ནད་ཡམས་གསར་པ་ཞིག

འདྲེ་རིག་ལྡན་གྱི་ཟིན་བྲིས་ལས་བཤུས།

མེག་སི་ཀོ་(Mexico) ནས་ཁྱབ་པའི་ནད་ཡམས་གསར་པ་ཞིག་གིས་འཛམ་གླིང་ཡོངས་སུ་འཇིགས་སྣང་སྐུལ་བཞིན་འདུག 
 
དེ་རིང་གི་ནིའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། མེཀ་སི་ཀོ་ནས་ནད་ཡམས་གསར་པ་ཞིག་ཁྱབ་བཞིན་ཡོད་པ་དང་། ཉིན་ཤས་རིང་འདིར་མེག་སི་ཀོ་ནས་ནད་ཡམས་ཕོག་པའི་མི་གྲངས་༡༣༠༠ ཙམ་ནས་མི་གྲངས་ ༨༠ ལྷག་རྐྱེན་ལམ་དུ་བཏང་ཡོད་འདུག་པ་དང་། ནད་ཡམས་ཕོག་པའི་མི་གྲངས་མགྱོགས་མྱུར་སྒོས་འཕེལ་བཞིན་ཡོད་པ་རེད།
 
ནད་འབུ་ཕྲ་མོ།
 

རྒྱུས་ལོན་རགས་ཙམ་བྱས་པ་ལྟར་ན། ནད་ ཡམས་དེ་ནི་ཕྲ་འབུས་སྐྱེད་པ་རེད་འདུག་པ་དང་། དེས་མིའི་སྣ་དང་། མགྲིན་པ། གློ་བ་བཅས་ལ་གཉན་ཁ་བརྒྱབ་ནས་དུས་ཡུན་ཐུང་ཐུང་ཞིག་གི་ནང་དུ་སྲོག་ཉེན་ལ་འཕྲད་ པའི་གནས་ཚུལ་ཐོན་བཞིན་ཡོད་པ་རེད། ཧ་ཅང་གཟབ་དགོས་པ་ཞིག་ནི་ནད་ཡམས་དེ་ཁ་དབུགས་བརྒྱུད་ནས་འགོས་ཀི་ཡོད་པ་དེ་རེད།
 
ཁྱབ་འགོས།
 
ནད་ཡམས་དེ་ད་ཆ་ཨ་རིའི་ནང་ལ་ཐོན་འདུག་པ་དང་། དེ་རིང་ཨ་རིའི་འཕྲོད་བསྟེན་ལས་བྱེད་པས་གསལ་བསྒྲགས་བྱས་པ་ལྟར་ན། ད་ལྟའི་བར་དུ་ནད་ཡམས་དེ་ཕོག་པའི་མི་གྲངས་ནིའུ་ཡོག་གྲོང་ཁྱེར་ནས་༨ དང་། ཁེལིཕོར་ནི་ཡ་ནས་༧  དེ་བཞིན་ཀན་ས་སི་ནས་༢ དང་ཊེག་ས་སི་ནས་༢  ཨོ་ཧ་ཡོ་ནས་༡ བཅས་ཤེས་རྟོགས་བྱུང་ཡོད་འདུག  འབྲེལ་ཡོད་མི་སྣས་གསལ་བསྒྲགས་བྱས་འདུག་པ་ལྟར་ན་དེ་དག་ཐམས་ཅད་ནི་མེག་སི་གོ་ལ་སོང་ནས་ཡོང་བ་ཏག་ཏག་ཡིན་པ་རེད། འོན་ཀྱང་། ཨ་རིའི་ནང་དུ་ད་ལྟའི་བར་དུ་ནད་ཡམས་དེ་ལ་བརྟེན་ནས་རྐྱེན་ལམ་དུ་གྱུར་བའི་གནས་ཚུལ་ཐོན་མི་འདུག།
 
སེམས་འཚབ།

ད་ཆ་ནད་ཡམས་འདི་ནིའུ་ཛི་ལན་ཌི་དང་སི་པན་རྒྱལ་ཁབ་གཉིས་སུ་ཤུགས་ཆེན་པོར་ཁྱབ་སྲིད་པར་འཇིགས་སྣང་བྱེད་ཀྱིན་པ་དང་། ཐེངས་འདིའི་ནད་ཡམས་འདི་རྒྱལ་སྤྱིའི་སྤྱི་ཚོགས་ཡོངས་སུ་ཁྱབ་སྲིད་པར་ཡང་འཇིགས་སྣང་བྱེད་ཀྱིན་ཡོད་པ་རེད།
 
དེ་རིང་རེས་གཟའ་ཉི་མའི་ཉིན་ལ་ཁེ་ན་ཌ་རྒྱལ་ཁབ་ཏུ་མི་གྲངས་དྲུག་ལ་ནད་ཡམས་ཕོག་པའི་ནད་རྟགས་ངོས་ཟིན་འདུག་པ་དང་། གལ་སྲིད་ནད་ཡམས་འདི་རྒྱ་ནག་དང་ར་ཤི་ཡ་གཉིས་ལ་ཁྱབ་པ་ཡིན་ན་དཀའ་ངལ་ཧ་ཅང་ཆེན་པོ་འཕྲད་ངེས་པའི་ཚོད་དཔག་བྱེད་ཀྱིན་འདུག
 
ནད་རྟགས་ཅི་ཞིག་ཡོད་དམ།
 
༡ གློ་སྐམ་རྒྱག་པ།  ༢ ཚ་བ་འཕར་བ།   ༣  མགོ་ན་བ།  ༤ ཤ་རྒྱུས་ན་བ།  ༥ མགྲིན་པ་སྐྲངས་པ།  ༦  སྣ་འགག་པ།  ༧  ཐང་ཆད་པ།
 
འབྱུང་སྲིད་པའི་ནད་རྟགས་གཞན།

༡ དུས་ཐུང་གི་ཆམ་པ་ཡངས་མོ་ཕོག་པ།  ༢ མགོ་ཡུག་འཁོར་བ།  ༣ ཤུགས་ཟད་པའི་སྣང་བ་བྱུང་བ།  ༤ ཟས་ཀྱི་ཡི་ག་ཆད་པ། ༥ ལུས་མི་བདེ་བའི་ཚོར་སྣང་འབྱུང་བ།  ༦ སྣ་ཆུ་འཛགས་པ།  ༧ དབུགས་རྒྱུན་ཐུང་བ།  ༨ རྒྱུན་ལྡན་ལས་བརྒལ་བའི་རྔུལ་ནག་ཐོན་པ།  ༩ ཞེ་མེར་བ། 
 

བརྟགས་ཐབས།

ཁྲག་ལ་བརྟགས་པ་དང་།   X གློག་དཔར་རྒྱག་པ(X-Ray)།
 
དོ་སྣང།
 
བོད་ཡུལ་ནི་ས་མཐོ་ཞིང་རླུང་བུ་གཙང་བས་འདི་ལྟའི་ནད་ཡམས་མི་འོང་བར་རེ་བ་བྱེད་ཆོག་པ་ཞིག་ཡིན་པ་དེ་ལྟར་ཡང་།  གྲྭ་སྒྲིག་སྡུག་ས་ནས་བྱེད་དགོས་ཟེར་བ་ལྟར། མི་ཚོགས་མང་སར་འགྲོ་དུས་ཁ་བཏུམ་རྒྱག་རྒྱུ་ནི་གལ་ཆེ་ལ། དེ་བཞིན་དུ་ཐ་མག་འཐེན་མཁན་ཚོས་དམིགས་བསལ་གྱིས་གཟབ་དགོས་ཚོད་རེད་འདུག་ན། རྣམ་པ་ཚོས་དེ་དོན་ཐུགས་ལ་འཛིན་རོགས། འགྲོ་ཀུན་ཁམས་བདེའི་དཔལ་ལ་རོལ་བའི་སྨོན་འདུན་བཅས།