སྔར་ལོའི་ཞི་རྒོལ་སྐབས་འཛིན་བཟུང་བྱས་པའི་ཁམས་དཀར་མཛེས་ཀྱི་བོད་མི་ཞིག་ལ། ཉལ་གདན་འོག་ནས་ཐུང་མདའ་དང་མདེའུ་རྙེད་པར་ཉེས་པ་ངོས་ལེན་བྱ་དགོས་པར་ཚ་འདེད་བྱེད་ཀྱིན་ཡོད་ཀྱང༌། ད་ལྟའི་ཆར་ཁས་ལེན་བྱས་ཡོད་མི་འདུག
དབྱིན་ཡིག་གི་གསར་ལམ་ཁག་ཅིག་ཏུ་གནས་ཚུལ་ཐོན་གསལ་ལྟར་ན། སི་ཁྲོན་ཞིང་ཆེན་དཀར་མཛེས་རྫོང་བཙུན་མའི་དགོན་པ་ཞིག་གི་མགོ་གཙོ་ཕུར་བུ་ཚེ་རིང་རིན་པོ་ཆེ་ལགས། ད་ལྟ་དཀར་མཛེས་རྫོང་མི་དམངས་ཁྲིམས་ཁང་དུ་བཀག་ཉར་བྱས་ཡོད་པ་དང༌། ཉེན་རྟོག་པས་ཁོང་གི་ཉལ་གདན་འོག་ནས་ཐུང་མདའ་གཅིག་དང་མདེའུ་བརྒྱ་ལྷག་རྙེད་ཡོད་པའི་ཉེས་འཛུགས་བྱས་ཡོད་ཀྱང༌། ཕུར་བུ་ཚེ་རིང་གིས་ངོས་ལེན་བྱས་མེད་པ་དང༌། དེ་ནི་ཁོང་ལ་མ་ཉེས་ཁག་གཡོག་བྱས་པ་ཞིག་ཡིན་ཚུལ་ཁོང་གི་ཁྲིམས་རྩོད་པ་རྒྱ་རིགས་ལཱི་ཧྥང་པཱང་ལ་བརྗོད་ཡོད་འདུག
གནད་དོན་དེའི་ཐད་ཕུར་བུ་ཚེ་རིང་ལགས་ཀྱི་ཁྲིམས་རྩོད་པས་གསར་ལམ་ཁག་ཅིག་ཏུ་བརྗོད་དོན། གལ་སྲིད་དགུང་ལོ་ ༥༢ ལ་སོན་པའི་ཕུར་བུ་ཚེ་རིང་རིན་པོ་ཆེ་ཡིས་ཐུང་མདའ་དང་མདེའུ་གསང་ཉར་བྱས་ཡོད་པ་བདེན་པ་ཡིན་ཚེ་བྱ་སྤྱོད་དེ་རིགས་ཁྲིམས་འགལ་ཆགས་ཀྱིན་ཡོད་པ་རེད། མ་མཐར་ཡང་ཁོང་ལོ་ངོ་ ༡༥ ལྷག་ལ་ཁྲིམས་ཁང་དུ་སྡོད་དགོས་པ་ཡོང་སྲིད་པ་ཞིག་རེད། ད་ལྟའི་ཆར་ཉེན་རྟོག་པས་ཐུང་མདའ་དེའི་ཡོང་ཁུངས་རྩད་གཅོད་དང། ཕུར་བུ་ཚེ་རིང་ལགས་ཀྱི་ལག་རིས་སོགས་ལ་རྟོག་ཞིབ་བྱས་ཡོད་པ་མ་རེད། འོན་ཀྱང། འདས་པའི་ཉིན་གྲངས་ ༤ ལྷག་རིང་ཉེན་རྟོག་པ་དང་ཉེས་དོན་ཞིབ་བཤེར་ཁང་གིས་མེ་མདའ་དེ་ཕུར་བུ་ཚེ་རིང་གི་ཡིན་པ་ངོས་ལེན་བྱ་དགོས་ཚུལ་གྱིས་ཁོང་ལ་ཚ་འདེད་བྱས་ཡོད་པ་མ་ཟད། ཉེན་རྟོག་པས་ཁོང་གི་ཆུང་མ་དང་བྱིས་པ་སོགས་ཀྱང་བཙོན་དུ་འཇུག་རྒྱུ་ཡིན་ཚུལ་སོགས་ཀྱི་འཇིགས་སྣང་སྐུལ་གྱིན་ཡོད་ཀྱང། ཕུར་བུ་ཚེ་རིང་རིན་པོ་ཆེ་ཡིས་ད་ཆར་གང་ཡང་ངོས་ལེན་བྱས་ཡོད་པ་མ་རེད། ཅེས་པེ་ཅིན་དུ་གཏན་སྡོད་བྱེད་མཁན་ཕུར་བུ་ཚེ་རིང་གི་རྒྱ་རིགས་ཁྲིམས་རྩོད་པ་ལཱི་ཧྥང་པཱང་གིས་གསར་ལམ་ཁག་ལ་བརྗོད་ཡོད་འདུག
ཕུར་བ་ཚེ་རིང་རིན་པོ་ཆེ་མཆོག་གིས་སྔར་ལོ་སྤྱི་ཟླ་ ༥ བའི་ནང་དུ་ཁམས་དཀར་མཛེས་རྫོང་ཐོག་ཏུ་བཙུན་མ་ ༥༠ ལྷག་གིས་རྒྱ་གཞུང་ལ་ཞི་བའི་ངོ་རྒོལ་སྐད་འབོད་གནང་སྐབས་སྣེ་ཁྲིད་བྱེད་མཁན་ཡིན་པའི་ཉེས་འཛུགས་འོག ཟླ་ ༥ ཚེས་ ༡༨ ཉིན་ཁོང་འཛིན་བཟུང་བཙན་ཁྲིད་བྱས་ཡོད་འདུག
ཕུར་བུ་ཚེ་རིང་རིན་པོ་ཆེ་ལགས་བཙོན་འཇུག་བྱས་ཡོད་པ་འདིར་ས་གནས་མི་མང་གིས་བློ་འཚབ་ཆེན་པོ་བྱེད་བཞིན་ཡོད་པ་དང༌། ཕུར་བུ་ཚེ་རིང་རིན་པོ་ཆེ་ནི་རྒྱུན་དུ་མི་མང་དང་དཀའ་ངལ་ཅན་གྱི་མི་རྣམས་ལ་རོགས་རམ་གནང་གིན་ཡོད་པ་སོགས་བཀུར་བར་འོས་པའི་མི་ཞིག་ཡིན་པ་དང༌། དཀར་མཛེས་ཁུལ་དུ་ཕུར་བུ་ཚེ་རིང་རིན་པོ་ཆེ་ཡིས་རྒན་གསོ་ཁང་ཞིག་དང་སྨན་ཁང་གཉིས་བརྒྱབ་ཡོད་འདུག
གཉིས་པ།
ཕྱི་ཟླ་ ༥ ཚེས་ ༡༩ ཉིན་འདི་གར་འབྱོར་བའི་གནས་ཚུལ།
མདོ་ཁམས་ཏྲེ་ཧོར་དཀར་མཛེས་ནས་རླབས་ཆེན་གྱི་སྐྱེས་བུ་ཞིག་འཛིན་བཟུང༌།
ཕྱི་ཟླ་ ༥ ཚེས་ ༡༩ ཉིན་འདི་གར་རྡ་ས་ཏྲེ་ཧོར་བ་ཐུན་མོང་གིས་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ལོ་ ༢༠༠༨ ཟླ་ ༥ ཚེས་ ༡༨ ཉིན་གྱི་ཞོགས་པ་ཆུ་ཚོད་ ༤།༣༠ གཡས་གཡོན་ཙམ་ལ་མདོ་ཁམས་ཏྲེ་ཧོར་དཀར་མཛེས་དགོན་གྱི་སྤྲུལ་སྐུ་ཕུར་བུ་ཚེ་རིང་རིན་པོ་ཆེ་མཆོག་རྒྱ་གཞུང་ནས་གློ་བུར་དུ་འཛིན་བཟུང་གིས་བཙན་ཁྲིད་བྱས་ཟིན་འདུག
དེ་ཡང་བོད་ཆོལ་ཁ་གསུམ་གྱི་ཁྱོན་དུ་བོད་བསྟན་སྲིད་མི་རིགས་དང་བཅས་པའི་ཁུར་འགན་བཞེས་མཁན་དཔྲལ་བའི་མིག་དང༌། ཁོག་པའི་སྙིང་ལྟ་བུའི་བླ་སྤྲུལ་དགེ་བཤེས་གང་ན་སུ་བཞུགས་པ་རྣམས་རིམ་བཞིན་རྒྱ་གཞུང་ནས་འཛིན་བཟུང་གིས་གཡོ་ཐབས་རབས་དང་རིམ་པ་སྤྱད་དེ་སྐུ་ཚེ་མ་ཟིན་པ་དང༌། སྐུ་ཁམས་མི་བདེ་བ་སོགས་ཆགས་པ་དུ་མ་ཞིག་བྱུང་ཟིན་ཡོད་པ་ཀུན་གྱིས་མཁྱེན་གསལ་ལྟར་ལ། ད་ལན་འཛིན་བཟུང་བཙན་ཁྲིད་བྱས་པའི་སྤྲུལ་སྐུ་ཕུར་བུ་ཚེ་རིང་རིན་པོ་ཆེ་མཆོག་ནི་མདོ་ཁམས་ཏྲེ་ཧོར་དཀར་མཛེས་ཁུལ་གྱི་སྤྲུལ་སྐུ་གྲགས་ཅན་ཞིག་དང༌། སྤང་རི་བུ་རམ་སྣ་བཙུན་དགོན་དང༌། གཡའ་བརྩེགས་དབྱར་སྟེང་བཙུན་དགོན་གཉིས་ཀྱི་ཐུགས་འགན་བཞེས་པའི་དབུ་བླ་དང༌། ས་གནས་མི་མང་གི་ཕན་བདེའི་ཆེད་རྒས་གསོ་ཁང་ཞིག་གསར་རྒྱག་གནང་བ་མ་ཟད། སྨན་ཚོང་ཁང་གཉིས་ཀྱང་གཉེར་བཞིན་ཡོད་པ་རེད།
མདོར་ན་རིན་པོ་ཆེ་མཆོག་ས་གནས་དེ་གའི་རྒྱ་ཆེའི་མང་ཚོགས་ཡོངས་ཀྱི་སེམས་འཁྲི་ས་ཞིག་དང་ལུང་པ་བདེ་འཇགས་བརྟན་ལྷིང་གི་ཕུག་རྩ་ཞིག་ཡིན་ནའང༌། རྒྱ་གཞུང་ནས་ཁུངས་ལྡན་གྱི་རྒྱུ་མཚན་གང་ཡང་མེད་པར་འཛིན་བཟུང་བཙན་ཁྲིད་བྱས་པ་ནི་ཆེས་བློ་ཕམ་གྱི་ཡུལ་ལས་མ་འདས། ཁོང་འཛིན་བཟུང་བཙན་ཁྲིད་བྱས་སྐབས་གཟུགས་ཁམས་གསལ་དྭངས་ཡིན། ཁོང་འཛིན་བཟུང་བྱས་པ་དེར་ས་གནས་དེ་གའི་མི་མང་ཙམ་མ་ཟད་རྒྱ་ཆེའི་བོད་རིགས་ཡོངས་ལ་ཡིད་སྐྱོ་དགོས་པའི་གནས་ཚུལ་ཞིག་བྱུང་བ་ཡིན་པས་གཟུ་བོར་གནས་པའི་འཛམ་གླིང་གཞུང་མང་ཡོངས་ནས་མགོན་སྐྱབས་དཔུང་རོགས་ཐབས་ཤེས་ཅི་ཡོད་ཀྱི་སྐྱབས་འཇུག་ངེས་པར་དུ་གནང་རོགས་གནང་ཞེས་སྙིང་ཐག་པ་ནས་ཞུ་བཞིན་ཡོད་འདུག
བོད་ནང་དངོས་ཡོད་གནས་ཚུལ་ཇི་བྱུང་འབྲེལ་བ་གནང་ཡུལ་ཚོགས་ཆུང་ནས་ ༢༠༠༨།༥།༡༩ ལ།
དཀར་མཛེས་ཀྱི་གྲགས་ཅན་སྤྲུལ་སྐུ་ཕུར་བུ་ཚེ་རིང་རིན་པོ་ཆེ་དང་འབྲེལ་བའི་ན་ནིང་གི་ཁུངས་ལྡན་གནས་ཚུལ་ཁག་གཉིས།
དང་པོ།
ཕྱི་ཟླ་ ༥ ཚེས་ ༡༥ ཉིན་འདི་གར་འབྱོར་བའི་གནས་ཚུལ།
མདོ་ཁམས་ཏྲེ་ཧོར་དཀར་མཛེས་སྤང་རི་བུ་རམ་སྣ་བཙུན་དགོན་གྱི་བཙུན་མ་རྣམས་ཀྱིས་ཞི་རྒོལ་སྐད་འབོད་དང་རྒྱ་གཞུང་གིས་འཛིན་བཟུང་
གཅར་རྡུང་བྱས་པའི་སྐོར་གྱི་གནས་ཚུལ་ཞིབ་ཕྲ།ཕྱི་ལོ་ ༢༠༠༨ ཟླ་ ༥ ཚེས་ ༡༤ ཉིན་གྱི་ཕྱི་དྲོ་དཀར་མཛེས་བོད་རིགས་རང་སྐྱོང་ཁུལ། དཀར་མཛེས་རྫོང༌། སུ་ངོ་ཤང༌། སྤང་རི་བུ་རམ་སྣ་བཀྲ་ཤིས་དགེ་འཕེལ་གླིང་གི་བཙུན་མ་རྣམས་ཀྱིས་ཞི་རྒོལ་སྐད་འབོད་བྱས་པར་རྒྱ་གཞུང་གིས་འཛིན་བཟུང་དང་མི་སྤྱོད་ལས་འདས་པའི་གཅར་བརྡུང་ཚད་མེད་བྱས་འདུག
དེ་ཡང་ད་ལོའི་ཕྱི་ཟླ་ ༣ ཚེས་ ༡༠ བཟུང་བོད་ཆོལ་ཁ་གསུམ་གྱི་ས་ཁྱོན་ཡོངས་ནས་རྒྱ་གཞུང་ལ་ངོ་རྒོལ་རྔམ་སྟོན་མུ་མཐུད་བྱས་དང་བྱེད་བཞིན་པར་རྒྱ་གཞུང་གིས་བོད་མི་མང་པོ་དམར་གསོད་དང་བརྡུང་རྡེག བཙོན་འཇུག་སོགས་མནར་གཅོད་ཚད་མེད་བཏང་དང་གཏོང་བཞིན་པ་དང༌། དམིགས་བསལ་དགོན་སྡེ་ཁག་གཙོ་གྱུར་ལ་རྒྱལ་གཅེས་ཆོས་གཅེས་ཀྱི་སློབ་གསོ་ཞེས་པའི་མིང་ཐོག་ྋགོང་ས་ྋསྐྱབས་མགོན་ཆེན་པོ་མཆོག་ལ་མཚན་སྨད་དང༌། བོད་ནང་གི་ལས་འགུལ་ཁག་ལ་དྲག་སྤྱོད་ཅེས་པའི་མིང་འདོགས་ཀྱིས་དེ་ནི་ྋགོང་ས་མཆོག་ནས་བརྒྱུད་སྐུལ་བྱས་ཚུལ་སོགས་ཀྱི་ས་རྟགས་བསྡུ་རུབ་ཀྱི་ལས་འགུལ་རབས་དང་རིམ་པ་སྤེལ་བཞིན་པ་ལྟར། སྤང་རི་སྣ་བཙུན་དགོན་དུའང་བཙན་ཤེད་ཀྱིས་ས་རྟགས་བསྡུ་རུབ་དགོས་པའི་ལས་འགུལ་སྤེལ་རྒྱུའི་ཆེད་ས་གནས་རིམ་པའི་ལས་བྱེད་དང་སྤྱི་བདེ་མི་སྣ་བཅས་ཐེངས་མང་སླེབས་ཡོད་འདུག་ཀྱང་བཙུན་མ་རྣམས་ནས་ད་བར་དང་ལེན་རྩ་བ་ནས་བྱས་ཡོད་མི་འདུག
དེ་ལྟ་བུའི་བཙན་ཤུགས་དྲག་གནོན་གྱི་ས་རྟགས་བསྡུ་རུབ་ལ་དང་ལེན་རྩ་བ་ནས་བྱ་ཐུབ་མེད་པར་སོང་སྤང་རི་སྣ་བཙུན་དགོན་གྱི་བཙུན་མ་རྣམས་རང་འགུལ་གྱིས་རུག་རུག་བྱས་ཏེ་ྋགོང་ས་མཆོག་ལ་མཚན་སྨོད་སོགས་བདེན་པ་མ་ཡིན་པའི་སྐོར་ལ་དང་ལེན་དང་ས་རྟགས་བརྒྱབ་པ་ལས་ཤི་ན་དགའ་བ་དང༌། ད་སྡོད་ས་མ་རག་ནའང་འགྲོ་ན་དགའ། བསད་ནའང་འགྱོད་པ་མེད་པས་རང་གི་ཞེ་འདོད་གསལ་སྟོན་གྱི་ངོ་རྒོལ་བྱ་རུ་འགྲོ་རྒྱུའི་ནང་གྲོས་བྱས་ཏེ་ཕྱི་ཟླ་ ༥ ཚེས་ ༡༤ ཕྱི་དྲོ་བཙུན་མ་རྣམས་དཀར་མཛེས་རྫོང་ཐོག་ཏུ་དམ་བསྒྲགས་དང་དམག་དཔུང་ལ་མ་འཛེམ་པར་ཞི་རྒོལ་སྐད་འབོད་བྱེད་པར་ཕྱིན་འདུག
ཐོག་མར་བཙུན་མ་ཚོ་གཅིག་ཤུག་རི་གླིང་ནས་ཡོང་བ་དང༌། ཚོ་གཅིག་བདེ་མགོན་པོ་ནས་ཡོང་ཏེ་བོད་ལ་རང་དབང་རང་བཙན་དགོས། རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ཞེས་སོགས་ཀྱི་སྐད་འབོད་ཤུགས་ཆེར་བརྒྱབ་པ་དང༌། ཡིག་ཆ་མང་པོ་བཀྲམ་བཞིན་ཕྱི་དྲོ་ཆུ་ཚོད་ ༥།༠༠ ཙམ་ལ་དཀར་མཛེས་རྫོང་གི་ཟམ་པའི་ཚུར་འགྲམ་གྱི་སུམ་མདོར་མཉམ་འཛོམས་བྱུང་བ་དང་དེ་ནས་ཟམ་པ་ཕར་ཕྱོགས་ཀྱི་ཉེན་རྟོག་པའི་ལས་ཁུངས་མདུན་བར་སྐད་འབོད་བྱེད་བཞིན་ཕྱིན་སྐབས་ཉེན་རྟོག་པ་དང་དམག་མིས་བཙུན་མ་ ༥༠ ལྷག་འཛིན་བཟུང་གིས་མོ་ཊ་ནང་མཉམ་བླུག་དང་བརྡུང་རྡེག་ཚད་ལས་འདས་པ་བཏང་ནས་ས་ཐོག་ཏུ་ཁྲག་དམར་ཐར་རེར་ཆགས་པ་མ་ཟད། བཙུན་མ་ཁ་ཤས་ཀྱི་གཟན་དང་ལྷམ་སོགས་བུད་ནས་བདག་པོ་རྒྱག་མཁན་མེད་པར་གྱུར་འདུག བཙུན་མ་རྣམས་རྒྱ་དམག་གི་མོ་ཊའི་ནང་བླུག་ནས་འཁྱེར་འགྲོ་བའི་སྐབས་ད་དུང་ཡང་སྐད་འབོད་དང་ཡིག་ཆ་གཏོར་བ་སོགས་བྱས་ཏེ་མཐོང་བ་ཙམ་གྱིས་ཡིད་སྐྱོ་དགོས་པ་དང་བོད་མི་གཞན་པ་རྣམས་ཀྱང་རང་སར་སྡོད་བཟོད་མེད་པའི་དྲན་སྐུལ་ཤུགས་ཆེ་ཞིག་བཏང་ཡོད།
སྤྱིར་བཏང་སྤང་རི་སྣ་བཙུན་དགོན་དེ་ཉིད་དཀར་མཛེས་རྫོང་ནས་ས་ཐག་ཀི་ལོ་མི་ཊར་ ༢ ཙམ་གྱི་སར་ཆགས་ཡོད་པ་དང༌། ནམ་རྒྱུན་བཙུན་མ་ ༨༠ ལྷག་ཡོད་པ་ནས་ཕྱི་ཟླ་ ༥ ཚེས་ ༡༤ ཉིན་བཙུན་མ་ཉི་ཤུ་ནང་སྐོར་ཞིག་གྲོང་གསེབ་ཏུ་ཞབས་བརྟན་བྱེད་པར་སོང་བའི་འཕྲོས་བཙུན་མ་ཡོངས་རྫོགས་ཞི་རྒོལ་སྐད་འབོད་ནང་མཉམ་ཞུགས་བྱས་ཡོད་པ་རེད།
ད་དུང་བཙུན་དགོན་ནང་ལྷག་ཡོད་པའི་བཙུན་མ་རྣམས་ཆགས་ས་བརྟེན་ས་གང་ཡང་མེད་པ་དང་གར་འགྲོ་འདི་འགྲོ་མེད་པའི་གནས་སུ་ལྷུང་ནས་ཅི་བྱ་གཏོལ་བྲལ་དུ་གྱུར་ཡོད་འདུག
ཕྱི་ ༥ ཚེས་ ༡༤ དགོང་མོ་དཀར་མཛེས་སྤྱི་བདེ་ལས་ཁུངས་ནས་དཀར་མཛེས་སུ་ཡོད་པའི་དགོན་པ་ཁག་ལ་དེ་རིང་ནས་བཟུང་གྲྭ་བཙུན་སུ་ཡང་གྲོང་ཁྱེར་ནང་འགྲོ་མི་ཆོག་པ་དང༌། གལ་སྲིད་ན་ཚ་འདྲ་ཕོག་ནས་འགྲོ་དགོས་བྱུང་བ་ཡིན་ཚེ་ས་གནས་དང་ཤང་གི་འགོ་ཁྲིད་བརྒྱུད་ཡི་གེ་བླངས་ཏེ་ཁག་ཐེག་ཁུར་མཁན་ལས་བྱེད་མི་སྣ་གཅིག་མཉམ་དུ་མ་ཡོང་ན་འཛིན་བཟུང་བྱ་རྒྱུ་ཡིན་སྐོར་བཤད་བཞིན་ཡོད་འདུག
ཕྱི་ཟླ་ ༥ ཚེས་ ༡༥ ཉིན་དཀར་མཛེས་རྫོང་ཕྱོགས་སུ་འགྲུལ་པ་ཕར་འགྲོ་ཚུར་འོང་ཚུན་ཆད་བཀག་པ་དང༌། ཚོང་ཁང་སོགས་སྒོ་བརྒྱབས་ནས་ཤིན་ཏུ་ཛ་དྲག་པའི་གནས་ཚུལ་ཐོན་བཞིན་འདུག་པ་བཅས།།
བོད་ནང་དངོས་ཡོད་གནས་ཚུལ་ཇི་བྱུང་འབྲེལ་བ་གནང་ཡུལ་ཚོགས་ཆུང་ནས་ ༢༠༠༨།༥།༡༥ ལ།
རྒྱ་གཞུང་གི་བྱེད་སྟངས་འདི་ནི་གསར་པ་གང་ཡང་མ་རེད། སྔོན་མ་སྤྲུལ་སྐུ་བསྟན་འཛིན་བདེ་ལེགས་ལའང་འདི་དང་འདྲ་བའི་ཉེས་འཛུགས་བྱས་ཏེ་ཁྲིམས་གཅོད་བྱས་པ་རེད། བོད་ཀྱི་གྲྭ་བཙུན་སྤྱི་དང་དམིགས་བསལ་སྤྲུལ་སྐུ་རྣམས་དྲག་སྤྱོད་པ་ཡིན་པའི་མཐོང་སྣང་ཞིག་བསྐྲུན་ཏེ། སྤྲུལ་སྐུ་ཚོའི་ཤུགས་རྐྱེན་མེད་པ་བཟོ་རྩིས་རེད།
གནད་འགག་ནི། རྒྱ་ནག་གཞུང་གིས་འདི་འདྲ་བྱས་ནས་བོད་རྒྱའི་གནད་དོན་མེད་པ་བཟོ་ཐུབ་མིན་དེ་རེད། ངའི་བསམས་པར། འདི་འདྲ་བྱས་ནས་བོད་མིའི་སེམས་ནང་རྒྱ་གཞུང་ལ་འཁོན་སེམས་ཇེ་ཆེ་ལས་ཇེ་ཆུང་དུ་གཏོང་ཐུབ་ཀི་མ་རེད། བྱེད་སྟངས་འདི་ཚོ་རྒྱ་གཞུང་འུ་ཐུག་པའི་རྟགས་ཤིག་ཀྱང་རེད།
ད་ལོ་ནི་འདས་ལོའི་མི་མང་ཞི་རྒོལ་བ་དེ་དག་གཅིག་རྗེས་གཉིས་མཐུད་དུ་བཙོན་དང་སྲོག་ཁྲིམས་ཀྱི་ལོ་ཞིག་ཆགས་ཡོད་པ་འདྲ། དྲ་ཐོག་ནས་གཅིག་རྗེས་གཉིས་མཐུད་དུ་བོད་ནང་གི་གསར་འགྱུར་རེ་བཀོད་དེ་འོང་དུས་གཅིག་ཚེ་བཙོན་རེད་འདུག གཅིག་སྲོག་ཁྲིམས་རེད་སོགས་ཀྱི་གནས་ཚུལ་ལས་གང་ཡང་ཐོས་ཀྱི་མི་འདུག འདི་ནི་རྒྱ་ནག་གིས་ལུག་གསད་ན་ར་སྙིང་འདར་ཟེར་བས་སྲིད་ཇུས་དེ་བོད་མི་མང་ལ་སྟོན་བཞིན་ཡོད་པ་མ་རེད་དམ། བོད་པ་ཚོ། བོད་ནང་གི་བོད་པའི་མི་སྣ་གལ་ཆེན་དེ་དག་གཅིག་རྗེས་གཉིས་མཐུད་དུ་ཁྲིམས་ཁང་དང་སྲོག་ཁྲིམས་བཅད་དེ་འོང་ན། ངེད་ཅག་བོད་རིགས་མི་མང་གཞིས་བྱེས་གཉིས་ཀྱིས་ད་ནི་ལྟད་མོ་བལྟས་དེ་གནས་ཚུལ་རེ་གསལ་བསྒྲགས་བྱོས་དེ་བསྡོད་རྒྱུ་ལས་ང་ཚོ་ལ་ལས་འགན་གང་ཡང་མེད་པ་ཡིན་ནམ་ཅི། འདི་ལྟར་ཡིད་སྐྱོ་བའི་གནས་ཚུལ་གཅིག་རྗེས་གཉིས་མཐུད་དུ་ཀློག་དུས་སུ། དངོས་ནས་སེམས་པ་འདི་ནི་ན་ཟུག་རྐྱང་རྐྱང་ལས་གང་ཡང་མེད་པར་གྱུར་བཞིན་འདུག དྲ་གྲོགས་ཚོ། ངེད་ཅག་ལ་ཐབས་ཤེས་རེ་ཡོད་སྲིད་དམ། ཚང་མའི་བོད་ནང་ལོག་གི་བོད་མི་དག་གི་ཆེད་དུ་བགྲོ་གླེང་དང་ལས་འགུལ་སྤེལ་ཕྱོགས་ཀྱི་བསམ་ཚུལ་རེ་འདོན་རྒྱུ་ཡོད་ན་ཡག་པོ་འདུག
ད་ལོ་ནི་འདས་ལོའི་མི་མང་ཞི་རྒོལ་བ་དེ་དག་གཅིག་རྗེས་གཉིས་མཐུད་དུ་བཙོན་དང་སྲོག་ཁྲིམས་ཀྱི་ལོ་ཞིག་ཆགས་ཡོད་པ་འདྲ། དྲ་ཐོག་ནས་གཅིག་རྗེས་གཉིས་མཐུད་དུ་བོད་ནང་གི་གསར་འགྱུར་རེ་བཀོད་དེ་འོང་དུས་གཅིག་ཚེ་བཙོན་རེད་འདུག གཅིག་སྲོག་ཁྲིམས་རེད་སོགས་ཀྱི་གནས་ཚུལ་ལས་གང་ཡང་ཐོས་ཀྱི་མི་འདུག འདི་ནི་རྒྱ་ནག་གིས་ལུག་གསད་ན་ར་སྙིང་འདར་ཟེར་བས་སྲིད་ཇུས་དེ་བོད་མི་མང་ལ་སྟོན་བཞིན་ཡོད་པ་མ་རེད་དམ། བོད་པ་ཚོ། བོད་ནང་གི་བོད་པའི་མི་སྣ་གལ་ཆེན་དེ་དག་གཅིག་རྗེས་གཉིས་མཐུད་དུ་ཁྲིམས་ཁང་དང་སྲོག་ཁྲིམས་བཅད་དེ་འོང་ན། ངེད་ཅག་བོད་རིགས་མི་མང་གཞིས་བྱེས་གཉིས་ཀྱིས་ད་ནི་ལྟད་མོ་བལྟས་དེ་གནས་ཚུལ་རེ་གསལ་བསྒྲགས་བྱོས་དེ་བསྡོད་རྒྱུ་ལས་ང་ཚོ་ལ་ལས་འགན་གང་ཡང་མེད་པ་ཡིན་ནམ་ཅི། འདི་ལྟར་ཡིད་སྐྱོ་བའི་གནས་ཚུལ་གཅིག་རྗེས་གཉིས་མཐུད་དུ་ཀློག་དུས་སུ། དངོས་ནས་སེམས་པ་འདི་ནི་ན་ཟུག་རྐྱང་རྐྱང་ལས་གང་ཡང་མེད་པར་གྱུར་བཞིན་