ད་ལྟ་བཙན་བྱོལ་བོད་མིའི་སྤྱི་ཚོགས་ནང་གཞོན་སྐྱེ་ཚོ་འཚར་ལོངས་བྱུང་སྟེ། ལས་དོན་མང་པོ་ཞིག་མི་རབས་གསར་བའི་ཕྲག་ཏུ་འབབ་ཀྱིན་ཡོད། ཁོང་ཚོར་རྒྱ་གར་རྩ་ཁྲིམས་ནང་འོས་ཤོག་ལྡུག་པའི་ཐོབ་ཐང་ལས་གཞན། རྒྱ་གར་ཡུལ་མི་དང་གཅིག་མཚུངས་ཀྱི་ཐོབ་ཐང་ཡོད་ལ། ལྷག་པར་དུ་སོ་སོའི་རང་དབང་འཐབ་རྩོད་ཆེད་དམིགས་བསལ་གྱི་ཐོབ་ཐང་ཡོད་སྟབས། ཐོབ་ཐང་དེ་དག་འཐུས་ཤོར་དུ་མ་འགྲོ་བ་དང་གདེང་ཚོད་ཡོད་པའི་ཐོག་ནས་ལེན་ཐུབ་པ་བྱ་དགོས་ཟེར།
རྒྱ་གར་བདེ་སྲུང་བློན་ཆེན་ཟུར་བ་ཇོར་རྗེ་ཧྤར་ནན་ཌེ་སི་ George Fernandes མཆོག་དང་ཁོང་གི་སྐུ་ཟླ། དེ་བཞིན། Samajwadi སྲིད་དོན་ཚོགས་པའི་སྤྱི་ཁྱབ་དྲུང་ཆེ་ལྕམ་སྐུ་རྗ་ཡ་རྗེ་ཊི་ལེ་ Jaya Jaitley ལགས། སྐུ་ཞབས་ཨ་རྗེ་ Ajay ལགས་བཅས་རྒྱ་གར་གྱི་གནད་ཡོད་མི་སྣ་ ༤ བཞིགས་སྒར་ངྷ་རམ་ས་ལར་གཟིགས་སྐོར་དུ་ཕེབས་ཏེ། ཁ་སང་ཕྱི་དྲོའི་ཆུ་ཚོད་ ༧ སྟེང་བོད་ཀྱི་གཞུང་འབྲེལ་མིན་པའི་ཚོགས་པ་ལྔའི་གོ་སྒྲིག་འོག ཐེག་ཆེན་ཆོས་གླེང་གཙུག་ལག་ཁང་དུ་བཞུགས་སྒར་ཁུལ་གྱི་མི་དམངས་ལ་ཐུག་འཕྲད་ཀྱིས་བོད་དོན་སྐོར་ལ་གཏམ་བཤད་གནང་ཡོད། གཏམ་བཤད་དབུ་འཛུགས་མ་བྱས་གོང་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་གསར་བ་ཀིརྟི་སྒྲོན་དཀར་ལྷ་མོ་ལགས་ཀྱིས་ཐེངས་འདིའི་སྐུ་མགྲོན་གཙོ་བོ་རྒྱ་གར་བདེ་སྲུང་བློན་ཆེན་ཟུར་བ་ཇོར་རྗེ་ཧྤར་ནན་ཌེ་སི་མཆོག་ནི། སྔར་བློན་ཆེན་གྱི་ལས་གནས་ཡོད་སྐབས་དང་ད་ལྟ་མེད་སྐབས་གཉིས་ཀར་ཁ་ཞེ་གཉིས་མེད་ཐོག་བོད་དོན་ལ་རྒྱབ་སྐྱོར་དང་། བྱམས་བརྩེ་དང་དྲང་བདེན་གྱི་ལངས་ཕྱོགས་བརྟན་བཟུང་བྱ་མཁན་ཞིག་ཡིན་སྐོར་དང་། སྐུ་མགྲོན་གཞན་རྣམས་ཀྱིས་ཀྱང་བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་རྐྱང་ཡིན་སྐོར་གསུངས་ཏེ། གཞུང་འབྲེལ་མིན་པའི་ཚོགས་པ་ལྔའི་ཚབ་བྱས་ཏེ་ཐུགས་རྗེ་ཆེ་ཡང་ཞུས་སོང་།
སྐབས་དེར་ལྕམ་སྐུ་རྗ་ཡ་རྗེ་ཊི་ལེ་ལགས་ཀྱིས་སྔར་གྱི་ལས་དོན་ཁག་ཅིག་ངོ་སྤྲོད་གནང་དོན། ངས་སྲིད་དོན་ཐོག་ལས་ཀ་བྱས་པའི་གོ་རིམ་ཁྲོད། སྐུ་ཞབས་ཇོར་རྗི་མཆོག་གི་མདུན་ནས་སློབ་སྟོན་ཞུས་ཏེ། བོད་དོན་ལ་ལས་ཀ་གང་འཚམ་བྱ་རྒྱུའི་གོ་སྐབས་བྱུང་སོང་ལ། མ་འོངས་པར་ཡང་གང་ནུས་ཅི་འཇོན་གྱིས་བྱ་རྒྱུའི་ཆོད་སེམས་ཡོད། སྔར་རྒྱལ་ས་ལྡི་ལིར་བོད་མི་ཚོས་རྒྱ་གཞུང་ལ་ངོ་རྒོལ་བྱས་སྐབས། ང་རང་མཉམ་ཞུགས་བྱས་ཏེ་བོད་པ་ཁག་ཅིག་དང་མཉམ་དུ་འཛིན་བཟུང་བྱས་སོང་། སྐབས་དེར་སྐུ་ཞབས་ཇོར་རྗི་མཆོག་གྲོས་ཚོགས་ནང་ཕེབས་ཏེ། ཐེངས་འདིར་ང་ཚོའི་རྒྱུན་ལས་འཇུས་པར་བསམ་ཚུལ་གང་ཡང་མེད། འོན་ཀྱང་། བོད་པ་ཚོ་རྒྱུ་མཚན་ཅིའི་ཕྱིར་བཟུང་པ་རེད། དམངས་གཙོའི་རྒྱལ་ཁབ་ནང་རང་དབང་འཐབ་རྩོད་བྱེད་པ་དེ་ཁྲིམས་མཐུན་ཡིན། བོད་མི་ཚོ་མགྱོགས་མྱུར་གློད་གྲོལ་གཏོང་དགོས། ཞེས་འབོད་སྐུལ་ཞུས་མཐར་གློད་གྲོལ་ཐོབ་པ་རེད། ཅེས་གསུངས་བྱུང་།
ཁོ་མོས་མུ་མཐུད་དུ་རྒྱ་གར་ནང་བོད་མི་སྐྱབས་བཅོལ་བར་ཐོབ་ཐང་གང་ཡོད་པ་དེ་འཐུས་ཤོར་མ་སོང་བ་བྱ་དགོས་སྐོར་གསུངས་དོན། ད་ལྟ་བཙན་བྱོལ་བོད་མིའི་སྤྱི་ཚོགས་ནང་གཞོན་སྐྱེ་ཚོ་འཚར་ལོངས་བྱུང་སྟེ། ལས་དོན་མང་པོ་ཞིག་མི་རབས་གསར་བའི་ཕྲག་ཏུ་འབབ་ཀྱིན་ཡོད། ཁོང་ཚོར་རྒྱ་གར་རྩ་ཁྲིམས་ནང་འོས་ཤོག་ལྡུག་པའི་ཐོབ་ཐང་ལས་གཞན། རྒྱ་གར་ཡུལ་མི་དང་གཅིག་མཚུངས་ཀྱི་ཐོབ་ཐང་ཡོད། ལྷག་པར་དུ་སོ་སོའི་རང་དབང་འཐབ་རྩོད་ཆེད་དམིགས་བསལ་གྱི་ཐོབ་ཐང་ཡོད་སྟབས། ཐོབ་ཐང་དེ་དག་འཐུས་ཤོར་དུ་མ་འགྲོ་བ་དང་གདེང་ཚོད་ཡོད་པའི་ཐོག་ནས་ལེན་ཐུབ་པ་བྱ་དགོས། ད་ལོ་སྐྱབས་བཅོལ་བོད་མི་ཚོས་རྒྱ་གར་གཞུང་དམངས་ལ་ཐུགས་རྗེ་ཆེ་ཞུ་བཞིན་ཡོད་ལ། ལོ་རྒྱུས་ཐོག་ནས་ཀྱང་རྒྱ་གར་དགེ་རྒན་དང་བོད་པ་དགེ་ཕྲུག་ལྟ་བུ་ཆགས་ཡོད་ཀྱང་། གནད་དོན་འགའ་རེའི་ཐོག་དགེ་རྒན་གྱིས་དགེ་ཕྲུག་ལ་ཐུགས་རྗེ་ཆེ་ཞུ་དགོས་པའི་གནས་སྟངས་མང་པོ་བྱུང་ཡོད་སྟབས། ངས་དེ་རིང་རྒྱ་གར་གཞུང་དམངས་ཀྱི་ཚབ་བྱས་ཏེ་ཁྱེད་ཅག་བོད་མི་ཚོར་ཐུགས་རྗེ་ཆེ་ཞུ་རྒྱུ་ཡིན། གང་ཡིན་ཟེར་ན། ད་བར་བོད་མི་ཚོས་ཆོས་དང་རིག་གཞུང་གཅེས་ཉར་བྱས་ཏེ་གྲུབ་འབྲས་ཆེན་པོ་བླངས་ཡོད་ལ། འདས་པའི་ལོ་ངོ་ ༥༠ རིང་འཚེ་མེད་ཞི་བའི་ཐོག་ནས་རྩ་དོན་འཐབ་རྩོད་བྱས་པར་འཛམ་གླིང་ལ་དམིགས་དཔེ་བཟང་བོ་བཞག་ཡོད། ཅེས་གསུངས་སོང་།
དེའི་རྗེས་སྐུ་ཞབས་ཨ་རྗེ་ Ajay ལགས་ཀྱིས་བོད་དོན་འཐབ་རྩོད་ཀྱི་གནས་ཚད་མཐོན་པོར་སླེབས་ཡོད་སྐོར་གསུངས་དོན། ཐེངས་འདིར་༧གོང་ས་མཆོག་གིས་མགྲོན་འབོད་གནང་བ་ལྟར། ངྷ་རམ་ས་ལར་བཅར་ཏེ་མི་དམངས་ལ་ཐུག་འཕྲད་བྱ་རྒྱུའི་གོ་སྐབས་བྱུང་བར་ཧ་ཅང་དགའ་བོ་བྱུང་། ང་རང་ལོ་ ༢༠ རིང་སྐུ་ཞབས་ཇོར་རྗེ་མཆོག་དང་མཉམ་དུ་ལས་ཀ་བྱས་ཏེ། ཁོང་གིས་ད་བར་བོད་དོན་ཐོག་ཕྱག་ལས་མང་པོ་ཞིག་གནང་ཡོད་པ་དེར། བོད་མི་ཚོས་དགའ་ཞེན་ཅི་ཙམ་བྱེད་ཀྱིན་ཡོད་པ་དེ་རིང་གསལ་བོར་མཐོང་སོང་། 
མང་པོ་ཞིག་གིས་བོད་མི་འབོར་ཉུང་ཉུང་དང་སྲིད་འབྱོར་རིག་གསུམ་ཉམས་ཞན་ཡིན་སྟབས། རྒྱ་ནག་རྒྱལ་ཁབ་ཆེན་པོ་དང་མི་འབོར་མང་པོ། སྲིད་འབྱོར་རིག་གསུམ་འཛམ་གླིང་གི་མཐོ་སར་སླེབས་ཡོད་པ་ཞིག་ལ་ཁ་གཏད་གཅོག་ཐབས་མེད་པར་འདོད་ཀྱིན་ཡོད། འོན་ཀྱང་། ང་བསམ་ཚུལ་དེར་མོས་མཐུན་རྩ་བ་ནས་མེད།
ཨི་རྫི་རིལ་ལ་མཚོན་ན། སོ་སོའི་རྒྱལ་ཁབ་ཤོར་ཏེ་ལོ་ ༢༠༠༠ ལྷག་རིང་མི་སེར་ཡོངས་ཀྱིས་ཡུལ་གྱར་བའི་འཚོ་བ་རོལ་ཏེ། སོ་སོའི་རྒྱལ་ཁབ་ཀྱི་ས་ཆ་ལག་མཐིལ་ཙམ་ཡང་སྟོན་རྒྱུ་མེད་པའི་གནས་སུ་ལྷུང་མྱོང་ཡོད་ཀྱང་། སོ་སོའི་ཆོས་དང་རིག་གཞུང་། མི་རིགས་ལ་བདག་ཉར་ཡག་པོ་བྱས་པའི་ཉེར་ལེན་གྱིས་ད་ལྟ་རྒྱལ་ཁབ་བསྐྱར་འཛུགས་བྱས་ཡོད། འཛམ་གླིང་ནང་དེ་དང་དེ་ལྟ་བའི་གནས་ཚུལ་མང་པོ་ཡོད། ལྷག་པར་དུ་བོད་པ་ཐོག་མ་སྐྱབས་བཅོལ་དུ་འབྱོར་བའི་སྐབས་ཀྱི་འཐབ་རྩོད་དང་ད་ལྟའི་འཐབ་རྩོད་གཉིས་བསྡུར་བ་ཡིན་ན། ༧གོང་ས་ཏཱ་ལའི་བླ་མའི་སྐུ་དྲིན་དང་། བོད་མི་ཚོས་དཀའ་ལས་བརྒྱབས་པའི་གྲུབ་འབྲས་ཀྱིས་ད་ལྟ་འཐབ་རྩོད་ཀྱི་གནས་ཚད་མཐོན་པོར་སླེབས་ཡོད་ལ། འཛམ་གླིང་མི་དམངས་ཁྲི་ཕྲག་མང་པོ་བོད་པའི་བདེན་རྒྱབ་ཏུ་བཞེངས་ཡོད། ང་རང་ལ་མཚོན་ནའང་གནས་སྟངས་གང་འདྲར་འཕྲད་ཀྱང་། ད་དུང་མུ་མཐུད་དུ་བོད་དོན་ལ་ལས་ཀ་བྱ་རྒྱུའི་དམ་བཅའ་ཡོད། ཅེས་གསུངས་བྱུང་།
རྒྱ་གར་བདེ་སྲུང་བློན་ཆེན་ཟུར་བ་སྐུ་ཞབས་ཇོར་རྗེ་ཧྤར་ནན་ཌེ་སི་ George Fernandes མཆོག ད་ལྟ་དགོང་ལོ་ ༧༩ ཕེབས་ཡོད་སྟབས། ཁོང་གིས་ཐེངས་འདིར་གསུང་བཤད་གནང་ཐུབ་མ་སོང་མོད། ཁོང་གིས་མི་དམངས་དང་མཉམ་དུ་༼བདེན་པ་ལ་རྒྱལ་ཁ་ཐོབ་གི་རེད༽ཅེས་པའི་གླུ་དབྱངས་དེ་བླངས་སྟབས། སྤྱི་འཐུས་ཚོགས་གཞོན་རྒྱ་རི་སྒྲོལ་མ་དང་རང་བཙན་འཐབ་རྩོད་པ་ལྷ་བཟང་ཚེ་རིང་གཉིས་སྐུ་ཞབས་ཇོར་རྗེ་ཧྤར་ནན་ཌེ་སི་མཆོག་ལ་འཐམ་སྟེ་མིག་ཆུ་ཤོར།
དེ་ཚོ་དངོས་ནས་རེད། དེ་འདྲའི་སྐོར་ལ་མང་པོ་བཤད་ཐུབ་ན་ཧ་ཅང་གི་ཡག་པོ་རེད།
དེ་ཚོ་དངོས་ནས་ཡག་པོ་རེད། ཐུགས་རྗེ་ཆེ།
གྲོགས་པོ་ལགས།མིང་དོན་མཚུངས་འདུགའཇིགས་པ་མེད་པའི་ཁར་ཞུམ་པའང་མེད།ད་དུང་དུས་ཀྱི་འགྱུར་འགྲས་དང་མི་སྣ་སོ་སོ་ལ་རྒྱུས་མངའ་ཡོས་འདུག་པས་དབྱེ་ཞིབ་མང་ཙམ་མུ་འཐུད་བྱོས་སྤྱི་ཚོགས་གསལ་པོ་ཆགས་ཐུབ།དགའ་བསུ་དང་རེ་བ་ཡོད་དཱ།
ལྷ་བཟང་ཚེ་རིང་སེམས་ཁམས་ལ་སྐྱོན་ཡོད། རྒྱ་རི་སྒྲོལ་མ་སྡིངས་ཆའི་སྒང་ནས་གཏམ་བཤད་བྱེད་དུས་མི་ངུ་དུས་ཤིག་ཕལ་ཆེར་མེད།
ཁོ་གཉིས་ནས་མིག་ཆུ་བཏོན་པར་དེ་ཙམ་གྱི་ཧ་ལས་དགོས་པ་མེད། འོན་ཀྱང་ཁོང་གཉིས་ཀ་སེམས་ཤུགས་ཆེན་པོ་ཡོད་པ་བདེན། དེ་ལས། ྂ༼ད་ལྟ་བཙན་བྱོལ་བོད་མིའི་སྤྱི་ཚོགས་ནང་གཞོན་སྐྱེ་ཚོ་འཚར་ལོངས་བྱུང་སྟེ། ལས་དོན་མང་པོ་ཞིག་མི་རབས་གསར་བའི་ཕྲག་ཏུ་འབབ་ཀྱིན་ཡོད། ཁོང་ཚོར་རྒྱ་གར་རྩ་ཁྲིམས་ནང་འོས་ཤོག་ལྡུག་པའི་ཐོབ་ཐང་ལས་གཞན། རྒྱ་གར་ཡུལ་མི་དང་གཅིག་མཚུངས་ཀྱི་ཐོབ་ཐང་ཡོད། ལྷག་པར་དུ་སོ་སོའི་རང་དབང་འཐབ་རྩོད་ཆེད་དམིགས་བསལ་གྱི་ཐོབ་ཐང་ཡོད་སྟབས། ཐོབ་ཐང་དེ་དག་འཐུས་ཤོར་དུ་མ་འགྲོ་བ་དང་གདེང་ཚོད་ཡོད་པའི་ཐོག་ནས་ལེན་ཐུབ་པ་བྱ་དགོས།༽ ཞེས་བཤད་པ་འདིའི་ཚིག་སྣེ་ལ་འཇུས་ཏེ་བཙན་བྱོལ་བོད་མིར་ཐོབ་ཐང་ཁ ཤས་ཇི་བཞིན་རག་གི་མེད་སྐོར་སྐབས་དེར་བཤད་ཐུབ་ཡོད་ན་བཟང་མོད་ཀྱང་དེ་བྱུང་མི་འདུག
དེ་དེ་བཞིན་ནོ
སྐུ་ཞབས་ལྷ་བཟང་ཚེ་རིང་དང་ཚོགས་གཞོན་རྒྱ་རི་སྒྲོལ་མ་གཉིས་ཀྱིས་བྱེད་སྟངས་འདིས་ང་ལ་སེམས་འགུལ་དྲག་པོ་ཐེབས་བཅུག་སོང་། འུ་ཚང་གི་མི་ཆེན་གཉིས་རྒྱ་གར་སྤོ་ལགས་ཤིག་ལ་འཐམ་ནས་ཅིའི་ཕྱིར་མིག་ཆུ་ཤོར་པ་རེད། དེ་ང་ཚོས་བསམ་བློ་གཏིང་ཟབ་གཏོང་དགོས་ཀྱིན་འདུག ཁོ་གཉིས་སྒེར་དོན་ལ་ཅིག་མ་འགྲིག་པ་ཨེ་རེད་ཟེར་ན་རྩ་ནས་མ་རེད། ནམ་རྒྱུན་མི་མང་པོ་ཞིག་གིས་རྒྱུ་མཚན་ཡོད་མེད་ལ་མ་ལྟོས་པར་གཞུང་གི་སྲི་ཞུ་བ་ཚོ་ལ་ཁ་གཏོང་རྐྱང་གནང་གི་འདུག དེ་ནི་ཧ་ཅང་གི་ནོར་འཁྲུལ་ཚབ་ཆེན་ཞིག་རེད། ངས་འདི་ལྟར་བསམ་དུས་ཁོང་ཚོ་འཇོན་ན་མ་འཇོན་ན་བོད་སྤྱིའི་དོན་ལ་སེམས་ཁྲལ་ང་ཚོ་ལས་ལྡབ་འགྱུར་གྱིས་ཆེ་བ་མཚོན་ཐུབ་གི
།གོང་ཁྲན་ཏང་གིས་བོད་ཀྱི་རིགས་གཞུང་གཏོར་བཤིགས་དང༌།མི་ས་བཙན་པོས་འཕྲོག་སྐབས་ཆོས་བརྒྱུད་བཞི་ཡི་བླ་ཆེན་རྣམས་ཀྱི་གཙོས་བོད་མི་མི་ཉུང་བ་ཞིག་རྒྱ་གར་དུ་སྐྱབས་བཅོལ་དུ་ཕེབས་ནས་རྒྱ་གར་གཞུང་དམངས་གཉིས་ཀྱིས་རང་གི་བུ་ཚ་རང་ཁྱིམ་དུ་སླེབས་པ་ལྟ་བུས་གནས་ཚང་དང་མཐུན་རྐྱེན།རང་དབང་སོགས་རྒྱ་གར་རང་གི་ཡུལ་མི་དང་ཁྱད་པར་མེད་པའི་རོགས་སྐྱོར་འོག་རྒྱ་གར་ནང་ཁུལ་ཙམ་དུ་མ་ཟད།འཛམ་གླིང་རིལ་པོའི་ཐོག་ཏུ་རྒྱ་གར་གྱི་ནང་བསྟན་འདི་དར་སྤེལ་གཏོང་ཐུབ་པ་བྱུང་ཡོད། གཅིག་ལ་རོག་བྱས་ན་གཅིག་ཤོས་ལ་ཕན་ཐོག་ཆེན་པོ་ཡོང་བ་དེ་རྟེན་འབྲེལ་ལོས་ཡིན།
བོད། ཤ་ཁྲག་རུས་གསུམ་ལགས། ཁྱེད་ལ་ཐུགས་རྗེ་ཆེ་ཞུ། སྐུ་ཉིད་ཀྱི་བསམ་ཚུལ་དེ་དག་ནི་ག་དུས་ཡིན་ནའང་མཐུན་འགྱུར་དང་ཡ་རབས། གཞེན་སྐུལ། ཧུར་བརྩོན། ད་དུང་ལམ་སྟོན་བཅས་ཁྱད་ཆོས་ཕྱོགས་མང་པོ་ཞིག་ན་འདུག དྲ་མི་རྣམས་ཀྱིས་ཁྱེད་རང་དོན་དངོས་ཐོག་སུ་ཡིན་མིན་གྱི་སྐད་ཆའང་འདྲི་གིན་འདུག ངས་མི་ཤེས་ལབ་གི་ཡོད། གལ་སྲིད་ཤེས་ནའང་ཁྱེད་རང་གི་ཆོག་མཆན་དང་མོས་མཐུན་མེད་པར་ཕྱི་ལ་བསྒྲག་རྒྱུའི་ཐོབ་ཐང་དང་སྙིང་སྟོབས་དེ་ང་ལའང་མེད། ཐུགས་རྗེ་ཆེ། མུ་མཐུད་དུ་ཧུར་བརྩོན་གནང་རོགས།
དྲ་གྲོགས་ལྷན་རྒྱས་ལ་ཞུ་རྒྱུར། ངས་གཞི་ནས་དྲན་སོང་། ང་ཚོས་སྐུ་ཞབས་རྗོར་རྗུ་ཧྥར་ནན་ཌ་མཆོག་གི་སྐུ་ཚེའི་ལོ་རྒྱུས་ཞིག་མི་འགྱངས་པར་བོད་ཀྱི་དུས་བབ་དྲ་ཐོག་ལ་འགོད་གི་ཡིན། བོད་དོན་ཤེས་དགོས་ན་བོད་པ་ཙམ་མིན་པར་བོད་དོན་གྱི་ཕྱག་ལས་གནང་མཁན་སྐྱེས་ཆེན་དམ་པ་འདི་དག་གི་མཛད་པ་འཕྲིན་ལས་ཀྱང་བོད་མི་ཕྱི་རབས་པ་དག་གིས་ཤེས་དགོས་པ་རེད།
ལྷ་བཟང་ཚེ་རིང་ལགས་ཀྱིས་ངང་ཚུལ་འདིས་ངེད་ཅག་ལ་ཅི་ཞིག་སྟོན་བཞིན་ཡོད་པ་རེད། ཁོང་ལྟ་བུ་མང་བོ་ཞིག་ངེད་ཅག་བོད་པ་ཚང་ལ་ཡོད་མེད་ཐད་དུ་བསམ་་གཞིགས་བྱེད་མཁན་གྱི་མི་ཡང་ཉུང་ཚོད་དུ་གྱུར་ཡོད་དོན་གང་ལ་ཐུག་པ་རེད།
རྒྱ་གར་གྱི་མི་སྣ་གལ་ཆེན་འདི་དག་གིས་བདེན་པའི་རྒྱབ་སྐྱོར་གནང་བ་དེར་སྙིང་ཐག་པ་ནས་ཐུགས་རྗེ་ཆེ་ཞུ། གནས་ཚང་དྲིན་ཆེན་འདི་ཚང་གི་དྲིན་ལ་༧གོང་ས་མཆོག་གི་གཙོ་བའི་བོད་མི་ཁྲི་སྟོང་མང་བོ་ཞིག་རང་དབང་ས་ནས་རང་དབང་གི་འཐབ་རྩོད་བྱེད་རྒྱུའི་གོ་སྐབས་བྱུང་བར་ཁས་ལེན་བྱེད་དགོས།