གསོ་
ཨེ་ཀི་ན་ཞེ་ཨ། Echinaces
རྒྱུན་སྤྱོད་མིང༌། ཀོན་མེ་ཏོག Purple coneflower,coneflower, American coneflower
ལ་ཊིན་མིང༌། Echinacea purpurea, Echinacea angustifolia, Echinacea pallida
སྨན་སྤྱོད། རྩ་བ་དང་སྡོང་ལོ་མེ་ཏོག སྐྱེ་དབྱིབས། འདི་ནི་ལོ་མང་སྐྱེ་བའི་རྩྭ་ལྡུམ་ཆུང་ངུ་ཞིག་སྟེ། ཨ་རིའི་ཤར་བྱང་སྤང་ཐང་ཅན་གྱི་མངའ་སྡེའི་ཁུལ་དུ་སྐྱེ། སྡོང་རྐང་མཁྲེགས་ལ་མཐུག་པ་རིལ་མོ་སྤུ་ཞིབ་སྐྱེ་ཞིང༌། ལོ་མ་ཆུང་ལ་རིང་བ་སྣེ་གཉིས་ཕྲ་བ། སྡོང་རྐང་གི་རྩེ་མོར་མེ་ཏོག་གི་འདབ་མ་ ༡༢ ནས་ ༢༠ འདོགས་པ་མུ་མེན་མདོག་ཅན། འབྲས་བུ་རྡོག་པོ་ཟེ་ཞིབ་མང་པོ་འདོགས་པ་ཞིག་ཡིན།རོ་དང་ངོ་བོ། རོ་ཁ་ལ་ཅུང་ཚ་བ། ངོ་བོ་བསིལ།
ཕན་ཡོན། ཆམ་རིམས་དང་ཡ་མ་སྣ་འགག འགོ་ནད་རིགས་སྔོན་འགོག་དང་གསོ་བཅོས་བྱེད་ཅིང༌། འབུ་སྲིན་འཇོམས་པ། རྨ་རིགས་ཏེ་པགས་ནད་ཟ་རྐོང་དང་རྣག་འབུར་ཆུ་བུར། ཁྲག་གི་འགོས་དུག ཁྲག་གཙང་མ་བཟོ་བ་བཅས་ལ་ཕན། ནུབ་ཕྱོགས་ཡུལ་དུ་འདི་ནི་དུག་སེལ་ཁྲག་གཙང་མ་བཟོ་བའི་རང་བྱུང་སྨན་རྩྭ་མཆོག་ཏུ་གྱུར་བ་ཞིག་ལ་བརྩི་བཞིན་ཡོད་པས་སྤྱོད་ཁྱབ་ཆེ།
སྤྱོད་སྟངས་དང་ཐུན་ཚད། རྩ་བ་དང་སྡོང་ལོ་མེ་ཏོག་ཞིབ་བརྡུངས་ཀྱིས་བསྒྲུང་ཇ་བཟོ་བ། སྨན་ཆང་སྟེ་ཊིན་ཁུ་ཆིར་ (tincture) བཟོ་བ། ཡང་ན་ལྡེ་གུ་བཟོས་ཏེ་ལུས་ཕྱི་ལ་བྱུག་དགོས།
དོ་སྣང༌། ཟུངས་ཁྲག་ཞན་པ་དང་མགོ་ཡུ་འཁོར་བ། རླུང་ཁ་མཐོ་བའི་རིགས་ལ་གནོད།
David Frawley & Vasant Lad “The Yoga of Herbs” དང་NCCAM “Herbs at Glance” དང་ John Lust “The Herb Book” བཅས་ལ་དཔྱད་གཞི་བྱས།
