༡༩༨༣ ལོའི་གསུམ་བཅུའི་དུས་དྲན་གྱི་གསུང་འཕྲིན།

    ད་ལམ་གསུམ་བཅུའི་དུས་དྲན་ཐེངས་ཉེར་བཞི་པ་བྱེད་པའི་སྐབས་འདིར། ད་ཕན་མི་ལོ་ཉེར་བཞིའི་རིང་བོད་ཀྱི་ནང་གསར་བརྗེ་དང༌། ཡར་རྒྱས་ཟེར་བའི་མིང་འདོགས་སྣ་ཚོགས་དང༌། རྣམ་འགྱུར་སྣ་ཚོགས་པའི་བྱ་སྤྱོད་བརྒྱུད་རིམ་ནང༌། བོད་རྒྱ་ཆེའི་མི་མང་རྣམས་ནས་བརྗོད་པར་དཀའ་བའི་དཀའ་སྡུག་མཐའ་ཡས་པ་ཞིག་མྱོང་དགོས་བྱུང་བ་དང༌། བོད་མི་ཤིན་ཏུ་མང་པོ་ཞིག་གི་རྩ་ཆེའི་ལུས་སྲོག་ཚུན་ཆུད་ཟོས་སུ་གྱུར་ཡོད་པ་རྣམས་རྗེས་སུ་དྲན་པའི་སྒོ་ནས། དེ་དག་གི་སྔོན་བསགས་དཀར་མིན་ལས་ཀྱི་འབྲས་བུ་མཐའ་དག་ཡོངས་སུ་ཟད་དེ་གནས་སྐབས་དང་མཐར་ཐུག་གི་འདོད་དོན་ཡིད་བཞིན་འགྲུབ་པའི་བསླུ་མེད་མཆོག་གསུམ་ལ་གསོལ་འདེབས་སྙིང་ཐག་པ་ནས་བྱ་རྒྱུ་དང༌། ད་དུང་སེམས་ཤུགས་གོང་མཐོར་བསྐྱེད་བཞིན་པའི་བོད་རྒྱ་ཆེའི་མི་མང་ལ་བསྔགས་བརྗོད་དང་འཚམས་འདྲི་ཞུ་རྒྱུ་ཡིན།

    ༡༩༧༩ ལོ་ནས་བཟུང་བོད་ནང་སྲིད་བྱུས་སྒྱུར་བཅོས་གང་འཚམས་བཏང་བ་ལ་བརྟེན་ནས་ ༡༩༧༩ ཕན་གྱི་གནས་སྟངས་ལ་ལྟོས་ན། བོད་མིའི་ལྟོ་གོས་དང༌། ངལ་རྩོལ་གནས་བབས། བོད་ཀྱི་སྐད་ཡིག་བེད་སྤྱོད་ཐོབ་ཐང་བཅས་པར་ཕྲན་བུ་ལེགས་བཅོས་ཀྱིས་དབུགས་ངལ་གསོ་བའི་གོ་སྐབས་ཤིག་བྱུང་ཡོད་ན་ཡང༌། ལེགས་བཅོས་དེ་དག་བོད་མཐའ་དབུས་དང༌། གྲོང་དང༌། གྲོང་གསེབ་ཡོངས་ཁྱབ་གཅིག་གྱུར་བྱུང་མེད་པའི་ཁར། ལེགས་བཅོས་ཕྲན་བུ་བྱུང་བའི་ས་ཁུལ་ཁག་ལ་ཡང་ལག་ལེན་གཏན་ཆགས་མ་ཡིན་པར་སྦུག་འདྲེན་བརྐྱངས་བསྐུམས་འགྱུར་ལྡོག་སྣ་ཚོགས་ཤིག་བྱེད་བཞིན་པ་དང༌། དེ་བཞིན་དབུལ་ཕོངས་ཕྱུག་སྒྱུར་གྱི་ལས་འགུལ་ཇི་ལྟར་བྱས་ཀྱང༌། དོན་སྙིང་བོད་རྒྱ་ཁྱབ་སྤྱི་སྙོམས་ཀྱི་ཆ་ནས་བལྟས་ན། དུས་འཁྲུག་མ་བྱུང་གོང་གི་འཚོ་བའི་གནས་སྟངས་སུ་ད་དུང་སླེབས་ཡོད་པ་མ་རེད། ལྷག་པར་དུ་བོད་མིའི་བསམ་བློའི་ནང་བོད་དང་རྒྱ་ཞེས་ཐག་རིང་ཞིང་ཡ་འགལ་ཆེ་ཐོག ཞེ་འཁོན་འཇིགས་དངངས་དོགས་ཟོན་རྒྱུན་འཇགས་དང༌། མི་ངོ་བོ་གཅིག་ལ་རྣམ་འགྱུར་ཕྱི་ནང་གཉིས་སྟོན་དགོས་པའི་གནས་སྟངས་ཡ་ང་བ་འདིས་བློ་བག་མི་ཕེབས་ཤིང༌། ཡིད་གདུང་གི་ཚོར་བ་རྒྱུན་ཆགས་སུ་གནས་མུས་རེད།

    མི་རིགས་གང་འདྲ་ཞིག་ཡིན་ན་ཡང༌། སོ་སོའི་སེམས་ཀྱི་གཏིང་ལ་ཡོད་པའི་བསམ་ཚུལ་ངོ་མ་དེ་གསལ་པོར་འདོན་ཆོག་པ་ཞིག་དང༌། བསམ་ཚུལ་དེ་དག་གཞི་བཟུང་གི་ལག་ལེན་ཐབས་ཚུལ་སྒོ་དུ་མ་ནས་འབད་པས་གསར་གཏོད་ཡར་རྒྱས་ཀྱི་རྣམ་པ་ཅི་ཡང་ཐོན་ཡོང་བ་དང༌། དེ་ལ་བརྟེན་ནས་མི་སྡེའི་སྤྱི་ཚོགས་ནང་ཡར་རྒྱས་མགྱོགས་མྱུར་འགྲོ་བ་དང༌། ཁ་ཞེ་མེད་པའི་དམ་ཚིག་གཙང་བ། བསམ་ཚུལ་མི་མཐུན་པ་བྱུང་སྐབས་ཀྱང་སྙིང་ལ་སྦས་ཏེ་མ་བཞག་པར་གསལ་པོར་བརྗོད་རེས་སྦྱངས་བཤད་བྱས་པས་ཞེ་འཁོན་གཏིང་ནག་རྒྱུན་བཅང་གིས་གོ་སྐབས་ཤིག་བྱུང་བ་དང་འགོ་གཏིང་སློག་རེས་བྱེད་པ་འདི་འདྲ་ཡོང་དོན་མེད། ཡ་རབས་དྲང་བདེན་ནས་བྱས་ན༑ དེ་འདྲའི་རང་དབང་གི་ཐོབ་ཐང་འགྲོ་བ་མིའི་རིགས་ཐམས་ཅད་ལ་ཡོད་པ་ལྟར། ང་ཚོ་བོད་རིགས་ལ་ཡང་ངེས་པར་དུ་ཡོད་དགོས། སོ་སོའི་བསམ་ཚུལ་ངོ་མ་འདོན་པ་ལ་དབང་ཤུགས་སམ། ཐབས་བྱུས་གཞན་ཞིག་གིས་འགོག་གནོན་བྱེད་པ་ནི་ཆེས་རྗེས་ལུས་དང༌། བཙན་གནོན་གདུག་རྩུབ་ངོ་མ་ཞིག་རེད། གལ་ཏེ་ས་ཁུལ་གང་ཞིག་ཏུ་མིའི་སེམས་ནང་གི་བསམ་ཚུལ་ངོ་མ་དེ་འདོན་དུ་མི་འཇུག་པར་བཙན་ཤུགས་ཀྱིས་འགོག་གནོན་བྱས་པ་ཡིན་ན། དེ་ལ་འཛམ་གླིང་རྒྱ་ཆེའི་མི་མང་གིས་འཕྲལ་ཡུན་ཀུན་ཏུ་དགའ་བསུ་མི་ཞུ་བས་མ་ཚད། འཕྱ་སྨོད་ངན་སྨྲས་ཀྱི་ཡུལ་དུ་འགྱུར་བ་དང་ཡུལ་ནང་བག་ཕེབས་ལྷིངས་འཇགས་མེད་པའི་དཀའ་རྙོག་ཀྱང་རྒྱུན་མི་ཆད་པ་ཞིག་འབྱུང་ངེས་ཡིན།

    དེས་ན་ཕྱོགས་གང་ནས་ཀྱང་ཐེ་བྱུས་མེད་པར་བོད་མི་ས་ཡ་དྲུག་ལ་རང་གི་ཐུན་མོང་མ་ཡིན་པའི་རིག་གཞུང་གཅེས་འཛིན་བྱེད་པ་དང༌། ཡར་རྒྱས་གཏོང་བ། ཆོས་དད་རང་མོས་བྱེད་པ། སོ་སོའི་མ་འོངས་པའི་མདུན་ལམ་རང་ཉིད་ནས་ཐག་གཅོད་བྱེད་པ། རང་གི་ལས་དོན་རང་གིས་བྱེད་པ། སོ་སོའི་འདོད་མོས་ཇི་ཡོད་ཁེངས་ཐུབ་པ་བཅས་ཀྱི་ཐོབ་ཐང་ངེས་པར་དུ་ཡོད་དགོས། ཐབས་ལམ་དེ་ནི་དྲང་བདེན་དང༌། རྒྱུ་མཚན་ལྡན་པ་ཞིག་ཡིན། ཐབས་ལམ་དེ་ལྟ་བུ་བརྒྱུད་ནས་འཕྲལ་ཕུགས་ཀྱི་དཀའ་ངལ་སེལ་ཐུབ་པ་དང༌། འདོད་དོན་ལ་ཅི་དགར་སྤྱོད་ཐུབ་པ་ཡོང་ངེས་ཡིན།།   །།