པོ་ཆེའི་སྐུ་ཚབ་དང་ལྷན་དུ་ཞི་མོལ་གྱི་གྲ་སྒྲིག་ཡོད་གསུངས་དུས་ང་རང་གི་བསམ་ཚུལ་ཡིན་ན་བསྐྱར་དུ་བཀའ་མོལ་གནང་བར་རེ་བ་ཏོག་ཙམ་མེད་འགྲོ་བསམ་གི་ཡོད། ཡིན་ནའང་དཀའ་ངལ་ཞིག་ཡོད་པ་ནི། ལམ་སེང་ཞི་མོལ་གནང་གི་ཡིན་ལབ་ན་ཡོང་ཐུབ་གི་མ་རེད། དེ་ལ་ཚོགས་འདུ་མང་པོ་འཚོགས་ནས་སྐད་ཆ་མང་པོ་བཤད་དགོས་པ་རེད།

དྲི་བ། རྒྱ་ནག་གིས་བོད་འདི་ཕྱི་ཕྱོགས་ལ་སྒོ་གཏན་ནས་ལོ་གཅིག་ལྷག་འགོར་ཡོད་ལ། བོད་ནང་གི་གནས་སྟངས་མུ་མཐུད་ནས་ཛ་དྲག་ངང་གནས་ཡོད་པ་རེད། དེ་བྱས་དུས་ད་རེབ་རྒྱ་ནག་གཞུང་གིས་སྐད་ཆ་བཤད་ལབ་གི་ཡོད་པ་དེ་བོད་རྒྱ་ཞི་མོལ་མ་ཡིན་པར་བོད་ནང་ཞི་འཇགས་ཡོང་ཐབས་ལ་དམིགས་ཡོད་པ་འདྲ་བོ་ཞིག་མ་རེད་དམ།
ལན། རྒྱལ་སྤྱིའི་སྟེང་གི་ཆབ་སྲིད་དཔྱད་ཞིབ་པ་མང་པོ་ཞིག་གིས་ད་རེབ་རྒྱ་ནག་གཞུང་གིས་སྐད་ཆ་བཤད་དགོས་ལབ་པ་དེ་ལྷག་བསམ་རྣམ་དག་གང་ཡང་མ་རེད། བཀའ་མོལ་གནང་གི་ཡོད་པའི་རྣམ་འགྱུར་སྟོན་པ་དང་། བོད་ནང་ཛ་དྲག་གི་གནས་ཚུལ་ཡོད་སྟབས། བོད་ནང་གི་བོད་མི་ཚོར་རེ་བ་སྟོང་བ་འདྲ་བོ་ཞིག་སྤྲད། བཀའ་མོལ་གནང་གི་ཡོད་སྟབས་ང་ཚོའི་དཀའ་ངལ་སེལ་མི་ཡོང་ངམ་སྙམ་པའི་རེ་བ་ཞིག་སྤྲོད་ཀྱི་ཡོད་པ་རེད་ཅེས་བཤད་མཁན་མང་པོ་ཡོད་པ་རེད། ཡིན་ཡང་ང་ཚོས་མཐའ་གཅིག་ཏུ་དེ་རེད་ཅེས་ལབ་ཐུབ་གི་མ་རེད།

དྲི་བ། སྐུ་ངོ་མཆོག་གིས་ད་སྐབས་ཡུ་རོབ་གཞུང་དམངས་མཉམ་དུ་བོད་དོན་གྱི་ཕྱག་ལས་གནང་གི་ཡོད་པ་རེད། སྔོན་མ་ ༢༠༠༡ ལོར་ཡུ་རོབ་གྲོས་ཚོགས་ཀྱིས་བོད་དོན་ཐོག་གྲོས་ཆོད་བཞག་པ་རེད། གྲོས་ཆོད་དེ་བོད་རྒྱའི་འབྲེལ་བའི་གནས་སྟངས་ལ་གཞིགས་ནས་སྐབས་མཚམས་ཤིག་ནས་གླེང་སློང་མེད་པར་ཆགས་པ་རེད། ད་སྐབས་ཡང་བསྐྱར་སྔོན་གྱི་གྲོས་ཆོད་དེ་འཁྱེར་ཡོང་ཡོད་སྟབས་འདིའི་ཤུགས་རྐྱེན་ཐད་དགོངས་ཚུལ་གང་འདྲ་ཞིག་ཡོད་དམ།

ལན། ང་ཚོས་ཤེས་གསལ་ལྟར་ཡུ་རོབ་གྲོས་ཚོགས་ནང་བོད་དོན་ཐོག་གྲོས་ཆོད་སྔ་རྗེས་མང་པོ་ཞིག་བཞག་ཡོད་པ་རེད། དེ་བཞིན་ཉེ་ཆར་ཕྱི་ཟླ་ ༣ པའི་ཚེས་ ༡༢ ཉིན་བསྐྱར་དུ་གྲོས་ཆོད་བཞག་ཡོད་པ་རེད། གྲོས་ཆོད་འདིའི་ནང་དུ་དེ་སྔོན་བཞག་པའི་གྲོས་ཆོད་དེ་དག་བསྐྱར་གླེང་བྱས་ནས་དེ་གཞི་ལ་བཞག་སྟེ། ད་རེབ་ཀྱི་གནད་དོན་གཙོ་བོ་དེ་བོད་རྒྱ་ཞི་མོལ་གྱི་ཕྱོགས་ནས་རེད། དེ་ཡང་རྒྱ་ནག་གཞུང་གིས་མིང་དོན་མཚུངས་པའི་རང་སྐྱོང་དེ་གང་འདྲ་ཞིག་གི་ཐོག་ལ་བཀའ་མོལ་གནང་གི་ཡོད་མེད་ཡིག་ཐོག་ལ་འཁྱེར་ཤོག་ཅེས་རེ་བ་བཏོན་པ་ནང་བཞིན་བོད་རྒྱ་འབྲེལ་མོལ་ཐེངས་བརྒྱད་པའི་སྐབས་ལ་༧གོང་ས་མཆོག་དང་སྐུ་ཚབ་ཚོའི་མཚན་ཐོག་ནས་སྒྲོམ་གཞི་གསལ་བོར་ཕུལ་ཡོད་པ་རེད། རྗེས་སོར་རྒྱ་ནག་གཞུང་གིས་དེར་ངོས་ལེན་མེད་ཅེས་གསལ་བསྒྲགས་བྱས་པར་བརྟེན་ང་ཚོའི་ངོས་ནས་ཀྱང་ཡིག་ཐོག་ཕར་གང་ཕུལ་བ་དང་། ༧རྒྱལ་བ་རིན་པོ་ཆེའི་དགོངས་གཞི་ངོ་མ་གང་ཡིན་འཛམ་གླིང་མི་དམངས་ཀྱིས་ཤེས་དགོས་པ་གལ་ཆེར་མཐོང་ནས་བཀྲམས་པ་རེད། ཡུ་རོབ་གྲོས་ཚོགས་དང་ཡུ་རོབ་རྒྱལ་ཁབ་ཚང་མས་ཡིག་ཆ་དེ་གཟིགས་ཡོད་པ་རེད། དེར་བརྟེན་ད་རེབ་ཀྱི་གྲོས་ཆོད་ནི་༧རྒྱལ་བ་རིན་པོ་ཆེ་དང་བོད་གཞུང་གི་ཕྱོགས་ནས་ཕུལ་བའི་དགོངས་ཚུལ་དེ་དག་གྲོས་གཞིར་འཛིན་འོས་པ་འདུག རྒྱ་ནག་གཞུང་གི་ངོས་ནས་འདི་ལ་དགོངས་པ་བཞེས་དགོས་ཀྱི་འདུག་ཅེས་ཚིག་ཁ་སྣོན་བརྒྱབས་ནས་གྲོས་ཆོད་བཞག་ཡོད་པ་རེད། ཁྱོན་ཡོངས་ནས་ལྟ་དུས་འདི་ནི་རྒྱབ་སྐྱོར་ཤུགས་ཆེན་པོ་ཞེ་དྲག་རེད་བསམ་གྱི་འདུག དེ་བཞིན་རྒྱལ་ཁབ་སོ་སོའི་གྲོས་ཚོགས་ཀྱི་ནང་ལ་བོད་དོན་རྒྱབ་སྐྱོར་ཚོགས་པ་མང་པོ་ཡོད་པ་རེད། དེ་དག་གིས་ཀྱང་དམིགས་བསལ་གྱི་ཐུགས་ཁུར་བཞེས་ནས་གྲོས་ཚོགས་སོ་སོའི་ནང་ལའང་བོད་དོན་གླེང་སློང་གནང་བ་དང་། གཞུང་ལ་བོད་དོན་ཐོག་བཀའ་འདྲི་གནང་བ་སོགས་རྒྱབ་སྐྱོར་ཆེན་པོ་རེད།

དྲི་བ། འདས་པའི་ལོ་ ༥༠ རིང་མཉམ་འབྲེལ་རྒྱལ་ཚོགས་དང་ཨ་རི། ཡུ་རོབ་བཅས་ནས་བོད་དོན་ཐོག་གྲོས་ཆོད་སྣ་ཚོགས་འཇོག་མྱོང་ཡོད་པ་རེད། ཡིན་ཡང་གྲོས་ཆོད་ཙམ་མ་གཏོགས་ནུས་པ་ཐོན་པ་ཞིག་ད་བར་དུ་ཁག་པོ་ཆགས་ཡོད་པ་རེད། དེ་བྱས་དུས་ཡུ་རོབ་ཀྱི་ངོས་ནས་གྲོས་ཆོད་དེ་དག་ཁ་ཡོད་ལག་ཡོད་དང་དོན་ཐོག་ལ་འབབ་ཐུབ་པའི་རིམ་པ་ཞིག་ལ་ཤུགས་རྒྱག་སྟངས་དེ་གང་འདྲ་ཞིག་ཡིན་ནམ།
ལན། གྲོས་ཆོད་བཞག་པ་དེ་དག་ལ་ནུས་པ་དང་རིན་ཐང་ཞིག་ཡོད་པ་རེད་བསམ་གི་འདུག ཡིན་ནའང་རྒྱ་ནག་གཞུང་ལ་གནོན་ཤུགས་ཐེབས་ནས་བོད་དོན་ཐག་གཅོད་ཡོང་རྒྱུ་དེ་ཁག་པོ་རེད། ད་ལྟ་འཛམ་གླིང་གིས་རྒྱ་ནག་གི་མགོ་ཁྲིད་ཚོར་རྣམ་འགྱུར་གང་འདྲ་ཞིག་སྟོན་གི་ཡོད་པ་རེད་ཅེ་ན། ཁོ་ཚོས་བོད་ཀྱི་ཐོག་ལ་འཛིན་པའི་སྲིད་བྱུས་དེར་ངོས་ལེན་བྱེད་ཐུབ་གི་མ་ི་འདུག སྲིད་བྱུས་འདི་ལ་དགོངས་པ་ཡག་པོ་བཞེས་དགོས་ཀྱི་འདུག་ཅེས་བཤད་བསྡད་ཡོད་པ་རེད། དེ་བྱས་དུས་རྒྱ་ནག་གཞུང་ཡིན་ནའང་སྔོན་མ་དང་མི་འདྲ་བར་ད་ལྟ་སྟོབས་ཆེན་རྒྱལ་ཁབ་རེད། འཛམ་གླིང་གིས་ཀྱང་རྒྱ་ནག་གལ་ཆེན་པོར་རྩིས་བསྡད་ཡོད་པ་རེད། རྒྱ་ནག་གི་དབུ་ཁྲིས་ཚོས་ཀྱང་འཛམ་གླིང་སྟེང་ནུས་ཤུགས་ལྡན་པའི་ཕྱག་ལས་གནང་བར་འགན་འཁྱེར་བའི་དགོངས་པ་ཡོད་པ་རེད་ལ། ཁོ་ཚོའི་འཐབ་རྩོད་ཀྱང་དེའི་ནང་ཞུགས་ཡོད་པ་རེད། དེ་གནང་བ་ལ་མིའི་ཆ་འཇོག་དགོས་པ་རེད། ཡིད་ཆེས་དགོས་པ་རེད། གུས་བརྩི་དགོས་པ་རེད། དེ་ཡོང་བ་ལ་ཁོ་ཚོས་བོད་ནང་ལ་སྲིད་བྱུས་འཛིན་སྟངས་དང་། རྒྱ་ནག་ནང་གི་རང་དབང་། དམངས་གཙོ། འགྲོ་བ་མིའི་ཐོབ་ཐང་བཅས་ཀྱི་ཐད་ནས་འགྲིག་ཡོད་པ་མ་རེད། འགྲིག་མེད་པ་དེ་འཛམ་གླིང་གིས་གསལ་བོ་བཟོ་ཐུབ་རྒྱུ་དེ་གལ་ཆེན་པོ་ཆགས་ཡོད་པ་རེད། རྒྱ་ནག་གི་དབུ་ཁྲིད་ཚོར་མཐོང་དང་ཆ་འཇོག་དེ་དག་དགོས་ཀྱི་ཡོད་ན་འགྱུར་བ་གཏོང་དགོས་པ་ཞིག་ཆགས་བསྡད་ཡོད་པ་རེད། དེ་བྱས་དུས་ཉིན་དང་ཟླ་ཁ་ཤས་ནང་མིན་རུང་གྲོས་ཆོད་དེ་དག་ལ་ནུས་པ་ཏན་ཏན་ཡོད་པ་རེད་བསམ་གི་འདུག