འོས་སྦྱོང་རྫོགས་ཀྱང་སློབ་སྦྱོང་ཚར་མེད།

              
དགེ་རྒན་ནི་མི་ཚེ་ལ་བརྩོན་པ་བསྐྱེད་ཐུབ་མཁན་ཞིག་ཡིན་དགོས་མ་ཟད།སློབ་ཕྲུག་གི་གནས་སྟངས་ལ་གཞིགས་ཏེ་གང་འདྲ་བྱ་དགོས་མིན་དང་། རང་ཉིད་ཇི་ལྟར་ཡར་རྒྱས་གཏོང་མིན་ཐད་སྤྲོ་བ་སྐྱེད་ཐུབ་མཁན་ཞིག་ཡིན་དགོས་ཟེར།

ཕྱི་ཟླ་ ༥ བའི་ཚེས་ ༡ ཉིན་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་སྐུ་མགྲོན་གཙོ་བོ་བོད་གཞུང་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་དང་ཤེས་ཡོན་འགན་འཛིན་ཚེ་རིང་བསམ་འགྲུབ་མཆོག  རིགས་ལམ་སློབ་གཉེར་ཁང་གི་འགན་འཛིན་གཞོན་པ་ཐུབ་བསྟན་བརྩོན་འགྲུས་མཆོག སཱ་ར་མཐོ་སློབ་ཀྱི་སློབ་སྤྱི་འཇམ་དཔལ་གྲགས་པ་ལགས་གཙོས་དགེ་སློབ་ལྷན་འཛོམས་ཐོག  སྐུ་མགྲོན་གཙོ་བོ་མཆོག་ནས་སྐབས་བརྒྱད་པའི་མཐོ་རིམ་རིག་གནས་རབ་འབྱམས་པའི་མཐར་ཕྱིན་སློབ་མའི་ཆེད་དེེབ་༼འགུལ་གྱིན་པའི་རྣམ་ཤེས༽ཞེས་པའི་དཔེ་དེབ་དབུ་འབྱེད་དང་འབྲེལ། སྐབས་ལྔ་བའི་གཞི་རིམ་འོག་མའི་ལོ་གཉིས་དགེ་རྒན་འོས་སྦྱོང་མཇུག་སྡོམ་དང་མཐར་ཕྱིན་སློབ་མའི་མཛད་སྒོ་འཚོགས་ཡོད།

སྐབས་དེར། ཤེས་ཡོན་འགན་འཛིན་ཚེ་རིང་བསམ་འགྲུབ་ལགས་ཀྱིས།  ༢༠༠༤ ལོར་ཤེས་ཡོན་སྲིད་བྱུས་གསར་བ་གཏན་འབེབས་བྱས་པ་ནས་བཟུང། ཤེས་རིག་ལས་ཁུངས་ཀྱིས་དགེ་རྒན་ཚོར་ཤེས་ཡོན་སྲིད་བྱུས་ངོ་སྤྲོད་དང་ལག་ལེན་སོགས་ཀྱི་ཐད་ཟབ་སྦྱོང་རིམ་པར་སྤྲོད་ཀྱིན་ཡོད་པ་དང་། ད་བར་སཱ་ར་མཐོ་སློབ་དུ་ཟླ་ ༣ རིང་དམིགས་བསལ་དོ་དམ་དང་། ཟླ་ ༦ རིང་དགེ་རྒན་གྱི་གནས་ཚད་ཐོག་ཟབ་སྦྱོང། དེ་བཞིན་ངྷ་སྟེང་བོད་ཁྱིམ་སོགས་སུ་སྔོན་འགྲོའི་དགེ་རྒན་ཚོར་ཤེས་ཡོན་སྲིད་བྱུས་དང་མཐུན་པའི་ཟབ་སྦྱོང་སྤྲོད་ཀྱིན་ཡོད། ད་རེབ་ཀྱི་འོས་སྦྱོང་དེ་སྲོལ་རྒྱུན་སློབ་ཁྲིད་ཀྱི་ཐབས་ལམ་དང་བྱེད་སྟངས་གཅིག་པུ་མིན་པར། དགེ་རྒན་གྱི་ཤེས་ཡོན་མཐོ་རུ་གཏོང་ཆེད་གཞི་རིམ་འོག་མར་དགེ་རྒན་གཙུག་ལག་རབ་འབྱམས་པའི་ཤེས་ཚད་དང་། སྔོན་འགྲོའི་དགེ་རྒན་ལ་གཙུག་ལག་རབ་འབྱམས་པ་དགོས་པའི་ཆ་རྐྱེན་བཏོན་ཡོད། ད་ལྟའི་བར་དགེ་རྒན་སཱ་ར་མཐོ་སློབ་གྱི་དགེ་རྒན་གཙོས་སློབ་གྲྭ་གཞན་དུ་ཕྱག་ལས་གནང་བཞིན་པ་དང། རྒྱ་གར་བ་སོགས་ཕྱི་མི་ ༩ ལྷག་གདན་ཞུས་ཀྱིས་འོས་སྦྱོང་སྤྲད་ཡོད། ཤེས་ཡོན་སྲིད་བྱུས་དང་འབྲེལ་བའི་ཐོག་སློབ་གྲྭ་གཞན་ནང་ཉིན་ ༡༠ ལྷག་ཉམས་མྱོང་བསྡུ་ལེན་དང་། སློབ་གྲྭ་དེ་དག་ནང་འོས་སྦྱོང་བ་ཚོར་ཤེས་ཡོན་སློབ་གསོ་དང་འབྲེལ་བའི་ཟབ་སྦྱོང་སློབ་ཁྲིད་སོགས་ཀྱི་གོ་སྐབས་མང་པོ་སྤྲད་ཡོད། ཅེས་གསུངས་བྱུང་ལ། དེ་བཞིན།  སཱ་ར་མཐོ་སློབ་ཀྱི་སློབ་སྤྱི་འཇམ་དཔལ་གྲགས་པ་ལགས་ཀྱིས། དེ་རིང་ནི། སཱ་ར་མཐོ་སློབ་ཐོག་མར་དབུ་བཙུགས་པ་ནས་སྐབས་ ༨ པའི་རིག་གནས་རབ་འབྱམས་པ་སློབ་ཐོན་གྱི་ཉིན་མོ་ཆགས་ཡོད་པ་འདི་བཀྲ་ཤིས་པའི་བྱ་བ་ཞིག་དང་། འཛིན་སྐྱོང་གནང་མཁན་དང་དེའི་འོག་འཚར་ལོངས་བྱུང་བ་དག་གི་མི་ཚེ་གཅིག་གི་འབྲས་བུ་མངོན་དུ་གྱུར་བའི་བྱ་བ་ཞིག་ཀྱང་རེད། དེ་ཡང། འཇམ་མགོན་བླ་མ་ཙོང་ཁ་པ་ཆེན་པོས། དང་པོ་རྒྱ་ཆེའི་ཐོས་པ་མང་དུ་བསྩལ།། བར་དུ་གཞུང་ལུགས་ཐམས་ཅད་གདམས་པར་ཤར།།  ཐ་མར་ཉིན་མཚན་ཀུན་ཏུ་ཉམས་སུ་བླངས།། ཀུན་ཀྱང་བསྟན་པ་རྒྱས་པའི་ཆེད་དུ་བསྔོ།། ཅེས་གསུངས་པ་བཞིན་ང་ཚོ་བསྔོ་བ་བསྐྱེད་པའི་དུས་ལ་བབས་ཡོད་པས། རང་ཉིད་ཀྱིས་གང་ཤེས་པ་དེ་བསམ་པ་རྣམ་དག་དང་ཀུན་སློང་བཟང་པོའི་ཐོག་སྤྱི་ཚོགས་ལ་ཞབས་ཞུ་སྒྲུབ་རྒྱུ་དེ་གལ་ཆེན་དུ་མཐོང་གི་འདུག  རྒྱུ་མཚན་ནི། ཕྱོགས་གཅིག་ནས་ད་ལྟའི་བོད་པའི་སྤྱི་ཚོགས་དེ་ཤེས་ཡོན་ཉམ་ཆག་གི་དུས་སྐབས་ཤིག་ལ་ངོས་འཛིན་དང་། ཕྱོགས་གཞན་ཞིག་ནས་ད་ལྟའི་གཞོན་སྐྱེས་ཚོར་རིག་གནས་རབ་འབྱམས་པ་སོགས་གནས་ཚད་དང་ཤེས་ཚད་གང་འཚམ་ཡོད་ཀྱང་ཕུན་སུམ་ཚོགས་པ་དང་བཀྲ་ཤིས་པ་ཞིག་ཡོང་མ་ཐུབ་པ་དེ་ང་རང་གིས་ལྷག་བསམ་གྱིས་མ་འདང་བར་ངོས་འཛིན་བྱེད་བཞིན་ཡོད། ལྷག་བསམ་གྱི་རྒྱུན་སྐྱོང་རྒྱུ་དེ་ཤེས་ཚད་གཅིག་པུས་འདང་གི་མེད་པར། རྣམ་དཔྱོད་ལེགས་ཉེས་རྣམ་པར་དབྱེ་བའི་ཐོག་གོམ་པ་རྒྱག་དགོས་པ་དང་། ལྷག་བསམ་དང་པོ་དེ་ཤེས་རབ་ལ་བརྟེན་ནས་བྱུང་བ་རེད། ལྷག་བསམ་གཉིས་པ་དེ། འདིར་འཚར་ལོངས་བྱུང་བའི་སློབ་མ་དང་ང་ཚོ་གང་དུ་བསྡད་སའི་སྤྱི་ཚོགས། རྒྱ་ཆེ་ས་ནས་མི་རིགས་ལ་ཕན་པའི་ལས་དོན་སོགས་གང་ཡིན་ཡང་ང་ཚོས་ཕན་པ་ལས་གནོད་པ་སྐྱེལ་བ་ཡིན་ན་ཕན་ཉེས་ཀྱི་བློ་སྐྱེ་བ་དེ་ལ་སྙིང་རྗེ་ཟེར་གྱིན་ཡོད་པ་དང་། སྙིང་རྗེ་སྐྱེས་པ་ནས་ལྷག་བསམ་ཡོང་གི་ཡོད་པ་རེད། ཕན་ཐོགས་པའི་ཀུན་སློང་སྐྱེས་པ་ཡིན་ན་ད་གཟོད་ལྷག་བསམ་ཡོང་གི་ཡོད་པ་རེད། རང་གཞུང་ཤེས་རིག་ནས་ཀྱང་གཞོན་སྐྱེས་ཚོའི་ཤེས་ཡོན་ཐད་དགོངས་པ་བཞེས། འཆར་གཞི་དང་འགྲོ་གྲོན་བཏང་བའི་འབྲས་བུ་དེ་ང་ཚོའི་མ་འོངས་སོན་རྩ་དེ་དག་བོད་བསྟན་སྲིད་ལ་ནུས་པ་འདོན་ཐུབ་པ་ཞིག་དང་། ང་ཚོའི་སྤྱི་ཚོགས་ཚགས་ཚུད་དང་ཡ་རབས་སྤྱོད་བཟང་ཅན་གྱི་ངོ་བོར་སྐྱེད་སྲིང་བྱ་རྒྱུ་ནི་༧གོང་ས་མཆོག་གི་དགོངས་གཞི་རེད། དེ་བས། ཁྱེད་ཅག་གིས་རང་ཉིད་ཀྱི་ཤེས་ཡོན་དེ་སྤྱི་ཚོགས་དང་མི་རིགས་ལ་ཕན་པ་ཞིག་དང་། མ་འོངས་བོད་ཀྱི་རིག་གཞུང་ལ་འགན་འཁུར་ཐུབ་པ་ཞིག སཱ་ར་ལྟ་བུའི་མཐོ་སློབ་ཞིག་ཡང་བསྐྱར་གསར་འཛུགས་ཐུབ་མཁན་ཞིག་ཏུ་འགྱུར་ཐུབ་པའི་རེ་བ་བྱེད་བཞིན་ཡོད་ལ། ཕྱི་རྒྱལ་སོགས་ཡུལ་གྲུ་གང་དུ་ཆས་ཀྱང་བོད་མི་ཡིན་པའི་འདུ་ཤེས་དང་ངོ་བོ་མ་བརླགས་པའི་ཐོག་ནས་མི་རིགས་ལ་ཕན་པའི་མི་ཞིག་ཏུ་འགྱུར་བའི་རེ་བ་བྱེད་བཞིན་ཡོད། ང་ཚོས་ད་ལྟ་ནས་ཧུར་བརྩོན་མ་བྱས་པ་ཡིན་ན། ང་རང་རྣམ་དཔྱོད་མེད་མཁན་ཞིག་གིས་བལྟས་ནའང་། ༧གོང་ས་མཆོག་གི་སྐུ་ཚེ་དང་ད་ལྟའི་བོད་མིའི་བསམ་བློ་གཏོང་སྟངས།སྤྱི་ཚོགས་ཀྱི་གནས་སྟངས་དང་དགོས་མཁོ་སོགས་ལས། དུས་འདི་ནས་རྩིས་པའི་མི་ལོ་ ༣༠ ནང་ང་ཚོ་བོད་མི་རིགས་ལ་སྔར་འཕྲད་མ་མྱོང་བའི་དཀའ་ངལ་ཞིག་འཕྲད་ཀྱི་ཡིན་པ་མཐོང་གི་འདུག ཅེས་གསུངས་བྱུང། མཐའ་མར། སྐུ་མགྲོན་གཙོ་བོ་ཤེས་རིག་བཀའ་སློབ་ཐུབ་བསྟན་ལུང་རིགས་མཆོག་གིས་ལམ་སྟོན་གསུང་བཤད་གནང་དོན། རང་གཞུང་ཤེས་རིག་ལས་ཁུངས་ཀྱིས་དགེ་རྒན་འོས་སྦྱོང་དེ་སཱ་ར་མཐོ་སློབ་དུ་གནང་དགོས་པ་དེ། དགོས་པ་རྒྱུ་མཚན་དམིགས་བསལ་ཅན་ཞིག་གི་ཐོག་གནང་བ་དང་། ལྷག་པར་བཙན་བྱོལ་བོད་གཞུང་གི་ཤེས་ཡོན་སྲིད་བྱུས་འོག་གནང་བ་ཞིག་ཡིན་སྟབས། ཤེས་ཡོན་སྲིད་བྱུས་ཀྱི་བྱུང་རིམ་དང་རྒྱབ་ལྗོངས། ནང་དོན་དང་བཅས་སློབ་སྟོན་གནང་ཡོད། འོས་སྦྱོང་གི་དུས་ཡུན་རྫོགས་ཏེ་དངོས་སུ་ལས་དོན་ནང་ཞུགས་པའི་དུས་རིམ་ལ་སླེབས་ཡོད་པ་རེད། དབྱིན་ཇིའི་གཏམ་དཔེར། དགེ་རྒན་གྱི་ལས་དོན་དེ་མི་ཚང་མས་མཐོང་ཐུབ་པའི་ལས་དོན་ཞིག་མ་རེད། ཅེས་པ་བཞིན། དགེ་རྒན་གྱི་ལས་དོན་དེ་ཧ་ཅང་དཀའ་ཁག་ཆེ་བའི་ལས་དོན་ཞིག་རེད། དགེ་རྒན་གྱིས་འོས་འགན་འདི་ཕྲག་ཏུ་བླངས་པ་ནས་རྒྱལ་ཁབ་དང་སྤྱི་ཚོགས། མི་རིགས། མ་འོངས་པའི་མི་རབས་སོགས་ཀྱི་ཆེད་རང་ཉིད་བློས་གཏོང་དགོས་པ་དང་། རྒྱལ་ཁབ་དང་སྤྱི་ཚོགས། མ་འོངས་བའི་མི་རིགས་ལ་གང་ཞིག་མཁོ་བར་དམིགས་ཏེ་ཕྱག་ལས་གནང་དགོས་སྟབས། སོ་སོའི་འདོད་དོན་མང་པོ་ཞིག་བློས་གཏོང་དགོས་པའི་གནས་སྟངས་ཆགས་ཡོད། དགེ་རྒན་འོས་སྦྱོང་གི་ལས་རིམ་རྫོགས་པ་ཡིན་ཡང། སློབ་སྦྱོང་བྱེད་པའི་ལས་རིམ་རྫོགས་མེད། དགེ་རྒན་ཞིག་ཡིན་ན་མི་ཚེ་རིང་བོར་སློབ་སྦྱོང་ལ་བརྩོན་པ་བསྐྱེད་ཐུབ་མཁན་ཞིག་ཡིན་དགོས་མ་ཟད།སློབ་ཕྲུག་གི་གནས་སྟངས་ལ་གཞིགས་ཏེ་གང་འདྲ་བྱ་དགོས་མིན་དང་། རང་ཉིད་ཇི་ལྟར་ཡར་རྒྱས་གཏོང་མིན་ཐད་སྐྱོ་བ་མ་ཡིན་པར་སྤྲོ་བ་སྐྱེད་ཐུབ་མཁན་ཞིག་ཡིན་དགོས། སློབ་སྦྱོང་བྱེད་སྟངས་སློབ་གྲྭར་སྦྱོང་བ་དང་། ལས་འགན་ནང་ཞུགས་རྗེས་སློབ་སྦྱོང་དངོས་བྱེད་ཀྱིན་ཡོད་ཟེར་བ་བཞིན། དགེ་རྒན་ཚོས་དེ་ལ་གཟབ་དགོས་པ་རེེད། དབྱིན་ཡིག་ནང་། ཆེས་ཐོག་མའི་མཐོང་ཚུལ་གང་ཡིན་པ་དེ་མཐར་ཐུག་གི་མཐོང་ཚུལ་ཡིན་ཟེར་བ་ལྟར། དགེ་རྒན་ཚོས་སོ་སོའི་ཀུན་སྤྱོད་ཐད་ཧ་ཅང་གཟབ་ནན་བྱ་དགོས་ལ། ཕྱིའི་སྒྲིག་སྲོལ་འཁུར་ཐུབ་མཁན་ཙམ་མ་ཟད་ནང་སེམས་ཀྱི་སྒྲིག་སྲོལ་འཁུར་ཐུབ་མཁན་ཞིག་ཀྱང་ཡིན་དགོས། ཞེས་གསུངས་སོང། ཡང་ཁོང་གིས་སཱ་ར་མཐོ་སློབ་ཀྱི་སློབ་མའི་ཀུན་སྤྱོད་ཐད་གསུངས་དོན། ཕོག་ན་ཕན་པའི་རྟགས་ཟེར་བ་བཞིན། དེ་རིང་ང་སློབ་མ་མང་པོ་ཞིག་ལ་མཇལ་བདེ་བོ་མ་བྱུང་། གང་ཡིན་ཟེར་ན། ཤེས་ཡོན་དང་མཉམ་དུ་ཀུན་སྤྱོད་དགོས་པ་རེད། ཀུན་སྤྱོད་ཞེས་པ་དེ་གྱོན་གོས་ནས་མགོ་བརྩམས་ཏེ་གསོ་སྐྱོང་བྱ་དགོས་པ་ཞིག་རེད། ང་ཚོའི་རྒན་པ་ཚོས་བསླབ་བྱ་གཏོང་སྟངས་ལ་བལྟས་ནའང། བདུན་ཅུ་དོན་གྲངས་ནང་ང་ཚོའི་རྒན་པ་ཚོས་གཞོན་སྐྱེས་ཚོར། རྒན་པར་བརྩི་བཀུར་དང་བོད་གཞུང་ལ་ཞབས་ཞུ་སྒྲུབ་ཐུབ་མཁན་ཞིག ༧གོང་ས་མཆོག་གི་བཀའ་དང་དགེ་རྒན་གྱི་ཁ་ལ་ཉན་དགོས་པ་རེད། སློབ་སྦྱོང་ཡག་པོ་བྱ་དགོས་པ་རེད། ཅེས་བསླབ་བྱ་གནང་གིན་ཡོད། རྗེས་སུ་སློབ་གསོར་འགྱུར་བ་ཐེབས་ཏེ། གྲུང་པོ་དང་མགོ་བདེ་བོ་བྱ་དགོས། གཉོམ་ཆུང་བྱས་ན་གྱོང་རག་གི་རེད། ཅེས་༧གོང་ས་མཆོག་དང་བོད་གཞུང་གི་བཀའ་དྲིན་ཟེར་བ་དེ་ཧ་ལམ་མེད་པར་ཆགས་པ་དང། གཞུང་ཞབས་པའི་ཕ་མ་དག་གིས་ཀྱང་བུ་ཕྲུག་ཚོར་དབྱིན་ཡིག་སློབ་སྦྱོང་བྱས་རྗེས་ཨ་རིར་འགྲོ་དགོས་པ་རེད། གཞུང་ཞབས་བྱས་ན་ཕོག་མཐོན་པོ་ཡོད་པ་མ་རེད། ཅེས་སློབ་གསོ་སྤྲོད་བཞིན་ཡོད་པ་རེད། སློབ་གསོ་དེ་དག་ལ་བརྟེན་ད་ལྟ་ང་ཚོའི་སྤྱི་ཚོགས་ནང་ཞབས་ཞུ་སྒྲུབ་མཁན་ག་ཚོད་འདུག དེ་དག་ལས་ནང་མི་ཚོས་བྱིས་པར་སློབ་གསོ་སྤྲོད་སྟངས་འགྲིག་གིན་མེད་པ་གསལ་བོ་རེད། དེེ་བཞིན། བཙན་བྱོལ་ནང་འཚར་ལོངས་བྱུང་བ་དང་སློབ་མཐར་ཕྱིན་པ་དག་གིས་ཅི་ཞིག་སྒྲུབ་ཐུབ་ཀྱིན་འདུག  བོད་ནས་སླེབས་པའི་སློབ་མ་དེ་དག་གིས་ཅི་ཞིག་སྒྲུབ་ཀྱིན་འདུག བོད་ནང་ནས་ཡོང་བ་ཚོས་སྐད་དང་ལུང་པའི་འགྲོ་སྟངས་མ་ཤེས་པའི་དཀའ་ངལ་མང་པོར་འཕྲད་ཀྱིན་ཡོད་ཀྱང། དེ་དག་གིས་དེབ་འདོན་པ་དང་ཚོགས་པ་གསར་འཛུགས་གནང་བ་སོགས་ལས་ཀ་མང་པོ་ཞིག་བྱེད་ཐུབ་ཀྱིན་ཡོད་པ་རེད། དེ་དག་ལ་བལྟས་ན་ང་ཚོས་སློབ་གསོ་སྤྲོད་སྟངས་དང་སློབ་མའི་ཀུན་སློང་དང་། ཕ་མའི་སློབ་གསོ་སོགས་ལ་བརྟག་དཔྱད་བྱས་ཏེ་སློབ་གསོ་སྤྲོད་རྒྱུ་དེ་གལ་ཆེན་པོ་རེད། ཅེས་གསུངས་བྱུང།