སློབ་ཕྲུག་གཉིས་ལ་མནར་གཅོད།

ཕྱི་ཚེས་ ༡༥ ཉིན་རྒྱ་ཡིག་གི་དྲ་རྒྱ་ཞིག་ཏུ་གནས་ཚུལ་སྤེལ་གསལ་ལྟར་ན། ཕ་ཡུལ་ཡུན་ནན་ཞིང་ཆེན་གྱི་མངའ་ཁོངས་བདེ་ཆེན་ནས་ཡིན་པའི་མདའ་དགའ་དང་ཚུལ་ཁྲིམས་གཉིས་རྒྱ་གར་དུ་འབྱོར་ནས་བཙན་བྱོལ་བོད་གཞུང་གི་སློབ་གྲྭའི་ནང་དུ་སློབ་སྦྱོང་བྱས་ཏེ་ལོ་འདིའི་ཕྱི་ཟླ་ ༢ པའི་ནང་བོད་དུ་ཕྱིར་ལོག་བྱས་ཡོད་ཀྱང༌། རྒྱ་མིའི་མཐའ་མཚམས་སྐོར་སྲུང་བས་རྒྱ་ནག་གཞུང་ཕྱོགས་ནས་བོད་མི་གཞོན་སྐྱེས་ཚོ་མཐའ་མཚམས་ཕར་བརྒལ་བྱེད་མི་ཆོག་པའི་བཀག་སྡོམ་བྱས་ཡོད་ཚུལ་བརྗོད་ནས། ལམ་འགྲུལ་ཡིག་ཆ་ལ་དང་ལེན་མ་བྱས་པས། ཁོང་གཉིས་བལ་ཡུལ་དུ་ཕྱིར་ལོག་བྱེད་དགོས་བྱུང་བ་དང༌། ཕྱི་ཟླ་ ༤ པའི་ནང་སླར་ཡང་འགྲུལ་བསྐྱོད་བྱེད་དུས་རྒྱ་མིའི་མཐའ་མཚམས་སྐོར་སྲུང་བས་ལམ་འགྲུལ་ཡིག་ཆ་དུས་ཡུན་རྫོགས་པར་ཁ་གཡར་ནས་བཙན་བཟུང་གིས་གཞིས་རྩེ་རྫོང་གི་བཙོན་ཁང་དུ་བཀག་ཉར་བྱས། དེའི་རིང་ཁོང་གཉིས་པོར་འདྲི་རྩད་འདྲ་མིན་བྱས་པ་དང༌། མཚོན་ཆ་འདྲ་མིན་བེད་སྤྱོད་ཀྱིས་སྡུག་སྦྱོང་ཚད་མེད་བཏང་པས་རྐྱེན་གྱིས་ཁོང་གཉིས་པོའི་ལྟོ་སྣོད་དང་མཚན་མར་གནོད་སྐྱོན་ཚབས་ཆེན་འཕོག་ཡོད་འདུག ཁོང་གཉིས་ཕྱིར་ལོག་མ་བྱས་གོང་རང་གི་ནང་མི་སྤུན་ཉེར་ཁ་པར་བརྒྱབས་པར་བརྟེན་ནས། ནང་མི་ཚོས་ཁོང་གཉིས་པོ་བརྩད་གཅོད་ཀྱིས་མཐར་གཞིས་རྩེར་བཀག་ཉར་བྱས་ཡོད་པ་ཤེས་འཕྲལ། མདའ་དགའི་ནང་མི་ཚོས་ཁོ་པ་གློད་གྲོལ་ཐུབ་པ་བྱུང་བ་དང༌། ཚུལ་ཁྲིམས་ཀྱི་ནང་མི་ཚོས་ཁོ་པ་གློད་གྲོལ་གྱི་ཕྱིར་གཞིས་རྩེར་ཡོང་ཡོད་འདུག མདའ་དགའ་ནི་ད་ལྟའི་ཆར་ཡུན་ནན་ཞིང་ཆེན་གྱི་ཀུན་མིན་ཞེས་པའི་ས་གནས་སྨན་ཁང་དུ་སྨན་བཅོས་བྱེད་བཞིན་ཡོད་པ་དང༌། དྲ་རྒྱ་ཁག་ལས་བཤད་ཚུལ་ལྟར་ན། ཁོང་གཉིས་ཙམ་མིན་པའི་བོད་མི་ཕྱིར་ལོག་པ་དང༌། རྒྱ་གར་དུ་བསྐྱོད་མཁན་མང་པོ་ཞིག་འཇུ་བཟུང་བྱས་ཏེ་བཀག་ཉར་བྱས་ཡོད་ཚུལ་བཤད་འདུག