འཛམ་གླིང་འདི་ང་ཚོ་གཅིག་པུར་དབང་བ་མ་རེད།

བཟང་ངན་གྱི་ལས་གང་འདྲ་བྱས་ཀྱང་འཛམ་གླིང་ནི་ང་ཚོར་མེད་ཐབས་མེད་པའི་གཞི་རྟེན་ཡིན་སྟབས།  ང་ཚོས་དུས་ནམ་ཡང་བློས་གཏོང་རྒྱུ་ཡོད་པ་མ་རེད། གལ་སྲིད། བློས་བཏང་བ་ཡིན་ན་རང་གི་མི་ཚེ་བློས་བཏང་བ་དང་གཅིག་པ་རེད།ཅེས་རྒྱལ་བ་༧ཀརྨ་པ་མཆོག་གིས་གསུངས།

ཕྱི་ཚེས་ ༢༩ ཉིན་གྱི་ཕྱི་དྲོ་རྒྱ་གར་རྒྱལ་སྤྱིའི་རི་སྐྱེས་སྲུང་སྐྱོབ་ཚོགས་པའི་ཐེབས་རྩ་ཁང་དང་བོད་ཀྱི་རི་སྐྱེས་སྲོག་ཆགས་ཐེབས་རྩ་ཚོགས་པ། བོད་མིའི་རི་སྐྱེས་སྲོག་ཆགས་སྲུང་སྐྱོབ་རྟོགས་སེལ་གྱི་ལས་འགུལ་ཁང་གསུམ་གྱི་གོ་སྒྲིག་འོག  ངྷ་སྟེེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་རི་སྐྱེས་སྲོག་ཆགས་སྲུང་སྐྱོབ་སྐོར་གྱི་ལས་འགུལ་ཞིག་སྤེལ་སོང་ལ། དེར་སྐུ་མགྲོན་གཙོ་བོ་དཔལ་རྒྱལ་བ་༧ཀ་རྨ་པ་ཨོ་རྒྱན་འཕྲིན་ལས་མཆོག་གཙོས། བོད་པའི་རི་སྐྱེས་སྲོག་ཆགས་ཐེབས་རྩ་ཁང་གི་འགན་འཛིན་གཅིག་ལྕོགས་ཨ་ཤུ་ཀུམ་མ་ལགས། དེ་བཞིན་ངྷ་སྟེང་བོད་ཁྱིམ་གྱི་དགེ་སློབ་ ༢༠༠ ལྷག་ལ་རི་སྐྱེས་སྲོག་ཆགས་རྩ་གཏོང་དང་གནོད་འཚེ་སྐོར་གྱི་གནས་ཚུལ་དང་བརྙན་འཕྲིན་གཟིགས་འབུལ་གནང་སོང་།  

སྐུ་མགྲོན་གཙོ་བོ་རྒྱལ་བ་༧ཀརྨ་པ་མཆོག་ནས་ཐེངས་འདིའི་ལས་འགུལ་དང་འབྲེལ་ལམ་སྟོན་བཀའ་སློབ་གནང་དོན། སྤྱིར་འཛམ་གླིང་ནི་འགྲོ་བ་སེམས་ཅན་ཀུན་གྱི་སྤྱི་མཐུན་གྱི་གནས་ཤིག་ཡིན་པ་དང་། འགྲོ་བ་མིའི་རིགས་འདུས་པའི་སྲོག་ཆགས་ཚང་མར་རྐྱེན་བར་ཆད་གཅིག་མ་གཏོགས་འཕྲད་ཀྱི་མེད་ནའང་། རྐྱེན་བར་ཆད་མང་པོ་ཞིག་འབུ་སྲིན་གྱི་རིགས་ལ་འཕྲད་ཀྱིན་ཡོད་པ་རེད། འབུ་སྲིན་གྱི་རིགས་དེ་ཆུང་ཆུང་ཞིག་ཡིན་སྟབས། ང་ཚོས་རིན་ཐང་མེད་པ་ཞིག་ཏུ་བརྩིས་ཀྱིན་འདུག ཡིན་ཡང། སེམས་ཅན་གྱི་རིགས་མི་འདྲ་བ་ཚང་མ་ལ་དགོས་པ་རྒྱུ་མཚན་ཞིག་ཡོད་པ་རེད། སྲིན་འབུ་ཆུང་ཆུང་ཞིག་ཡིན་ནའང་། ཁོ་ཡོད་པ་ཙམ་གྱིས་ཟས་བཅུད་རྒྱས་པ་སོགས་དམིགས་བསལ་གྱི་དགོས་པ་ཡོད་པ་རེད། དེ་བཞིན། རྐྱེན་ངན་གྱི་རིགས་མང་པོ་ཞིག་ང་ཚོས་སེལ་ན་ཕན་ཐོགས་ཡོང་གི་ཡོད་པ་རེད། དཔེར་ན། སྦྲང་མའི་རིགས་ཀྱིས་མེ་ཏོག་གི་བཅུད་བླངས་ཏེ་མེ་ཏོག་འདབ་མ་རྒྱས་པ་དང་མེ་ཏོག་སྨིན་པར་ཕན་གྱི་ཡོད་པ་རེད། གལ་སྲིད། སྦྲང་མ་རིགས་ཡོད་ཚད་མེད་པར་གྱུར་པ་ཡིན་ན། རྩི་ཤིང་གི་རིགས་མང་པོ་ཞིག་འཇིག་འགྲོ་གི་ཡོད་པ་རེད། དེ་བས། འཛམ་གླིང་ཐོག་འབུ་སྲིན་ཚུན་གྱི་ཡོད་ཚད་ངེས་པར་དུ་ཡོད་དགོས་པ་ཞིག་དང་། སོ་སོར་དགོས་པ་རེ་ཡོད་པ་རེད། ང་ཚོས་ཚུལ་ཁྲིམས་དང་བླང་དོར་གྱི་ཕྱོགས་ནས་བསམ་བློ་བཏང་བ་ཡིན་ན། སྲོག་ཆགས་རིགས་ཡོངས་ལ་སོ་སོར་མུ་མཐུད་གནས་པ་དང་གསོན་པའི་ཐོབ་ཐང་དང་འོས་བབ་ཆ་ཚང་ཡོད་པ་རེད། ཡིན་ཡང། མང་པོ་ཞིག་གིས་ཚུལ་ཁྲིམས་དང་བླང་དོར། ལས་རྒྱུ་འབྲས་སོགས་ལ་བསམ་བློ་གཏོང་གི་མེད་པར། སྒེར་གྱི་ཁེ་ཕན་ཁོ་ནར་བསམ་བློ་གཏོང་མཁན་མང་པོ་ཡོད་པ་རེད།

མང་པོ་ཞིག་གིས་སྟག་དང་གཟིག་དེ་ཚོ་ཞེད་སྣང་ཆེ་བས་མེད་ན་ཡག་པོ་རེད། དེ་དག་མེད་ན་ཤྭ་བ་དང་རི་བོང་སོགས་ལ་ཞི་བདེ་ཐོབ་ཀྱི་རེད། ཅེས་བཤད་མཁན་ཡོང་བསྡད་ཀྱིན་ཡོད་པ་རེད། གལ་སྲིད། སྲོག་ཆགས་རིགས་གཅིག་ལ་གནོད་འཚེ་ཐེབས་པ་ཡིན་ན། དེའི་ཤུགས་དེ་སྲོག་ཆགས་མང་པོ་ཞིག་ལ་འགྱུར་བ་དང་ཤུགས་རྐྱེན་ཐེབས་འོང་གི་ཡོད་པ་རེད། དེ་བས། སྲོག་ཆགས་ཀྱི་རིགས་མེད་པ་ཡིན་ན་སྤྱི་ཚོགས་ལ་གནོད་འགྲོ་བ་ཞིག་ཡིན་སྟབས། སྲོག་ཆགས་ཧ་ཅང་གལ་ཆེན་ཆགས་ཡོད་པ་རེད། ནང་པ་སངས་རྒྱས་པའི་ལྟ་ཚུལ་ཐོག་བཤད་པ་ཡིན་ན། སེམས་ཅན་གཞན་ལ་འཚེ་བ་དང་གནོད་པ་མི་བྱེད་པར་ཕན་པ་སྒྲུབ་པ། གལ་སྲིད། ཕན་པ་མ་བསྒྲུབ་ཀྱང་གནོད་པ་མི་སྐྱེལ། ཅེས་གསུངས་ཡོད་པ་རེད། དེ་བས། སེམས་ཅན་གཞན་གྱི་ཚེ་སྲོག་དང་རིན་ཐང་ལ་བརྩི་འཇོག་བྱ་དགོས་པ་དེ་གལ་ཆེན་པོ་ཆགས་ཡོད་པ་རེད། ང་ཚོས་མི་ལས་གཞན་པའི་སེམས་ཅན་གཞན་ལ་མནར་གཅོད་གཏོང་རྐྱང་དང་སྲོག་གཅོད་རྐྱང་བྱེད་ཀྱིན་ཡོད་པ་དང་། བསད་པ་ཙམ་དུ་མ་ཟད་པགས་པ་མགོ་རུས་དེ་དག་གོན་པ་དང་སྒོ་མགོར་འགེལ་བའི་སྲོལ་ཆགས་ཡོད་པ་རེད། དེ་ཧ་ཅང་གདུག་རྩུབ་ཀྱི་བྱ་སྤྱོད་རེད། སྤྱི་ཚོགས་རྙིང་པའི་སྐབས། སོ་སོའི་དགྲ་བོར་འཁོན་འཛིན་ཆེད་གཞན་བསད་རྗེས་མགོ་ཁང་པའི་ཕྱི་ལོགས་སུ་བཀལ་ཏེ་དགྲ་ཤ་ལེན་པའི་སྲོལ་འདྲ་བོ་སྟོན་གྱིན་ཡོད་པ་དང་གཅིག་མཚུངས་རེད། ཁོང་ཚོ་ང་ཚོའི་དགྲ་བོ་རེད་ཅེས་ན་ང་ཚོར་གནོད་པ་དང་འཁོན་འཛིན་ཅི་ཡང་ཡོད་པ་མ་རེད། ང་ཚོས་ཁོང་ཚོར་གདུག་རྩུབ་དེ་འདྲ་བྱེད་དོན་ཅི་ཡིིན་ནམ། ཅེ་ན་ང་ཚོར་རྒྱུ་མཚན་ཅི་ཡང་མེད། སྔོན་མ་སྟག་ལྤགས་གཟིག་ལྤགས་གྱོན་མཁན་དེ་དཔའ་བོའི་རིགས་ཀྱི་གྱོན་པའི་སྲོལ་ཡོད་ཀྱང། རིམ་བཞིན་མི་མང་པོས་སེམས་ཅན་གྱི་པགས་པ་གྱོན་མཁན་ཇེ་མང་ཕྱིན་པ་དང་སེམས་ཅན་མང་པོར་གནོད་འཚེ་ཐེབས་བཞིན་ཡོད་པ་རེད། དེ་དག་ང་ཚོའི་ལུགས་སྲོལ་ཡིན་ཡང། སྤྱི་དང་མ་འཚམ་པ་ཞིག་དང་དུས་དང་གནས་བབ་ལ་ཉེན་ཁ་ཚ་བོ་དང་གནས་ཚུལ་ཆེན་པོ་ཡོད་ན། ལུགས་སྲོལ་རྙིང་པ་རེད་ཟེར་ནས་ཉར་བསྡད་ན་འགྲིག་གི་མ་རེད། ཅེས་གསུངས་བྱུང་། 

ཁོང་གིས་མུ་མཐུད་དུ་གསུངས་དོན། ཁ་ནས་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་ཟེར་བཞིན་ལག་ལེན་ཐོག་གནོད་འཚེ་གཏོང་གང་འདོད་བྱས་པ་ཡིན་ན། ང་ཚོས་རང་ཉིད་ལ་མགོ་སྐོར་བཏང་བ་རེད། དེ་བས། མི་རྣམས་ཀྱིས་འཛམ་བུ་གླིང་དེ་མི་ལ་བདག་པ་ཞིག་དང་དབང་བསྒྱུར་བྱེད་མཁན་མི་ཡིན་པ་དྲན་གྱི་ཡོད་པ་རེད། དངོས་ནས་བཤད་ན་མི་ཟེར་བ་དེ་འཛམ་གླིང་གི་སྲོག་ཆགས་ས་ཡ་མང་པོའི་གྲས་ཀྱི་རིགས་གཅིག་རེད། ཡིན་ཡང་། མི་ལ་ཐུན་མོང་མ་ཡིན་པའི་རྣམ་དཔྱོད་ཞིག་ཡོད་སྟབས། དེས་རྒྱབ་རྟེན་གྱིས་ང་ཚོས་ཐུན་མོང་མ་ཡིན་པའི་ནུས་པ་སྟོན་ཐུབ་ཀྱིན་ཡོད་པ་རེད། མི་ཚང་མས་ནུས་པ་དེ་ཧ་ཅང་སྟོབས་ཆེན་པོ་ཞིག་ཡིན་པར་བསམ་གྱི་ཡོད་པ་ལས། གནོད་འཚེ་གཏོང་བ་དེར་འགྱུར་བ་གཏོང་རྒྱུ་ཡོད་པ་ཞིག་ལ་བསམ་བློ་གཏོང་གི་མེད། ཡིན་ཡང། ཞིབ་ཏུ་བསམ་བློ་བཏང་ན་འཛམ་གླིང་སྟེང་གཏོར་བཤིག་དེ་མིའི་བཅོས་པའི་ལས་དེ་ཧ་ཅང་སྟོབས་ཆེན་པོ་རེད། གལ་སྲིད། ང་ཚོས་གཟབ་གཟབ་མ་བྱས་པར་བསམ་བློ་གཏོང་སྟངས་དང་བདག་པོ་བྱེད་སྟངས་ནོར་བ་ཡིན་ན། ཉིན་ཞིག་རང་ཉིད་རང་གིས་བརླག་པའི་ཉེན་ཁ་ཡོད་པ་རེད། འཛམ་གླིང་ཕྱིའི་ཁོར་ཡུག་ལ་བསྒྱུར་བཅོས་བཏང་བ་དང་ཆབས་ཅིག་ཁོར་ཡུག་དེར་གནས་པའི་སྲོག་ཆགས་ས་ཡ་མང་པོའང་མིས་བཅོས་ལས་ལ་བརྟེན་ནས་གནོད་སྐྱོན་ཆེན་པོ་ཐེབས་བཞིན་ཡོད་པ་རེད། དེ་བས། ང་ཚོའི་རང་ཉིད་ཀྱི་སྤྱོད་ལམ་ལ་འགྱུར་བ་གཏོང་དགོས། ང་ཚོའི་འཛམ་བུ་གླིང་འདི་ལ་ཁྱད་ཆོས་ཤིག་ཡོད་པ་ནི་ཚེ་སྲོག་མང་པོ་ཞིག་གནས་ཐུབ་པ་དེ་རེད། དེ་བཞིན་ང་ཚོས་མི་གཞན་གྱི་ཚེ་སྲོག་རིན་ཐང་དུ་བརྩིས་དགོས་པ་དེ་ང་ཚོ་མི་ཞིག་ཏུ་སྐྱེས་པའི་ཆ་ནས་འོས་འགན་ཞིག་དང་རེ་བ་ཞིག་རེད། ཐ་ན་ང་ཚོས་དབུགས་གཏོང་ལེན་ཚུན་སོགས་ཀྱང་རྩི་ཤིང་ནགས་ཚལ་སོགས་ལ་བརྟེན་ནས་བྱུང་བ་ཡིིན་པས། ཕན་ཚུན་གཅིག་ལ་གཅིག་རྟེན་དུ་གནས་ཡོད་པ་རེད། ང་ཚོས་རང་ཉིད་གླེང་དུས་སུ་དང་གང་ལ་བརྟེན་མི་དགོས་པར་གནས་ཡོད་པའི་བསམ་བློ་ཞིག་འཁུར་བསྡད་ཡོད་པ་རེད། འདི་ལ་བརྟེན་ནས་ང་ཚོ་དཀའ་ངལ་མང་པོ་ཞིག་འཕྲད་ཡོང་གི་ཡོད་པ་རེད།  དེ་བས། འཛམ་བུ་གླིང་འདི་ང་ཚོས་བཟང་ངན་གང་འདྲ་བྱས་ཀྱང་མེད་ཐབས་མེད་པའི་གཞི་རྟེན་ཡིན་སྟབས། ང་ཚོས་དུས་ནམ་ཡང་བློས་གཏོང་རྒྱུ་ཡོད་པ་མ་རེད། གལ་སྲིད། བློས་བཏང་བ་ཡིན་ན་རང་གི་མི་ཚེ་བློས་བཏང་བ་དང་གཅིག་པ་རེད། དེ་བས་ཚང་མའི་ངོས་ནས་དོ་སྣང་བྱ་དགོས་པ་དེ་གལ་ཆེན་པོ་རེད། ཅེས་གསུངས་ཡོད།