ཞིན་ཅང་ཡུ་གུར་མི་རིགས་ཀྱི་ཞི་བའི་གྱེན་ལངས་ཆེན་མོ།

བོད་ཀྱི་ནུབ་བྱང་ཕྱོགས་སུ་གནས་ཤིང་མི་གྲངས་ས་ཡ་བརྒྱད་ ༨༠༠༠༠༠༠ ལྷག་ཡོད་པ། ད་ལྟ་རྒྱ་ནག་གི་བཙན་འོག་ཏུ་ཡོད་པའི་ཤར་ཏུར་ཀི་སི་ཐན་ནམ། ཞིན་ཅང་ཡུ་གུར་མི་རིགས་ཀྱི་རྒྱལ་ས་ཝུ་རུ་མུ་ཆི་གྲོང་ཁྱེར་ནང་། ཉེ་ཆར་ཡུ་གུར་བ་སྟོང་ཕྲག་མང་པོས་རྒྱ་གཞུང་ལ་ཞི་བའི་རྔམ་སྟོན་ཁྲོམ་སྐོར་གཞི་རྒྱ་ཆེན་པོ་ཞིག་སྤེལ་ཏེ། མི་བརྒྱ་ལྷག་རྐྱེན་ལམ་དུ་བཏང་ཡོད་པ་དང་། དེ་ལས་མང་བ་ཞིག་ལ་རྨས་སྐྱོན་ཕོག་ཡོད་འདུག  གནད་དོན་དེའི་ཐད་མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཙོས་པའི་འཛམ་གླིང་གི་དབུ་ཁྲིད་མང་པོ་ཞིག་གིས་སེམས་འཚབ་ཆེན་པོ་བྱེད་ཀྱིན་ཡོད།

ཟླ་འདིའི་ཚེས་ ༥ ཉིན་གྱི་ཕྱི་དྲོའི་པེ་ཅིན་གྱི་ཆུ་ཚོད་༧ ཡས་མས་སུ། ད་ལྟའི་རྒྱ་ནག་གི་མངའ་ཁུལ་ཞིན་ཅང་ཡུ་གུར་རིགས་རང་སྐྱོང་ལྗོངས་ཀྱི་རྒྱལ་ས་ཝུ་རུ་མུ་ཆི་ནང་། ཡུ་གུར་བ་བརྒྱ་ལྷག་གིས་ཞི་བའི་རྔམ་སྟོན་ཁྲོམ་སྐོར་ཞིག་བྱས་ཡོད་པ་དང་། སྐབས་དེར་རྒྱ་གཞུང་གི་ཉེན་རྟོག་པ་དང་དམག་མི་འབོར་ཆེན་ཡོང་སྟེ། གང་བྱུང་དུ་མེ་མདའ་རྒྱག་པ་དང་དུག་རླངས་གཏོར་བ་སོགས་དྲག་ཆས་བེད་སྤྱོད་བཏང་སྟེ། ཞི་རྒོལ་དེ་དྲག་པོའི་ངོ་བོར་བསྒྱུར་ཐབས་བྱས་ཡོད་སྟབས། ཡུ་གུར་བ་རྣམས་ཁོང་ཁྲོ་ཆེན་པོ་ལངས་ཏེ། ཕྱོགས་སོ་སོ་ནས་ཡུ་གུར་བ་ཆིག་ཁྲིར་ཉེ་བ་འདུ་འཛོམས་ཀྱིས་གཞུང་གི་ལས་ཁུངས་དང་རླངས་འཁོར། ཚོང་ཁང་དང་ཟ་ཁང་། སྤྱི་དམངས་ཀྱི་སྡོད་ཤག་བཅས་ལ་གཏོར་བཅོམ་དང་མེར་བསྲེག་ཚབས་ཆེན་བཏང་ཡོད་འདུག ཐེངས་འདིར་ཞིན་ཅང་ནང་དོན་རྐྱེན་བྱུང་རྗེས་ཕྱི་རྒྱལ་གྱི་གསར་འགོད་པ་ཚོར་དེ་ཙམ་བཀག་འགོག་བྱས་མེད་ཀྱང་། ཉིན་འདི་འགར་ཞིན་ཅང་ས་ཁུལ་གྱི་གློག་ཀླད་དང་ཁ་པར་སོགས་བརྡ་འཕྲིན་བརྒྱུད་ལམ་ཡོངས་བཀག་སྡོམ་བྱས་ཡོད་པ་མ་ཟད། གྲོང་ཁྱེར་དང་ས་ཚིགས་སོ་སོར་དམག་མི་མང་པོ་འགྲེམས་འཇོག་གིས་དམ་དྲག་ཤུགས་ཆེན་བྱེད་ཀྱིན་ཡོད་འདུག

རྒྱལ་སྤྱིའི་གསར་ལམ་ཁག་ནས་བསྒྲགས་པ་ལྟར་ན། ཉིན་དེར་ཡུ་གུར་བ་དང་དམག་མི་གདོང་ཐུག་གི་དོན་རྐྱེན་ཁྲོད། མི་ ༡༥༦ རྐྱེན་ལམ་དུ་ཕྱིན་ཡོད་པ་དང་། མི་ ༡༠༠༠ ལྷག་ལ་རྨས་སྐྱོན་ཕོག་པ། དོགས་ཡོད་ཉེས་ཅན་ ༡༤༠༠ ཙམ་འཛིན་བཟུང་བྱས་ཡོད་ཚུལ་བཀོད་འདུག ཕྱི་ཕྱོགས་ཀྱི་ཡུ་གུར་བ་ཚོས་བརྗོད་པ་ལྟར་ན། ཐེངས་འདིའི་དོན་རྐྱེན་ཁྲོད་ཉུང་མཐར་མི་ ༦༠༠ ལྷག་འདས་གྲོངས་སུ་ཕྱིན་ཡོད་པ་དང་། རྨས་སྐྱོན་ཕོག་པ་དང་བོར་བརླག་ཏུ་སོང་བ་ ༢༠༠༠ ལས་བརྒལ་ཡོད་ཚུལ་བརྗོད་འདུག ཕྱི་ཚེས་ ༦ ཉིན་ཡུ་གུར་རིགས་རང་སྐྱོང་ལྗོངས་ཏང་ཨུ་ཧྲུའུ་ཅི་དང་། དམངས་ཆེན་སྤྱི་དཔོན་གཞོན་པས་གསར་འགོད་ལྷན་ཚོགས་སྟེང་བརྗོད་དོན། ཐེངས་འདིའི་དོན་རྐྱེན་ཁྲོད་མི ༡༤༠ རྐྱེན་ལམ་དུ་ཕྱིན་པ་དང་། གཞན་མི་ ༨༢༨ ཙམ་ལ་རྨས་སྐྱོན་ཕོག་པ། རླངས་འཁོར་ ༢༦༡ མེར་བསྲེགས་བཏང་ཡོད་པ་དང་། ཚོང་ཁང་ ༢༠༣ དང་། སྤྱི་དམངས་ཀྱི་སྡོད་ཤག་ ༡༤  ལ་གཏོར་བཅོམ་བཏང་ཡོད་ཚུལ་བརྗོད་འདུག

ད་ལྟ་ཕྱིའི་མཐོང་སྣང་ལ་ཟིང་འཁྲུག་ཞོད་འཇགས་ཀྱི་རྣམ་པ་ལྟ་བུར་སྣང་ཡང་། ནང་ཁུལ་གྱི་གནས་སྟངས་ཧ་ཅང་ཛ་དྲག་གི་ངོ་བོར་གྱུར་ཏེ། ཡུ་གུར་གྱི་རྒྱལ་ས་ཝུ་རུ་མུ་ཆི་ Urumchi དང་། ཧོ་ཁྲོན་ Hotan གཉིས་ནང་མཚམས་མ་ཆད་པར་ངོ་རྒོལ་གྱི་དོན་རྐྱེན་འབྱུང་གིན་ཡོད་པ་མ་ཟད། ཡུ་གུར་བ་དང་ཧན་མི་རིགས་གཉིས་བར་གྱི་རྙོག་དྲ་ལྟ་བུར་གྱུར་ཏེ། རྒྱ་རིགས་མང་པོས་མཚོན་ཆ་བཟུང་སྟེ་ཡུ་གུར་བར་འཇིགས་སྐུལ་བྱེད་ཀྱིན་ཡོད་འདུག ཡུ་གུར་བ་ཚོས་ཁ་ཆེ་ལྷ་ཁང་དག་ཏུ་འཛོམས་ཏེ། ངོ་རྒོལ་གྱི་འཆར་འགོད་བྱེད་ཀྱིན་ཡོད་པའི་རྟོག་གཞིའི་འོག རྒྱ་གཞུང་གིས་ཁ་ཆེ་ལྷ་ཁང་ཁག་བཀག་སྡོམ་བྱ་མགོ་བརྩམས་ཡོད་པ་མ་ཟད། ཝུ་རུ་མུ་ཆུ་ནང་གི་ཁ་ཆེ་ལྷ་ཁང་ཆེ་ཤོས་དེ་སྒོ་བརྒྱབས་ཡོད་འདུག ཕྱི་ཚེས་ ༥ ཉིན་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཨི་ཊ་ལིའི་འབྱོར་ལྡན་རྒྱལ་ཁབ་བརྒྱད་ཀྱི་ཚོགས་འདུ་ ( G8 Summit ) ཞེས་པར་མཉམ་ཞུགས་ཆེད། ཨི་ཊ་ལིའི་རྒྱལ་ས་རོམ་དུ་འབྱོར་ཡོད་ཀྱང་། ཕྱི་ཚེས་ ༨ ཉིན་ཛ་དྲག་ཐོག་ཚོགས་འདུ་ལས་ཕྱིར་འཐེན་ཀྱིས་པེ་ཅིན་དུ་ལོག་སྟེ། ཁོ་རང་གིས་དངོས་སུ་ཡུ་གུར་གྱི་གནད་དོན་ཐད་བཀོད་འདོམ་བྱེད་ཀྱིན་ཡོད་འདུག

ཐེངས་འདིའི་ཡུ་གུར་གྱི་དོན་རྐྱེན་ཐད། རྒྱལ་སྤྱིའི་སྲིད་དོན་དབྱེ་ཞིབ་པ་དང་ཕྱི་སྡོད་ཡུ་གུར་བ་ཚོས་བརྗོད་པ་ལྟར་ན། འདས་པའི་ལོ་མང་རིང་རྒྱ་གཞུང་གིས་ཡུ་གུར་མི་རིགས་ལ་གཉའ་གནོན་དང་བརྙས་བཅོས། ཆོས་ལུགས་རིག་གཞུང་ལ་བརྩི་བཀུར་མ་བྱས་པ། གནད་དོན་ཆེ་ཕྲ་ཀུན་ལ་ཁྲིམས་ཐོག་ནས་ཞིབ་བཤེར་མེད་པར། ཁ་བྲལ་བ་དང་འཇིགས་སྐུལ་བ། ངོ་ལོག་པ་བཅས་ཀྱི་ཉེས་འཛུགས་འོག་དྲང་བདེན་མིན་པའི་ཐག་གཅོད་བྱས་པ། ལྷག་པར་དུ་ད་ལོའི་ཟླ་ ༦ ཚེས་ ༢༦ ཉིན་རྒྱ་ནག་ཀུང་ཏུང་གྲོང་ཁྱེར་གྱི་བཟོ་གྲྭ་ཞིག་ནས་ཡུ་གུར་བ་གཉིས་ཀྱིས་རྒྱ་རིགས་བུད་མེད་ཅིག་ལ་བཙན་གཡེམ་བྱས་པའི་ཉེས་འཛུགས་འོག ཡུ་གུར་བ་དང་རྒྱ་རིགས་བར་འཁྲུག་འཛིང་གི་དོན་རྐྱེན་བྱུང་སྟེ་ཡུ་གུར་བ་ ༢ འཆི་སྐྱོན་དང་། ཡུ་གུར་བ་ ༡༡༨ ཙམ་རྨས་སྐྱོན་ཕོག་ཡོད། གནད་དོན་དེར་ཁག་བཞག་སྟེ་རྒྱ་ནག་གྲོང་ཁྱེར་ཆེ་གྲས་ཀྱི་བཟོ་གྲྭ་ཁག་ནས་ཡུ་གུར་བ་རྣམས་ཕྱིར་ཕུད་གཏོང་བ་སོགས་མི་རིགས་དབྱེ་འབྱེད་བྱས་པ་སོགས། ཐེངས་འདིར་ཡུན་རིང་གི་འཁོན་སེམས་མཐའ་དག་ཕྱིར་མངོན་པ་ཡིན་ཚུལ་བརྗོད་འདུག 

རྒྱ་ནག་གཞུང་ཕྱོགས་ནས་བརྗོད་པ་ལྟར་ན། ཐེངས་འདིའི་དོན་རྐྱེན་དེ་ནི་ནང་ཁུལ་གྱི་ཁ་བྲལ་བ་ཉུང་ཤས་ཤིག་དང་ཕྱི་ཕྱོགས་ཀྱི་འཇིགས་སྐུལ་བ་ལག་འབྲེལ་བྱས་པ་ཞིག་ཡིན་ཞིང་། ལྷག་པར་དུ་ཕྱི་སྡོད་ཡུ་གུར་བ་རེ་བྷེ་ཡ་ཁ་ཌེར་ Rebiya Kadeer  ཟེར་བ་དེས་མགོ་འཛིན་བྱས་པའི ” འཛམ་གླིང་ཡུ་གུར་མི་རིགས་འཐུས་མི་ལྷན་ཚོགས། ” ཟེར་བ་དེས། དྲ་རྒྱ་སོགས་བརྒྱུད་ལམ་ཁག་བེད་སྤྱད་དེ། ” སྙིང་སྟོབས་བསྐྱེད་རོགས ” དང་།  ” བྱ་བ་ཆེན་པོ་བསྒྲུབ་དགོས ” ཟེར་བ་སོགས་ཀྱི་འཆལ་གཏམ་འུར་སྒྲོག་སྣ་ཚོགས་བྱས་ཏེ། དོན་རྐྱེན་དེ་བསླངས་པ་ཡིན་ཚུལ་བརྗོད་འདུག ཕྱི་ཚེས་ ༨ ཉིན་ཝུ་རུ་མི་ཆི་གྲོང་ཁྱེར་ཏང་ཨུའི་ཧྲུའུ་ཅི་ལིས་ཀྲི་ཡིས་བརྗོད་དོན། བདུན་པའི་ཚེས་ལྔ་ཉིན་གྱི་རྡུང་གཅོག་འཕྲོག་བསྲེག་ཁྲོད་ཀྱི་དོགས་ཡོད་ཉེས་ཅན་མང་པོ་འཛིན་བཟུང་བྱས་ཏེ། ད་ལྟ་འདྲི་གཅོད་བྱེད་བཞིན་པའི་སྒང་ཡིན། དོན་རྐྱེན་རྗེས་ཀྱི་གནད་དོན་རྣམས་གོ་རིམ་ཡོད་པའི་ཐོག་ནས་བསྒྲུབ་རྒྱུ་ཡིན། ཅེས་དང་། ཨོ་ལོ་མོའུ་ཆུའི་གྲོང་ཁྱེར་སྤྱི་ཁྱབ་པ་ཨར་ལཱ་དབྱི་ཧྲ་མུའུ་ཏིན་གྱིས་བརྗོད་དོན། གྲོང་ཁྱེར་སྲིད་གཞུང་གིས་རྨས་མ་ ༡༠༠༠ ལྷག་ལྟ་སྐོར་བྱ་རྒྱུ་ཡིན། དེ་མིན། གྲོང་ཁྱེར་གྱི་འགྲིམ་འགྲུལ་དང་མང་ཚོགས་ཀྱི་འཚོ་བ་བསྐྱར་གསོ་བྱུང་ཡོད། རགས་རྩིས་བྱས་ན། ཐེངས་འདིའི་དོན་རྐྱེན་ཐད་སྒོར་དུང་ཕྱུར་གཅིག་ཙམ་གྱི་འགྲོ་གྲོན་འདུག ཅེས་བརྗོད་འདུག ཡུ་གུར་གྱི་དོན་རྐྱེན་དེར་རྒྱ་ནག་གཞུང་ཕྱོགས་ནས། ༼ ཞིན་ཅང་གི་ ༧ . ༥ རྡུང་གཅོག་འཕྲོག་བསྲེག་གི་དོན་རྐྱེན༽ ཞེས་སྐྱོན་བརྗོད་བྱས་ཡོད།

མཉམ་འབྲེལ་རྒྱལ་ཚོགས་ནས་རྒྱ་གཞུང་ལ། ཚེ་སྲོག་ལ་རིན་ཐང་བརྩི་དགོས་སྐོར་བརྗོད་ཡོད་ལ། ཡུ་རོབ་མཐུན་ཚོགས། ཨ་རིའི་སྲིད་འཛིན་ལས་ཁུངས། དབྱིན་གཞུང་བཅས་ནས་ཐེངས་འདིའི་དོན་རྐྱེན་ཁྲོད་འདས་གྲོངས་སུ་སོང་བ་དང་། བཙོན་འཇུག་བྱས་རིགས་ལ་སེམས་འཚབ་ཡོད་པ་དང་། འབྱུང་འགྱུར་ཕྱོགས་གཉིས་ཀས་བཟོད་བསྲན་བྱ་དགོས་པའི་འབོད་སྐུལ་ཞུས་འདུག ཕྱི་ཚེས་ ༨ ཉིན་ཨ་རིའི་ཕྱི་འབྲེལ་དྲུང་ཆེ་ཧི་ལེ་རེའུ་ཁི་ལེན་ཊོན་གྱིས་བསྐྱར་དུ། རྒྱ་ནག་ནང་འབྱུང་བཞིན་པའི་ཟིང་འཁྲུག་དེ་གང་མགྱོགས་ཞི་འཇགས་ཡོང་དགོས་པའི་རེ་འདུན་བཏོན་འདུག དེ་བཞིན། ཕྱི་ཚེས་ ༨ ཉིན་བོད་མིའི་དབུ་ཁྲིད་སྤྱི་ནོར་༧གོང་ས་ཆེན་པོ་མཆོག་ནས་ཀྱང་། ཐུགས་འཚབ་ཀྱི་གསུང་འཕྲིན་ཞིག་བསྩལ་ཡོད་པའི་ནང་། ཤར་ཏུར་ཀི་སི་ཐན་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དང་། ལྷག་པར་དུ་ཚེ་སྲོག་གི་ཆག་སྒོ་འབྱུང་བཞིན་པའི་ཐད་ངོས་རང་བློ་འཚབ་དང་སེམས་སྐྱོ་བོ་བྱུང་། ངོས་ནས་རྒྱ་ནག་གཞུང་གི་དཔོན་རིགས་ཚོར་གནད་དོན་འདི་ཞི་འཇམ་དུ་གཏོང་བར་གོ་རྟོགས་དང་མིག་རྒྱང་ཡོད་པའི་ཐབས་ལམ་བེད་སྤྱོད་གཏོང་རྒྱུའི་རེ་སྐུལ་ཞུ་གིན་ཡོད། ངོས་ནས་དོན་རྐྱེན་འདིའི་ཁྲོད་རྐྱེན་འདས་སུ་སོང་བ་རྣམས་དང་ཁོང་ཚོའི་ཤུལ་ལུས་ནང་མི་དང་། འབྲེལ་ཡོད་མི་སྣ་ཚང་མར་སྨོན་ལམ་འདེབས་ཀྱིན་ཡོད། ཅེས་བཀོད་འདུག

ཡང་འཛམ་གླིང་ཡུ་གུར་མི་རིགས་འཐུས་མི་ལྷན་ཚོགས་ཀྱིས་འཛམ་གླིང་ཡོངས་སུ་རྔམ་སྟོན་ཁྲོམ་སྐོར་གཞི་རྒྱ་ཆེན་པོ་ཞིག་བྱ་རྒྱུ་ཡིན་ཚུལ་བསྒྲགས་འདུག་ལ། སོའུ་ཌན་དུ་ཡོད་པའི་འཛམ་གླིང་ཡུ་གུར་ལྷན་ཚོགས་ཀྱི་མགྲིན་ཚབ་པ་མདོ་ཁཱན་ཨེ་སཱ་ཡིས་ཐེངས་འདིར་མི་ཤི་རྨས་ཀྱི་གྲངས་འབོར་དེ་རྒྱ་ནག་གཞུང་ཕྱོགས་ནས་གསལ་བསྒྲགས་བྱས་པ་ལས་རིང་དུ་བརྒལ་ཡོད་པ་དང་། དེ་དག་མང་ཆེ་བ་ཡུ་གུར་བ་ཡིན་ཚུལ། རྒྱ་གཞུང་གིས་དམག་ལ་གྱོན་མེད་པའི་དམག་མི་བཀྲམ་སྟེ། ཡུ་གུར་བའི་ཞི་རྒོལ་དྲག་པོའི་ངོ་བོར་བསྒྱུར་ཐབས་བྱས་ཡོད་ཚུལ་བཤད། དེ་བཞིན། ཨ་རིའི་ནེའུ་ཡོག་ནང་རྟེན་གཞི་བྱས་པའི་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པས་གསལ་བསྒྲགས་སྤེལ་བའི་ནང་། ཞིན་ཅང་གི་དོན་རྐྱེན་ཁྲོད་འཛིན་བཟུང་བྱས་རིགས་ལ་རྒྱ་གཞུང་གིས་ཚད་ལས་བརྒལ་བའི་མནར་གཅོད་གཏོང་རྒྱུར་སེམས་འཚབ་ཡོད་པ་དང་། རྒྱ་གཞུང་གིས་དྲང་བདེན་གྱི་ཁྲིམས་བཤེར་ཐག་གཅོད་བྱ་དགོས་སྐོར་བཀོད་འདུག  རྗེ་ཌི་ནང་ཡོད་པའི་ཁ་ཆེ་རྒྱལ་ཁབ་ ༥༧ ལས་གྲུབ་པའི་རྩ་འཛུགས་ཀྱི་གསལ་བསྒྲགས་ནང་། ཡུ་གུར་གྱི་མང་ཚོགས་འབོར་ཆེན་ཞིག་གི་ཚེ་སྲོག་ཤོར་ཡོད་པ་དེ་ནི་རྒྱ་གཞུང་གིས་ཡུ་གུར་གྱི་གནད་དོན་ལ་སྣང་མེད་དང་དྲག་གནོན་བྱས་པ་མཚོན་ཞིང་། ཐེངས་འདིར་ཡུ་གུར་དང་རྒྱ་རིགས་གཉིས་བར་བྱུང་བའི་དོན་རྐྱེན་གྱི་རྒྱུ་རྐྱེན་གསལ་བཤད་དགོས་སྐོར་བརྗོད་ཡོད།

ཕྱི་ཚེས་ ༦ ཉིན་ཡུ་གུར་མི་རིགས་ཀྱི་ཐོབ་ཐང་བརྩོན་ལེན་པ་གྲགས་ཆེན་དང། སྔར་འཛམ་གླིང་ཞི་བདེ་གཟེངས་རྟགས་ཀྱི་འོས་མིར་བདམས་མྱོང་མཁན། ལྕམ་རེ་བྷེ་ཡ་ Rebiya ལགས་ཀྱིས་ཨ་རིའི་རྒྱལ་ས་ཝ་ཤིན་ཊོན་ནས་རྒྱལ་སྤྱིའི་གསར་འགོད་ལྷན་ཚོགས་བསྐངས་ཏེ། དེ་རིང་ནི་ཡུ་གུར་བའི་ཆེས་མུན་ནག་གི་ཉིན་མོ་ཞིག་ཡིན། རྒྱ་ནག་གི་ཉེན་རྟོག་པ་དང་དམག་མིས་ཡུ་གུར་ཞི་རྒོལ་བའི་ཐོག་ལ་མེ་མདའ་སོགས་དྲག་ཆས་བེད་སྤྱོད་བཏང་སྟེ། མི་བརྒྱ་ཕྲག་མང་པོ་རྐྱེན་ལམ་དུ་བཏང་འདུག་ལ། དེ་བས་མང་བར་རྨས་སྐྱོན་ཕོག་འདུག ད་ལྟ་ཉེན་རྟོག་པ་དང་དམག་མི་འགྲེམས་འཇོག་གིས་གནས་སྟངས་ཧ་ཅང་ཛ་དྲག་རེད། ཨ་རིའི་ཡུ་གུར་ལྷན་ཚོགས་ UAA དང་། རྒྱལ་སྤྱིའི་ཡུ་གུར་ཚོགས་པ་ WUC ཐུན་མོང་གིས་ཞིན་ཅང་ཨོ་ལོ་མོའུ་ཆུ་ Urumchi དང་། ཀཱ་ཤི་གྷར་ Kashgar བཅས་ཀྱི་ཞི་རྒོལ་ཁྲོད་རྐྱེན་ལམ་དུ་སོང་བ་རྣམས་ལ་གདུང་སེམས་མཉམ་སྐྱེད་དང་། རྒྱ་གཞུང་གིས་མི་སྤྱོད་ལས་འདས་པའི་དྲག་གནོན་བྱས་པར་ཁ་རྡུང་གཏོང་གིན་ཡོད། རྒྱལ་སྤྱིའི་སྤྱི་ཚོགས་ནས། གང་མགྱོགས་ཤར་ཏུར་ཀི་སི་ཐན་གྱི་མི་དམངས་ལ་ཞི་བདེ་ལྷིང་འཇགས་བསྐྲུན་རྒྱུ་ཁག་ཐེག་དང་། ཤི་རྨས་དང་བཙོན་འཇུག་བྱས་པའི་གྲངས་འབོར་གསལ་བཤད། དེ་བཞིན། ཉེས་མེད་བཙོན་འཇུག་བྱས་རིགས་གང་མགྱོགས་གློད་གྲོལ་ཡོང་རྒྱུར་རྒྱབ་རོགས་བྱ་དགོས།  

རྒྱ་གཞུང་གིས་ཐེངས་འདིའི་དོན་རྐྱེན་དྲག་པོའི་ངོ་བོར་བསྒྱུར་ཐབས་བྱས་ཡོད་ཀྱང་། ང་ཚོའི་ངོས་ནས་དེ་ནི་ཞི་བ་ཁོ་ནའི་ལས་འགུལ་ཞིག་ལ་ངོས་འཛིན་བྱེད་ཀྱིན་ཡོད། དོན་རྐྱེན་གྱི་འབྱུང་རྩ་གཙོ་བོ། ཟླ་སྔོན་མའི་ཚེས་ ༢༦ ཉིན་རྒྱ་ནག་ཀུང་ཏོན་གྲོང་ཁྱེར་ནང་། ཡུ་གུར་དང་རྒྱ་རིགས་འཁྲུག་འཛིང་གི་དོན་རྐྱེན་ལ། རྒྱ་གཞུང་གིས་དྲང་བདེན་གྱི་ཐག་གཅོད་མི་བྱེད་པར་མི་རིགས་དབྱེ་འབྱེད་བྱས་པ། ལྷག་པར་དུ་ཐེངས་འདིར་དོན་རྐྱེན་ཐོག་མ་བྱུང་སྐབས་ཡ་ལན་ཡག་པོ་སྤྲད་མེད་པ་བཅས་ལ་བརྟེན་ཏེ་ཛ་དྲག་གི་ངོ་བོར་གྱུར་བ་རེད། རྒྱ་ནག་གཞུང་ཕྱོགས་ནས་ཐེངས་འདིར་ཤི་བ་དང་རྨས་པའི་གྲངས་ཐོ་ཕྱིར་བསྒྲགས་བྱས་པའི་རྒྱབ་ལོགས་སུ་ད་དུང་གནས་ཚུལ་མང་པོ་ལྷག་ཡོད་པའི་སེམས་འཚབ་ཡོད། འདས་པའི་ལོ་མང་རིང་རྒྱ་ནག་གི་བཙན་གནོན་འོག་ཏུ་ཤར་ཏུར་ཀི་སི་ཐན་གྱི་སྐད་ཡིག་རིག་གཞུང་རྩ་གཏོར་དང་། མི་རིགས་ལ་གཉའ་གནོན་དང་མཐོང་ཆུང་ཁྱད་གསོད། དོན་མེད་བཙོན་འཇུག་ཚད་ལས་འདས་པ་བྱས་ཡོད་སྟབས་ཐེངས་འདིར་སེམས་ཀྱི་ན་ཟུག་ཕྱིར་མངོན་པ་རེད།

རྒྱ་གཞུང་གིས་འདས་པའི་ལོ་མང་རིང་ཡུ་གུར་བ་དང་བོད་པ། རྒྱ་རིགས་མི་དམངས་བཅས་ཀྱི་ཐོག་དྲག་གནོན་དང་གཅིག་བསྡུད་རིང་ལུགས་ཀྱི་སྲིད་བྱུས་དེ་ལ་ངེས་པར་དུ་འགྱུར་བ་གཏོང་དགོས་པ་མ་ཟད། ལྷག་བསམ་རྣམ་དག་ཁྲིམས་དང་ལྡན་པའི་ཐོག་ནས་མི་དམངས་ཀྱི་དཀའ་སྡུག་ཐག་གཅོད་མ་བྱས་ཚེ། དུས་ནམ་ཡང་ཞི་བདེ་ཡོང་ཐབས་མེད། རྒྱ་གཞུང་གིས་ཐེངས་འདིའི་དོན་རྐྱེན་ང་དང་འབྲེལ་བ་ཡོད་ཚུལ་དང་། ཕྱི་ལོགས་ནས་བརྒྱུད་སྐུལ་བྱས་ཡོད་ཚུལ་གྱི་སྐྱོན་བརྗོད་བྱེད་པ་དེ་ནི་ཁུངས་ལུང་མེད་པ་ཞིག་རེད།  ཉེ་ཆར་ངའི་བུ་མོས་གློག་ཀླད་བརྒྱུད་ཕྱི་ཚེས་ ༤ ཉིན་ཡུ་གུར་བས་ཞི་རྒོལ་བྱ་འཆར་ཡོད་པ་ཤེས་ཏེ། ང་ལ་བརྗོད་བྱུང་། སྐབས་དེར་ངས་ཁྱིམ་ལ་ཁ་པར་བཏང་སྟེ་ང་རང་གི་ཕུ་བོར། རེས་གཟའ་ཉི་མའི་ཉིན་ཕྱི་རོལ་དུ་མ་འགྲོ། ནང་མི་ཚོ་དང་མཉམ་དུ་ཁྱིམ་ནས་སྡོད། ཅེས་བཤད་པ་ཡིན། དེ་ནི་ངས་ཟླ་འགའི་རིང་ཁྱིམ་ལ་འབྲེལ་བ་བྱས་པ་དང་པོ་དེ་ཡིན། ཞེས་བརྗོད་འདུག