པདྨ་ཚེ་དབང་ཤཱསྟྲི།
ཉེ་ཆར་ཁ་བརྡ་དྲྭ་རྒྱའི་ནང་དུ་ཐོན་པའི་འཇམ་དབྱངས་སྐྱིད་ལཊ་ཀྱི་མནར་གཅོད་ཀྱི་གོ་རིམ་ཞིག་ཅེས་འགོ་བརྗོད་དུ་འཁོད་པ། ཁོ་མོ་རྒྱ་ནག་གཞུང་གི་ཉེན་རྟོག་པས་གློ་བུར་ཐོག་རྒྱག་ཏུ་འཛིན་བཟུང་གིས་ཉིན་ཉི་ཤུའི་རིང་བཀག་ཉར་དང༌། དྲི་བརྩད་ཀྱིས་བསམ་ཡུལ་ལས་འདས་པའི་མནར་གཅོད་མྱངས་པའི་སྐོར་ཞིག་བཀླགས་རྗེས། དེ་སྔ་ནཱཛིའི་བཙན་འོག་ཏུ་འཇིའུ་མི་རིགས་ཀྱིས་མནར་གཅོད་སྡུག་སྦྱོང་ཇི་ལྟར་མྱངས་སྐོར་གྱི་གློག་བརྙན་ཞིག་སྐྱར་བལྟ་བྱས་པ་ནང་བཞིན་སེམས་ནང་དུ་འགྲེལ་བརྗོད་བྱེད་མི་ཤེས་པའི་འཇིགས་སྣང་སྐྱི་གཡའ་བ་ཞིག་སྐྱེས།
ཅི་སྟེ་འཇམ་དབྱངས་སྐྱིད་ལྟ་བུའི་ཤེས་ཡོན་ཅན་གྱི་གླུ་མ་དང༌། རྒྱ་གཞུང་གི་བརྙན་འཕྲིན་ཁང་དུ་གསར་འགྱུར་དང་འབྲེལ་བའི་ཕྱག་ལས་གནང་བཞིན་པའི་མི་སྣ་གྲགས་ཅན་དེ་འདྲ་ཞིག་ལ། རྒྱ་ནག་གཞུང་གིས་མ་ཉེས་ཁ་གཡོག་གིས་ཨ་རིར་ཕྱིར་བསྐྱོད་བྱས་པ་དང༌། ཕྱི་སྡོད་བོད་རིགས་ཁ་ཤས་དང༌། བཙན་བྱོལ་བོད་གཞུང་གི་ལས་བྱེད་དང་འབྲེལ་འདྲིས་བྱས་པ། གཞན་ལ་འཕྲིན་ཐུང་བསྐུར་བ་སོགས་ལ་བསྙད་དེ། ཧ་ལམ་ཉིན་མཚན་བསྟུད་མར་ལས་ཁུངས་དང༌། མགྲོན་ཁང༌། བཀག་ཉར་ཁང་བཅས་སུ་བཀག་བསྐྱིལ་དོ་དམ་གྱི་འོག་ཏུ་དྲི་བརྩད་ཀྱིས་སྡིག་ར་བསྐུལ་སྟངས་དང༌། ཀ་བ་ལ་བསྐོར་ཏེ་མདུང་མར་བརྡ་སྤྲོད་སྟངས་སོགས་ལ་གཞིགས་ན། སྤྱི་ཚོགས་ཀྱི་ནང་དུ་སྙན་གྲགས་མེད་པ་དང༌། རྒྱ་གཞུང་གི་ལས་བྱེད་མིན་པ། ཤེས་ཡོན་མེད་པའི་བོད་མི་དཀྱུས་མ་ཁྲི་ཕྲག་དུ་མར་རྒྱ་གཞུང་གིས་མནར་གཅོད་ཇི་ལྟར་བཏང་དང་གཏོང་བཞིན་ཡོད་པ་ནི་ཚོད་དཔག་ཀྱང་བྱེད་དཀའ་བར་མངོན།
གཞིས་ལུས་གངས་ཅན་པ་ཚོས་རང་གི་མི་རིགས་དང༌། རིག་གཞུང༌། རྒྱལ་ཁབ་བཅས་ཀྱི་དོན་དུ་རྒྱ་འོག་ཏུ་མྱངས་དང་མྱོང་བཞིན་པའི་མནར་གཅོད་དཀའ་སྡུག་གི་གནས་བབ་འདི་ལྟར་ཐོས་ཚེ་བྱེས་འབྱོར་རང་རིགས་ཡོད་དོ་ཅོག་གི་སྙིང་རྩ་རང་ཤུགས་ཀྱིས་འདར་བ་ནི་གདོན་མི་ཟ། ༧རྒྱལ་དབང་སྐལ་བཟང་རྒྱ་མཚོས། ཕྱོགས་ཀུན་འབར་བའི་མེ་ལྕེས་བསྲེག་ཅིང་ཁ་གདངས་མིག་རྩ་དམར་ཁྲོས་པའི། གཤེད་མས་ཁོར་ཡུག་ཀུན་ནས་འཇིགས་བསྐྱེད་ལ་ལ་ཟངས་ཞུན་འབར་བའི་ཁྲོད། ཅེས་སོགས་དམྱལ་ཁམས་ཀྱི་གནས་སྟངས་གསུངས་པ་ལྟར་གཞིས་ལུས་ཆོལ་གསུམ་སྤུན་ཟླ་ཉེས་མེད་གྲངས་ལས་འདས་པ་རྣམས་ཀྱིས་དམྱལ་ཁམས་མི་ཡུལ་དུ་དངོས་སུ་མྱོང་བཞིན་པའི་གནས་སྐབས་དང༌། རྒྱ་གཞུང་གིས་རྒྱལ་ཁབ་ཀྱི་བདེ་འཇགས་དང༌། ཁ་བྲལ་རིང་ལུགས། ཏཱ་ལའི་ཤོག་ཁག་སོགས་ལ་ཁ་གཡར་ནས་མདོར་ན། བོད་མི་ས་ཡ་དྲུག་པོ་དེ་རྡུང་རྡེག་ཚ་ནན་དང༌། རྒྱལ་གཅེས་ཆོས་གཅེས་སོགས་གོ་རིམ་ལྡན་པའི་འཐབ་བྱུས་སྣ་ཚོགས་ཀྱི་ལམ་ནས་རྩ་མེད་ཤུལ་མེད་དུ་བཟོ་རྒྱུའི་ངན་འཆར་སྙིང་བཅངས་ཡོད་པ་གསལ་པོར་མངོན་བཞིན་པ་འདིར་བསམ་ཚེ། རང་ཅག་བྱེས་འབྱོར་བ་རྣམས་ནས་མཆོག་གསུམ་ལ་ཐུགས་སྨོན་དང༌། མར་མེའི་ཁྲོམ་བསྐོར། སྐད་འབོད་དང་གོམ་བགྲོད། རྒྱལ་སྤྱིའི་བོད་དོན་རྒྱབ་སྐྱོར་བ་ཚོར་རེ་སྐུལ་ཞུ་བ་སོགས་ཀྱི་ལམ་ནས་གདུང་སེམས་མཉམ་སྐྱེད་མཚོན་པ་བྱེད་རྒྱུ་ཙམ་ལས། གཞིས་ལུས་སྤུན་ཟླ་རྣམས་ཀྱིས་མྱངས་དང་མྱོང་བཞིན་པའི་དཀའ་ཚེགས་མཉམ་མྱོང་བྱེད་རྒྱུ་ལྟར་བཞག་ཐ་ན་ཕྲན་བུ་ཆུང་དུ་གཏོང་རྒྱུའི་ནུས་པ་ཡང་མེད་པའི་གནས་སྟངས་འདིར་སྐྱོ་བ་གཏིང་ནས་སྐྱེས། འཇམ་དབྱངས་སྐྱིད་ལཊ་ཀྱིས་བོད་རྒྱལ་ཁབ་དང་མི་རིགས་ཀྱི་དོན་དུ་རང་ཉིད་ཀྱི་བདེ་འཇགས་བློ་ཁོག་ཆེན་པོའི་སྒོ་ནས་བློས་གཏོང་གནང་སྟེ་རང་སྟེང་གི་མྱོང་བ་ཟིན་ཐོར་བཀོད་པ་མ་ཟད། དྲ་སྟེང་དུ་བཀྲམས་པ་དེས་གཞིས་བྱེས་བོད་མི་ཡོད་དོ་ཅོག་དང༌། ལྷག་པར་དུ་ཁྱི་སྤྱང་ལག་འབྲེལ་བྱེད་མཁན་གྱི་ཤེས་ལྡན་མི་སྣ་ཚོར་གོ་རྒྱུ་ཆེན་པོ་ཡོད་པའི་བརྡ་རྟགས་ཞིག་སྟོན་པ་དང་ལྷན་དུ་སྐུལ་ལྕགས་ཤུགས་ཆེ་ཞིག་ཀྱང་ཡིན་པར་སྙམ། དེས་ན། བྱེས་འབྱོར་བོད་མི་ཡོད་དོ་ཅོག་དང༌། ཁྱད་པར་དུ་ན་གཞོན་ཚོས། འཇམ་དབྱངས་སྐྱིད་ལཊ་ཀྱིས་རང་སྟེང་གི་མྱོང་བ་མེ་ལོང་གི་ངོས་སུ་འཕོས་སུ་བཅུག་པ་དང་དབྱེར་མེད་པའི་ཟིན་ཐོ་དེ་མ་མཐར་ཡང་ལན་གཅིག་ཀློག་གནང་ཡོང་བ་འཚལ།།
གྲོགས་བདེ་མིང་བས་རབ་རིབ་མང་པོ་ཞིག་བཤད་འདུག་ཀྱང་། མདོ་དོན་པད་མ་ཚེ་དབང་གིས་ཟིན་བྲིས་སྟེ་འདོད་ཆགས་དང་ཕྱོགས་ལྷུང་ཡིན་ལ་བོད་རིགས་དཔའ་པོ་མང་པོའི་ལོ་རྒྱུས་ལ་མཐོང་ཆེན་མ་བྱས་པ་སོགས་ལ་འཁང་ར་བྱས་བ་ཙམ་ལས་སྙིང་པོ་མི་གདའ། པད་མས་འཇམ་དབྱངས་སྐྱིད་ཀྱིས་དཀའ་སྡུག་གི་ཟིན་ལ་མཐོང་ཆེན་བྱས་པ་འདི་ཀུན་སློང་ཅི་འདྲ་ཞིག་གིས་བསྐུལ་ཡང་ཕྱི་སྡོད་བོད་མི་ཤེས་ཡོན་པ་གཅིག་གིས་རང་འགན་ཁུར་ཏུ་བླང་པ་རེད་ལ་ལེན་དགོས་པ་ཞིག་ཀྱང་རེད། ད་དུང་རྒྱལ་གཅེས་བ་མང་པོ་ཞིག་གིས་ལོ་རྒྱུས་ལ་མཐོང་ཆེན་བྱེད་མ་ཐུབ་པར་ལྷག་པ་འདི་གོང་གི་བདེ་བ་ཅན་ལྟ་བུས་རང་འགན་མ་སྒྲུབ་པས་བྱས་ཉེས་རེད། མདོོར་ན་བཀག་རྡོ་ཟེར་བ་ནི་བདེ་མིང་པས་སྐད་ཆ་འདི་ལྟ་བུ་ལ་བརྗོད་དགོས།
ཁོ་རེ་བདེ་བ་ཅན། སྟག་སྣ་ལགས་རྒྱལ་ཁབ་གང་གི་མི་སེར་རེད་དམ། རྒྱལ་ཁབ་དེའི་མི་སེར་དུ་ཇི་ལྟར་གྱུར་བ་རེད་དམ། འཛམ་གླིང་གི་བརྒྱུད་ལམ་ཁག་བརྒྱུད་ནས་ཡོང་བ་མིན་ནམ།
ཁོ་རེ་གནས་ཚང་། ཁྱོད་འདི་འདྲའི་བསམ་ཤེས་མེད་པ་ལ། འདས་དོན་ལ་བསམ་ཤེས་མ་བྱས་ཚེ་ང་ཚོས་འདས་ཟིན་པའི་དཔའ་བོ་དཔའ་མོ་ཚོའི་ལོ་རྒྱུས་རྣམས་་རྦད་དེ་གཏིང་བརྗེད་དུ་གཏོང་དགོས་དོན་ཡོད་པ་རེད་དམ། ཁྱོད་འདོད་ཆགས་དང་ཞེན་ཁོག་གི་བཟི་བའི་སྐད་ཆ་མ་ཤོད། སྤྱི་དོན་ལ་ཕན་པ་ཤོད་དང་། འདས་དོན་ལ་རྩ་བ་ནས་འགན་འཁྱེར་དགོས་མ་རེད་དམ། ཁོང་ཚོའི་ལོ་རྒྱུས་ཇི་བཞིན་འཛམ་གླིང་དེ་ཙམ་ཁྱབ་ཐུབ་ཡོད་མ་རེད། ཞིབ་ཕྲའི་བརྒྱུད་རིམ་ཁ་གསལ་ཞིག་ད་བར་གང་ཡང་ང་ཚོས་མཐོང་མ་བྱུང་། ཁོང་གཅིག་པུ་མ་ཡིན་པར་བོད་ས་གང་སར་དེ་འདྲ་བའི་ལོ་རྒྱུས་མང་པོ་ཡོད་པ་དེ་དག་ལ་དེ་ལྟ་བུའི་མཐོང་ཆེན་བྱེད་མཁན་མེད་པ་གསལ་པོ་རེད། ངས་དེ་རྒྱུ་མཚན་དུ་དྲངས་ནས་བཤད་ཀྱི་ཡོད། གཞན་ལ་པདྨ་ཚེ་དབང་གིས་ལན་བརྒྱབ་དང་མ་བརྒྱབ་ཁོང་རང་གི་རང་དབང་རེད། དེར་ཁྱོད་རང་གི་གསལ་པོ་བཟོ་དགོས་དོན་ཡོད་མ་རེད། གང་ལྟར་ངས་འདས་དོན་ལ་བསམ་གཞིགས་བྱ་དགོས་ལ། རི་བོང་གི་ཕྱི་ཕིག་འཛིན་པའི་སྒྲུང་གཏམ་འདི་ལད་ཟློས་བྱེད་དྲག་ན་ང་ཚོའི་མི་རིགས་ལ་ཐོབ་རྒྱུ་འདི་ཞེན་ཁོག་དང་ཨེ་གསར་ཅན་གྱི་མི་རྒྱུད་ཀྱི་ལས་དབང་ལ་འཐམས་རྒྱུ་ཡོད་པ་མ་རེད་ཟེར་བ་དེ་ངས་ཁྱོད་ཚོ་ལྟ་བུར་བཤད་ཀྱི་ཡོད། བྱས་ཙང་འཇམ་དབྱངས་སྐྱིད་ལགས་ཀྱི་གསོན་ཉམས་ལྡན་པའི་ཉིན་ཐོ་དེ་རྩ་ཆེན་ཞིག་ཡིན་ལ། དེ་བས་ཀྱང་ད་ལྟ་ཡལ་ཉེར་ཐུག་པའི་རྒན་རབས་ཚོའི་མྱངས་ཟིན་པའི་འདས་པའི་བརྒྱུད་རིམ་དེ་དག་ལའང་ང་ཚོས་དོ་སྣང་དང་གོ་རྟོགས་སྤེལ་རྒྱུ་གལ་ཆེན་པོ་ཡིན་པ་དེ་ངའི་བསམ་ ཚུལ་རེད། ཡིན་ནའང་ ཁྱོད་རང་དགོངས་པ་མ་འཚོམ་རོགས། ་ངས་བསམ་ཚུལ་གང་ཡོད་པ་སྤྱི་ལ་ཕན་ན་སྙམ་སྟེ་ཞུས་ཡོད་པས་དགོངས་པ་འཚོམ་རོགས་གནང་།།
བདེ་བ་ཅན་ལགས། ལྷོད་ལྷོད་གནང་རོགས།
སྟག་སྣ་འཇིགས་མེད་བཟང་བོ་ལགས་ཀྱིས་ཀྱང་བྲིས་ཆོག་གི་ཡོད་མོད། དེ་ནི་འདས་དོན་ཡིན་ལ་མང་ཆེ་བ་འཛམ་གླིང་གི་བརྒྱུད་ལམ་ཁག་ཏུ་ཐོན་ཡོད། ཡིན་ནའི། འཇམ་དབྱངས་སྐྱིད་ལགས་ཀྱི་ཕྱིར་དྲན་འདི་གསར་བ་གསར་རྐྱང་ཡིན་པའི་ཁར། རྒྱ་གཞུང་གིས་བོད་ནང་ཡག་པོ་གནང་གི་ཡོད་ཅེས་པའི་རྐུབ་ཀྱང་བརྟོལ་ཐུབ་ཡོད་པས། འདི་ལས་ལྷག་པའི་ལས་ཀ་རླབས་ཆེན་ཞིག་འགྲུབ་མི་ཧ་ཅང་ཉུང་ཉུང་མིན་ནམ། དེ་མིན་གཞན་དག་ལ་པདྨ་ཚེ་དབང་ལགས་ནས་ལན་འདེབས་སྲིད་པ་ཞིག་ཡིན།
འཇམ་དབྱངས་སྐྱིད་ལགས་ཀྱི་ཟིན་ཐོ་དེ་ཧ་ཅང་གལ་ཆེན་པོ་འདུག ཡིན་ནའང་དེ་སྔ་ལོའི་གནས་ཚུལ་བྱུང་བའི་རྗེས་སྐད་ཆ་བཤད་རྒྱུའི་གོ་སྐབས་བྱུང་བའི་ཟུར་ཆ་གཅིག་རེད། འདས་པའི་དུས་ཚོད་ནང་དུའང་ང་ཚོ་དཔའ་བོ་ཁྲི་སྟོང་་མང་པོས་དེ་དང་དེ་ལས་ལྷག་པ་མྱངས་ཡོད་ལ། ཁོང་ཚོར་སེམས་ཚོར་འདྲ་མིན་བྱུང་ཡོད་པས་དེ་དག་ཀྱང་ཡིག་ཐོག་ཏུ་ཕབ་ཐུབ་ན་ཅི་འདྲའི་ལེགས་པ་ལ། ལྷག་པར་དུ་མི་ལོ ༣༧ རྒྱ་མིའི་བཙོན་དོང་ནང་སྡུག་བསྔལ་མྱངས་པའི་བོད་ནང་གི་ཆབ་སྲིད་བཙོན་པ་སྟག་སྣ་འཇིགས་མེད་བཟང་པོ་ལགས་ལ་ཏན་ཏན་དེ་ལས་ལྷག་པའི་མྱོང་ཚོར་དང་སྐྱོ་གདུང་གི་སྒྲུང་གཏམ་ཤོད་རྒྱུ་ཡོད་སྲིད་པས། ཁོང་གིས་ཀྱང་དེ་ལྟར་མྱོང་ཚོར་ཞིག་འབྲི་མ་གནང་བ་གང་ཡིན་ནམ། ཁོང་ལ་དེ་ལྟར་འབྲི་རྒྱུའི་འབོད་བསྐུལ་ཞུ་མཁན་ཞིག་ཀྱང་མ་བྱུང་གང་ཡིན་ནམ། ཁོང་ལ་གང་ཞིག་མ་ཚང་བ་ཡིན་ནམ། འཇམ་དབྱངས་སྐྱིད་ལྟར་བུད་མེད་མིན་ཙང་ཕོ་གཞོན་ཚོའི་ཡིད་དབང་འགུག་མ་ཐུབ་པ་ཡིན་ནམ། དེའི་ཐོག་ནས་ལས་ཀ་དང་གནས་ཚུལ་གང་ཞིག་ལ་དོ་སྣང་བྱས་ཀྱང་ཕྱིའི་ལྟ་སྣང་ལ་ཡིད་འཕྲུལ་ཏེ་གནས་ཚུལ་མང་པོར་ཨེ་གསར་ཅན་གྱི་རྟ་ཕོ་བཞོན་པའི་ལས་ཟློས་དེ་བྱ་རྒྱུ་མང་ན་ཡག་པོ་མེད། བསྟོད་བསྔགས་ཡོང་ཚོད་ཞིག་བཏང་ནས་བཞག་ན་ཡག་པོ་མི་འདུག་གམ། ལྷག་པར་དུ་པདྨ་ཚེ་དབང་ལགས་ཀྱི་ཟིན་ཐོ་དེ་ལའང་འཇམ་་དབྱངས་སྐྱིད་ལགས་གཙོསཔའི་ད་བར་རྒྱ་དམར་གྱི་ཁ་འོག་ན་སྡུག་སྣ་ཚོགས་མྱངས་པའི་མི་སྣའི་ལོ་རྒྱུས་དེ་དག་ལ་ཆ་ཚང་མ་བྱུང་ཡང་ཕྱི་བལྟས་ཐེངས་རེ་དང་བསམ་ཤེས་ཐེངས་རེ་བྱས་ན་ཡག་པོ་མི་འདུག་གམ་ཞེས་བཏོན་ན་མི་འགྲིག་གམ། དེ་བས་ཀྱང་བོད་ནང་གི་ཤེས་ཡོན་ཅན་མང་ཆེ་བ་ད་ཆར་ལྟ་བ་དང་ལངས་ཕྱོགས་མི་རིགས་ཀྱི་ལ་རྒྱ་ཤུགས་ཆེར་འགྲོ་བཞིན་ཡོད་པས་ཁྱི་སྤྱང་ལག་བྲེལ་བྱེད་པ་ཟེར་བ་དེ་ད་ཆ་བོད་ནང་གི་ཤེས་ཡོན་ཅན་པའི་ཁྲོད་གོ་ན་རྣ་བར་མི་འགྲོ་བ་ ཞིག་ཆགས་ཟིན་པ་རེད། དེ་ནི་ནུབ་ཕྱོགས་གྲང་ངར་ཡུལ་དུ་སྙིང་པོ་མེད་པར་གཞན་ལ་ལོག་ཏུ་འགྲེལ་ཏེ་རང་ཉིད་སོ་སོའི་སྤྱི་ཚོགས་ནས་ཁ་བྲལཏེ་ས་མཐར་འཁྱམས་པའི་རྒས་པོ་ཁྱེད་ལྟ་་བུར་དྲན་བསྐུལ་ཙམ་ཕུལ་བ་ཡིན་པས་ཐུགས་སེམས་འཁྲུག་པ་མ་གནང་་། མུ་མཐུད་བྲིས་པ་གནང་དང་། ཨ་ཇོ་ལགས་པདྨ་ཚེ་དབང་ལགས།།
ལས་གཞི་འདི་དཔེ་མི་སྲིད་པའི་ཡག་པོ་རེད། གང་ལྟར་ཕྱི་ལ་འགྲམས་ཟིན་དུས་བོད་ཡིག་ཀློག་མཁན་ནང་ཁུལ་དང་བོད་མིའི་ནང་ཁུལ་ཙམ་མིན་པར། འཛམ་གླིང་གི་སྐྱེ་བོ་མཐའ་དག་གིས་ཤེས་ན་ཡག་པོ་རེད།
པདྨ་ཚེ་དབང་ལགས། སྐུ་ཉིད་ནས་འཇམ་དབྱངས་སྐྱིད་ལགས་ཀྱི་རྩོམ་ཡིག་འདི་དབྱིན་སྒྱུར་གནང་ཐུབ་པ་འདུག་གམ། རྩོམ་ཡིག་འདི་དབྱིན་ཡིག་གི་དྲ་ལམ་ཁག་ཏུ་གཏོང་ཐུབ་ཚེ། ཕྱི་རྒྱལ་བ་དང་ལྷག་པར་བྱེས་འབྱོར་གཞོན་སྐྱེས་མང་པོས་བལྟ་ཀློག་ཐུབ་ངེས་རེད། དེར་དཔལ་འབྱོར་སོགས་ཀྱི་མཐུན་རྐྱེན་ཅི་དགོས་གུས་པས་ཐབས་འཚོལ་ཞུས་ཆོག
རྩོམ་ཡིག་དེ་ངས་ལྟ་ཐེངས་གཅིག་གིས་མཇུག་བར་དུ་བསྐྱལ་བ་ཡིན། མཚམས་འཇོག་མི་ཐུབ་པ་ཞིག་རེད། རྩོམ་ཡིག་ཀློག་གིན་ཀློག་གིན་ཡིད་ལ་དོན་དག་འདྲ་མི་འདྲ་མང་པོ་དྲན་ཡོང་གི་འདུག དོན་དངོས་དེ་རང་སྟེང་ལ་ཡང་ཡང་སྦྱར། ཐ་ན་སོ་སོའི་བཟའ་ཟླ་དང་བུ་ཕྲུག་ཀྱང་ཡིད་ལ་དྲན་ཡོང་གི་འདུག
ད་དུང་སེམས་སྐྱོ་བ་ཞིག་ནི་ཚེ་རིང་སྒྲོལ་མ་དང་སྒྲོལ་མ་སྐྱིད་གཉིས་ཀྱི་གནས་སྟངས་རེད། ཁོང་གཉིས་ཀྱི་ཤེས་མཁན་འདྲ་ཡོད་དམ། སྒྲོལ་མ་སྐྱིད་མགོ་ལོག་གི་ཡིན་པ་འདྲ། ཚེ་རིང་སྒྲོལ་མ་ནི་སྐུ་འབུམ་གི་རེད། ཕལ་ཆེར་གསོག་སྒར་སློབ་གྲྭ་ནས་ཕྱིར་ལོག་པ་ཞིག་ཡིན་པ་འདྲ།
རྒྱབ་བསྐྱོར་ཡོད། ངོ་མ་དེ་འདྲ་རེད། ཏཱ་ལའི་བླ་མས་དབུས་པའི་བོད་ཀྱི་དབུ་ཁྲིད་ཁག་གིས་ཀྱང་འདིའི་རིགས་ཀློག་འོས་པས། མཐའ་འཁོར་གྱི་ལས་བྱེད་ཚོས་དུས་ལྟར་དཔར་ནས་སྤྱན་ཕུལ་ཞུ་འོས་པ་ཞིག་རེད། ལྷན་རྒྱས་དགོངས་ཚུལ་གཞན་ཡོད་དམ།