བོད་ཀྱི་དཔེ་མཛོད་ཁང་གི་འགན་འཛིན་ཟུར་བ་སྐུ་ངོ་རྒྱ་མཚོ་ཚེ་རིང་ལགས་ཕྱི་ཚེས་ ༢༥ ཉིན་ཨ་རི་ནས་དགོངས་པ་རྫོགས་འདུག ཁོང་དགོང་ལོ་ ༧༣ རེད།
སྐུ་ངོ་རྒྱ་མཚོ་ཚེ་རིང་ལགས་ནི་ ༡༩༣༦ ལོར་ཡབ་བླ་མ་བློ་བཟང་དང་ཡུམ་ཉི་མ་སྒྲོལ་མ་གཉིས་ཀྱི་བུ་རུ་འཁྲུངས། འཁྲུངས་ཡུལ་འབྲས་ལྗོངས་ཡིན། ཁོང་ཉིད་རྒྱ་གར་བྱང་ཤར་གྱི་ཀ་ལི་ཀ་ཏའི་གཙུག་ལག་སློབ་གྲྭ་ནས་སློབ་མཐར་ཕྱིན། སློབ་མཐར་ཕྱིན་རྗེས་ཁོང་གིས་རྒྱ་གར་གྱི་ཕྱི་སྲིད་ལས་ཁུངས་དང་ནང་སྲིད་ལས་ཁུངས་སུ་ཕྱག་ལས་གནང་། དེས་མི་ཚད་ལྷ་སར་རྒྱ་གར་གྱི་གཞུང་ཚབ་ཀྱི་ཕྱག་ལས་གནང་ལ། འབྲས་ལྗོངས་གཞུང་དུའང་ཕྱག་ལས་གནང་།
ཕྱི་ལོ་ ༡༩༦༣ ལོ་ནས་བཟུང་ཁོང་གིས་བཙན་བྱོལ་བོད་གཞུང་གི་སྡེ་ཚན་ཁག་ཏུ་ཕྱག་ལས་གནང་མགོ་བཙུགས་ཤིང་། ༡༩༩༠ ལོར་རྒན་ཡོལ་མ་ཞུས་བར་དུ་ཕྱག་ལས་གནང་ཡོད། ༡༩༦༥ ལོར་ཁོང་གིས་ཡིག་སྒྱུར་དང་དཔེ་སྐྲུན་སྡེ་ཚན་དུ་ཕྱག་ལས་གནང་། ༡༩༦༦ ལོར་ཕྱི་དྲིལ་ལས་ཁུངས་སུ་གནས་སྤོ་བྱས། ༡༩༦༧ ལོར་ཆོས་ཤེས་ལྷན་ཁང་དུ་གནས་སྤོ་བྱས། ༧གོང་ས་མཆོག་ཐེངས་དང་པོར་ཉི་ཧོང་དང་ཐའེ་ལན་ཌིར་ཆིབས་བསྒྱུར་གནང་དུས་སྐུ་ངོ་རྒྱ་མཚོ་ཚེ་རིང་ལགས་ཞབས་གཡོག་གི་གྲས་སུ་ཡོད། རིམ་བཞིན་ཁོང་ཉིད་ཀྱི་གནས་རིམ་དེ་དྲུང་ཆེའི་རིམ་པར་སྤར་བ་དང་བཀའ་བློན་གྱི་ཕྱག་རོགས་སུའང་བསྐོས་འདུག ༡༩༧༢ ལོར་ཁོོང་ཉིད་སྐབས་དེར་གསར་དུ་སྒོ་ཕྱེ་བའི་བོད་ཀྱི་དཔེ་མཛོད་ཁང་གི་འགན་འཛིན་ལས་ཚབ་དུ་བསྐོས་ཤིང་། ལོ་དེའི་ཕྱི་ཟླ་ ༦ པའི་ནང་སྟག་འཚེར་རིན་པོ་ཆེ་ཐུབ་བསྟན་འཇིགས་མེད་ནོར་བུ་མཆོག་དཔེ་མཛོད་ཁང་གི་འགན་འཛིན་ལ་མ་བསྐོས་བར་དུ་སྐུ་ངོ་རྒྱ་མཚོ་ཚེ་རིང་ལགས་ཀྱིས་དཔེ་མཛོད་ཁང་གི་འགན་འཛིན་ལས་ཚབ་གནང་། ༡༩༧༤ ལོར་༧གོང་ས་མཆོག་གིས་སྐུ་ངོ་རྒྱ་མཚོ་ཚེ་རིང་ལགས་བོད་ཀྱི་དཔེ་མཛོད་ཁང་གི་འགན་འཛིན་གསར་བར་བསྐོ་འཇོག་གནང་། ལོ་དེའི་ཕྱི་ཟླ་གསུམ་པའི་ཚེས་ ༡ ནས་བཟུང་ཁོང་ཉིད་རྒན་ཡོལ་ལ་མ་ཕེབས་བར་དུ་བོད་ཀྱི་དཔེ་མཛོད་ཁང་གི་འགན་འཛིན་གནང་བ་རེད། ཁོང་རྒན་ཡོལ་ལ་ཕེབས་རྗེས་ཁོང་གི་སྐུ་ཟླ་རྣམ་རྒྱལ་ལྷ་མོ་དང་མཉམ་དུ་ཨ་རིའི་མིན་ནི་སོ་ཌའི་མིན་ནི་ཕོ་ལེ་སི་ཞེས་པར་གཞིས་ཆགས།
ཁོང་ནི་སྙན་གྲགས་ལ་གཡོལ་བའི་ཚུལ་ལྡན་གྱི་སྐྱེ་བུ་ཞིག་ཡིན་ལ། རང་གི་ཕྱག་ལས་ལ་དབྱིངས་ཞུགས་མཁན་ཞིག་ཀྱང་རེད། བཙན་བྱོལ་བོད་གཞུང་ལ་དབྱིན་སྐད་ཤེས་མཁན་དཀོན་ཞིང་ཕྱག་ལས་ཀྱི་ཉམས་མྱོང་ཆེ་བའི་མི་སྣ་ཧ་ཅང་དཀོན་དུས་ཤིག་ལ་ཁོང་བཙན་བྱོལ་བོད་གཞུང་ལ་ཞབས་ཕྱི་ཞུ་བར་ཕེབས་པ་རེད། ཁོང་གི་ཕྱག་ལས་ཁྲོད་ནས་གཟེངས་སུ་ཐོན་པའི་གྲུབ་འབྲས་ནི་བོད་ཀྱི་དཔེ་མཛོད་ཁང་འདི་རྒྱ་སྐྱེད་ཀྱིས་དེང་སྐབས་རྒྱལ་སྤྱིའི་སྟེང་བོད་ཉམས་ཞིབ་ཀྱི་བསྟི་གནས་ཆེ་ཤོས་དེ་ཆགས་ཡོད་པ་འདི་ཡིན་ངེས། ཁོང་གིས་དཔེ་མཛོད་ཁང་དུ་བོད་མི་འགའ་ཤས་བོད་དོན་ཉམས་ཞིབ་བྱེད་མཁན་དུ་སྐྱེད་བསྲིངས་ཀྱང་གནང་ཡོད། དེས་མི་ཚད་དེང་སྐབས་འཛམ་གླིང་གས་སར་རིག་གཞུང་གི་སྡེ་ཚན་ཁག་དང་གཙུག་ལག་སློབ་གཉེར་ཁང་དག་ཏུ་བོད་རིག་པའི་ཉམས་ཞིབ་པ་མང་པོ་ཞིག་ཡོད་པ་འདི་དག་གིས་ཀྱང་ཁོང་གི་སྐབས་ཐོག་དེར་བོད་ཀྱི་དཔེ་མཛོད་ཁང་ནས་སློབ་གཉེར་གནང་ཡོད།
འབྲས་ལྗོངས་ཀྱི་ཡུལ་མི་དང་རྒྱ་གར་གྱི་མི་སེར་ཞིག་ཡིན་པའི་ཆ་ནས་སྐུ་ངོ་རྒྱ་མཚོ་ཚེ་རིང་ལགས་ལ་ཕྱག་ལས་ཀྱི་གོ་སྐབས་མང་པོ་རག་ཡོད་པ་རེད། ཕྱག་ལས་དེ་དག་ཀྱང་བོད་ཀྱི་དཔེ་མཛོད་ཁང་གི་འགན་འཛིན་གྱི་གོ་བབ་ལས་རྒྱ་ཆེ་བ་དག་ཡིན། འོན་ཀྱང་། ཁོང་ཉིད་༧གོང་ས་མཆོག་ལ་མི་ཕྱེད་པའི་དད་པ་དམ་ཚིག་ལྡན་ཞིང་། ཁོང་ཉིད་བོད་མི་རིགས་ལ་བརྩེ་སེམས་ཆེ་བའི་དབང་གིས་ཁོང་གི་ཕྱག་ལས་མཐའ་དག་རྒྱབ་ཏུ་དོར་དེ་མུ་མཐུད་ནས་བོད་པའི་སྤྱི་ཚོགས་ནང་དུ་ཞབས་ཕྱི་གནང་ཡོད་པ་རེད།
ཁོང་ཉིད་མེ་ཏོག་ལྡུམ་རྭ་བདག་སྐྱོང་གནང་རྒྱུར་དགའ་ཞིང་། བོད་ཀྱི་དཔེ་མཛོད་ཁང་གི་ཁོང་གི་བཞུགས་ཤག་གི་ཁྱམས་རྭའི་ནང་དུ་མེ་ཏོག་ལྡུམ་རྭ་ཆུང་ཆུང་ཞིག་ཀྱང་ཡོད།
ཁོང་ལ་ད་ཆར་ཤུལ་བཞུགས་ནང་མི་ནི་ཁོང་གི་སྐུ་ཟླ་རྣམ་རྒྱལ་སྒྲོལ་མ་དང་བུ་མོ་ཡིད་དགའ་ལྷ་མོ་གཉིས་ཡོད།
མཆན། གནས་ཚུལ་གྱི་ཁོང་ནི་བུ་ཆུང་ཚེ་རིང་ཡིན།
ཧ་ལས་པའི་བཀའ་དྲིན་ཆེན་པོ་ཡིན། ནང་མི་རྣམས་ལའང་བཀྲིན་ཆེ་ཞུ།
བཀའ་དྲིན་ཆེ་ཞུ་རྒན་པོ་སེམས་གཏིང་ནས།